Yohanes 6

₁Baka dati Yesus go na a tra sei fu a Meer fu Galilea, di den e kari a Meer fu Tiberias tu. ₂Wan bigi grupu sma ben e waka na En baka bika den ben si den marki di A ben du gi den sikisma. ₃Dan Yesus kren go sidon tapu wan bergi nanga den man di ben e teki leri fu En. ₄Now a ben de so taki a Paskafesa fu den Dyusma ben de krosbei.

₅Di Yesus luku lontu, A si taki wan heri ipi sma e kon na En. Dan A aksi Filipus taki: “Pe wi o bai brede fu den sma disi kan nyan?” ₆Yesus taki so fu yere san Filipus ben o taki, bika A ben sabi kba san A ben wani du. ₇Filipus piki En taki: “Tu hondro solfrumoni no ben o sari ete fu gi ala den sma disi wan pikin pisi brede.” ₈Dan Andreas, wan fu den man di ben e teki leri fu Yesus, di ben de a brada fu Simon Petrus, taigi En taki: ₉“Wan boi de dya di abi feifi brede nanga tu fisi. Ma dati no sari gi someni sma.” ₁₀Furu grasi ben de na a presi drape. Dan Yesus taki: “Meki den sma go sidon.” Ne den sma saka sidon. Wan feifi dusun mansma so ben de ini a grupu. ₁₁Dan Yesus teki den brede, A taki Gado tangi, dan A prati den gi den sma di ben e sidon drape. A du a srefi sani nanga den fisi tu. Ala den sma ben kisi someni leki den wani. ₁₂Di den sma nyan te den bere furu, Yesus taigi den man di ben e teki leri fu En taki: “Piki ala den pis'pisi san libi ete, fu noti no lasi.” ₁₃So den piki den pis'pisi di ben libi ete fu den feifi brede baka di den sma nyan, èn den furu twarfu baskita. ₁₄Di den sma si a marki san Yesus du, den taki: “Fu tru, disi na a Profeiti di ben o kon na grontapu.” ₁₅Yesus si taki den ben wani kon teki En nanga tranga fu poti En leki kownu, so A gwe libi den. A go baka na a bergi presi pe En wawan ben kan de.

₁₆Di neti tapu den man di ben e teki leri fu Yesus saka go na a meer. ₁₇Den go ini wan boto, dan den bigin koti abra go na Kafarnaum. A ben dungru kba èn Yesus no ben drai kon baka na den ete. ₁₈Dan wan hebi winti bigin wai èn den skwala kon hei. ₁₉Di den pari a boto wan feifi kilometer so, den si Yesus e waka tapu a watra e kon na a boto. Den man frede, ₂₀ma Yesus taigi den taki: “Na Mi! Un no abi fu frede.” ₂₁Den ben wani teki En ini a boto, ma a srefi momenti dati a boto doro a syoro pe den ben wani go.

₂₂A tra dei fu en, a bigi grupu sma di ben de na a tra sei fu a meer ete, memre taki na wan boto nomo ben drape. Den memre tu taki Yesus no ben go nanga den man di ben e teki leri fu En ini a boto, ma taki den man di ben e teki leri fu En ben gwe sondro En. ₂₃Ma now tra boto ben kmopo fu Tiberias kon na a presi pe den ben nyan a brede baka di Masra ben taki tangi fu en. ₂₄So di a bigi grupu sma si taki Yesus nanga den man di ben e teki leri fu En no ben drape, den go ini den boto dati, dan den koti abra go na Kafarnaum fu go suku Yesus.

₂₅Di den feni En na abrasei fu a meer, den aksi En taki: “Meister, oten Yu kon dya?” ₂₆Yesus piki den taki: “Fu tru Mi e taigi un taki: Un no e suku Mi fu di un si den marki, ma fu di un furu un bere nanga brede. ₂₇Un no mus wroko fu kisi nyanyan san e pori gwe, ma un mus wroko fu kisi a nyanyan san no e pori èn san e gi a libi fu têgo. Dati na a nyanyan san a Manpikin fu Libisma o gi unu. Bika Gado a P'pa poti En stampu na En tapu.” ₂₈Dan den sma aksi En taki: “San un mus du? San na den wroko san Gado wani taki un mus du?” ₂₉Yesus piki den taki: “A wroko san Gado wani taki un mus du na disi: Un mus bribi ini a Wan di A seni kon.”

₃₀Dan den aksi En baka taki: “Sortu marki Yu o sori unu fu un kan bribi ini Yu? San Yu o du? ₃₁Den afo fu wi ben nyan mana ini a dreisabana, soleki fa a skrifi taki: ‘A gi den brede fu nyan di kmoto fu heimel.’ ” ₃₂Dan Yesus taigi den taki: “Fu tru Mi e taigi unu: A no Moses ben gi un a brede di kmoto fu heimel, ma na Mi P'pa e gi un a trutru brede san e kmopo fu heimel. ₃₃Bika a brede fu Gado na a Wan di saka kmopo fu heimel fu gi libi na ala sma fu grontapu.” ₃₄Dan den sma aksi En taki: “Masra, gi unu a brede disi ala dei.” ₃₅Yesus piki den taki: “Mi na a brede san e gi libi. Noiti moro angri o kiri a sma di e kon na Mi, èn noiti moro watra o kiri a sma di e bribi ini Mi. ₃₆Leki fa Mi taigi un kba: Un e si Mi, ma toku un no e bribi. ₃₇Ala den sma di a P'pa gi Mi, o kon na Mi, èn den sma di kon na Mi, noiti Mi o yagi gwe. ₃₈Bika Mi no saka kmopo fu heimel fu du Mi eigi wani, ma fu du a wani fu a Wan di seni Mi kon. ₃₉Èn disi na a wani fu a Wan di seni Mi kon, tak' Mi no lasi no wan fu den sma di A gi Mi, ma tak' Mi meki alamala kon na libi baka tapu a laste dei. ₄₀Bika Mi P'pa wani taki ala sma di e si a Manpikin, èn di e bribi ini En, sa kisi a libi fu têgo, èn Mi o meki den kon na libi baka tapu a laste dei.”

₄₁Dan den Dyusma bigin krutukrutu fu di A ben taki tak' En na a brede san saka kmopo fu heimel. ₄₂Den taki: “A no Yesus, a manpikin fu Yosef? Un sabi En m'ma nanga En p'pa. Fa a kan taki tak' A saka kmopo fu heimel?” ₄₃Ma Yesus piki den taki: “No krutukrutu nanga makandra. ₄₄No wan sma kan kon na Mi, efu a P'pa di seni Mi, no hari en kon. Dan Mi sa meki a kon na libi baka tapu a laste dei. ₄₅A skrifi ini den buku fu den profeiti taki: ‘Gado srefi o gi ala sma leri.’ Ala sma di e arki a P'pa èn di e teki leri fu En, e kon na Mi. ₄₆Dati no wani taki tak' a sma si a P'pa, bika soso a Wan di kmoto fu Gado si a P'pa. ₄₇Fu tru Mi e taigi un taki: A sma di e bribi, abi a libi fu têgo. ₄₈Mi na a brede san e gi libi. ₄₉Den afo fu unu ben nyan a mana ini a dreisabana, ma toku den dede. ₅₀Ma a sma di e nyan fu a brede disi di e saka kmopo fu heimel, no sa dede. ₅₁Mi na a brede san e gi libi, di saka kmopo fu heimel. A sma di e nyan fu a brede disi, sa libi fu têgo. Èn a brede san Mi o gi en na Mi skin, san Mi o gi fu ala sma na grontapu kan feni libi.”

₅₂Dan den Dyusma bigin krutu nanga makandra. Den taki: “Fa a Man disi kan gi un En skin fu nyan?” ₅₃Ne Yesus taigi den taki: “Fu tru Mi e taigi unu: Efu un no nyan a skin èn efu un no dringi a brudu fu a Manpikin fu Libisma, dan un no abi libi na ini unu. ₅₄A sma di e nyan Mi skin èn di e dringi Mi brudu, abi a libi fu têgo. Èn Mi sa meki a kon na libi baka tapu a laste dei. ₅₅Bika Mi skin na trutru nyanyan èn Mi brudu na trutru dringi. ₅₆A sma di e nyan Mi skin èn di e dringi Mi brudu, e tan wan nanga Mi èn Mi e tan wan nanga en. ₅₇A P'pa di e libi seni Mi kon, èn soleki fa A gi Mi libi, na so Mi o gi libi tu na a sma di e nyan Mi skin. ₅₈Disi na a brede di saka kmoto fu heimel. Den afo fu unu ben nyan mana, ma toku den dede. Ma a sma di e nyan a brede disi, sa libi fu têgo.” ₅₉Yesus taki den sani disi di A ben e gi leri ini a kerki na Kafarnaum.

₆₀Di furu fu den sma di ben e teki leri fu Yesus yere den sani di A taki, den taki: “A leri disi tranga. Suma o man teki en?” ₆₁Ma Yesus ben sabi taki den man di ben e teki leri fu En ben e krutukrutu abra a san disi. So A taigi den taki: “Na mandi un e mandi fu di Mi taki so? ₆₂San un o du dan te un si a Manpikin fu Libisma e opo go na a presi pe A ben de fosi? ₆₃Na a Yeye e gi libi, a skin na noti. Den sani san Mi taigi unu, na yeye sani èn den e gi libi. ₆₄Ma sonwan fu unu no e bribi.” Yesus ben sabi sensi na a bigin suma no ben o bribi, nanga suma ben o seri En. ₆₅Dan Yesus taki: “Fu dat'ede Mi taigi unu: No wan sma kan kon na Mi efu a no a P'pa meki a du dati.” ₆₆Sensi a pisten dati, furu fu den sma di ben e teki leri fu En, drai baka gi En. Den no waka moro langa nanga En.

₆₇Dan Yesus aksi den twarfu man fu En taki: “Ma unu dan, un o gwe libi Mi tu?” ₆₈Simon Petrus piki En taki: “Masra, na suma un o go dan? Na Yu abi wortu di e gi a libi fu têgo. ₆₉Wi e bribi Yu, èn wi sabi taki Yu na a Santa Wan fu Gado.” ₇₀Dan Yesus piki den taki: “Unu na den twarfu man di Mi teki. Ma wan fu unu na wan didibri.” ₇₁Yesus ben e taki fu Yudas, a manpikin fu Simon Iskariot. Bika fu den twarfu den man, Yudas ben de a wan di ben o seri En.