Gado o krutu den feyanti fu Israel
1Ini den dei te Mi o gi Yuda nanga Yerusalem a presi baka di den ben abi, 2Mi o tyari ala den tra folku kon na wan. Mi o tyari den go ini a Yosafatdal. Drape mi o krutu den. Bika den meki den sma fu Israel panya, Mi folku di Mi teki fu Misrefi. Den yagi den go na kondre di den no sabi èn den prati Mi kondre. 3Den fringi a lot fu mi pipel ede. Boi den kenki gi motyo, umapikin gi win fu dringi drungu. 4Sma fu Tyrus nanga Sidon, san un denki taki un o man du Mi? Èn unu, sma fu Filistea, un denki taki un o man bigin wan sani nanga Mi? A sma di wan du mi wan sani baka, Mi o meki a sani dati kon wantron tapu en eigi ede. 5Bika un gwe nanga Mi gowtu nanga mi solfru. Un srepi den gudu fu mi un srepi tyari gwe na den tempel fu unu. 6Un seri den sma fu Yuda nanga Yerusalem gi den Grikisma. Un srepi den tyari gwe, farawe fu den eigi kondre. 7Ma Mi sa tyari den kon baka fu pe den ben go baka di un seri den èn Mi o meki unu o butu fu san un du. 8Mi o seri den manpikin nanga den umapikin fu unu now, gi Yuda. Yuda o seri den gi den Sabeasma. Dan so den o tyari den gwe go na wan farawe kondre. Na Mi, MASRA, e taki tak' den sani disi o psa.
9Bari wroko gi den tra folku:
un meki unsrefi klari fu feti.
Un kari ala den ofisiri fu unu,
meki den srudati tnapu klari,
meki den hari go feti!
10Teki den isri wrokosani fu drai doti,
meki deigri fu den!
Teki den nefi fu koti grasi,
meki lansri fu den!
Swakiwan, tnapu leki bun fetiman!
11Un kon, ala folku,
un kon na wan ini a Yosafatdal.
MASRA, meki a legre fu yu hari go drape.
12MASRA taki:
“Ala folku mus kon,
den mus hari kon na a Yosafatdal.
Drape Mi o krutu den.
13Den na ogri-ati sma.
Un koti den nanga babun-nefi,
bika a ten fu koti doro.
Un masi den droifi,
den tobo furu
taki den e lon abra
fu ala a ogri.
14Libisma leki pesi,
ini a dal pe a krutu o koti.
A dei fu MASRA de krosbei.
Drape A o koti krutu.
15A son no e gi faya moro,
munkenki kon dungru.
No wan stari no e brenki moro”
16MASRA e bari leki wan lew ini Sion,
A e meki den yere En sten di e kmoto fu Yerusalem.
Heimel nanga grontapu e beifi.
Ma gi en folku, A de wan kibripresi,
A e kibri Israel.
17A taki:
“Israel, yu sa sabi
taki Mi, MASRA, na yu Gado.
Mi e libi tapu a santa bergi Sion.
Yerusalem sa de mi santa presi,
no wan doroseisma sa kon moro na ini.
18A ten dati
win sa droipi kmoto fu den bergi,
merki sa lon fu den hei presi.
Ala kriki fu Yuda sa lon, taki den e skuma.
Wan kriki sa lon kmoto fu a oso fu MASRA,
di sa nati a heri Acaciadal.
19Egipte sa tron wan sabana,
Edom wan drei kontren pe noti no e gro.
Bika den ben teki Yuda nanga tranga,
den meki brudu lon fu soso drape.
20Yuda sa tan fu têgo,
Yerusalem sa de fu ala ten.
21Na so Mi o pai den baka fu a brudu di lon,
Mi o strafu den wan di ben du disi!
Mi, MASRA, sa libi tapu a bergi Sion.”
