Den foto di den sma fu a lo fu Lefi kisi
1Den famiri-edeman fu a lo fu Lefi go na priester Eleasar, Yosua, a manpikin fu Nun, nanga na den famiri-edeman fu den tra lo fu den Israelitisma. 2Den taigi den drape na Silo ini Kanaan taki: “MASRA ben komanderi Moses fu gi un foto fu un libi, nanga weigron gi den meti fu unu.” 3Dan soleki fa MASRA ben komanderi, den tra lo fu den Israelitisma gi a lo fu Lefi wantu foto nanga weigron ini den kontren fu den.
4A lot ben sori a famiri fu Kehat fosi. Den Lefitisma di ben de bakapikin fu priester Aaron ben kisi tin-na-dri foto ini den kontren fu den lo fu Yuda, Simeon nanga Benyamin. 5A lot sori moro fara taki den tra bakapikin fu Kehat ben mus kisi tin foto ini den kontren fu den famiri fu den lo fu Efraim, Dan nanga a afu lo fu Manase. 6A lot sori taki den bakapikin fu Gerson ben mus kisi tin-na-dri foto ini den kontren fu den famiri fu den lo fu Isakar, Aser, Naftali nanga a tra afu lo fu Manase ini Basan. 7Den famiri fu den bakapikin fu Merari kisi twarfu foto ini den kontren fu den lo fu Ruben, Gad nanga Sebulon. 8Soleki fa MASRA ben komanderi Moses, den tra Israelitisma meki a lot sori den sortu foto nanga weigron den ben mus gi na a lo fu Lefi.
9Den lo fu Yuda nanga Simeon ben gi foto na den 10famiri fu den Kehatitisma di ben de bakapikin fu Aaron. Den ben de den fosi Lefitisma di a lot ben sori èn disi kisi den foto disi: 11Kiryat-Arba, dati na Hebron, ini a bergikontren fu Yuda, nanga den weigron lontu a foto. Arba ben de a p'pa fu Enak. 12Kaleb, a manpikin fu Yefune, ben kisi den pranigron fu a foto dati nanga den dorpu ini a birti dati kba. 13Boiti Hebron, di ben de wan fu den foto pe wan sma ben kan lowe go te a ben kiri wan trawan sondro espresi, den bakapikin fu Aaron ben kisi den foto disi tu: Libna nanga den weigron fu en, 14Yatir nanga den weigron fu en, Estemoa nanga den weigron fu en, 15Holon nanga den weigron fu en, Debir nanga den weigron fu en, 16Ain nanga den weigron fu en, Yuta nanga den weigron fu en, nanga Bet-Semes nanga den weigron fu en. Dati ben de neigi foto fu den lo fu Yuda nanga Simeon. 17Fu a lo fu Benyamin den kisi den foto: Gibeon nanga den weigron fu en, Geba nanga den weigron fu en, 18Anatot nanga den weigron fu en nanga Almon nanga den weigron fu en. Dati ben de fo foto. 19Ala na ala den bakapikin fu Aaron, den priester, kisi tin-na-dri foto nanga den weigron fu den.
20Gi den tra famiri fu Kehat di ben de bakapikin fu Lefi tu, a lot sori den foto disi, ini a kontren fu a lo fu Efraim: 21Sikem nanga den weigron fu en ini a bergikontren fu Efraim. A foto disi ben de wan fu den foto pe wan sma ben kan lowe go te a ben kiri wan trawan sondro espresi. Moro fara Geser nanga den weigron fu en, 22Kibsaim nanga den weigron fu en, nanga Bet-Horon nanga den weigron fu en. Dati ben de fo foto. 23Fu a lo fu Dan den kisi: Elteke nanga den weigron fu en, Gibeton nanga den wei fu en, 24Ayalon nanga den weigron fu en, nanga Gat-Rimon nanga den weigron fu en. Dati ben de fo foto. 25Fu a afu lo fu Manase den kisi den foto: Taanak nanga den weigron fu en, nanga Gat-Rimon nanga den weigron fu en. Dati ben de tu foto. 26Ala nanga ala den tra famiri fu den bakapikin fu Kehat kisi tin foto nanga den weigron fu den.
27Disi na den foto di a afu lo fu Manase gi na den famiri fu den Lefitisma di ben de bakapikin fu Gerson: Golan ini Basan nanga den weigron fu en. Golan ben de wan fu den foto pe wan sma ben kan lowe go te a ben kiri wan trawan sondro espresi. Moro fara Beestera nanga den weigron fu en. Dati ben de tu foto. 28Fu a lo fu Isakar den kisi: Kisyon nanga den weigron fu en, Daberat nanga den weigron fu en, 29Yarmut nanga den weigron fu en nanga En-Ganim nanga den weigron fu en. Dati ben de fo foto. 30Fu a lo fu Aser den kisi: Misal nanga den wei fu en, Abdon nanga den weigron fu en, 31Helkat nanga den weigron fu en, nanga Rekob nanga den weigron fu en. Dati ben de fo foto. 32Fu a lo fu Naftali, den kisi den foto: Kedes nanga den weigron fu en ini Galilea. Kedes ben de wan fu den foto pe wan sma ben kan lowe go te a ben kiri wan trawan sondro espresi. Moro fara Hamot-Dor nanga den weigron fu en, nanga Kartan nanga den weigron fu en. Dati ben de dri foto. 33Ala nanga ala den famiri fu den Gersonitisma kisi tin-na-dri foto nanga den wei fu den.
34Disi na den foto di a lo fu Sebulon gi na den famiri fu den Lefitisma di ben de bakapikin fu Merari: Yokneam nanga den wei fu en, Karta nanga den wei fu en, 35Dimna nanga den weigron fu en, Nahalal nanga den weigron fu en. Dati ben de fo foto. 36Fu a lo fu Ruben, den kisi: Beser nanga den weigron fu en, Yasa nanga den weigron fu en, 37Kedemot nanga den weigron fu en, Mefaat nanga den weigron fu en. Dati ben de fo foto. 38Fu a lo fu Gad, den kisi: Ramot nanga den weigron fu en, ini a bergikontren fu Gilead. Ramot ben de wan fu den foto pe wan sma ben kan lowe go te a ben kiri wan trawan sondro espresi. Moro fara Mahanaim nanga den weigron fu en, 39Hesbon nanga den weigron fu en nanga Yaser nanga den weigron fu en. Dati ben de fo foto. 40Ala nanga ala a lot sori twarfu foto gi den famiri fu Merari. A famiri disi fu den Lefitisma ben den a laste wan di ben mus kisi foto ete.
41Ala nanga ala den Lefitisma kisi fotenti-na-aiti foto na ini den kontren fu den Israelitisma. Den kisi den foto dati nanga den weigron. 42Fu ala den foto disi den ben mus kisi den weigron tu. Disi ben mus de so gi ala den foto.
43Na so MASRA gi Israel a heri kondre. A ben sweri dati gi den afo fu den. Den teki a kondre abra dan den go libi na ini. 44Dan MASRA gi den freide na ala sei, leki fa A ben sweri gi den afo fu den. No wan fu den feyanti fu den Israelitisma ben man hori feti nanga den. MASRA ben gi den ala den feyanti fu den abra na den. 45MASRA no broko no wan fu den bun pramisi di A ben pramisi a folku fu Israel. A du ala sani san A ben taki.
