Den sani fu a skin di e meki taki sma no krin
1MASRA taigi Moses nanga Aaron taki: 2“Taigi den sma fu Israel taki: ‘Efu wan man en manpresi e puru dot'doti watra fu di a kisi wan siki, a watra dati no krin ini Gado ai. 3Efu a siki meki taki na dropu a watra e dropu kmoto, noso taki noti no man psa moro fu en manpresi kon na doro, ala tu fasi sowan man no krin ini Gado ai. 4Ala bedi tapu san a man didon, nanga ala sani tapu san a sidon, no krin ini Gado ai tu. 5Efu wan sma fasi a bedi fu a man dati, a sa wasi en krosi nanga en skin, èn a no sa krin ini Gado ai te leki neti tapu. 6Efu wan sma sidon tapu wan sani tapu san a man ben sidon di abi a siki, a sma sa wasi en krosi nanga en skin èn a no sa krin ini Gado ai te leki neti tapu. 7Efu wan sma fasi a man di abi a siki, a sma dati sa wasi en krosi nanga en skin èn a no sa krin ini Gado ai te leki neti tapu. 8Efu a man di abi a siki spiti tapu wan sma di krin ini Gado ai, a sma dati sa wasi en krosi nanga en skin èn a no sa krin ini Gado ai te leki neti tapu. 9Te a man di abi a siki sidon tapu en asi, dan a sani tapu san a sidon tapu a asi en baka, no sa krin ini Gado ai tu. 10Efu wan sma fasi wan sani tapu san a man ben sidon, a sma dati no sa krin ini Gado ai te leki neti tapu èn efu wan sma opo a sani tapu san a man ben sidon, a sma dati sa wasi en krosi nanga en skin èn a no sa krin ini Gado ai te leki neti tapu. 11Efu a man di abi a siki fasi wan sma sondro fu a ben wasi en anu, a sma di a fasi sa wasi en krosi nanga en skin èn a no sa krin ini Gado ai te leki neti tapu. 12Efu a man di abi a siki fasi wan sani di meki fu kleidoti, un sa naki a sani dati broko. Ala sani fu udu di a fasi, un sa spuru nanga watra fu a kon krin baka ini Gado ai. 13Te a man di abi a siki kon betre, a sa teri seibi dei fosi a kan krin ensrefi. Baka den seibi dei a mus wasi en krosi èn a sa wasi en skin nanga watra fu wan bron, dan a sa de krin baka ini Gado ai. 14Tapu a di fu aiti dei a sa go nanga tu stondoifi noso tu yongu doifi na MASRA fesi, na mofodoro fu a tenti pe yu kan miti nanga Gado. Dan a sa langa den doifi gi a priester. 15A priester sa bron wan leki ofrandi fu kisi pardon fu sondu, a trawan a sa bron leki ofrandi. Dan a priester sa meki a kon bun baka nanga Gado na MASRA fesi, fu di a ben abi wan siki di ben e meki dot'doti watra kmoto fu en manpresi.
16Te a manwatra fu wan man lon, a sa wasi en heri skin èn a no sa krin ini Gado ai te leki neti tapu. 17Den sa wasi ala krosi nanga ala sani fu leer tapu san a manwatra fadon èn den sani no sa krin ini Gado ai te leki neti tapu. 18Efu wan man go na bedi nanga wan uma èn en manwatra lon tu, den ala tu sa wasi den skin èn den no sa krin ini Gado ai te leki neti tapu.
19Te wan uma abi en munsiki a no sa krin seibi dei langa ini Gado ai. Efu wan sma fasi en, a sma dati no sa krin ini Gado ai te leki neti tapu. 20Ala bedi tapu san a uma didon, nanga ala sani tapu san a sidon no krin ini Gado ai tu. 21Efu wan sma fasi a bedi fu a uma dati, a sa wasi en krosi nanga en skin, èn a no sa krin ini Gado ai te leki neti tapu. 22Efu wan sma fasi wan sani tapu san a uma ben sidon, a sma dati sa wasi en krosi nanga en skin èn a no sa krin ini Gado ai te leki neti tapu. 23Efu wan sma fasi wan sani tapu a bedi fu a uma, noso efu a fasi wan sani tapu a presi pe a uma sidon, a sma dati no sa krin ini Gado ai te leki neti tapu. 24Efu wan man go na bedi nanga a uma, dan leki fa a uma no krin ini Gado ai, na so a man srefi no sa krin ini Gado ai tu. Seibi dei langa a man no sa krin ini Gado ai. Ala bedi tapu san a didon no sa krin ini Gado ai tu.
25Efu wan uma e lasi brudu, ma a no de a ten fu en munsiki, noso efu a munsiki fu wan uma e tan moro langa leki san a ben mus tan, a uma dati no sa krin ini Gado ai solanga leki a e lasi brudu. A sa de leki efu na en munsiki a abi. A no krin ini Gado ai. 26Te a uma e lasi brudu so, dan ala bedi tapu san a e didon nanga ala sani tapu san a e sidon no sa krin ini Gado ai neleki te a abi en munsiki. 27Efu wan sma fasi den sani disi, a sma dati no sa krin ini Gado ai. A sa wasi en krosi nanga en skin, èn a no sa krin ini Gado ai te leki neti tapu. 28Te a uma kon betre, a sa teri seibi dei fosi a kon krin ini Gado ai. 29Tapu a di fu aiti dei a sa go nanga tu stondoifi noso tu yongu doifi na mofodoro fu a tenti pe yu kan miti nanga Gado. Dan a sa langa den doifi gi a priester. 30A priester sa bron wan leki ofrandi fu kisi pardon fu sondu, a trawan a sa bron leki ofrandi. Dan so a priester sa meki a uma kon bun baka nanga Gado na MASRA fesi, fu di a no ben krin ini Gado ai èn a ben e lasi brudu.’ ”
31Na disi Gado ben taigi Moses nanga Aaron fu taigi den sma fu Israel: “na so den mus hori densrefi aparti fu den sani di kan meki taki den no krin ini Gado ai. Efu den no du dati den o dede, efu den doti Mi santa tenti di tnapu na den mindri.”
32Disi na den wèt na san wan man mus hori ensrefi efu a abi wan siki na en manpresi di e meki dot'doti watra kmoto fu en manpresi, noso te a manwatra fu wan man lon. Bika den sani disi e meki taki wan man no krin ini Gado ai. 33Èn disi na den wèt na san wan uma mus hori ensrefi te a abi en munsiki, te wan uma e lasi brudu nanga te wan man didon nanga wan uma di no krin ini Gado ai.
