Nomru 5

₁MASRA taigi Moses taki: ₂“Taigi den Israelitisma taki den mus seni den sma disi gwe fu a kampu: ala sma di abi gwasi siki, ala sma di abi wan siki di e meki doti watra kmoto fu en manpresi noso en umasmapresi nanga ala sma di doti densrefi fu di den fasi wan dedeskin. Den no mus tan ini a kampu. ₃Man nanga uma un mus seni gwe. Un mus seni den go na dorosei fu a kampu, fu den no doti a kampu. Bika Mi e libi na un mindri.” ₄So den Israelitisma du leki fa MASRA ben taigi Moses fu taigi den. Den seni den sma go na dorosei fu a kampu.

₅MASRA taigi Moses taki: ₆“Taigi den Israelitisma taki: ‘Te wan man noso wan uma sondu, fu di a du wan trawan wan sani, èn a no e hori ensrefi tapu sowan fasi na den sani fu MASRA, dan sowan sma fiti fu kisi strafu. ₇A sma sa taki sortu sondu a du. Baka dati a sa pai fu ala sani baka nanga tutenti prosenti moro na en tapu. A sa gi dati na a sma di a ben du a sani. ₈Ma efu no wan krosbei famiri de, fu a sma di ben mus kisi a moni, dan a moni sa de fu MASRA. A sma di ben mus pai a moni sa gi a moni na den priester, boiti a man skapu di a ben mus tyari kon, fu a priester meki a kon bun baka nanga Gado. ₉Fu ala den santa ofrandi di den Israelitisma e tyari, a priester sa teki a spesrutu pisi, di den sma e gi en. ₁₀Den santa ofrandi srefi e tan fu a sma di tyari en kon. Ma a pisi san a sma gi na a priester sa de gi a priester.’ ”

₁₁MASRA taigi Moses taki: ₁₂“Taigi den Israelitisma taki: ‘Disi na san musu psa efu wan uma no hori ensrefi dan a waka gi en masra, ₁₃sobun a go na bedi nanga wan tra man èn a masra fu en no sabi, fu di a tori ben tan kibri taki a doti ensrefi èn no wan sma no ben si en tu di a e du en. ₁₄Te a yeye fu dyarusu kon tapu a man èn a no e fertrow en frow moro di doti ensrefi, noso te a yeye fu dyarusu kon tapu a man awinsi en frow no doti ensrefi, ₁₅a man sa tyari en frow go na a priester. A sa tyari wan ofrandi gi a frow go tu gi a priester fu tu kilo blon. A no sa kanti oli na en tapu èn a no sa poti wierook di e smeri switi tu, bika na wan graan-ofrandi fu dyarusu. Na wan ofrandi di e tyari kon ini prakseri baka taki wan sondu ben du. ₁₆A priester sa meki a uma kon dan a sa poti en tnapu na MASRA fesi. ₁₇Baka dati a priester sa teki spesrutu watra ini wan kroiki. A sa teki pikinso doti tu di didon na gron na a futu fu a altari dan a moksi en nanga a watra. ₁₈Te a priester poti a uma tnapu na MASRA fesi, a sa lusu a edewiwiri fu a uma. Dan a sa poti a ofrandi di e tyari kon ini prakseri taki wan sondu du, ini a anu fu a uma. Dati na a graan-ofrandi fu dyarusu. Ini en eigi anu a priester sa hori a bita watra di sa tyari a fluku kon. ₁₉A priester sa meki a uma sweri taki a sa taki san na tru, dan a sa taigi en taki: Efu yu no go nanga no wan man na bedi, èn efu yu no doti yusrefi sensi yu de nanga yu man, dan a fluku fu a bita watra disi no sa kisi yu. ₂₀Ma efu yu no hori yusrefi èn yu doti yusrefi ala di yu abi yu masra, èn yu go na bedi nanga wan tra man: _21-22dan MASRA sa meki yu nen de wan fluku na ini a mofo fu den sma fu yu folku. MASRA sa meki yu muru krempi fu yu no kisi pikin moro èn A sa meki yu bere sweri. Bika a watra disi di sa tyari a fluku sa meki yu bere sweri èn a sa meki yu muru krempi fu yu no kisi pikin moro.’ ” Tapu a fasi disi a priester sa taki a fluku. Dan a uma sa piki: “Na so a sa de. Na so a sa de.” ₂₃Baka dati a priester sa skrifi a fluku na tapu wan pisi papira dan a wasi en ini a bita watra. ₂₄Dan a sa meki a uma dringi a bita watra, di e tyari a fluku kon èn a watra di e tyari a fluku kon, sa du en bita wroko. ₂₅A priester sa teki a graan-ofrandi fu dyarusu fu a anu fu a uma. A sa beweigi en na MASRA fesi, dan a sa tyari en go na a altari. ₂₆A priester sa teki wan anu furu fu a ofrandi dan a bron na tapu a altari. Dan disi sa de neleki na a heri ofrandi bron. Baka dati a sa gi a uma a watra fu dringi. ₂₇Efu a uma ben doti ensrefi èn a ben waka gi en masra, dan a watra, di e tyari a fluku kon, sa kon bita na ini en inisei te a dringi en. A uma en bere sa sweri, en muru sa krempi èn a sa tron wan fluku na mindri en folku. ₂₈Efu a uma no ben doti ensrefi, efu a krin, dan noti no o miti en. A sa man hori bere.

₂₉Disi na a wèt gi dyarusu te wan uma no hori ensrefi, èn a doti ensrefi fu di a waka gi en masra, ₃₀noso te a yeye fu dyarusu kon tapu a man, èn a no e fertrow en frow moro. A sa tyari en frow go na fesi MASRA, dan a priester sa du ala den sani disi nanga en. ₃₁Noti sa psa nanga a man, ma a uma fiti fu kisi strafu.