1Fu David. Wan psalm.
Mi wani singi fu lobi nanga fu du sani tapu wan leti fasi,
ini wan singi gi Yu, MASRA.
2Mi wani libi so taki sma no man sori finga na mi tapu.
Oten Yu o kon na mi?
Mi wani du Yu wani
ini mi oso.
3Mi no wani abi not'noti fu du
nanga sani di no bun fu du.
Mi no lobi den sani di den sma e du
di drai den baka gi Yu,
a no sa de fu feni na mi srefsrefi.
4Wan kruktu ati mus tan fara fu mi,
ogri no mus de fu feni na mi.
5Mi o puru den sma na pasi
di e taki takru fu trawan bakabaka.
Sma nanga heimemre nanga bigifasi sma,
mi no sa lobi.
6Mi sa suku den sma di e tan fertrow na Yu tapu,
fu de nanga mi.
Den sma tapu san trawan no man sori finga,
na den o wroko gi mi.
7No wan bedrigiman o tan ini mi oso,
no wan sma di e lei no o tnapu na mi fesi.
8Ala mamanten mi o puru den ogri-ati sma fu a kondre na pasi,
mi sa tyari wan kba kon na den sma di e du kruktudu
ini a foto fu MASRA.
Uw browser ondersteunt geen HTML5 audio.