Gado e du sani nanga leti
1Gi a tiriman fu a singigrupu fu a tempel. A mus singi a srefi fasi leki: A dede fu a manpikin. Wan psalm fu David.
2MASRA, mi sa prijse Yu nanga mi heri ati,
mi sa ferteri fu ala den wondru fu Yu.
3Mi breiti èn mi e prisiri fu den sani di Yu du,
mi sa singi fu gi Yu grani,
Yu, a Moro Hei Gado.
4Bika den feyanti fu mi hari go nanga baka,
den fadon èn den dede na Yu fesi.
5Di Yu teki presi tapu a sturu fu krutu,
Yu gi mi leti,
bika Yu na wan krutubakra di e krutu sani
na tapu wan leti fasi.
6Yu bari den folku,
Yu puru den ogri-ati sma na pasi,
Yu figi a nen fu den fu têgo puru na grontapu.
7Feyanti no de moro,
prakseri srefi sma no o prakseri den moro.
Yu wai den foto fu den puru na pasi,
fu têgo den broko èn didon na gron.
8Ma MASRA na kownu fu têgo,
A seti a krutusturu fu En fu koti krutu.
9Iya, A e krutu grontapu na tapu wan leti fasi,
A e krutu folku soleki fa a fiti.
10MASRA na wan tranga kibripresi
gi sma di trawan e pina,
wan tranga kibripresi ini ten fu nowtu.
11Dat' meki den di sabi Yu e fertrow na Yu tapu.
Bika MASRA, noiti Yu libi den sma di e suku Yu.
12Singi fu prijse MASRA di e rigeri ini Sion,
ferteri den folku fu den wondru fu En.
13A e strafu den sma di ben kiri trawan,
A e memre den dedewan.
A no e fergiti a kari fu den mofinawan.
14MASRA, sori mi a bun-ati fu Yu,
luku fa den di no lobi mi e pina mi,
Yu di e yepi mi fu mi no dede.
15Dan mi kan ferteri fu ala den bigi wroko fu Yu,
èn taki nanga prisiri na den bigi doro fu Sion
taki Yu ferlusu mi.
16Den folku fadon ini a olo di densrefi diki,
den futu fasi ini den sani
di densrefi ben kibri poti fu fanga trawan.
17MASRA e sori suma A de,
A e koti krutu na tapu wan leti fasi,
den ogri-ati sma e fasi ini den sani di densrefi seti. higgajon, sela
18Ogri-ati sma, na dede pasi den de,
ala den folku di no e dini Gado.
19Ma Gado no e fergiti den mofinawan fu têgo,
a howpu di den swakiwan abi no de fu soso.
20Du wan sani, MASRA,
no meki libisma wini wi,
krutu den folku te den tnapu na Yu fesi.
21Skreki den MASRA,
meki den folku ferstan taki den na libisma,
di o dede gwe wan dei. sela