Boskopuman 8

₁Saulus ben feni en bun tak' den kiri Stefanus.

Dan bigin fu a dei dati, sma ben de nomonomo baka den sma fu a gemeente na Yerusalem fu du den ogri. Dat' meki ala den bribisma panya go na den distrikti Yudea nanga Samaria. Soso den boskopuman fu Yesus ben tan na baka.

₂Nanga furu krei wantu man di ben e libi leki fa Gado wani, tyari a dedeskin fu Stefanus go beri.

₃Saulus ben e suku fu broko a gemeente nanga tranga. A ben go ini ala den oso èn a ben srepi man nanga uma kon na dorosei, dan a ben tyari den go sroto.

₄Den bribisma di lowe ben ferteri a Bun Nyunsu ala presi pe den go. ₅So a psa tak' Filipus go na a foto fu Samaria èn a ferteri den fu a Mesias. ₆Furu sma ben arki san Filipus taki èn di den si den bigi marki di a du, den poti yesi arki en moro bun. ₇Bika takruyeye ben kmopo nanga bigi babari tapu furu sma, èn furu lanman nanga malengrisma ben kon betre. ₈Dat' meki wan bigi prisiri kon ini a foto dati.

₉Ma fosi dati, wan man di ben nen Simon ben e du tofruwroko ini a foto, èn a ben meki ala sma fu Samaria ferwondru. A ben taki fu ensrefi tak' en na wan prenspari sma. ₁₀Ala sma, pikinwan nanga bigiwan, ben e tan arki san Simon e taki, èn den ben e taki fu en taki: “A man disi abi san yu e kari a bigi krakti fu Gado.” ₁₁Den sma ben tan arki en bika a ben meki den ferwondru wan heri pisten kba nanga den tofruwroko fu en. ₁₂Ma di Filipus ferteri den a Bun Nyunsu fu Yesus Kristus nanga a fasi fa Gado wani tiri libisma, den bribi en, èn mansma nanga umasma teki dopu. ₁₃Simon srefi bribi èn a teki dopu tu. Dan a tan waka na Filipus baka èn a ferwondru srefsrefi fu si den marki fu Gado di ben e psa, nanga ala den tra bigi sani.

₁₄Di den boskopuman fu Yesus ini Yerusalem yere tak' den sma fu Samaria bribi a wortu fu Gado, den seni Petrus nanga Yohanes go drape. ₁₅Di den doro, den begi gi den sma fu den kisi a Santa Yeye. ₁₆Bika den ben dopu ini a nen fu Masra Yesus, ma no wan fu den ben kisi a Santa Yeye ete. ₁₇So Petrus nanga Yohanes poti anu na den tapu èn den kisi a Santa Yeye.

₁₈Dan Simon langa moni gi den boskopuman fu Yesus di a si tak' den sma ben kisi a Santa Yeye te den ben poti anu na den tapu. ₁₉A taigi den taki: “Un gi mi a makti tu, fu sma kan kisi a Santa Yeye te mi poti anu na den tapu.”

₂₀Ma Petrus taigi en taki: “Yu nanga yu moni kan go na hel! Fa yu kan prakseri tak' yu kan bai san Gado e gi fu soso? ₂₁Yu no man teki prati ini a wroko disi, bika yu ati no de tapu a leti presi ini Gado ai. ₂₂Tapu nanga den takru denki disi, dan yu begi Gado efu A wani gi yu pardon fu a prakseri di kon ini yu ede. ₂₃Bika mi e si fa yu lai nanga wan bita dyarusu èn fa sondu tai yu ete.”

₂₄Dan Simon aksi taki: “Begi Masra gi mi tak' noti fu den sani san yu taki sa miti mi.”

₂₅Baka di Petrus nanga Yohanes ferteri a wortu fu Masra èn kotoigi fu En, den drai go baka na Yerusalem. Di den ben de na pasi, den ferteri a Bun Nyunsu na furu dorpu ini Samaria.

₂₆Dan wan engel fu Masra taigi Filipus taki: “Tide bakadina yu mus go na a pasi di e waka fu Yerusalem go na Gasa.” Furu sma no e waka na tapu a pasi dati. _27-28So Filipus go. Di a doro drape a si wan man fu Etiopia. A ben de wan eunuch èn a ben de wan prenspari man di ben luku den moni tori fu Kandaka, a frow di ben rigeri Etiopia. A man disi ben kmopo fu Yerusalem pe a ben go anbegi Gado, èn a ben sidon ini en wagi e leisi a buku fu a profeiti Yesaya. ₂₉Dan a Santa Yeye taigi Filipus taki: “Go waka sei a wagi dati.” ₃₀So Filipus lon go na a wagi, èn a yere fa a man e leisi ini a buku fu a profeiti Yesaya. Dan a aksi en taki: “Yu e ferstan san yu e leisi?”

₃₁A man piki Filipus taki: “Fa mi kan ferstan en, efu no wan sma no de di kan tyari en kon na krin gi mi?” Dan a man aksi Filipus fu kon sidon na en sei ini a wagi. ₃₂A pisi fu a Santa Buku di a ben leisi ben taki:

₃₅Dan Filipus bigin nanga a srefi pisi dati fu a Santa Buku fu ferteri en fu Yesus. ₃₆Di den rei moro fara den si wan kriki. Ne a man aksi Filipus taki: “Luku, watra dya. San e hori mi ete fu teki dopu?”

₃₇Filipus taigi a man taki: “Efu yu e bribi nanga yu heri ati, yu kan dopu.”

A man piki Filipus taki: “Mi e bribi tak' Yesus Kristus na a Manpikin fu Gado.” ₃₈So a meki a wagi tan tnapu. Dan en nanga Filipus saka go ini a watra èn Filipus dopu en. ₃₉Di den kmopo fu a watra, a Yeye fu Masra teki Filipus tyari gwe. A man no ben si en moro, ma nanga prisiri a gwe moro fara. ₄₀Filipus ben feni ensrefi te ini a foto Asdod. Drape a ben waka lontu na ala foto e ferteri den sma a Bun Nyunsu te leki a doro na a foto Sesarea.