Yohanes 13

₁Fosi a Paskafesa doro, Yesus ben sabi tak' a ten doro fu A libi grontapu go na En P'pa. Èn A lobi den sma fu En di A ben lobi na grontapu, te na a kba. ₂A pisten di Yesus nanga den man fu En ben e nyan, dan didibri ben gi Yudas, a manpikin fu Simon Iskariot, a prakseri kba fu a seri En. ₃Yesus ben sabi tak' a P'pa ben poti ala sani na ini En anu. A ben sabi tak' A ben kmopo fu Gado èn tak' A bo drai go baka na En. ₄Dat' meki A opo, A puru En tap'sei krosi, dan A tai wan duku lontu En bere. ₅Baka dati A kanti watra na ini wan beki, dan A bigin wasi den futu fu den man fu En. Dan A drei den nanga a duku san ben tai lontu En bere.

₆Di a doro na Simon Petrus, a disi taigi En taki: “Masra, na wasi Yu wani wasi mi futu?”

₇Yesus piki en taki: “Yu no man ferstan san Mi e du now, ma wan dei yu o sabi.”

₈Dan Petrus taki: “Masra, solanga mi e libi, Yu no sa wasi mi futu!”

Ma Yesus piki en taki: “Efu Mi no wasi yu futu, yu no man de wan sma fu Mi.”

₉Ne Simon Petrus piki En taki: “Masra, dan Yu no mus wasi mi futu wawan, ma mi anu nanga mi ede tu.”

₁₀Yesus taigi en taki: “A sma di wasi en skin, krin kba. A abi fu wasi en futu nomo. Un krin, ma a no un alamala.” ₁₁Yesus taki so bika A ben sabi kba suma bo seri En. Dat' meki A taigi den taki den alamala no krin.

₁₂Di A kba wasi den futu, A weri En tap'sei krosi, dan A go sidon na En presi baka. Dan A taigi den taki: “Un ferstan san Mi du gi unu? ₁₃Unu e kari Mi Meister nanga Masra, èn un abi leti, bika na dati Mi de tu. ₁₄Efu Mi leki un Masra nanga un Meister, wasi un futu, dan un mus wasi makandra futu tu. ₁₅Bika Mi gi un wan eksempre, fu un kan du leki fa Mi ben du gi unu. ₁₆Fu tru Mi e taigi un taki: Wan knekti no hei moro en masra, èn wan boskopuman no hei moro a wan di seni en. ₁₇Now di un sabi den sani disi, Gado sa blesi unu efu un du den.

₁₈San Mi e taki no de gi un alamala. Mi sabi den sma di Mi ben teki. Ma a musu psa leki fa a skrifi ini a Santa Buku. A skrifi taki: ‘A wan di nyan Mi brede, opo en bakafutu fu trapu Mi.’ ₁₉Mi e taigi un a sani disi na fesi, fu te a psa un kan bribi tak' Mi de suma Mi de. ₂₀Fu tru Mi e taigi un taki: A sma di opo en doro gi a wan di Mi seni, e opo en gi Mi. Èn a sma di opo en doro gi Mi, e opo en gi a Wan di seni Mi.”

₂₁Baka di Yesus taki den sani disi, A firi wan dipi sari, dan A taigi den taki: “Fu tru Mi e taigi unu: Wan fu unu o seri Mi.”

₂₂Den man fu En luku makandra ferwondru. Den no ben sabi suma A e taki. ₂₃Wan fu den man fu Yesus, a wan di Yesus ben lobi, ben de let' na En sei. ₂₄Dan Simon Petrus sori en fu a aksi Yesus suma A e taki. ₂₅So a man disi dribi go moro krosbei, dan a aksi Yesus taki: “Masra, suma na en?”

₂₆Yesus piki en taki: “Mi o dopu a pisi brede disi ini a komki, dan Mi o langa en gi a sma dati.” So Yesus dopu a pisi brede ini a komki, dan A langa en gi Yudas, a manpikin fu Simon Iskariot. ₂₇Di Yudas teki a pisi brede, Satan kon ini en ati. Dan Yesus taigi en taki: “Opo, go du es'esi san yu wani du.” ₂₈Ma no wan fu den trawan drape ben ferstan fu sanede Yesus taigi en a sani disi. ₂₉Yudas ben de a man di ben e hori a moni gi den. Dat' meki sonwan fu den ben prakseri tak' Yesus seni en fu go bai den sani di ben de fanowdu fu hori a Paskafesa. Trawan fu den ben prakseri tak' Yesus seni en go fu gi den pôtisma wan sani. ₃₀So Yudas teki a pisi brede, dan a gwe wantron. A ben de neti yuru.

₃₁Baka di Yudas gwe, Yesus taki: “A ten doro now tak' a Manpikin fu Libisma e kisi glori, èn so Gado e kisi glori tu. ₃₂Efu a Manpikin meki Gado kisi glori, dan Gado sa meki a Manpikin kisi glori tu. Èn A o du dati wantron.

₃₃Mi pikin, na wan syatu pisten ete Mi de nanga unu. Un o suku Mi, ma Mi taigi unu a srefi sani san Mi ben taigi den Dyu: ‘Pe Mi e go, un no man kon.’ ₃₄Wan nyun sani Mi e komanderi un fu du: Un mus lobi makandra. Leki fa Mi ben lobi unu, na so un mus lobi makandra tu. ₃₅Efu un lobi makandra, dan ala sma o sabi tak' un na sma fu Mi.”

₃₆Simon Petrus aksi En taki: “Masra, pe Yu e go?”

Yesus piki en taki: “Pe Mi e go, yu no man kon now nanga Mi. Ma baka wan pisten yu o kon tu.”

₃₇Dan Petrus aksi En taki: “Masra, fu sanede mi no man kon now nanga Yu? Mi klari fu dede gi Yu.”

₃₈Yesus piki en taki: “Yu klari fu dede gi Mi? Fu tru Mi e taigi yu taki: Fosi kakafowru bari, yu o taki dri leisi tak' yu no sabi Mi.”