Yohanes 5

₁Baka dati Yesus go na Yerusalem, bika den Dyusma ben abi wan fesa. ₂Na Yerusalem yu ben abi wan bigi ston peti nanga feifi gadri lontu en, di ben de krosbei fu a Skapupoort. Ini a tongo fu den Dyu den ben e kari en Betesda. ₃Furu sikisma ben e didon ini den gadri, soleki brenisma, lansma nanga malengrisma. Den ben e wakti fu a watra sek'seki. ₄Bika wanwan leisi wan engel fu Masra ben e saka kon na ini a watra, dan a watra ben e sek'seki. A fosi sma di ben saka go ini a watra te a sek'seki, ben e kon betre, awinsi sortu siki a ben abi.

₅Wan man ben drape di ben e siki dritenti-na-aiti (38) yari kba. ₆Yesus si a man disi, èn fu di A ben sabi tak' a de wan heri pisten drape kba, meki A aksi en taki: “Yu wani kon betre?”

₇A sikiman piki En taki: “Masra, mi no abi no wan sma fu saka mi ini a watra te a e beweigi. Te fu mi doro drape, wan trawan koti mi fesi kba.”

₈Dan Yesus taigi en taki: “Opo, teki yu matrasi, dan yu waka gwe.” ₉A srefi momenti dati a man kon betre. A teki en matrasi, dan a waka gwe.

A sani disi psa tapu wan sabadei. ₁₀Dan den fesiman fu den Dyu taigi a man di ben kon betre taki: “Tide na sabadei èn a wèt no wani fu yu tyari yu matrasi tapu a dei disi.”

₁₁Ma a man piki den taki: “A man di dresi mi, taigi mi fu teki mi matrasi dan mi waka gwe.”

₁₂Dan den aksi en taki: “Suma na a man di taigi yu fu du dati?” ₁₃Ma a man di ben kon betre no ben sabi, bika wan bigi grupu sma ben drape èn Yesus ben gwe na den mindri.

₁₄Baka dati Yesus miti a man ini a mamakerki, dan A taigi en taki: “Arki, yu kon betre. Ma yu mus tapu nanga a sondu libi, noso wan moro takru sani o psa nanga yu.”

₁₅Dan a man gwe go ferteri den fesiman fu den Dyu tak' na Yesus ben dresi en. ₁₆Fu dat'ede den fesiman fu den Dyu bigin fu de nomo na Yesus baka fu du En ogri, bika A ben du a sani disi tapu wan sabadei. ₁₇Ma Yesus taigi den taki: “Mi P'pa e wroko te nanga a dei fu tide. Dat' meki Mi e wroko tu.” ₁₈So den Dyu fesiman ben e du moro furu muiti fu kiri Yesus. Bika A no ben broko a wèt fu sabadei wawan, ma A ben kari Gado En eigi P'pa tu. Tapu sowan fasi A ben taki tak' En nanga Gado na wan.

₁₉Dan Yesus taigi den taki: “Fu tru Mi e taigi un taki: A Manpikin no man du noti fu Ensrefi, ma A e du soso san A si tak' a P'pa e du. San a P'pa e du, na dati a Manpikin e du tu. ₂₀Bika a P'pa lobi a Manpikin, èn A e sori En ala sani san Ensrefi e du. A o sori En moro bigi wroko leki disi di o meki unu ferwondru. ₂₁Bika soleki fa a P'pa e meki dedesma opo baka èn A e gi den libi, na so a Manpikin e gi libi tu na suma A wani. ₂₂Moro fara a P'pa no e krutu no wan sma, ma A o meki a Manpikin krutu ala sani. ₂₃A du dati fu ala sma gi a Manpikin grani, soleki fa den e gi a P'pa grani. A sma di no e gi a Manpikin grani, no e gi grani na a P'pa tu di seni En kon.

₂₄Fu tru Mi e taigi un taki: A sma di arki san Mi e taki, èn di bribi ini a Wan di seni Mi kon, abi a libi fu têgo. A no sa kon ondro a krutu, ma a kmoto fu dede kon na libi. ₂₅Fu tru Mi e taigi un taki: A ten e kon èn a de kba, pe den dedewan o yere a sten fu a Manpikin fu Gado, èn den wan di yere en o libi. ₂₆Bika soleki fa a P'pa abi libi ini Ensrefi, na so A meki tak' a Manpikin abi libi ini Ensrefi tu. ₂₇A gi En makti tu fu krutu sma, bika En na a Manpikin fu Libisma. ₂₈Un no mus ferwondru fu a sani disi. Bika a ten e kon tak' ala den dedesma o yere En sten, ₂₉dan den o opo kmoto fu den grebi. Den sma di ben du bun, o opo baka fu kisi a libi fu têgo. Ma den sma di ben du ogri, o opo baka fu kisi strafu. ₃₀Mi no kan du noti fu Misrefi. Mi e krutu soleki fa Mi yere, èn Mi e krutu nanga leti, bika Mi no e suku fu du Mi eigi wani, ma fu du a wani fu a Wan di seni Mi kon. ₃₁Efu Mi e taki fu Misrefi, a no abi warti. ₃₂Ma wan trawan de di e taki fu Mi, èn Mi sabi tak' san En e taki fu Mi tru.

₃₃Un ben seni aksi Yohanes èn a ben ferteri un san tru. ₃₄Mi no abi libisma fanowdu fu taki fu Mi, ma Mi e taki disi fu Gado kan ferlusu unu. ₃₅Yohanes ben de leki wan lampu di ben bron e gi faya, èn un ben prisiri fu wan pisten nanga a faya di a ben gi. ₃₆Ma sani de di prenspari moro leki den sani san Yohanes ben taki fu Mi. Dati na den wroko di a P'pa gi Mi fu du. Na den wroko dati Mi e du, èn den e sori tak' a P'pa seni Mi kon. ₃₇Èn a P'pa di seni Mi kon, na En ben taki fu Mi tu. Noiti un yere En sten èn noiti un si En. ₃₈A wortu fu En no e tan ini unu, fu di un no e bribi ini a Wan di A seni kon. ₃₉Un e ondrosuku Gadowortu, bika un e prakseri tak' na drape un o feni a libi fu têgo. A Wortu disi e taki fu Mi, ₄₀ma toku un no wani kon na Mi fu kisi a libi fu têgo.

₄₁Mi no e suku grani fu libisma. ₄₂Ma Mi sabi fa un de. A lobi fu Gado no de ini unu. ₄₃Mi kon ini a nen fu Mi P'pa, ma un no wani Mi. Ma te wan tra sma kon ini en eigi nen, un o teki en. ₄₄Un e suku grani fu tra sma, ma un no e suku grani fu a wan enkri Gado. Fa un o man bribi dan? ₄₅Un no mus prakseri tak' Mi o tyari unu go krutu na a P'pa. Ma na Moses, a sma tapu san un poti un howpu, na en o krutu unu. ₄₆Efu un ben bribi Moses, un bo bribi Mi tu, bika a ben skrifi fu Mi. ₄₇Ma efu un no e bribi san Moses skrifi, fa un o man bribi san Mi e taki?”