Markus 13

₁Di Yesus e waka kmopo na ini a mamakerki, wan fu den man fu En taigi En taki: “Meister, luku fa den ston moi èn fa den oso bigi.”

₂Dan Yesus taigi en taki: “Yu e si ala den bigi oso disi? Den alamala o broko te na gron. No wan ston o tan na tapu wan trawan.”

₃Baka dati Yesus go sidon tapu a Oleifbergi, na abrasei fu a mamakerki. Petrus, Yakobus, Yohanes, nanga Andreas wawan ben de nanga En. Dan den aksi En taki: ₄“Masra, taigi unu: Oten a sani dati o psa? San o de a marki di o sori tak' den sani dati de fu psa?”

₅Dan Yesus bigin taigi den taki: “Un mus luku bun tak' no wan sma no kori unu! ₆Furu sma o du leki den na Mi. Den o taki tak' den na a Mesias, èn den o kori furu sma. ₇Te un sa yere tak' kondre e feti èn tak' feti de fu broko, un no mus skreki. Den sani disi mus fu psa, ma dati a no a kba ete. ₈Bika a wan folku o feti nanga a tra folku, èn a wan kondre o feti nanga a trawan. A gron o seki hebi na difrenti presi, èn angriten o de. Ma ala den sani disi na soso a bigin fu a tranga ten di o kon.

₉Ma un mus luku bun, bika den sa tyari un go na krutu, èn den o fon unu na ini den kerki fu den. Fu Mi ede den o srepi unu go na fesi granman nanga kownu. Dan un mus teki den okasi dati fu ferteri den fu Mi. ₁₀Bika fosi grontapu kba, sma fu ala folku mus yere a Bun Nyunsu.

₁₁Te den kisi unu tyari go na krutu, un no abi fu broko un ede na fesi san un mus taki. Ma un mus taki san Gado o gi un fu taki a yuru dati. Bika a no unu sa taki fu unsrefi, ma a Santa Yeye sa meki un taki.” ₁₂Dan Yesus taki moro fara: “Wan brada sa gi en eigi brada abra fu den kiri en. Wan p'pa sa du a srefi sani nanga en pikin. Pikin sa tron feyanti fu den m'ma nanga den p'pa, èn den o kiri den. ₁₃Fu Mi ede no wan sma no o man si un na ai. Ma Gado sa ferlusu a sma di sa hori doro te na a kba.”

₁₄“Te un si tak' a groskin-sani di e pori ala sani, de pe a no mus de, dan den sma di de ini Yudea mus lon go na den bergi. (Suma e leisi a sani disi mus suku fu ferstan en.) ₁₅A sma di de tapu a daki fu en oso, no mus saka go ini en oso fu go teki sani. ₁₆Èn a sma di de ini en gron, no mus drai go baka fu go teki en krosi. ₁₇Den uma di de nanga bere, nanga den di abi pikin na bobi a pisten dati, o de fu sari. ₁₈Un mus begi tak' a sani disi no o psa ini a kowruten. ₁₉Bika ini den dei dati, wan bigi pinaten o kon. Kmopo na a bigin di Gado ben meki ala sani, kon te leki now, noiti sowan ten ben de. Èn noiti moro sowan ten o kon baka. ₂₀Efu Gado no ben syatu a ten disi, no wan sma bo tan na libi. Ma Gado syatu a ten fu den sma fu En ede, di A ben teki gi Ensrefi.

₂₁Efu wan sma sa taigi unu ini a ten dati taki: ‘Luku, a Mesias de dyaso,’ noso: ‘Luku, A de drape,’ no bribi en. ₂₂Sma o kon di o du leki den na a Mesias. Trawan o du leki den na profeiti. Den o du wondru èn den o meki un si marki. Nanga dati den o suku fu kori den sma di Gado ben teki gi Ensrefi. ₂₃Ma un dati mus luku bun! Mi e warskow unu na fesi.”

₂₄“Ma ini den dei baka a pinaten dati, a son o kon dungru èn a munkenki no o gi faya. ₂₅Den stari o fadon kmopo na loktu, èn ala den makti di de na loktu o seki. ₂₆Dan den sma o si a Manpikin fu Libisma e kon tapu den wolku nanga bigi krakti nanga glori. ₂₇Dan A o seni den engel fu En go fu tyari den sma kon na wan di A ben teki gi Ensrefi. A o teki den fu den fo uku fu grontapu pe a winti e kmopo, èn fu a moro fara presi fu grontapu go te na a moro fara uku fu heimel.

₂₈Un teki wan figabon leki eksempre. Te a bigin sproiti èn a e bigin gi nyun wiwiri, dan un sabi tak' a dreiten de fu kon. ₂₉Na so un mus sabi tu tak' te un si den sani disi e bigin psa, dan a ten de krosbei, a de let' na mofodoro. ₃₀Fu tru Mi e taigi un taki: Ala den sani disi o psa te den sma fu a ten disi de na libi ete. ₃₁Wan dei heimel nanga grontapu no o de moro, ma den sani san Mi taki o tan fu têgo.”

₃₂“No wan sma sabi a dei noso a yuru te a o psa. Den engel di de na heimel no sabi, èn a Manpikin srefi no sabi. Na a P'pa wawan sabi. ₃₃Fu dat'ede un mus tan na ai, fu di un no sabi oten a yuru o doro. ₃₄Un mus si a sani leki wan man di go na wan tra kondre, dan a libi en oso gi den knekti fu en. A libi wroko gi alamala, san nanga san den mus du, èn a taigi a waktiman tak' a mus hori wakti. ₃₅So un mus de na ai. Bika un no sabi oten a man di abi a oso o drai kon baka. Un no sabi efu a o kon na neti, mindrineti, musudei noso mamanten. ₃₆Un sorgu tak' te a drai kon baka, a no kon miti unu e sribi. ₃₇San Mi e taigi unu, Mi e taigi ala sma: Un mus de na ai!”