Markus 15

₁Fruku mamanten den prenspari domri, den fesiman fu a folku, den sabiman fu Gado wèt nanga den man fu a Grankrutu fu den Dyu, kon makandra fu taki san den o du. Dan den tai Yesus tyari go gi Pilatus. ₂Pilatus aksi En taki: “Na Yu na a Kownu fu den Dyu?”

Yesus piki en taki: “Na leki fa yu taki.”

₃Den prenspari domri ben gi wan lo kragi fu Yesus. ₄Dan Pilatus aksi Yesus taki: “Yu no e piki tapu san den man disi e taki fu Yu? Arki omeni kragi den e gi fu Yu.” ₅Ma Yesus no piki moro fara, so Pilatus ben ferwondru.

₆Ala yari tapu a Paskafesa, Pilatus ben gwenti fu lusu wan straf'man di den sma ben wani tak' a mus lusu. ₇Now wan man Barabas ben sroto makandra nanga den man di ben meki dyugudyugu, èn di ben kiri wan sma ini a dyugudyugu. ₈Den sma kon na fesi dan den bigin aksi Pilatus fu a lusu wan straf'man soleki fa a ben gwenti. ₉Dan Pilatus aksi den taki: “Un wani fu mi lusu a Kownu fu den Dyu gi unu?” ₁₀A aksi den so, bika a kon si tak' den prenspari domri ben tyari Yesus kon gi en fu di den ben dyarusu na En tapu.

₁₁Ma den prenspari domri sutu faya gi a bigi grupu sma fu den taigi Pilatus tak' a mus lusu Barabas na ini Yesus presi. ₁₂Pilatus aksi den sma baka taki: “Dan san mi mus du nanga a man di un e kari Kownu fu den Dyu?”

₁₃Ne den sma bari taki: “Spikri En na wan kroisi!”

₁₄Pilatus aksi den taki: “Ma sortu ogri a man disi du?”

Ma den sma bigin bari moro tranga taki: “Spikri En na wan kroisi!” ₁₅Dan fu di Pilatus ben wani du den sma wan prisiri, a lusu Barabas, dan a meki den wipi Yesus èn tyari En go spikri na wan kroisi.

₁₆Den srudati tyari Yesus go ini a krutu-oso, san den ben kari a Pretorium, dan den kari den tra srudati kon. ₁₇Den weri wan lila krosi gi En, dan den brei wan banti fu makataki poti tapu En ede. ₁₈Dan den bigin gi En odi. Den taki: “Odi, Kownu fu den Dyu!” ₁₉Baka dati den bigin naki En nanga wan tiki tapu En ede. Den spiti na En tapu, dan den go na tapu den kindi fu gi En grani. ₂₀Di den kba meki spotu nanga En, den puru a lila krosi san den ben weri gi En, dan den weri En eigi krosi gi En baka. Dan den tyari En gwe fu go spikri na wan kroisi.

₂₁Wan man ben kmopo na boiti e kon, dan den dwengi en fu tyari a kroisi fu Yesus. A man disi ben nen Simon, èn a ben de fu a foto Sirena. A ben de a p'pa fu Aleksander nanga Rufus. ₂₂Dan den tyari Yesus go na a presi san den e kari Golgota. Golgota wani taki: Dede-ede Presi. ₂₃Den gi En win moksi nanga mirre fu A dringi, ma A no dringi en. ₂₄Dan den spikri En na a kroisi. Baka dati den prati En krosi, ma den ben hari a lot fosi fu luku suma o teki sortu pisi fu a krosi.

₂₅A ben de neigi yuru mamanten di den spikri En na a kroisi. ₂₆Den ben skrifi fu sanede den spikri En. Den skrifi: “A Kownu fu den Dyu.” ₂₇Makandra nanga En den spikri tu fufuruman: wan na En let'anu sei, èn a trawan na En kruktu-anu sei. ₂₈Na so san skrifi ini a Santa Buku kon tru. A skrifi taki: Den si en leki wan abani.

₂₉Den sma di ben e waka psa afrontu Yesus. Den seki den ede èn den taki: “Ai, a no Yu bo broko a Santa Presi dan Yu meki en baka ini dri dei? ₃₀We, yepi Yusrefi! Saka kmopo fu a kroisi dan!”

₃₁Den prenspari domri makandra nanga den sabiman fu Gado wèt ben meki spotu nanga Yesus tu. Den taki: “A ben yepi trawan, ma A no man yepi Ensrefi. ₃₂Efu Yu na a Mesias, a Kownu fu Israel, saka kmopo fu a kroisi now, meki un si. Dan wi sa bribi.”

Den man di ben spikri makandra nanga En, ben kosi En tu.

₃₃Di twarfu yuru doro, a heri kondre kon dungru te leki dri yuru bakadina. ₃₄Dan a yuru dati Yesus bari taki: “Elohi, Elohi, lama sabaktani?” Dati wani taki: Mi Gado, Mi Gado, fu sanede Yu gwe libi Mi?

₃₅Di wantu sma di ben tnapu drape yere a sani disi, den taki: “Arki! A e kari Elia.” ₃₆Dan wan fu den lon go teki wan sponsu. A nati en nanga swa win, a fasi en na wan tiki, dan a langa en gi Yesus fu A dringi. A taki: “Wakti, meki un luku efu Elia o kon puru En na a kroisi.”

₃₇Ma Yesus bari nanga tranga sten, dan En bro koti. ₃₈Dan a garden ini a Santa Presi priti langalanga na mindri fu loktu kon te na gron. ₃₉Di a kapten fu den srudati di ben tnapu e luku Yesus, si fa En bro koti, a taki: “Trutru, a Man disi ben de a Manpikin fu Gado!”

₄₀Wantu frow ben tnapu fu fara e luku. Wantu fu den frow dati ben de: Salome, Maria fu a foto Magdala, nanga Maria a m'ma fu Yoses nanga Yakobus a yonguwan. ₄₁Di Yesus ben de na ini Galilea, den frow disi ben e waka na En baka, èn den ben e yepi En. Wan lo tra umasma ben drape tu di ben kon nanga En na Yerusalem.

₄₂A ben de a dei fosi a sabadei èn neti ben de fu tapu. Tapu a dei dati den sma ben e meki ala sani klari gi a sabadei. ₄₃Dan Yosef fu a foto Arimatea teki dek'ati go na Pilatus fu aksi en a dedeskin fu Yesus. A man disi ben de wan prenspari man fu a Grankrutu fu den Dyu èn a ben angri tu fu Gado kon tiri libisma. ₄₄Pilatus ben ferwondru tak' Yesus ben dede kba. A seni kari a kapten fu den srudati, dan a aksi en efu Yesus dede kba. ₄₅Di a kapten taigi en tak' A dede, Pilatus gi Yosef a dedeskin. ₄₆Yosef bai wan linnen krosi, a puru a skin fu Yesus na a kroisi, dan a domru en na ini. Baka dati a poti Yesus na ini wan grebi san den ben diki ini a bergiskin. Dan a lolo wan bigi ston na a mofo fu a grebi fu tapu en. ₄₇Maria fu Magdala nanga Maria, a m'ma fu Yoses, si pe Yosef poti a skin fu Yesus.