Dag 100 van 365- 1 Samuel 15-16 en Lucas 10:25-42

₁Wan leisi Samuel taigi Saul taki: “Na mi MASRA ben seni fu salfu yu leki kownu fu En pipel, leki kownu fu Israel. We dan, arki san MASRA abi fu taki! ₂Na disi MASRA fu ala sani e taki: Mi o strafu den Amalekitisma fu di den ben tapu pasi gi den Israelitisma, di den ben e kmoto fu Egipte. ₃Dat' meki yu mus hari go feti nanga Amalek. Yu mus kiri èn pori ala sani di den abi. No abi sari-ati gi den. Yu mus kiri man nanga uma, yongu pikin nanga nyunyun pikin, kaw, skapu, kameel nanga buriki.” ₄Ne Saul seni kari ala den srudati fu Israel fu kon na Telaim. Makandra den ben de tu hondro dusun srudati di ben de nanga futu, nanga ete tin dusun srudati fu Yuda. ₅Di Saul nanga a legre doro na a foto fu den Amalekitisma, den go didon luru ini wan pikin drei liba. ₆Dan Saul seni warskow den Kenitisma taki: “Un kmoto drape. Un kmoto mindri den Amalekitisma, fu mi no kiri un makandra nanga den. Un ben bun gi den Israelitisma di den ben kmoto na Egipte.” Wantron den Kenitisma kmoto na mindri den Amalekitisma. ₇Baka dati Saul nanga a legre kiri den Amalekitisma fu Hawila te go miti Sur, na oostsei fu Egipte. ₈Agag, a kownu fu den Amalekitisma, den grabu libilibi. Ala den tra Amalekitisma den kiri nanga deigri. ₉Ma Saul nanga den srudati fu en no kiri Agag. Den no kiri den moro bun skapu, krabita nanga kaw tu. Fu san ben libi ete den teki den bun yongu skapu nanga ala sani di ben abi warti. Den sani dati den no ben wani kiri noso pori. Soso den meti di no ben abi warti nanga den wan di no ben bun, den kiri.

₁₀Ne MASRA taigi Samuel taki: ₁₁“A e hati Mi tak' Mi meki Saul tron kownu. Bika a drai en baka gi Mi èn a no du san Mi ben komanderi en.” Samuel atibron, èn a begi MASRA a heri neti dati. ₁₂Fruku mamanten Samuel gwe fu go miti Saul. Ma den taigi en taki Saul ben go na Karmel fu go poti wan marki drape fu sma memre a feti di a ben wini, dan baka dati a ben saka go na Gilgal. ₁₃Di Samuel kon miti nanga Saul, Saul taigi en taki: “Meki MASRA blesi yu. Mi du san MASRA ben komanderi mi.” ₁₄Ma Samuel piki en taki: “Dan san wani taki a babari fu skapu nanga kaw di mi e yere drape?” ₁₅Saul piki taki: “Dati na den moro bun skapu, krabita nanga kaw, di den srudati tyari kmoto fu den Amalekitisma. Den no kiri den meti disi fu di den wani gi den leki ofrandi na MASRA, a Gado fu yu. Ma ala den trawan wi kiri.” ₁₆Ne Samuel taigi Saul taki: “Tan tiri, dan mi o taigi yu san MASRA taigi mi esde neti.” Saul piki taki: “Yu kan taki.” ₁₇Dan Samuel taigi en taki: “Aladi yu ben e si yusrefi leki noti, yu tron a edeman fu den lo fu Israel. Na yu MASRA salfu leki kownu fu Israel. ₁₈MASRA ben komanderi yu fu yu go feti nanga den ogri-atisma, den Amalekitisma. Yu ben mus feti nanga den èn kiri den te leki no wan ben de na libi moro. ₁₉Prefu yu du san MASRA taigi yu fu du, yu go teki den sani fu den èn yu du san no bun ini MASRA ai srefsrefi.” ₂₀Ne Saul piki Samuel taki: “Mi du san MASRA taigi mi, mi go pe A ben seni mi go. Mi kiri ala den Amalekitisma èn mi grabu Agag, a kownu fu den, tyari kon dyaso. ₂₁Ma den srudati teki den moro bun skapu, krabita nanga kaw, di den ben mus kiri, fu gi den leki ofrandi ini Gilgal, na MASRA, a Gado fu yu.” ₂₂Ma Samuel piki en taki: “MASRA no abi a srefi prisiri te sma e bron meti leki ofrandi gi En nanga te sma e du san A e taki. Arki, fu du san MASRA taki, betre moro dan fu srakti meti leki ofrandi. Fu arki san A e taki, betre moro a fatu fu man skapu. ₂₃Fu tru, efu yu no wani du san MASRA e taki, a de a srefi leki te yu e du tofruwroko. Efu yu no wani arki san MASRA e taki, a de a srefi leki te yu e dini kruktu gado. Fu di yu no du san MASRA ben komanderi yu, MASRA poti yu na wan sei, yu no sa de kownu moro langa.” ₂₄Dan Saul piki Samuel taki: “Mi sondu, bika mi no du san MASRA ben komanderi mi èn san yu ben taigi mi. Ma fu di mi ben e frede den srudati, mi du san den ben wani. ₂₅Ma now mi e begi yu fu yu kan gi mi pardon fu mi sondu. Drai go baka nanga mi, dan mi sa anbegi MASRA.” ₂₆Ma Samuel piki en taki: “Mi no sa drai go baka nanga yu. Bika yu ben poti san MASRA komanderi yu na wan sei, dat' meki A poti yu na wan sei tu. Yu no sa de kownu fu Israel moro langa.” ₂₇Di Samuel drai fu gwe, Saul grabu a ondrosei pisi fu a langa dyakti fu Samuel ori. Ma a pisi dati priti kmoto. ₂₈Ne Samuel taigi en taki: “Leki fa a krosi priti kmoto, na so MASRA e puru yu tide leki kownu fu Israel. A o poti wan tra sma di betre moro yu. ₂₉A Gado fu Israel di e tan a srefi fu têgo, no e lei. A no e kenki wan besroiti tu di A teki. Bika En a no libisma, taki a sa kenki a besroiti di A teki.” ₃₀Ma Saul taigi Samuel taki: “Mi sondu, ma no meki mi fesi fadon fesi den edeman fu a legre èn fesi den tra Israelitisma. Drai go baka nanga mi, dan mi sa anbegi MASRA, yu Gado.” ₃₁Ne Samuel drai go baka nanga Saul. Dan Saul anbegi MASRA.

₃₂Baka dati Samuel taki: “Un tyari kownu Agag fu Amalek kon gi mi.” Nanga prisiri Agag waka go miti Samuel, dan a taki: “Fu tru, mi no abi fu frede moro tak' mi o dede.” ₃₃Ma Samuel piki en taki: “Soleki fa a deigri fu yu meki uma lasi den pikin, na so yu m'ma o tron wan uma tu di lasi en pikin.” Dan Samuel kapu Agag pis'pisi fesi a santa presi fu MASRA na Gilgal.

₃₄Baka dati Samuel drai go baka na Rama, èn Saul drai go na en oso na Gibea, a foto pe a ben gebore. ₃₅Noiti moro Samuel ben wani si Saul, ma a ben e sari fu Saul ede. A ben hati MASRA taki A ben poti Saul leki kownu fu Israel.

₁Dan MASRA taigi Samuel taki: “No sari moro langa fu Saul ede, bika na Mi poti en na wan sei leki kownu fu Israel. Furu a tutu fu yu nanga oleif-oli, dan yu e go gi Mi na Betlehem, na wan man di nen Isai. Bika na wan fu den boi fu en Mi teki fu poti leki kownu.” ₂Ma Samuel aksi taki: “Fa mi o man go du a sani dati drape? Efu Saul yere, a o kiri mi.” Ma MASRA piki en taki: “Tyari wan yongu kaw te yu e go, èn taigi den sma tak' na srakti yu kon srakti en leki wan ofrandi gi MASRA. ₃Yu mus kari Isai te yu o tyari a ofrandi. Dan Mi o meki yu sabi san yu mus du. Na a sma di Mi o sori yu, yu mus salfu gi Mi.” ₄Samuel du san MASRA taigi èn a go na Betlehem. Di a doro drape, den edeman fu a foto waka kon miti en nanga beifi ati. Den aksi en taki: “Na bun nyunsu yu tyari kon?” ₅Samuel piki den taki: “Iya, mi kon fu srakti wan meti leki ofrandi gi MASRA. Un krin unsrefi dan un kan nyan fu a ofrandi nanga mi.” Samuel kari Isai nanga den boi fu en tu èn ensrefi krin den fu den ben kan teki prati. ₆Di den e kon na inisei, en ai fadon tapu Eliab. Dan Samuel prakseri taki: “Na en mus de a wan di MASRA wani tak' mi mus salfu.” ₇Ma MASRA taigi en taki: “No luku fa a moi noso fa a bigi, bika a no en Mi wani. A no prenspari fa libisma e si sani, bika libisma e luku san den ai e si, ma MASRA e luku a ati.” ₈Dan Isai kari Abinadab, èn a meki a go na Samuel. Ma Samuel taki: “MASRA no wani a disi tu.” ₉Baka dati Isai meki Sama go na Samuel. Ma Samuel taki: “A disi srefi MASRA no wani.” ₁₀Na so Isai ben meki den seibi boi fu en go na Samuel. Ma Samuel taigi Isai taki: “MASRA no teki no wan fu den disi.” ₁₁Dan Samuel aksi Isai taki: “Na disi na ala den boi fu yu.” Isai piki en taki: “A moro yongu wan mankeri. A de ini a wei e luku den skapu.” Dan Samuel taigi Isai taki: “Un seni kari en, bika un no o nyan solanga a no kon.” ₁₂So Isai seni kari en. A boi ben luku gesontu, a ben abi moi ai, èn a ben moi fu si. Ne MASRA taigi Samuel taki: “Na en na a wan, salfu en.” ₁₃So Samuel teki a tutu nanga oleif-oli, dan a salfu David leti pe den brada fu en tnapu. Bigin fu a dei dati a yeye fu MASRA kon tapu David, èn a no gwe libi en moro. Baka dati Samuel drai go baka na Rama.

₁₄Ma a yeye fu MASRA ben gwe libi Saul, èn MASRA ben seni wan takruyeye di ben e pina en. ₁₅Ne den knekti fu Saul taigi en taki: “Na wan takruyeye di Gado seni, e pina yu. ₁₆Taigi wi leki knekti di e wroko gi yu, fu un go suku wan sma di man prei bun tapu wan citer. Dan te a takruyeye, di Gado seni, kon na yu tapu, a sma mus prei, dan yu o firi betre.” ₁₇Ne Saul taigi den knekti fu en taki: “A bun, un luku fu wan sma di kan prei bun, dan un tyari en kon gi mi.” ₁₈Dan wan fu den knekti taki: “Mi sabi wan sma di kan prei bun. Na wan manpikin fu Isai, wan man fu Betlehem. Na wan moi boi di abi dek'ati, a de wan bun fetiman èn a sabi taki bun. MASRA de nanga en.” ₁₉Dan Saul seni boskopuman go na Isai nanga a boskopu disi: “Seni yu manpikin David gi mi, di e luku den skapu fu yu.” ₂₀Dan Isai gi David wan buriki, brede, wan saka nanga win nanga wan yongu bokoboko fu tyari go gi Saul. ₂₁Na so David doro Saul èn bigin wroko gi en. Saul ben lobi David trutru, èn a poti David fu syow den fetisani fu en. ₂₂Dan Saul seni aksi Isai tu taki: “Meki David tan wroko gi mi, bika mi lobi fa a de.” ₂₃Ala leisi te a takruyeye di Gado ben seni, ben kon tapu Saul, David ben e teki a citer èn a ben e prei. Dati ben e du Saul bun, a ben e firi betre baka èn a takruyeye ben e gwe libi en.

₂₅Wan dei wan sabiman fu Gado wèt go na Yesus fu tesi En. A taki: “Meister, san mi mus du fu kan kisi a libi fu têgo?” ₂₆Yesus piki en taki: “San skrifi ini a wèt fu Gado? San yu e leisi drape?” ₂₇A man piki taki: “A skrifi taki: Yu mus lobi Masra, yu Gado, nanga yu heri ati, nanga yu heri sili, nanga ala yu krakti, èn nanga yu heri ferstan. Èn yu mus lobi tra sma soleki fa yu lobi yusrefi.” ₂₈Yesus taigi en taki: “Yu piki bun. Du dati, dan yu o kisi a libi fu têgo.” ₂₉Ma a man ben wani krin en fesi, dat' meki a aksi Yesus taki: “Ma suma na den tra sma?” ₃₀Dan Yesus piki en taki: “Wan man ben kmopo fu Yerusalem e go na a foto Yeriko. Di a ben de na pasi, fufuruman grabu en. Den teki ala san a ben abi, den fon en te fu dede, dan den gwe libi en didon drape. ₃₁Baka wan pisten wan priester ben e psa na tapu a srefi pasi. Di a si a man, a koti abra go waka na a tra sei fu a pasi. ₃₂Owktu wan Lefitiman ben psa drape. Di a si a man, ensrefi koti abra go waka na a tra sei. ₃₃Baka dati wan man fu Samaria kon psa. Di a doro krosbei, a si a man didon tapu a pasi, dan a firi sari gi en. ₃₄A go na a man, a krin den soro fu en nanga oli nanga win, dan a tai den. Baka dati a poti a man na tapu en eigi buriki. A tyari en go na wan oso pe yu ben kan yuru wan presi fu tan, dan a sorgu gi en. ₃₅A tra dei, fosi a man fu Samaria gwe, a gi a man di abi a presi tu solfrumoni. A taigi en taki: ‘Luku a man gi mi. Efu a moni no sari, mi sa pai yu te mi drai kon baka.’ ” ₃₆Dan Yesus aksi a sabiman fu Gado wèt taki: “Taigi Mi, sortu wan fu den dri man disi sori a man di den fufuruman grabu taki a de wan sma di e lobi tra sma?” ₃₇A piki taki: “A wan di sori sari-ati gi a tra man.” Dan Yesus taigi en taki: “Go, dan yu du a srefi sani tu.”

₃₈Yesus nanga den man di ben e teki leri fu En waka go moro fara. Di den doro na wan fu den dorpu, wan uma di ben nen Marta kari Yesus kon na en oso. ₃₉A ben abi wan s'sa di nen Maria. Maria ben sidon na Yesus futusei e arki san Yesus ben e leri. ₄₀Ma Marta ben e broko en ede nanga ala den sani san ben de fu du. Dan a go na Yesus èn a taigi En taki: “Masra, Yu no abi bisi taki mi s'sa e libi mi wawan fu du ala a wroko? Yu no kan taigi en fu a kon yepi mi?” ₄₁Ma Yesus piki en taki: “Marta, Marta. Yu e broko yu ede, èn yu e feti nanga someni sani. ₄₂Ma na wan sani nomo de fanowdu. Èn Maria teki a bun sani dati, san no wan sma no man puru na en anu.”