Dag 107 van 365- 2 Samuel 1-2 en Lucas 14:1-24

₁Baka a dede fu Saul, David ben drai go baka na Siklag baka di a ben wini den Amalekitisma. A ben de drape tu dei kba. ₂Tapu a di fu dri dei wan man fu a legre fu Saul kon doro drape. A ben priti en krosi èn a ben poti santi tapu en ede fu sori tak' a e sari. Di a doro na David a boigi te na gron fu sori en lespeki. ₃Dan David aksi en taki: “Pe yu kmoto?” A man piki taki: “Na a legrekampu fu Israel. Mi ben kan lowe ete.” ₄David aksi en moro fara taki: “San psa drape? Ferteri mi!” A man piki taki: “Den srudati ben abi fu lon gi a feti. Furu fu den lasi den libi. Saul nanga en manpikin Yonatan dede tu.” ₅Ne David aksi a yonkuman di tyari a boskopu kon taki: “Fa yu du sabi tak' Saul nanga en manpikin Yonatan dede?” ₆A yonkuman piki taki: “Fu mi koloku mi ben de tapu a bergi Gilboa. Ne mi si Saul anga tapu a lansri fu en. A ten dati den fetiwagi nanga den srudati tapu asi fu den Filistijnsma ben de krosbei fu en kba. ₇Dan Saul drai luku èn di a si mi a kari mi kon na en. Mi go èn mi aksi en san mi kan du gi en. ₈A aksi mi suma na mi. Dan mi taigi en tak' mi na wan Amalekitisma. ₉Ne a taigi mi taki: ‘Mi e begi yu, kon tnapu dyaso dan yu dyuku mi kiri. Bika mi e bro ete, ma mi dede afupasi kba.’ ₁₀Ne mi waka go na en, dan mi dyuku en kiri. Bika mi ben si tak' a ben lasi a feti kba èn taki a no ben abi langa fu libi moro. Baka dati mi puru a kroon fu en ede nanga a bui na en anu. Na den mi tyari kon gi yu, mi masra.” ₁₁Di a man taki dati David priti en krosi. Ala den man di ben de nanga en du a srefi sani tu. ₁₂Dan den low, den krei èn den faste te neti. Den du dati fu di Saul, en manpikin Yonatan nanga den srudati fu Israel ben dede ini a feti. ₁₃Baka dati David aksi a yonkuman di ben tyari a boskopu taki: “Suma na yu?” A yonkuman piki taki: “Mi na wan Amalekitisma. Mi p'pa ben kon libi dyaso leki wan doroseisma.” ₁₄Ne David aksi en taki: “Fa yu du prefuru fu kiri a sma di MASRA srefi ben salfu leki kownu?” ₁₅Ne David kari wan fu den yonkuman fu en, dan a komanderi en taki: “Dyuku en kiri.” Ne a man fu David dyuku en kiri. ₁₆Dan David taigi a Amalekitiman taki: “Na yu eigi fowtu meki yu o dede, bika yu taki nanga yu eigi mofo tak' na yu kiri a sma di MASRA srefi salfu leki kownu.”

₁₇Dan David singi wan dede-oso singi gi Saul nanga en manpikin Yonatan. ₁₈A ben taki tak' ala den sma fu Yuda ben mus leri a singi disi, a Singi fu a Bo. A singi disi de ini a Buku fu den sma di de fu fertrow.

₁Baka wan pisten David aksi MASRA taki: “Mi kan go na wan fu den foto fu Yuda?” MASRA piki en taki: “Yu kan go.” David aksi moro fara taki: “Na sortu wan fu den mi kan go?” MASRA piki en taki: “Na Hebron.” ₂Dan David hari go na Hebron nanga den tu uma fu en: Akinoam fu Yisreel nanga Abigail, a uma di ben e libi fosi nanga Nabal fu Karmel. ₃David ben tyari den man tu di ben de nanga en. Iniwan fu den nanga en uma nanga en pikin. Dan den go libi ini den dorpu krosbei fu Hebron. ₄Dan den man fu Yuda go na David na Hebron, dan den salfu en leki kownu fu a lo fu Yuda.

Baka dati den taigi David tak' na den sma fu Yabes ini Gilead beri Saul. ₅Ne David seni boskopuman go drape nanga a boskopu taki: “MASRA sa blesi unu fu a bun di un du fu beri un masra Saul. ₆Mi e winsi tak' MASRA sa meki un si a lobi fu En èn sori unu tak' A de fu fertrow. Mi srefi sa libi bun nanga unu fu di un ben du a sani dati. ₇Dat' meki un no mus lasi ati, ma un mus abi dek'ati. A tru tak' un masra Saul dede, ma a lo fu Yuda salfu mi leki den kownu.”

₈Abner, a manpikin fu Ner, ben de a edeman fu a legre fu Saul. A srefi ten dati a ben teki Isboset, wan fu den manpikin fu Saul, tyari go na Makanaim. ₉Drape a poti Isboset leki kownu fu a kontren fu Gilead, Aser, Yisreel, Efraim nanga Benyamin. Sobun, a poti en leki kownu fu heri Israel. ₁₀Isboset, a manpikin fu Saul, ben abi fotenti yari di a tron kownu fu Israel. A tiri a kondre tu yari. Na soso a lo fu Yuda ben teki David leki den tiriman. ₁₁Na ini Hebron David tiri a lo fu Yuda seibi yari nanga siksi mun langa.

₁₂Wan dei Abner, a manpikin fu Ner, hari kmoto fu Makanaim go na Gibeon nanga a legre fu Isboset, a manpikin fu Saul. ₁₃Yoab, a manpikin fu Seruya, ben hari gwe nanga a legre fu David tu. Dan den tu legre miti na a watrapeti fu Gibeon. Abner nanga den man fu en tan tnapu na wan sei fu a watrapeti èn Yoab nanga den man fu en tan tnapu na a tra sei. ₁₄Dan Abner taigi Yoab taki: “Meki wi meki wantu fu den moro bun fetiman fu wi feti nanga densrefi fu luku sortu wan fu den moro bun.” Yoab agri nanga dati. ₁₅Den bun fetiman waka kon na fesi èn den teri den: twarfu fu a lo fu Benyamin di ben o feti gi Isboset, nanga twarfu fu den srudati fu David. ₁₆Iniwan fu den man grabu a wan nanga san a ben o feti na en edewiwiri, dan den dyuku densrefi na den bere nanga den deigri. Ala den tutenti-na-fo man fadon dede wantron. Na dat' meki den e kari a presi dati ini Gibeon: Helkat-Hasurim.

₁₇A dei dati wan hebi feti broko èn Abner nanga den srudati fu Israel lasi a feti fu den srudati fu David. ₁₈Ala den dri manpikin fu Seruya ben de na a feti: Yoab, Abisai nanga Asael. Asael ben man lon leki wan dia. ₁₉Dan a bigin lon baka Abner. A ben e tan lon na en baka èn a ben ori en ai soso na en tapu. ₂₀Abner drai luku, dan a aksi taki: “Na yu Asael?” Asael piki taki: “Iya na mi.” ₂₁Dan Abner taigi en taki: “Lon go na wan tra sei! Go grabu wan fu den srudati dan yu e teki den fetisani fu en.” Ma Asael tan lon na en baka. ₂₂Abner taigi Asael baka taki: “Tapu fu lon na mi baka. No dwengi mi fu kiri yu, bika dati o pori mi nanga yu brada Yoab.” ₂₃Ma Asael no ben wani tapu fu lon na en baka. Ne Abner sutu Asael nanga bakasei fu a lansri fu en na en ondrobere. A sutu en so tranga tak' a lansri ben de fu si na bakasei. Asael fadon dede leti drape. Ala sma di ben e psa na a presi pe Asael ben fadon dede, tan tnapu. ₂₄Ma Yoab nanga Abisai hari go baka Abner. Di a son ben e saka den ben doro a pikin bergi Ama, oostsei fu Giak, na a pasi di e go na a dreisabana fu Gibeon. ₂₅Dan den srudati fu a lo fu Benyamin kon na wan baka leki wan grupu nanga Abner, dan den go tnapu na tapu wan pikin bergi. ₂₆Dan Abner bari taigi Yoab taki: “Wi no kan tan kiri makandra nomo. Yu no e ferstan tak' a baka pisi o de soso sari? Olanga yu o meki den srudati fu yu lon ete baka den eigi kondreman fosi yu taigi den fu tapu nanga dati?” ₂₇Ne Yoab piki en taki: “Mi e sweri na a libi Gado, tak' efu yu ben taki disi moro esi, den man fu mi ben tapu fu kon na baka den eigi kondreman sensi tide mamanten.” ₂₈Dan Yoab bro tapu a tutu èn den srudati fu en tan tnapu. Dan den tapu fu go baka a legre fu Israel èn so a feti kon tapu. ₂₉A heri neti dati Abner nanga den srudati fu en waka ini a Yordandal. Baka dati den koti a Yordanliba abra èn den waka a heri mamanten te leki den ben doro Makanaim. ₃₀Ma Yoab ben kari ala den man fu en kon na wan, di a ben tapu fu go baka Abner. Drape a ben kon na krin taki Asael nanga tin-na-neigi srudati fu David ben kon lasi libi. ₃₁Ma den man fu David ben kiri dri hondro siksitenti fu den srudati fu Benyamin di Abner ben e tiri. ₃₂Dan Yoab nanga den man fu en teki a dedeskin fu Asael èn den tyari en go poti ini a grebi fu en p'pa na Betlehem. Baka dati den waka a heri neti èn den doro baka na Hebron di dei ben e bigin krin.

₁Wan dei Yesus go nyan na a oso fu wan fu den edeman fu den Fariseiman. Den man ben luru En fu luku efu A ben o du wan sani, fu di a ben de wan sabatdei. ₂Now wan man ben drape fesi Yesus di ben abi wan siki san ben meki en skin sweri. ₃Dan Yesus aksi den sabiman fu Gado wèt nanga den Fariseiman taki: “San a wèt e taki? A fiti efu a no fiti fu dresi wan sma tapu a sabatdei?” ₄Ma den man no taki noti. So Yesus teki a man na en anu, A dresi en, dan A meki a man gwe. ₅Dan Yesus aksi den taki: “Efu wan boi noso wan burkaw fu wan fu unu fadon go ini wan peti tapu a sabatdei, a no wantewante un e go puru en?” ₆Ma den man no ben man piki En noti.

₇Di Yesus si fa den tra sma di ben kisi kari fu kon nyan, ben teki den moro prenspari presi sei a tafra, A gi den wan agersitori. A taki: ₈“Te wan sma kari yu kon na wan trow-oso, no go sidon te na fes'sei. Bika kande a sma kari wan tra sma kon di hei moro yu. ₉Dan a sma di kari un fu kon nyan, o kon taigi yu taki: ‘Opo, meki a man disi sidon dya.’ Dati o de wan syen gi yu, èn yu o abi fu go sidon te na bakasei. ₁₀Ma te wan sma kari yu fu kon nyan, go sidon na bakasei. Dan kande te a sma di e hori a fesa kon na inisei, a sa taigi yu taki: ‘Mi mati, kon moro na fes'sei.’ A sani dati o de wan grani gi yu na fesi ala den tra sma di de na tafra. ₁₁Bika ibri sma di e opo ensrefi, den o broko en saka. Ma den o opo a sma di e saka ensrefi.”

₁₂Dan Yesus taigi a Fariseiman di ben kari En kon, taki: “Te yu o kari sma fu kon nyan, awinsi na bakadina noso neti, dan yu no mus kari yu mati kon, noso den brada nanga den tra famiri fu yu, noso den gudusma fu yu birti. Bika wan tra leisi den kan gi yu wan kari tu. Na so yu o kisi pai baka fu san yu ben du. ₁₃Ma te yu o kari sma fu kon nyan, yu mus kari den pôtisma, den malengrisma, den lanman nanga den breniman. ₁₄Te yu du dati, blesi o de na yu tapu, fu di den sma disi no abi noti fu gi yu baka. Èn Gado o pai yu tapu a dei di den sma di libi bun ini En ai, o kon na libi baka.”

₁₅Di wan fu den sma di ben sidon na tafra nanga Yesus, yere san A taki, a taigi En taki: “A sma di o de ini a fesa te Gado o tiri libisma na wan blesi sma.” ₁₆Dan Yesus piki en nanga wan agersitori. A taki: “Wan man ben o hori wan bigi fesa èn a ben kari bun furu sma kon. ₁₇Di a yuru doro fu go na tafra, a seni en knekti fu go kari den sma taki: ‘Un kon! A tafra seti kba.’ ₁₈Ma den alamala bigin taki tak' den no man kon moro. A fosi wan taki: ‘Mi bai wan gron, èn mi mus go nomonomo fu go luku en. Mi e begi yu fu no mandi nanga mi fu di mi no man kon moro.’ ₁₉Wan trawan taki: ‘Mi bai tin burkaw, èn mi e go luku fu si efu den bun. Mi e begi yu fu no mandi nanga mi fu di mi no man kon moro.’ ₂₀Wan trawan taki baka: ‘A no tumsi langa di mi trow nanga mi uma. Fu dat'ede mi no man kon moro.’ ₂₁A knekti drai go baka, go taigi en masra san den man taki. Dan a masra ati bron. A taigi en knekti taki: ‘Go wantewante na tapu den strati nanga den pikinpikin pasi fu a foto. Tyari den pôtisma, den malengrisma, den breniman nanga den lanman kon dya.’ ₂₂Di a knekti go te a kon, a taki: ‘Masra, mi du kba san yu taigi mi. Ma presi de ete.’ ₂₃Dan a masra taigi a knekti taki: ‘Go na den pasi fu den bakabini nanga den boiti presi, dan yu dwengi den sma fu kon. Bika mi oso mus furu. ₂₄Yu kan bribi mi: No wan fu den sma di mi ben seni kari o tesi a nyanyan fu mi.’ ”