Dag 11 van 365- Genesis 27-28 en Matteüs 8:18-34

₁Isak ben kon breni di a kon owru. A kari Esau en fosi boi, dan a taki: “Mi boi.” Esau piki: “Iya, mi e arki.” ₂Ne Isak taigi en taki: “Luku, mi kon owru èn mi no sabi oten mi o dede. ₃Dat' meki yu mus teki yu ontisani, yu peiri nanga yu bo, dan yu go na busi go sutu wan meti gi mi. ₄Bori wan switi nyanyan, leki fa yu sabi taki mi lobi en, dan yu e tyari en gi mi meki mi nyan. Dan te mi nyan mi o blesi yu fosi mi dede.”

₅Rebeka ben arki di Isak ben e taki nanga Esau. Di Esau gwe na busi fu go sutu a meti gi en p'pa, ₆Rebeka taigi Yakob taki: “Arki, mi yere fa yu p'pa taigi yu brada Esau taki: ₇‘yu mus go sutu wan meti gi mi. Bori wan switi nyanyan meki mi nyan. Dan mi o blesi yu na MASRA fesi, fosi mi dede.’ ₈Dat' meki yu mus arki san mi e taigi yu, mi boi. ₉Go na den meti fu unu, tyari den tu moro bun bokoboko gi mi, dan mi o bori wan switi nyanyan gi yu p'pa, leki fa wi sabi taki a lobi en. ₁₀Dan yu mus tyari en gi en fu a nyan fu a kan blesi yu.” ₁₁Ma Yakob taigi en m'ma taki: “Esau skin lai nanga wiwiri. Mi skin no abi wiwiri. ₁₂Kande p'pa o firifiri mi skin. Dan a o si mi leki wan bedrigiman èn a o fluku mi prefu a blesi mi.” ₁₃En m'ma taigi en taki: “Meki a fluku kon na mi tapu, mi boi. Du san mi taigi yu, go teki den bokoboko kon.” ₁₄So Yakob go teki den bokoboko kon gi en m'ma. Dan en m'ma bori wan switi nyanyan, leki fa a ben sabi taki a p'pa lobi en. ₁₅Rebeka teki den moro bun krosi fu en fosi boi Esau tu, di a ben abi ini oso. Dan a meki Yakob, a yonguwan, weri den. ₁₆Den buba fu den bokoboko a poti abra den anu nanga a neki fu Yakob di no ben abi wiwiri ₁₇Baka dati a gi en boi a switi nyanyan di a ben bori nanga brede.

₁₈Dan Yakob go na en p'pa. A taki: “P'pa.” Isak piki taki: “Iya. Sortu wan fu den boi fu mi na en?” ₁₉Yakob piki en p'pa taki: “Na mi, Esau, yu fosi boi. Mi du san yu ben taigi mi fu du. Opo sidon, dan yu e nyan a bus'meti, fu yu kan blesi mi.” ₂₀Isak piki en boi baka taki: “Mi boi, yu feni a meti sutu esi.” Yakob piki taki: “Na fu di MASRA, a Gado fu yu, meki sani waka bun gi mi.” ₂₁Dan Isak taigi Yakob taki: “Mi boi, kon moro krosbei meki mi fasi yu, fu mi kan sabi trutru efu yu na mi boi Esau.” ₂₂So Yakob go moro krosbei fu en p'pa Isak. Isak fas'fasi en dan a taki: “Na Yakob sten, ma den anu na fu Esau.” ₂₃Isak no ben man sabi taki na Yakob, fu di en anu ben lai wiwiri leki di fu en brada Esau. Ma fu di a ben wan blesi en, meki a aksi en taki: ₂₄“Yu na mi boi Esau, trutru?” Yakob piki: “Iya.” ₂₅Ne Isak taigi en taki: “Tyari a nyanyan kon, fu mi nyan fu a bus'meti fu mi boi, fu mi kan blesi yu.” Yakob tyari a nyanyan gi en, dan Isak nyan. Yakob tyari win gi en tu, èn Isak dringi. ₂₆Baka dati en p'pa Isak taigi en taki: “Kon moro krosbei, mi boi, dan yu e bosi mi.” ₂₇Yakob kon moro krosbei fu en p'pa dan a bosi en. Di Isak smeri en krosi, a blesi en dan a taki:

₃₀Yakob go na dorosei baka di Isak blesi en. Leki fa a go na dorosei, na so Esau drai kon fu onti. ₃₁Esau srefi bori wan switi nyanyan tu. A tyari en go gi en p'pa dan a taigi en taki: “P'pa opo sidon. Nyan fu a bus'meti di mi bori gi yu fu yu kan blesi mi.” ₃₂Ne Isak aksi taki: “Suma na yu?” Esau piki taki: “Na mi, Esau, yu fosi boi.” ₃₃Isak skreki srefsrefi. Dan a aksi taki: “Ma suma ben de a sma dan, di ben sutu bus'meti tyari kon gi mi? Mi nyan ala sani fosi yu doro, dan mi blesi en. Èn a blesi sa tan na en tapu.” ₃₄Di Esau yere san en p'pa taki, a hati en. A bari gi en p'pa taki: “Blesi mi, mi p'pa. Blesi mi tu.” ₃₅Ma Isak piki en taki: “Yu pikinbrada kon tapu wan bedrigi fasi, dan a kisi a blesi di yu ben mus kisi.” ₃₆Ne Esau taki: “Den sma abi leti fu kari en Yakob, bika na di fu tu leisi kba di a bedrigi mi. A teki den leti di mi ben abi leki fosi pikin. Luku, now a teki mi blesi tu.” Dan Esau aksi en p'pa taki: “Yu no abi no wan blesi moro gi mi?” ₃₇Isak piki taki: “Arki, mi poti en leki yu edeman. Ala den brada fu en sa de knekti fu en. Mi gi en nyanyan nanga dringi. San mi o man du gi yu moro, mi boi?” ₃₈Esau aksi en p'pa baka taki: “Mi p'pa na a wan enkri blesi dati nomo yu ben abi? Blesi mi tu mi p'pa, blesi mi tu.” Dan a bari krei. ₃₉Ne Isak taigi en taki:

₄₁Esau ben hori Yakob na ati fu a blesi di en p'pa ben blesi Yakob. A ben e waka nanga a prakseri taki: “No langa moro, dan wi o abi fu low gi p'pa. Ma baka dati mi o kiri Yakob.” ₄₂Di Rebeka kisi fu yere san en fosi boi, Esau, ben wani du, a seni kari a pikinwan, Yakob, dan a taigi en taki: “Arki, yu brada wan kiri yu, soso fu du yu wan sani baka. ₄₃Dat' meki yu mus arki mi, mi boi. Opo, lowe go es'esi na mi brada Laban, na ini Haran. ₄₄Tan wan pisten drape, te leki a atibron fu yu brada saka. ₄₅Te en ati kowru èn a fergiti san yu ben du en, dan mi san kari yu kon. Mi no wani lasi un ala tu tapu a srefi dei.”

₄₆Dan Rebeka taigi Isak taki: “Mi no lobi den Hetiti-uma srefsrefi. Mi bribi taki mi o dede efu Yakob teki wan uma fu a kondre disi tu.”

₆Esau ben kon ferstan taki Isak blesi Yakob èn taki a seni en go na Padan-Aram fu teki wan frow drape. A ben kon ferstan tu taki Isak ben taigi en taki a no mus teki wan Kananiti uma leki frow, ₇èn taki Yakob ben arki en p'pa nanga en m'ma dan a go na Padan-Aram. ₈Di Esau kon ferstan taki en p'pa no ben lobi den uma fu Kanaan srefsrefi, ₉a go na Ismael, a manpikin fu Abraham. Drape a teki Makalat, a umapikin fu Ismael leki frow, na sei den tra frow di a ben abi kba. Makalat ben de a s'sa fu Nebayot.

₁₀Na so Yakob kmoto fu Berseba dan a go na Haran. ₁₁Dan a doro na wan presi pe a tan sribi fu di a son ben saka kba. A teki wan ston di ben drape poti ondro en ede dan a fadon na sribi drape. ₁₂Dan a kisi wan dren. Ini a dren a si wan trapu di ben tnapu na grontapu, ma a ben e doro te na heimel. Engel fu Gado ben e kren èn saka fu a trapu. ₁₃MASRA ben tnapu na loktusei fu a trapu èn A taigi Yakob taki: “Mi na MASRA, a Gado fu yu afo Abraham nanga yu p'pa Isak. Mi sa gi yu nanga den bakapikin fu yu a gron tapu san yu e didon. ₁₄Mi sa gi yu someni bakapikin leki a santi. A kondre fu den sa bradi ensrefi go na westsei, na oostsei, na noordsei nanga zuidsei. Ala folku na grontapu sa winsi makandra fu Mi blesi den leki fa Mi blesi yu nanga den bakapikin fu yu. ₁₅Arki, Mi sa de nanga yu èn Mi sa kibri yu awinsi pe yu e go. Mi sa tyari yu kon baka na a kondre disi, bika Mi no sa libi yu te leki Mi du sa Mi pramisi yu.”

₁₆Yakob wiki dan a taki: “MASRA de trutru dyaso na a presi disi èn mi no ben sabi dati.” ₁₇Dan a taki fredefrede: “A presi disi na wan presi fu frede trutru. Disi mus de a presi pe Gado e tan. Disi na a poort fu heimel.” ₁₈A tra mamanten, frukufruku, Yakob teki a ston di a ben poti ondro en ede. A poti a ston tnapu, fu memre san ben psa drape, dan a kanti oli na en tapu. ₁₉Fosi den sma ben e kari a presi dati Lus. Ma Yakob kari en Betel. ₂₀Dan a sweri taki: “Efu Gado sa de nanga mi, efu A kibri mi tapu a pasi di mi e go, efu A gi mi nyanyan nanga krosi, ₂₁èn efu A tyari mi kon bun baka na mi famiri, dan MASRA sa de mi Gado. ₂₂A ston disi, di mi poti tnapu, sa de wan presi fu anbegi Gado èn fu ala sani di A gi mi, mi sa gi En tin prosenti.”

₁₈Di Yesus si fa wan heri ipi sma ben e lontu En, A taigi den man di ben e teki leri fu En taki: “Meki un abra go na a tra sei fu a meer.” ₁₉Ma dan wan sabiman fu Gado wèt kon na En. A taigi En taki: “Meister, mi sa go nanga Yu ala sei pe Yu e go.” ₂₀Yesus piki en taki: “Krab'dagu abi den olo, èn den pikinfowru abi den nesi. Ma a Manpikin fu Libisma no abi wan presi fu kanti En ede.” ₂₁Dan wan tra man di ben e teki leri fu En, taigi En taki: “Masra, gi mi a okasi fu go beri mi p'pa fosi.” ₂₂Ma Yesus piki en taki: “Kon nanga Mi, èn meki den dedewan beri den eigi dede.”

₂₃Dan Yesus go ini a boto èn den man di ben e teki leri fu En go na En baka. ₂₄Ma di den e koti abra, wantron so wan tranga winti bigin wai tapu a watra, taki den skwala ben e naki go ini a boto. Ma Yesus ben e sribi. ₂₅Ne den man go wiki En taki: “Masra, yepi wi! Wi e dede!” ₂₆Yesus piki den taki: “Fu sanede un e frede so? A bribi fu un pikin!” Dan A opo, A bari a winti nanga a watra, èn wantron ala sani kon tiri. ₂₇Den man ferwondru. Den taki: “Suma na a man disi? Winti nanga watra srefi e du san A e taki!”

₂₈Di Yesus doro na abrasei ini a kontren fu den sma fu Gadara, tu man di ben abi takruyeye na den tapu, waka kon miti En. Den man disi ben kmoto ini a berpe, èn den ben ogri sote taki no wan sma no ben man psa drape. ₂₉Dan den man bari taki: “Yu Manpikin fu Gado, san Yu wani nanga unu? Na kon Yu kon dyaso fu pina wi fosi a ten doro?” ₃₀Krosbei fu drape wan bigi ipi agu ben e nyan. ₃₁Ne den takruyeye begi Yesus taki: “Efu Yu o yagi un puru na tapu den man, dan tangitangi, seni un go na ini den agu.” ₃₂Yesus taigi den taki: “Kmopo fu dyaso!” Dan den takruyeye kmopo na den man tapu, go na ini den agu. Ne ala den agu lon saka fu a bergi go ini a meer, dan den dede ini a watra. ₃₃Den man di ben e luku den agu, lon gwe. Den lon go na ini a foto, dan den ferteri ala sani san den si, sosrefi san ben psa nanga den man di ben abi den takruyeye na den tapu. ₃₄Dan ala sma kmopo fu a foto go miti Yesus. Di den si En, den aksi En tangitangi fu A gwe libi a kontren fu den.