Dag 12 van 365- Genesis 29-30 en Matteüs 9:1-17

₁Dan Yakob teki pasi go moro fara na a kondre fu den sma na oostsei. ₂Di a doro a luku lontu dan a si wan peti ini wan wei. A ben de wan peti pe den skapuman ben e meki den meti dringi. Dri grupu skapu ben didon lontu a peti èn wan bigi ston ben tapu a peti. ₃Te den skapuman ben tyari den skapu kon na wan, den ben e dribi a ston puru dan den ben e meki den meti dringi. Baka dati den ben e poti a ston baka na en presi. ₄Dan Yakob aksi den skapuman taki: “Brada, sortu foto un e libi?” Den piki taki: “Wi na fu Haran.” ₅Ne Yakob aksi den taki: “Un sabi Laban, a manpikin fu Nakor?” Den piki: “Un sabi en iya.” ₆Yakob aksi den taki: “A e go bun nanga en?” Den pikin taki: “Iya. Luku, Rachel en umapikin e kon nanga den skapu fu en.” ₇Dan Yakob taki: “Dei krin ete. A no ten ete fu tyari den skapu kon na wan. Meki den dringi, dan un meki den go nyan grasi baka.” ₈Ma den man piki en taki: “Wi no o du dati, te leki ala den grupu skapu doro dyaso fosi. Te dati psa, dan wi e dribi a ston puru fu a petimofo fu den meti dringi.”

₉Yakob ben e taki nanga den man ete di Rachel doro nanga den skapu fu en p'pa bika a ben de en wroko fu wei den skapu. ₁₀Rachel ben de a umapikin fu Laban, a brada fu Yakob m'ma. Fa Yakob si en, a waka go na a peti dan a lolo a ston puru fu a petimofo fu meki den skapu fu Laban, a brada fu en m'ma, dringi. ₁₁Dan Yakob bosi Rachel èn a krei trangatranga. ₁₂Baka dati a ferteri Rachel taki en na wan famiri fu en p'pa sei èn taki en na a manpikin fu Rebeka. Ne Rachel lon gwe es'esi go ferteri en p'pa.

₁₃Di Laban yere a nyunsu fu Yakob, a boi fu en s'sa, a lon go es'esi go miti en dan a brasa en, èn a bosi en. ₁₄Laban taigi en taki: “Yu na wan trutru famiri fu mi.”

Yakob ben de wan mun langa na den ₁₅di Laban taigi en taki: “A no fu di yu na mi famiri meki yu abi fu wroko fu soso gi mi. Taigi mi omeni mi mus pai yu.” ₁₆Now a ben de so taki Laban ben abi tu umapikin. A bigiwan ben nen Lea èn a pikinwan Rachel. ₁₇Lea ben abi moi ai, ma Rachel ben moi fu en ede te na en futu. ₁₈Yakob ben lobi Rachel. So a taigi Laban taki: “Mi wan wroko seibi yari gi yu, gi Rachel, a moro yongu umapikin fu yu.” ₁₉Laban piki en taki: “Yu kan tan. A moro betre efu mi gi en na yu, dan taki mi gi en na wan tra man.” ₂₀So Yakob tan wroko seibi yari fu Rachel ede. Ma fu di a ben lobi en, meki a ben gersi leki na wantu dei nomo.

₂₁Baka dati a taigi Laban taki: “A ten doro kba. Gi mi mi frow fu mi trow nanga en.” ₂₂Ne Laban seni kari ala sma fu a birti dan a gi wan bigi fesa. ₂₃Ma neti fu en Laban teki Lea tyari go gi Yakob. So Yakob sribi nanga Lea. ₂₄Laban ben gi Lea en umasrafu Silpa tu, fu a tron a srafu fu Lea. ₂₅A tra mamanten fu en Yakob kon si taki na Lea. Ne a taigi Laban taki: “San yu du nanga mi? Mi wroko gi yu gi Rachel. San meki yu bedrigi mi?” ₂₆Laban piki en taki: “Dyaso wi no abi a gwenti taki a yonguwan e trow fosi a bigiwan. ₂₇Psa a wiki fu a trowfesa nanga a disi. Baka dati mi o gi yu a trawan, ma yu o abi fu wroko ete seibi yari gi mi.” ₂₈Dan Yakob du dati. A psa a wiki fu a trowfesa nanga en. Baka dati Laban gi Yakob en umapikin Rachel leki frow. ₂₉Laban gi Rachel Bilha, wan tra umasrafu fu en. ₃₀Yakob sribi nanga Rachel tu. A ben lobi Rachel ma a no ben lobi Lea. So a tan wroko ete seibi yari gi Laban.

₃₁Di MASRA si taki Yakob no ben lobi Lea, A meki Lea kisi pikin, ma Rachel no ben man kisi. ₃₂Lea hori bere, dan a kisi wan manpikin di a kari Ruben. A taki: “MASRA si mi nowtu fu tru. Now mi masra sa lobi mi.” ₃₃Dan Lea hori bere baka dan a kisi ete wan boi. A taki: “MASRA yere trutru taki mi masra no lobi mi. Dat' meki a gi mi a disi tu.” So a kari a boi Simeon. ₃₄Baka dati a hori bere baka dan a kisi wan boi. A taki: “Now mi masra sa tan na mi sei, bika na dri boi mi kisi gi en.” Dan a kari a boi Lefi. ₃₅Lea hori bere baka dan a kisi wan boi. A taki: “Now mi sa prijse MASRA.” Dan a kari a boi Yuda. Baka dati Lea tapu fu kisi pikin.

₁Di Rachel si taki a no ben man kisi pikin gi Yakob, a bigin dyarusu tapu en s'sa. Ne a taigi Yakob taki: “Meki pikin nanga mi noso mi o dede.” ₂Ma Yakob kisi atibron gi Rachel dan a taigi en taki: “Mi a no Gado. Na En meki taki yu no man kisi pikin.” ₃Ne Rachel taigi en taki: “Luku Bilha, a umasrafu fu mi dyaso. Sribi nanga en, dan a kan meki pikin na tapu mi kindi. Sofasi mi sa tron m'ma tu.” ₄Dan a gi Yakob Bilha, en umasrafu leki frow èn Yakob sribi nanga en. ₅Bilha hori bere dan a kisi wan manpikin gi Yakob. ₆Ne Rachel taki: “Gado meki mi kisi leti. A yere mi èn A gi mi wan boi.” Dat' meki a kari a boi Dan. ₇Dan Bilha, a umasrafu fu Rachel, hori bere baka dan a kisi a di fu tu boi gi Yakob. ₈Ne Rachel taki: “Mi ben abi fu feti nanga mi s'sa fu Gado sori mi en sari-ati, èn mi wini.” So a kari a boi Naftali.

₉Di Lea si taki a no ben e kisi pikin moro, a meki Yakob teki Silpa, a umasrafu fu en, leki frow. ₁₀Dan Silpa kisi wan boi gi Yakob. ₁₁Ne Lea taki: “Mi abi koloku baka.” So a kari a boi Gad. ₁₂Dan Silpa kisi a di fu tu boi gi Yakob. ₁₃Ne Lea taki: “Mi na wan koloku uma. Den tra uma sa taki tak' mi abi koloku trutru.” Dan a kari a boi Aser.

₁₄Ini a ten pe tarwe e koti, Ruben ben go na gron, dan a feni lobi-apra. Ne a tyari den gi Lea, en m'ma. Dan Rachel aksi Lea taki: “Gi mi wantu fu den lobi-apra fu yu boi.” ₁₅Lea piki en taki: “Yu teki mi masra kba dan now yu wan den lobi-apra fu mi boi tu.” Ma Rachel taigi en taki: “Efu yu gi mi den lobi-apra fu yu boi, yu kan sribi nanga Yakob tide neti.” ₁₆Di Yakob kmoto neti fu gron e kon, Lea waka miti en dan a taigi en taki: “Yu mus sribi tide neti na mi, bika mi yuru yu nanga den lobi-apra fu mi boi.” A neti dati Yakob sribi nanga Lea. ₁₇Gado ben yere a begi fu Lea. Lea hori bere dan a meki a di fu feifi boi gi Yakob. ₁₈Ne Lea taki: “Gado gi mi san mi ben mus kisi. Bika mi ben meki mi umasrafu sribi nanga mi masra.” So a kari a boi: Isakar. ₁₉Lea hori bere baka dan a meki a di fu siksi boi gi Yakob. Ne a taki: ₂₀“Gado gi mi wan moi kado. Disi leisi mi masra sa tan na mi fu di mi meki siksi manpikin gi en.” Dan a kari a boi Sebulon. ₂₁Baka dati Lea kisi wan umapikin di a kari Dina.

₂₂Ma Gado no ben fergiti Rachel. A yere en begi èn A meki a kisi pikin. ₂₃So Rachel hori bere dan a kisi wan boi. Ne a taki: “Gado puru a syen di ben de na mi tapu.” ₂₄Rachel kari a boi Yosef, dan a taki: “Mi winsi taki MASRA sa gi mi ete wan manpikin.”

₂₅Di Rachel kisi Yosef, Yakob taigi Laban taki: “Meki mi drai go baka na mi kondre pe mi e tan. ₂₆Meki den frow nanga den pikin fu mi go nanga mi. Na fu den mi wroko gi yu èn yu sabi o bun mi wroko gi yu.” ₂₇Ma Laban taigi en taki: “Sari mi. Bika mi kon si taki na fu yu ede MASRA e blesi mi.” ₂₈A taigi Yakob tu taki: “Taigi mi omeni yu wani taki mi mus pai yu, dan mi sa gi yu dati.” ₂₉Ma Yakob piki en taki: “Yu sabi bunbun o bun mi wroko gi yu èn o bun mi luku den meti gi yu. ₃₀Fosi mi kon dyaso yu no ben abi furu. Ma now den furu fu di MASRA e blesi yu awinsi pe mi tyari den meti go. Now mi wan wroko gi misrefi tu.” ₃₁Laban aksi baka taki: “San mi mus gi yu?” Ma Yakob piki en taki: “Yu no abi fu pai mi. Mi sa go wei den meti baka èn hori ai na den tapu, efu yu meki mi du a wan sani disi: ₃₂Mi o waka psa ala den skapu nanga krabita fu yu tide, dan mi o puru ala den penipeni wan, den wan di abi flaka nanga den blaka wan poti na wan sei. Disi sa de mi paiman. ₃₃Tamara, te yu kon luku san mi ben teki leki paiman, a sa de fu si taki mi no fufuru yu. Ala krabita di no penipeni noso flaka èn ala skapu di no blaka yu kan si leki na fufuru mi fufuru den.” ₃₄Ne Laban piki taki: “A bun. A sa de leki fa yu taki.” ₃₅Ma a srefi dei dati Laban puru ala den strepistrepi bokoboko nanga den wan di ben flaka poti na wan sei. Fu den krabita a puru alamala di ben penipeni noso di ben flaka. Alamala di ben abi wan weti flaka a puru. A puru ala den blaka skapu tu, dan a meki den boi fu en hori den gi en. ₃₆Dan Laban gwe bun fara nanga den meti taki yu ben abi fu waka dri dei fu doro na den. Ma Yakob ben tan luku den tra meti fu Laban.

₃₇Dan Yakob broko taki fu a populierbon, fu a amandrabon nanga a plataanbon. A piri a buba fu den taki sowan fasi taki a weti fu den taki ben de fu si leki strepi. ₃₈A poti den taki disi leti fesi den meti ini den watrabaki pe den ben e kon dringi. Te den meti ben kon dringi den manwan ben wan dyompo den umawan. ₃₉Efu den manwan ben dyompo den umawan leti pe den taki de, den ben e kisi pikinwan di ben strepistrepi, penipeni noso di ben abi flaka. ₄₀Yakob ben poti den skapu aparti èn te den manwan ben e dyompo den umawan a ben sorgu taki den ben e luku go na den strepistrepi nanga den blaka meti fu Laban. So Yakob ben e kisi en eigi grupu skapu. ₄₁Ala leisi te den moro bun meti ben wani dyompo den umawan, Yakob ben e poti den taki ini den watrabaki fu den ben dyompo den umawan leti pe den taki ben de. ₄₂Te a ben de swakiswaki meti, Yakob no ben e poti den taki ini den watrabaki. So Laban ben e kisi soso den swaki meti, ma Yakob ben e kisi den moro tranga meti. ₄₃Tapu a fasi disi Yakob ben e kon gudu moro nanga moro. A ben abi furu skapu nanga krabita, srafu, kameel nanga buriki.

₁So Yesus go ini wan boto, dan A koti a Meer fu Galilea abra go na a foto pe A ben e libi. Ne den sma tyari wan lanman na tapu wan bedi kon na En. ₂Di Yesus si a bribi fu den, A taigi a lanman taki: “Mi mati, no frede. Yu kisi pardon fu yu sondu.” ₃Ma wantu fu den sabiman fu Gado wèt taki na ini densrefi taki: “Fa a man disi kan taki so? A e afrontu Gado!” ₄Ma Yesus ben sabi san den e prakseri, dat' meki A taigi den taki: “Fu sanede un e prakseri takru sani ini un ati? ₅Bika san moro makriki? Fu taigi a man taki a kisi pardon fu en sondu, noso fu taigi en fu a opo waka? ₆Ma Mi o sori unu taki a Manpikin fu Libisma abi makti dyaso na grontapu fu gi sma pardon fu sondu.” Dan Yesus taigi a lanman taki: “Opo, teki yu bedi, dan yu go na oso.” ₇Ne a man opo, dan a go na en oso. ₈We, di den sma si a sani dati, den kisi bigi lespeki gi Gado. Den gi Gado glori fu di A gi libisma sowan makti.

₉Di Yesus kmoto fu drape e gwe moro fara, A si wan man di ben nen Mateus. A ben sidon pe den sma ben mus kon pai lantimoni. Yesus taigi en taki: “Kon nanga Mi!” Ne Mateus opo èn a bigin waka na Yesus baka. ₁₀Bakaten Yesus go nyan na Mateus oso. Furu fu den man di e piki lantimoni, nanga tra sondusma, ben sidon e nyan makandra nanga Yesus nanga den man di ben e teki leri fu En. ₁₁Di den Fariseiman si a sani dati, den aksi den man di ben e teki leri fu Yesus taki: “Fu sanede a Meister fu unu e nyan makandra nanga den man di e piki lantimoni, èn nanga den sondusma?” ₁₂Ma di Yesus yere san den man aksi, A piki den taki: “Sma di gesontu no abi datra fanowdu, ma na sma di e siki abi datra fanowdu. ₁₃Un go ondrosuku san Gado wani taki nanga a sani disi: ‘Mi no wani den meti di un e tyari leki ofrandi gi Mi, ma Mi wani fu un abi sari-ati nanga trawan.’ Mi no kon fu kari bun sma, ma Mi kon fu kari sondusma.”

₁₄Baka dati wantu fu den man di ben e teki leri fu Yohanes a Dopuman kon na Yesus, dan den aksi En taki: “Wi nanga den Fariseiman gwenti fu faste. Ma fu sanede den man fu Yu no e du dati?” ₁₅Yesus piki den taki: “Sma di de na wan trow-oso no e sari solanga a trowmasra de drape nanga den. Ma a ten o kon taki den o puru a trowmasra na den mindri. Dan den sa faste. ₁₆No wan sma e lapu wan owru krosi nanga wan pisi nyun wan. Bika te a nyun wan o krempi, a o hari a owru wan priti èn a olo o kon moro bigi. ₁₇Sosrefi yu no e poti win di no lepi ete na ini winsaka di kon owru kba, noso den saka o priti èn yu o lasi a win nanga den saka. Fu dat'ede yu e poti win di no lepi ete na ini nyun winsaka, fu ala tu kan tan bun.”