Dag 115 van 365- 2 Samuel 21-22 en Lucas 18:24-43

₁Ini a ten di David ben de na makti, wan angriten ben de ini a kondre dri yari langa. Dan David begi MASRA èn MASRA piki en taki: “Na fu di Saul nanga en famiri meki brudu lon, bika Saul ben kiri den Gibeonitisma.” ₂Ne kownu seni kari den Gibeonitisma èn a taki nanga den. Den Gibeonitisma no ben de Israelitisma, ma den ben de Amoritisma di ben tan na libi. Langa na fesi, den Israelitisma ben meki wan sweri nanga den Amoritisma tak' den no bo kiri den. Ma Saul ben kiri furu fu den Gibeonitisma, bika a ben wani tak' na soso den Israelitisma nanga den sma fu Yuda ben mus abi fu taki ini a kondre. ₃Dan David aksi den Gibeonitisma taki: “San mi kan du fu meki a ogri di miti unu bun baka? Bika na dati wawan kan broko a fluku di de tapu a pipel fu MASRA.” ₄Den Gibeonitisma piki taki: “Gowtu nanga solfru no o man tyari wan kba kon na a tori fu wi nanga Saul nanga en famiri. Wi no abi a leti tu fu kiri wan Israelitisma.” David aksi den baka taki: “Dan san un wani tak' mi mus du gi unu?” ₅Den piki kownu taki: “Saul ben wani kiri wi èn a ben poti na en ede fu tyari wan kba kon na a libi fu wi alasei ini Israel. ₆Gi wi seibi bakapikin fu en, den mus de mansma. Dan wi o anga den, na MASRA fesi, ini Gibea, a foto pe Saul, a man di MASRA ben poti leki kownu, ben e libi.” Kownu piki den tak: “Mi sa gi un san un aksi.” ₇Ma kownu no gi den Mefiboset, a manpikin fu Yonatan, a granpikin fu Saul, fu a ferbontu ede di en nanga Yonatan ben meki na MASRA fesi. ₈Ma kownu seni grabu Armoni nanga Mefiboset, den tu manpikin di Saul ben meki nanga Rispa, a umapikin fu Aya, nanga den feifi boi di Merab, a umapikin fu Saul, ben meki nanga Adriyel, a manpikin fu Barsilai fu Mekola. ₉Dan David gi den abra na den Gibeonitisma. Den dati anga den seibi boi tapu a bergi na MASRA fesi. Den kiri ala seibi manpikin a srefi momenti. Dati psa ini den fosi dei te sma e bigin koti nyanyan ini den gron, te den e koti groto. ₁₀Dan Rispa, a umapikin fu Aya, bradi wan pisi krosi nanga san den e meki saka tapu den ston dan a tan drape. A tan drape na a bigin fu a ten pe den sma ben bigin koti nyanyan ini den gron te kon miti a ten di alen bigin fadon baka. A ben hori wakti na den dedeskin fu fowru no ben go na den te deiten noso taki krasimeti ben go na den te neti. ₁₁Di David kisi fu yere san Rispa, a umapikin fu Aya ben du, ₁₂a go na den sma fu a foto Yabes ini Gilead, go teki den bonyo fu Saul nanga fu en manpikin Yonatan. Bika baka di den Filistijnsma ben wini a feti nanga Saul nanga en legre na Gilboa, den ben anga den dedeskin fu Saul nanga Yonatan tapu a pren fu a foto Bet-San. Dan den sma fu Yabes ben go tapu wan kibrifasi go puru den dedeskin. ₁₃David go puru den bonyo fu Saul nanga en manpikin Yonatan drape. A meki den teki den bonyo tu fu den manpikin di ben anga, ₁₄dan a beri Saul nanga en manpikin Yonatan na ini Sela ini a kontren fu Benyamin, ini a grebi fu a p'pa Kis. Den sma du ala sani leki fa kownu ben komanderi den. Baka dati Gado bigin sorgu gi a kondre baka.

₁₅Feti ben broko baka mindri den Filistijnsma nanga Israel. David nanga den srudati fu en ben hari go feti nanga den Filistijnsma te leki David ben kon weri srefsrefi. ₁₆Yisbibenob, wan Refaitiman, ben wani kiri David. A man disi ben weri nyun fetikrosi, èn a lansri fu en ben e wegi sowan dri kilo. ₁₇Ma Abisai, a manpikin fu Seruya, go yepi David. A naki a Filistijnman trowe dan a kiri en. Ne den srudati fu David sweri gi en taki: “Noiti moro yu mus kon na feti nanga wi. Bika Gado pramisi tak' na den pikin nanga bakapikin fu yu sa tiri a kondre disi fu têgo.” ₁₈No langa baka dati, wan feti broko baka nanga den Filistijnsma na Gob. Dan Sibekai fu Husa, kiri Saf, wan tra Refaitiman. ₁₉Wan tra leisi di den ben e feti baka nanga den Filistijnsma na Gob, Elkanan, a manpikin fu Yari fu Betlehem, kiri Goliat fu a foto Gat. A tiki fu a lansri fu a man dati ben deki leki wan pikin postu. ₂₀Baka dati wan feti broko na Gat. Wan Refaitiman ben drape di ben bigi srefsrefi. A ben abi siksi finga na ibri anu nanga siksi futufinga na ibri futu. Ala nanga ala, a ben abi tutenti-na-fo finga na en anu nanga futu. ₂₁A man disi ben e afrontu Israel, ma Yonatan, a manpikin fu David brada Sima, kiri en. ₂₂Den fo man disi di David nanga den srudati fu en kiri ben de Refaitiman fu Gat.

₁Disi na a singi di David singi gi MASRA baka di MASRA ferlusu en ini a makti fu ala den feyanti fu en, nanga fu a makti fu Saul: ₂A taki:

₂₄Di Yesus si dati, A taki: “A tranga gi sma di lai moni fu den poti densrefi ondro a tiri fu Gado. ₂₅Bika a moro makriki gi wan asaw fu psa ini wan nanai-olo, dan fu wan guduman poti ensrefi ondro a tiri fu Gado.” ₂₆Den sma di yere san Yesus taki, aksi En taki: “Suma Gado o man ferlusu dan?” ₂₇Yesus piki taki: “San libisma no man du, Gado kan du.” ₂₈Dan Petrus taki: “Luku, wi libi ala sani san wi ben abi fu waka na Yu baka.” ₂₉Yesus piki den taki: “Fu tru Mi e taigi un taki: Gado o pai ala sma di libi en oso, noso en uma noso en brada, den bigisma fu en noso en pikin, nomo fu meki taki Gado kon tiri libisma. ₃₀Gado o pai en someni tron moro furu na ini a libi disi. Èn ini a ten san e kon, A o gi en a libi fu têgo.”

₃₁Yesus kari den twarfu man fu En kon na wan sei, dan A taigi den taki: “Luku, un de na pasi fu go na Yerusalem. Ala sani san den profeiti ben skrifi taki o psa nanga a Manpikin fu Libisma, o psa tu. ₃₂Bika den o gi En abra na den sma di no de Dyu. Den o teki En leki spot'popki, den o kosi En, èn den o spiti na En tapu. ₃₃Den o wipi En, dan den o kiri En. Ma tapu a di fu dri dei, A o kon baka na libi.” ₃₄Ma den man no ben ferstan noti fu san Yesus taki. A ben dangra den, èn den no ben sabi fu san A ben taki.

₃₅A ten di Yesus doro krosbei fu Yeriko, wan breniman ben sidon sei a pasi e begi moni. ₃₆Di a man yere wan bigi grupu sma e psa, a aksi san de fu du. ₃₇Den sma taigi en taki: “Yesus fu Nasaret e psa.” ₃₈Dan a man bari taki: “Yesus, Manpikin fu David, abi sari-ati nanga mi!” ₃₉Den sma di ben waka na fes'sei bari en fu a tapu en mofo. Ma a bigin bari moro tranga taki: “Yesus, Manpikin fu David, abi sari-ati nanga mi!” ₄₀Ne Yesus tan tnapu dan A meki den tyari a man kon na En. Di a man kon krosbei, ₄₁Yesus aksi en taki: “San yu wani taki Mi mus du gi yu?” A man piki taki: “Masra, mi wani si.” ₄₂Yesus piki en taki: “Yu sa si baka. A bribi fu yu meki yu kon betre.” ₄₃Wantron a man bigin si, dan a bigin waka baka Yesus e gi Gado grani. Di ala den sma si san psa, den prijse Gado.