Den laste wortu fu David
1Disi na den laste wortu fu David:
“Na so mi David, a manpikin fu Isai, e taki,
na so mi e taki, mi di Gado opo srefsrefi,
mi, di a Gado fu Yakob salfu,
mi, a lobi singiman fu Israel.
2A Yeye fu MASRA e taigi mi san mi mus taki,
A e poti En wortu na tapu mi tongo.
3A Gado fu Israel ben taki,
a Trangawan fu Israel, ben taigi mi taki:
‘Wan tiriman di e tiri libisma na tapu wan leti fasi,
na wan tiriman di abi dipi lespeki gi Gado.
4A de leki a mamanten son di e opo
tapu wan dei pe wolku no de fu si.
A waran fu en e meki yongu grun grasi
sproiti kon na loktu baka te alen fadon.’
5We, nanga a yepi fu Gado, na so a sa de nanga mi nanga mi famiri.
Bika Gado ben meki wan ferbontu nanga mi di sa tan fu têgo,
ala sani seti fin'fini ini a ferbontu dati
èn noti fu en no kan kenki.
Mi kan bow ala ten na tapu a yepi fu En,
èn A e meki den sani di mi e angri kon tru.
6Ma den ogri-ati sma, de leki makamaka di winti rutu puru.
sma no e hori den nanga anu.
7A sma di wani tyari den kon na wan,
e teki wan tiki nanga wan isri pisi na fes'sei fu en,
dan a e fringi den ini faya,
pe den e bron te noti fu den no tan.”
Den dyadya fetiman fu David
8Disi na den nen fu den dyadya fetiman fu David:
Isboset fu Takmon ben de a edeman fu den dri moro dyadya fetiman. Wan leisi a kiri aiti hondro srudati nanga en lansri na ini wan feti. 9A di fu tu ben de Elasar, a manpikin fu Dodo, di ben de wan bakapikin fu Akoak. A ben de wan fu den dri dyadya fetiman. A ben de nanga David di den ben e afrontu den Filistijnsrudati di ben konmakandra drape fu feti. Den srudati fu Israel ben lon gi a feti. 10Ma Elasar kaka futu èn a kiri bun furu fu den Filistijnsrudati, te leki a ben weri srefsrefi. Ma a no ben lusu a deigri fu en. Na so MASRA kon gi Israel wan bigi wini a dei dati. Den srudati fu Israel di ben lon, drai go baka na Elasar, ma den no ben abi noti fu du moro dan fu teki den sani fu den Filistijnsrudati tyari gwe. 11A laste wan fu den dri moro dyadya fetiman ben de Sama, a manpikin fu Age fu Harar. Wan leisi den Filistijnsrudati ben konmakandra na Lehi. Wan pranigron ben drape pe sma ben prani bonki. Di den srudati fu Israel lon gi den Filistijnsrudati, 12Sama go tnapu na mindri fu a pranigron. A kiri den Filistijnsrudati èn den no ben man teki a pranigron abra. MASRA ben gi wan bigi wini.
13Wan leisi, krosbei fu a ten pe den sma e koti nyanyan ini den gron, dri fu den dritenti edeman, kon na David di ben de na a bergi-olo na Adulam. Den Filistijnsrudati ben meki den kampu ini a Refaimdal. 14David ben de ini a tranga kibripresi èn den Filistijnsrudati ben abi wan kampu ini Betlehem. 15Dan David soktu wan leisi èn a taki: “Mi winsi taki wan sma ben kan go teki pikinso watra fu a peti na a bigi doro fu Betlehem tyari kon gi mi.” 16Ne den dri dyadya fetiman disi boro psa ini a legrekampu fu den Filistijnsrudati go na a peti na a bigi doro fu Betlehem. Den peti watra dan den tyari en go gi David. Ma David no ben wani dringi a watra. A kanti en na gron leki wan ofrandi gi MASRA. 17A taki: “MASRA, mi no kan dringi a watra disi kwet'kweti. A o de leki na a brudu mi e dringi fu den man di ben kan lasi den libi fu a teki di den go teki a watra gi mi.” Na dat' meki David no ben wani dringi a watra. Na den sortu sani dati den dri dyadya fetiman disi ben e du.
18Abisai, a brada fu Yoab, wan fu den manpikin fu Seruya, ben de a edeman fu den dritenti dyadya fetiman. Wan leisi a kiri dri hondro srudati, dan a wai nanga en lansri leki winiman. Den dri moro dyadya fetiman ben e warderi en. 19A ben de a edeman fu den dritenti dyadya fetiman, a ben abi a moro bigi nen fu a grupu dati, ma a no ben doro den dri moro dyadya fetiman. 20Benaya, a manpikin fu Yoyada, fu a foto Kabseel, ben de wan bun fetiman tu di du bigi sani. Na en ben wini tu fu den moro bun fetiman fu Moab. Wan leisi di sneeuw ben e fadon, a ben meki den saka en go na ini wan olo pe wan lew ben de dan a kiri a lew. 21Na Benaya ben kiri wan bun bigi man fu Egipte tu. A man ben abi wan lansri, ma Benaya go nanga wan tiki na en tapu. A puru a lansri na en anu, dan a kiri en nanga en eigi lansri. 22Na den dyadya sani dati Benaya, a manpikin fu Yoyada, ben e du. Den dri moro dyadya fetiman ben e warderi en. 23Fu den dritenti dyadya fetiman, en ben de wan fu den moro prenspari wan, ma a no ben de doro den dri moro dyadya wan. David ben poti en leki edeman fu den waktiman fu en.
24Den tra fetiman di ben de ini a grupu fu den dritenti dyadya fetiman ben de: Asael, wan tra brada fu Yoab. Elkanan, a manpikin fu Dodo, fu Betlehem. 25Sama nanga Elika fu Harod, 26Heles fu Pelet nanga Ira, a manpikin fu Ikes, fu Tekoa. 27Abiyeser fu Anatot nanga Mebunai fu Husa. 28Salmon fu Akoak nanga Maharai fu Netofa. 29Heleb, a manpikin fu Baana, fu Netofa nanga Itai, a manpikin fu Ribai, fu Gibea ini a kontren fu Benyamin. 30Benaya fu Piraton nanga Hidai fu den dal fu Gaas. 31Abialbon fu Araba nanga Asmawet fu Barhum. 32Elyakba fu Saalbon nanga Yason fu Gun. Yonatan, 33a manpikin fu Sama, fu Harar nanga Akiam, a manpikin fu Sarar, fu Harar. 34Elifet, a manpikin fu Akasbai, fu Maaka nanga Eliam, a manpikin fu Akitofel fu Gilo. 35Hesrai fu Karmel nanga Paarai fu Arba. 36Yigal, a manpikin fu Natan, fu Soba nanga Bani fu Gat. 37Selek fu Amon nanga Nakrai fu Beerot, a man di ben e syow den fetisani fu Yoab, a manpikin fu Seruya. 38Ira nanga Gareb fu Yeter, 39nanga a Hetitiman Uria. Ala nanga ala yu ben abi dritenti-na-seibi fetiman.
