Dag 121 van 365- 1 Koningen 10-11 en Lucas 21:20-38

₁A uma di ben de kownu fu Seba, ben yere fu a bigi nen di MASRA ben meki Salomo abi. Dat' meki a ben kon fu tesi Salomo nanga aksi di no ben makriki fu piki. ₂A kon na Yerusalem nanga bun furu sma nanga kameel di ben e syow spesrei, bun furu gowtu nanga diri ston. Di a doro na Salomo, a aksi en ala sani di ben de tapu en ati. ₃Salomo piki en tapu ala den aksi fu en. Ala den dipidipi sani a ben tyari kon na krin gi en. ₄Di a kownu fu Seba si fa Salomo koni, di a si a kownu-oso tu di a bow, ₅a nyanyan di ben de tapu tafra, a fasi fa den wrokoman fu en ben e sidon na tafra, a fasi fa den sma di ben e sorgu gi a nyanyan ben tnapu èn fa den ben e weri, den dringi nanga den meti di Salomo ben e bron leki ofrandi ini a oso fu MASRA, a fruwondru srefsrefi. ₆Dat' meki a taigi kownu taki: “Den sani tru di mi yere ini mi kondre fu yu nanga a fasi fa yu koni. ₇Mi no ben e bribi te leki mi kon dyaso èn si nanga mi eigi ai. Ma den no ben ferteri mi afu srefi fu san mi si. A koni nanga a gudu fu yu no de fu marki nanga den tori di mi yere fu yu. ₈Den sma di yu e tiri, den knekti fu yu di e dini yu èn di e yere den koni sani di yu e taki, na blesi sma. ₉Mi e prijse MASRA, a Gado fu yu, di abi sowan prisiri nanga yu taki a poti yu tapu a kownusturu fu Israel. Na fu di MASRA lobi Israel nanga wan lobi di no abi kba, meki a poti yu leki kownu fu tiri a kondre tapu wan bun èn leti fasi.”

₁₀Dan a gi kownu Salomo sowan fo dusun nanga tu hondro kilo gowtu nanga bun furu spesrei nanga diri ston. Noiti moro spesrei kon ini a kondre, leki san a kownu fu Seba ben gi kownu Salomo. ₁₁Den boto fu Hiram no ben tyari gowtu fu Ofir wawan kon ini a kondre, ma bun furu sandel-udu nanga diriston. ₁₂Nanga a udu dati kownu Salomo meki sturu nanga tafra gi a oso fu MASRA nanga a kownu-oso. A meki citer nanga harp tu gi den singiman. Noiti moro someni sandel-udu kon ini a kondre èn noiti moro sma si someni fu a udu dati tu te tide. ₁₃Kownu Salomo fu ensei, no gi a kownu fu Seba den kado wawan di a ben gwenti gi leki kownu, ma a gi en ala san a ben angri fu abi tu. Baka dati a kownu nanga den knekti fu en drai go baka na a kondre fu den.

₁₄A gowtu di Salomo ben e kisi ala yari, ben de tutenti dusun kilo, ₁₅boiti san den bai nanga seriman, ala den kownu fu Arabia nanga den man di kownu ben poti fu tiri den foto, ben e tyari kon.

₁₆Kownu Salomo meki tu hondro bigi schild fu fini gowtu. Ibri schild ben meki fu siksi kilo gowtu. ₁₇A meki dri hondro pikin schild tu fu fini gowtu. Ibriwan fu den ben meki fu wan nanga afu kilo gowtu. Dan kownu poti den ini a oso: Busi fu Libanon. ₁₈Moro fara kownu meki wan bigi kownusturu fu ivoor. Dan a poti lala gowtu na en tapu. ₁₉A kownusturu ben abi wan pikin trapu nanga siksi tree, a edepisi ben lontu na loktusei èn abi ben abi tu pisi fu poti yu anu. Sei iniwan fu den pisi fu poti yu anu wan lew ben tnapu. ₂₀Twarfu lew ben tnapu tapu den tree fu a trapu, siksi na a wan sei nanga siksi na a tra sei. Noiti ete sowan kownusturu ben meki ini wan kondre. ₂₁Ala den sani fu dringi fu kownu Salomo ben de fu gowtu. Ala den tra kukru sani fu a oso: Busi fu Libanon ben de fu lala gowtu. Noti ben de fu solfru, bika ini a ten fu Salomo solfru no ben abi warti. ₂₂Kownu Salomo ben abi sipi na se di ben e go na Tarsis makandra nanga den di fu Hiram. Ibri dri yari den ben e drai kon nanga gowtu, solfru, ivoor, kes'kesi nanga prodokaka.

₂₃No wan kownu fu grontapu ben gudu noso koni moro kownu Salomo. ₂₄Alasei fu grontapu sma ben e kmoto kon na Salomo fu arki a koni di Gado ben gi en. ₂₅Iniwan fu den ben e kon nanga kado: solfru nanga gowtu sani, krosi, fetisani, spesrei, asi nanga buriki. Na so a ben e go ala yari.

₂₆Salomo ben sorgu taki fetiwagi nanga man di e tyari den fetiwagi ben de. A ben abi wan dusun nanga fo hondro fetiwagi nanga twarfu dusun man di ben e tyari den wagi. Dan a poti afu fu den ini den foto di ben meki spesrutu fu poti den wagi, a tra afu ben de na en ini Yerusalem.

₂₇Kownu ben meki tu taki solfru ben furu leki ston na ini Yerusalem. Sedre-udu ben lai tu leki den figabon di e gro bogobogo ini den kontren na den bergifutu.

₂₈Den asi fu Salomo ben e kmoto fu Egipte nanga Kewe. Den bai nanga seriman fu kownu ben e go bai den ini Kewe. ₂₉Den ben e bai wan fetiwagi ini Egipte gi siksi hondro pisi solfru èn gi wan asi wan hondro nanga feifitenti pisi solfru. Den bai nanga seriman ben e tyari asi go seri tu gi ala den kownu fu den Hetitisma nanga di fu den Arameesma.

₁Boiti a umapikin fu farao, kownu Salomo ben lobi furu tra uma tu fu difrenti dorosei kondre. Uma fu Moab, fu Amon, fu Edom nanga uma fu den Hetitisma. ₂Den ben de fu den folku fu san MASRA ben taigi den Israelitisma taki: “Un no mus trow nanga den umasma fu den èn den no mus trow nanga den umasma fu unu. Bika den o drai un ede fu un dini den gado fu den.” Ma na den uma dati Salomo ben lobi. ₃A ben trow nanga seibi hondro uma èn a ben e libi nanga dri hondro trawan ete èn den uma dati drai en ede. ₄Salomo ben de wan owru man kba di den uma fu en meki a bigin dini tra gado. A no teki a eksempre fu en p'pa David, fu dini MASRA, a Gado fu en, wawan. ₅A go dini Astarte, a gado fu den Sidonisisma, nanga Milkom, a groskin gado fu den Amonitisma. ₆A ben e du sani di no ben bun srefsrefi ini MASRA ai, èn a no ben e dini MASRA moro nanga en heri ati, leki en p'pa David. ₇Dan Salomo meki den bow wan altari gi Kemos, a groskin gado fu Moab, tapu a bergi na oostsei fu Yerusalem, nanga wan gi Molok, a groskin gado fu Amon. ₈A du a srefi sani tu gi ala den uma fu en fu den doroseikondre, di ben e bron wierook èn den ben e srakti meti leki ofrandi gi den gado fu den.

₉A sani disi meki MASRA ati bron tapu Salomo, fu di Salomo ben drai en baka gi MASRA, a Gado fu Israel, di ben sori Ensrefi tu leisi na en. ₁₀A ben taigi Salomo fu no waka baka tra gado, ma Salomo no ben arki san MASRA ben komanderi en. ₁₁Fu dat'ede MASRA taigi en taki: “Fu di a kon so now, taki yu broko a ferbontu nanga Mi èn yu no hori yusrefi na den sani di yu ben mus tan du soleki fa Mi ben komanderi yu, Mi sa puru a kondre na yu anu èn gi en na wan knekti fu yu. ₁₂Ma fu yu p'pa David ede, meki Mi o du dati te yu dede fosi. Mi o puru a kondre na yu manpikin anu. ₁₃Ma Mi no sa puru a heri kondre na en anu. Mi sa libi wan fu den lo gi en fu Mi knekti David ede nanga fu Yerusalem ede, di Mi teki.”

₁₄Dan MASRA meki Hadad fu Edom tron a feyanti fu Salomo. A man disi ben de famiri fu a kownu fu Edom. ₁₅Baka wan feti fu David nanga Edom, Yoab, a edeman fu a legre, ben go fu beri den srudati di ben dede ini a feti. Dan Yoab kiri ala den mansma ini Edom. ₁₆Yoab ben tan siksi mun nanga a legre fu Israel ini Edom, te leki den ben kiri ala den mansma ini Edom. ₁₇Ma Hadad, di ben yongu ete a ten dati, ben man lowe nanga wantu tra man fu Edom go na Egipte. Den man dati ben de heihei wrokoman fu en p'pa. ₁₈Den psa ini Midyan dan den kon doro na Paran. Drape den teki wantu man moro nanga den, dan den hari go moro fara na Egipte. Drape Farao, a kownu fu Egipte, gi en wan oso fu tan, a pramisi Hadad taki a o sorgu taki a abi nyanyan èn a gi en wan pisi gron. ₁₉Farao ben kon lobi Hadad sote tak' a meki a trow nanga a sisa fu en eigi frow, kownu Takpenes. ₂₀A frow fu Hadad kisi wan boi gi en di den kari Genubat. A frow fu farao teki a boi dati kweki ini Farao oso èn a gro makandra nanga den boi fu farao. ₂₁Ma di Hadad kisi fu yere taki David nanga Yoab, a edeman fu a legre fu David, dede, a aksi farao taki: “Mi e begi yu fu drai go baka na mi kondre.” ₂₂Ne Farao aksi en taki: “Yu e mankeri wan sani na mi taki wantron so yu wani go baka na yu kondre?” Hadad piki farao taki: “Kwet'kweti, ma mi e begi yu fu yu meki mi go.”

₂₃Gado ben meki Salomo kisi ete wan feyanti. Dati ben de Reson, a manpikin fu Elyada. Reson ben lowe fu en basi, kownu Hadadeser fu Soba, ₂₄di David ben kiri Hadadeser nanga a legre fu en ini wan feti. Reson ben feni wantu man di ben e waka na en baka. Den go tan na Damaskus, den teki drape leki den tanpresi èn den ben e libi leki kownu. ₂₅Reson ben de wan feyanti fu Israel solanga di Salomo ben de na libi. Boiti Hadad, Reson srefi ben e gi Israel bigi problema, bika a no ben wani sabi not'noti fu Israel èn A ben tron kownu fu Aram.

₂₆Wan tra sma di ben tron wan feyanti fu Salomo tu, ben de Yerobeam, wan knekti fu en fu Sereda, wan presi ini Efraim. En p'pa, di no ben de na libi moro, ben nen Nebat èn en m'ma ben nen Serua. ₂₇Na so a dyugudyugu fu en nanga Salomo bigin. Salomo ben e meki a Millo fu tapu wan bigi olo na a skotu fu a foto fu David. ₂₈Yerobeam ben de wan bun wrokoman. Di Salomo si taki a ben de wan tranga wrokoman, a poti en leki edeman fu luku den wrokoman fu a lo fu Yosef. ₂₉Wan dei di Yerobeam ben kmoto na Yerusalem, a miti nanga a profeiti Akia fu Silo, dorosei fu a foto. Akia ben weri wan nyun langa dyakti. ₃₀Den tu man disi wawan ben de ini a opo wei. Ne Akia teki a nyun langa dyakti fu en dan a priti en ini twarfu pisi. ₃₁Dan a taigi Yerobeam taki: “Teki tin pisi, bika MASRA, a Gado fu Israel, e taigi yu taki: Luku, Mi o puru a kondre na Salomo anu èn Mi o gi yu tin fu den lo. ₃₂Ma Mi o libi wan lo gi en. Mi o du dati fu Mi knekti David ede èn fu Yerusalem, a foto di Mi teki na mindri fu ala den lo fu Israel. ₃₃Mi e tyari a prati disi fu di a kownu nanga a folku gwe libi mi. Den go boigi gi Astarte, a gado fu den Sidonisisma, gi Kemos, a gado fu Moab, nanga gi Milkom, a gado fu Amon. Den no libi leki fa Mi wani, èn den no du san Mi ben wani. Den no teki a eksempre fu David, a p'pa fu Salomo fu du den sani di den ben mus tan du èn fu hori densrefi na den sani na san den ben mus tan hori densrefi. ₃₄Ma Mi no sa puru a heri kondre na Salomo anu. Mi sa meki a tan kownu solanga leki a de na libi. Mi o du dati fu Mi knekti David ede, di Mi ben teki èn a ben hori ensrefi na den gebod fu Mi nanga den sani na san a ben mus tan hori ensrefi. ₃₅Mi sa puru a kondre na Salomo en manpikin anu. Mi o gi yu tin fu den lo. ₃₆Mi o meki a manpikin fu en hori wan. Bika Mi wani taki wan bakapikin fu Mi knekti David sa tan kownu ini Yerusalem, a foto di Mi teki leki a presi pe sma kan anbegi Mi. ₃₇Mi sa meki yu tron kownu fu Israel èn yu sa de kownu fu a heri kontren di yu wani. ₃₈Du ala san Mi e komanderi yu, libi leki fa Mi wani èn du san bun ini Mi ai. Hori yusrefi na den sani na san yu mus hori yusrefi nanga den gebod fu Mi, soleki fa Mi knekti David ben du. Dan Mi sa yepi yu èn sorgu taki na soso den pikin nanga bakapikin fu yu sa tan kownu, neleki fa Mi du nanga David, èn Mi sa gi yu Israel. ₃₉Mi sa broko den bakapikin fu Israel saka fu den sondu di den du, ma no fu ala ten.”

₄₀Salomo suku fu kiri Yerobeam, ma Yerobeam lowe go na Sisak, a kownu fu Egipte. A tan drape te leki Salomo dede.

₄₁Den tra sani di psa ini a libi fu Salomo, ala den sani di a du, a koni di a ben abi, skrifi poti ini a buku fu a historia fu Salomo. ₄₂Ini Yerusalem, Salomo tiri heri Israel fotenti yari langa. ₄₃A dede èn den beri en ini a foto fu en p'pa David. En manpikin Rekabeam teki en presi leki kownu.

₂₀“Te un si taki srudati lontu Yerusalem, dan un mus sabi taki a yuru fu a foto broko te na gron de krosbei. ₂₁Dan den sma di de ini Yudea, mus lon go na den bergi. Den sma di de ini a foto, mus lowe kmopo na ini, èn den sma di de ini den gron, no mus drai go ini a foto. ₂₂Bika ini den dei dati Gado o puru En atibron na tapu den sma, meki ala sani san den profeiti skrifi kon psa. ₂₃Den uma di de nanga bere, nanga den di abi pikin na bobi a pisten dati, o de fu sari. Bika bigi nowtu o de ini a kondre èn Gado o puru En atibron tapu a folku disi. ₂₄Den o kiri den nanga deigri, èn den o kisi den tyari gwe na den kondre fu ala den tra folku. Dan sma di no de Dyu o du san den wani na ini Yerusalem, te leki a yuru doro fu den srefi kisi strafu.”

₂₅“Marki o de fu si na a son, a munkenki, nanga den stari. A fasi fa den hei skwala fu a se o bari, o meki den sma fu grontapu frede sote taki den no sabi san fu du. ₂₆Soso frede fu den sani san o psa na grontapu, o meki den sma lasi ati. Bika ala den makti di de na loktu o seki. ₂₇Dan den sma o si a Manpikin fu Libisma e kon na tapu wan wolku nanga krakti nanga glori. ₂₈Te den sani disi bigin fu psa, dan un mus opo tnapu èn opo un ede luku go na loktu. Bika a ten fu Gado ferlusu unu de krosbei.”

₂₉Dan Yesus gi den wan agersitori. A taki: “Un mus luku den figabon nanga ala den tra bon. ₃₀Te un e si taki den bon e bigin gi nyun wiwiri, dan un sabi taki a dreiten de fu kon. ₃₁Na so un mus sabi tu tak' te den sani san Mi taigi unu e bigin fu psa, dan a yuru fu Gado tiri libisma de krosbei. ₃₂Fu tru Mi e taigi un taki: Ala den sani disi o psa te den sma fu a ten disi de na libi ete. ₃₃Wan dei heimel nanga grontapu no o de moro, ma den sani san Mi taki, o tan fu têgo.” ₃₄“Un mus de na ai. No furu un prakseri nanga fesa nanga sopi. No broko un ede nanga fa un o sorgu gi unsrefi. Un mus de na ai, fu a dei te Mi o kon baka, no tapu unu leki wan krafana. ₃₅Bika a dei dati o kon gi ala sma na heri grontapu. ₃₆Dat' meki un mus de na ai ala ten. Un mus begi fu un kan kmopo na ini den sani san o psa, èn fu un man tnapu na fesi a Manpikin fu Libisma.”

₃₇Deiten Yesus ben e gi leri na ini a tempel. Ma te neti A ben e go na tapu a Oleifbergi, dorosei fu a foto. ₃₈Fruku mamanten a heri folku ben e kon na Yesus na ini a tempel fu arki san A e leri.