Dag 128 van 365- 2 Koningen 4-6 en Lucas 24:36-53

₁Wan leisi wan uma fu wan fu den profeiti go krei en nowtu gi Elisa. A uma taigi en taki: “Yu knekti, mi masra, dede. Yu sabi tak' a ben de wan man di ben e lespeki MASRA. Now wan sma di wi mus pai, kon fu teki den tu pikin fu mi fu den go wroko gi en leki srafu.” ₂Dan Elisa aksi en taki: “San mi kan du gi yu? Taigi mi san yu abi na oso.” A uma piki en taki: “Na soso wan pikin batra oleif-oli mi abi na oso.” ₃Ne Elisa taigi en taki: “Gwe go leni leigi bari na den birtisma fu yu, leni omeni leki yu man. ₄Dan yu nanga den boi fu yu mus go na inisei, un mus sroto a doro na un baka, dan un kanti a oleif-oli di yu abi na ini den bari. Den wan di furu, un mus poti na wan sei.” ₅So a uma gwe. A go na inisei nanga den boi fu en, dan den sroto a doro na den baka. Den boi fu en ben e tyari den bari kon èn a uma ben e tan kanti nomo. ₆Di den bari furu, a taigi wan fu den boi fu en taki: “Tyari ete wan tra bari kon.” Ma a boi piki en taki: “Bari no de moro.” A srefi momenti dati, a oleif-oli tapu fu lon. ₇Di a uma go ferteri a man fu Gado fa sani waka, a piki en taki: “Go seri a oli, dan yu e pai yu paiman. A moni di o tan abra o sari fu yu nanga den boi fu yu libi.”

₈Wan dei Elisa go na a foto Sunem. Wan gudu uma di ben e libi drape aksi en tangitangi fu a tan nyan na en oso. Sensi a dei dati, ala leisi te Elisa ben e psa na a foto dati, a ben e go nyan na a uma. ₉Wan leisi a uma taigi en masra taki: “A no abi misi tak' a man di e kon furufuru na wi, na wan santa man fu Gado. ₁₀Meki wi meki wan pikin kamra gi en tapu a plata daki fu a oso, dan wi poti wan bedi, wan tafra, wan sturu nanga wan lampu na ini. Dan a man kan tan drape te a kon baka na wi.”

₁₁Wan bun dei, Elisa doro drape baka. Dan a go ini a kamra tapu a daki go rostu. ₁₂Baka dati a kari en knekti Gehazi, dan a taigi en taki: “Go kari a uma fu a oso gi mi.” Di Gehazi go kari en, a uma waka kon tnapu fesi Elisa. ₁₃Dan Elisa taigi Gehazi taki: “Taigi en tak' wi e si ala a muiti di a e meki gi wi. Aksi en efu wan sani de di wi kan du gi en. Efu nanga kownu noso a edeman fu a legre wi mus tak' gi en, a no abi trobi.” Ma a uma piki den taki: “Den famiri fu mi e luku mi bun.” ₁₄Ma Elisa taigi Gehazi baka taki: “Wan sani mus de di wi kan du gi a uma.” Gehazi piki taki: “We, a no abi manpikin èn a masra fu en grani kba.” ₁₅Ne Elisa taki: “Go kari en.” Di Gehazi go kari a uma, a uma kon dan a tan tnapu na a doro. ₁₆Dan Elisa taigi en taki: “Tra yari, a srefi ten disi, yu o hori wan manpikin ini yu anu.” Ma a uma taki: “Tye, mi masra, yu na wan man fu Gado, fu sanede meki yu e kori mi?” ₁₇Ma a uma kon hori bere èn a kisi wan boi, a srefi ten fu a tra yari, leki fa Elisa ben taki.

₁₈Di a boi kon moro bigi, a go wan dei na en p'pa, di ben de ini a wei e koti grasi nanga den wrokoman. ₁₉Ma wantronso a boi bari gi en p'pa taki: “Mi ede, mi ede!” Dan a p'pa taigi wan fu den knekti taki: “Opo en tyari go na en m'ma.” ₂₀So wan knekti opo a boi tyari go na en m'ma. A m'ma hori a boi tapu en bowtu te bakadina, dan a boi dede. ₂₁Dan a m'ma go na tap'sei, a poti a boi tapu a bedi fu a man fu Gado dan a sroto a doro. ₂₂Baka dati a go na dorosei, a kari en masra, dan a taigi en taki: “Seni wan fu den knekti fu yu kon nanga wan buriki. Mi wani go es'esi na a man fu Gado èn drai kon baka.” ₂₃A man aksi en taki: “Fu sanede yu wani go na en tide? Tide a no nyunmunfesa noso sabatdei.” Ma a uma piki en taki: “No broko yu ede.” ₂₄Di a meki a buriki klari fu tyari en, a taigi en knekti taki: “Yu mus wipi den buriki fu den tan lon. Soso te mi taigi yu, yu mus tan tnapu.”

₂₅Dan a teki pasi go na a man fu Gado, di ben de tapu a Karmelbergi. Di a man fu Gado si en fu farawe e kon, a taigi en knekti Gehazi taki: “Luku, a uma fu Sunem e kon. ₂₆Lon go miti en es'esi, dan yu aksi en taki: ‘Ala sani e go bun nanga yu, yu masra nanga yu boi?’ ” Di Gehazi aksi a uma, a piki: “Ala sani e go bun.” ₂₇Ma di a doro na a man fu Gado tapu a bergi, a grabu den futu fu en hori. Gehazi waka go na en fu hari en puru, ma a man fu Gado taigi en taki: “Libi en. Yu no e si tak' na sari a e sari? Ma MASRA no taigi mi san e du en.” ₂₈Ne a uma taigi Elisa taki: “Mi masra, a no mi ben aksi yu fu wan boi. Mi ben taigi yu tak' yu no mus kori mi?” ₂₉Dan Elisa taigi Gehazi taki: “Seti yu krosi, teki a wakatiki fu mi dan yu e lon gwe es'esi. No tan tnapu fu taki sma odi, èn no piki te sma e tak' yu odi. Dan yu e poti a tiki fu mi tapu a fesi fu a boi.” ₃₀Ma a m'ma fu a boi piki Elisa taki: “Mi e sweri na a libilibi MASRA, sosrefi na yu eigi libi tak' mi no e kmoto dyaso sondro yu.” Ne Elisa opo, dan a gwe nanga en.

₃₁Gehazi di ben de na den fesi, poti a wakatiki tapu a fesi fu a boi, ma a boi no gi no wan marki tak' a kon na libi. Ne Gehazi drai gwe go miti Elisa, dan a taigi en taki: “A boi no kon na libi.” ₃₂Di Elisa doro, a si taki a boi ben didon dede tapu a bedi fu en. ₃₃Ne a sroto a doro, fu en wawan ben kan de nanga a boi, dan a begi MASRA. ₃₄Di a kba, a go didon tapu a boi. A poti en mofo tapu a mofo fu a boi, a poti en ai tapu den ai fu boi, èn a poti den anu fu en tapu den anu fu a boi. A tan didon so tapu a boi te leki a skin fu a boi ben kon waran. ₃₅Dan Elisa opo, a waka go waka kon ini a kamra, dan a go didon baka tapu a boi. Ne a boi koso seibi leisi, dan a opo en ai. ₃₆Elisa kari Gehazi dan a taigi en taki: “Kari a uma.” Di Gehazi kari en, a go na Elisa. Dan Elisa taigi en taki: “Yu kan opo a boi fu yu.” ₃₇A uma go ini a kamra, a trowe ensrefi na den futu fu Elisa èn a boigi dipi fu gi Elisa grani. Baka dati, a opo a boi fu en dan a gwe.

₃₈Di Elisa drai go baka na Gilgal, wan angriten ben de ini a kondre. Wan leisi di ala den profeiti ben sidon na en fesi, a taigi en knekti taki: “Poti a moro bigi patu na faya, dan yu e bori nyanyan gi den profeiti.” ₃₉Dan wan fu den profeiti go ini a wei go suku gruntu. Ma a feni soso wan busifroktu di ben gersi pikin panpun èn di ben e gro leki panpun. Ne a piki so furu fu den froktu leki san a ben man tyari ini en dyakti. Di a drai go baka, a koti den pis'pisi poti na ini a patu, sondro fu sabi efu den bun fu nyan. ₄₀Baka dati den man puru den nyanyan fu nyan. Ma fa den poti en na den mofo na so den bari taki: “Man fu Gado, a nyanyan disi o kiri wi!” Den no ben man nyan en srefsrefi. ₄₁Ne Elisa taki: “Un tyari pikinso blon kon.” A poti a blon ini a patu, dan a taigi den taki: “Un puru gi den sma meki den nyan.” Èn noti no ben de fu du nanga a nyanyan ini a patu moro.

₄₂Wan leisi wan man fu Baal-Salisa tyari tutenti brede gi a man fu Gado. Den brede disi ben meki fu groto, a fosi groto di ben koti di a ten fu koti nyanyan ini den gron ben doro. A ben tyari pikinso graan kon tu. Dan Elisa taigi en knekti taki: “Gi den profeiti fu den nyan.” ₄₃Ma a knekti taigi en taki: “A nyanyan no sari fu gi wan hondro sma.” Ma Elisa taigi en baka taki: “Gi den profeiti fu den nyan. Bika na disi MASRA e taki: ‘Den o nyan èn a o tan abra.’ ” ₄₄Ne a knekti poti a nyanyan gi den profeiti, den nyan èn a ben tan abra srefi leki fa MASRA ben taki.

₁Naaman ben de a edeman fu a legre fu Aram. A ben de wan prenspari man gi en basi, a kownu fu Aram, di ben abi bigi lespeki gi en, bika MASRA ben yepi Naaman fu gi Aram wan bigi wini abra den feyanti fu den. Ma a bun fetiman disi ben gwasi. ₂Wan leisi wantu grupu Arameesrudati ben broko go ini Israel fu teki den sma sani nanga tranga. Den ben teki wan yongu umapikin tyari gwe tu. A pikin dati ben e wroko gi a frow fu Naaman. ₃Wan dei, a pikin taigi en basi, a frow fu Naaman taki: “Efu yu masra, ben sa wani go nomo na a profeiti fu Samaria, a profeiti ben o dresi en fu a gwasi siki.” ₄Naaman go ferteri en basi san a pikin fu Israel taki. ₅Dan a kownu fu Aram piki en taki: “We, yu kan go. Mi sa gi yu wan brifi gi a kownu fu Israel.”

So Naaman kon teki pasi gwe. A ben tyari sowan dri hondro kilo solfru, siksitenti kilo gowtu nanga tin pisi krosi. ₆Ini a brifi di a ben tyari go gi a kownu fu Israel ben skrifi taki: “Mi seni a brifi disi gi yu nanga mi knekti Naaman. Mi seni en fu yu kan dresi en fu a gwasi siki.” ₇Ma fa a kownu fu Israel leisi a brifi, na so a priti en krosi dan a taki: “Fa a kownu kan seni aksi mi sowan sani, fu dresi wan sma fu en gwasi siki? Mi a no Gado di kan kiri wan sma noso meki wan sma tan na libi. A de krin tak' na wan sani a e suku fu kan kon feti baka nanga mi.” ₈Fa Elisa, a man fu Gado, yere tak' a kownu fu Israel priti en krosi, a seni a boskopu gi kownu taki: “Fu sanede meki yu priti yu krosi? Meki a man kon na mi, dan a o sabi tak' wan profeiti de na ini Israel.”

₉So Naaman go nanga den asi èn den asiwagi fu en, dan a tan tnapu mofo doro fu a oso fu Elisa. ₁₀Dan Elisa seni wan boskopuman go na en, di taigi en taki: “Go wasi seibi leisi na ini a Yordanliba dan a skin fu yu o kon bun baka, èn yu o kon betre fu a siki.” ₁₁Ma Naaman kisi sowan atibron tak' a gwe. A krutu taki: “Luku, mi ben prakseri tak' a profeiti bo kon na dorosei, kon tnapu kari MASRA, a Gado fu en. Mi prakseri tak' a bo hari en anu wantu leisi tapu a presi pe a siki de fu dresi mi fu a gwasi siki. ₁₂A Abana nanga a Parparliba fu Damaskus betre moro ala den watra fu Israel. Mi kan wasi tu ini den liba dati fu mi skin kon bun baka!” Èn nanga bigi atibron a drai gwe baka. ₁₃Ma dan den knekti fu en go na en, èn den taigi en taki: “Mi p'pa, efu na wan bigi sani a profeiti ben taigi yu fu yu du, wi sabi tak' yu bo du en. Dan fu sanede meki yu abi someni muiti nanga san a taki, fu yu go wasi, fu yu kan kon betre?” ₁₄Ne Naaman saka go ini a Yordanliba, dan a dukrun seibi leisi, leki fa a man fu Gado ben taigi en fu du. Dan a skin fu en kon bun baka, leki a skin fu wan yongu pikin, èn a ben kon gesontu. ₁₅Baka dati, Naaman drai go baka na a man fu Gado, makandra nanga ala den sma di ben de nanga en. A go ini a oso, a go tnapu fesi Elisa, dan a taki: “We, now mi sabi taki na a Gado fu Israel wawan de Gado fu heri grontapu. Dat' meki mi e begi yu fu yu teki wan kado fu yu knekti.” ₁₆Ma Elisa piki en taki: “Mi e sweri na a libilibi MASRA di mi e dini, mi no o teki noti.” Awinsi fa Naaman ben dwengi en fu a teki wan sani, Elisa no ben wani. ₁₇Ne Naaman taki: “Efu trutru yu no wani teki noti, gi yu knekti doti dan fu a tyari gwe someni leki tu buriki kan tyari. Bika yu knekti no wani bron meti leki ofrandi moro èn a no wani srakti meti leki ofrandi moro tu gi tra gado, dan gi MASRA wawan. ₁₈Ma mi e begi tak' MASRA sa gi mi pardon fu a wan sani disi: A de so tak' te mi basi e go ini a tempel fu Rimon, fu boigi gi a gado dati, dan na tapu mi anu a e anga. Tapu a fasi dati, mi musu fu boigi tu ini a tempel fu Rimon. MASRA sa gi mi pardon fu a sani dati?” ₁₉Elisa piki en taki: “Yu kan go ini freide.”

Ma Naaman no ben gwe langa, ₂₀di Gehazi, a knekti fu Elisa, a man fu Gado, prakseri taki: “Mi basi meki en tumsi makriki gi Naaman, a Arameeman, fu meki a gwe sondro fu teki wan sani fu san a ben tyari kon. Mi e sweri na a libilibi MASRA, tak' mi o go es'esi na en baka fu teki wan sani fu en.” ₂₁So Gehazi go na baka Naaman. Di Naaman si taki wan sma ben e kon es'esi na en baka, a saka kmoto fu en asiwagi, dan a waka go miti en. A aksi en taki: “Ala sani de bun nanga yu?” ₂₂Gehazi piki en taki: “Iya, mi basi seni mi nanga wan boskopu. A seni taigi yu tak' didyonsro tu yongu profeiti fu a bergikondre fu Efraim kon na en. A seni aksi fu yu du en wan bun fu seni dritenti kilo solfru nanga tu fu den krosi gi den.” ₂₃Naaman piki Gehazi taki: “Du mi wan bun, èn teki siksitenti kilo.” Naaman dwengi en fu a teki someni. Dan a meki den lai a solfru na ini tu saka, dan a langa den saka makandra nanga tu fu den krosi gi tu fu den knekti fu en, fu syow gi Gehazi. ₂₄Di den doro na a pikin bergi pe Elisa ben e libi, Gehazi teki a lai abra fu den knekti. A seni den gwe, dan a kibri den sani ini a oso. ₂₅Baka dati a go tnapu fesi en basi, Elisa, di aksi en taki: “Pe yu kmoto, Gehazi?” Gehazi piki en taki: “Yu knekti no ben go na no wan presi.” ₂₆Ma Elisa piki en taki: “Yu no sabi tak' mi si di a man saka fu en wagi waka kon miti yu? A no a ten fu ben teki solfru nanga krosi, noso fu abi oleifdyari, droifidyari, skapu, kaw, mansrafu nanga umasrafu. ₂₇Dat' meki a gwasi di Naaman ben abi, o kon tapu yu nanga den bakapikin fu yu, fu têgo.” Di Gehazi e gwe fu Elisa, a gwasi ben meki a kon weti leki katun.

₁Wan leisi den profeiti taigi Elisa taki: “Luku, a presi pe wi e kon makandra nanga yu, kon pikin. ₂Meki wi go na a Yordanliba go koti wantu bon fu meki wan nyun presi pe wi kan kon makandra.” Elisa piki den taki: “Un kan go.” ₃Ma wan fu den aksi en taki: “Du den knekti fu yu wan bun fu go nanga wi.” A piki den taki: “A bun.” ₄So a go nanga den. Di den doro na a Yordanliba, den bigin kapu bon. ₅Ma di wan fu den ben e kapu wan bon, a ambeiri lusu kmoto na a tiki dan a fadon go ini a watra. A man bari, dan a taigi Elisa taki: “San mi mus du masra, na leni mi leni en!” ₆Dan a man fu Gado aksi en taki: “Pe a fadon?” Di a man sori en, Elisa koti wan pisi udu, dan a fringi en go na a presi, èn a ambeiri kon na loktu baka. ₇Dan Elisa taigi a man taki: “Puru en ini a watra.” Ne a man langa en anu teki en.

₈A kownu fu Aram, ben e feti nanga Israel. Dan a gi den ofisiri fu en rai pe nanga pe den ben mus meki den kampu. ₉Ma a man fu Gado, seni wan boskopu gi a kownu fu Israel taki: “Luku bun, no psa na sowan presi, bika a legre fu Aram seti densrefi drape.” ₁₀Dan a kownu fu Israel ben e seni sma go na a presi di a man fu Gado ben taigi en fu warskow den sma fu a birtu fu den luku bun. Na so a sani ben e go, ala leisi baka. ₁₁A sani disi ben meki a kownu fu Aram kisi atibron. A kari den ofisiri fu en, dan a aksi den taki: “Un kan taigi mi sortu wan fu wi de na a sei fu a kownu fu Israel?” ₁₂Ma wan fu den piki en taki: “Mi kownu, no wan fu wi e du a sani dati, ma na Elisa, a profeiti fu Israel. A e taigi a kownu fu Israel srefi san yu e taki na ini yu sribi kamra.” ₁₃Ne kownu taigi den taki: “Un go suku en pe a de fu mi grabu en.” Di den seni piki kownu tak' Elisa de na Dotan, ₁₄a seni wan tranga legre fu srudati, asi nanga fetiwagi go drape.

Den doro drape neti, dan den lontu a foto. ₁₅Di a knekti fu a man fu Gado opo a tamara mamanten fruku go na dorosei, a si taki wan legre fu srudati, asi nanga fetiwagi, lontu a foto. Ne a knekti bari taki: “Masra, fa un o du?” ₁₆Ma Elisa piki en taki: “Yu no abi fu frede, bika den wan di de na a sei fu unu, furu moro den wan di de nanga den.” ₁₇Ne Elisa begi taki: “Tye MASRA, opo en ai fu a kan si den tu.” Dan MASRA opo den ai fu a knekti, dan a si taki a bergi ben furu nanga asi nanga fetiwagi fu faya di ben lontu Elisa. ₁₈Di den Arameesrudati ben e kon fu teki Elisa, Elisa begi taki: “MASRA, breni den alamala.” MASRA du san Elisa aksi en, èn a breni den alamala. ₁₉Dan Elisa taigi den srudati taki: “Disi no de a yoisti pasi, èn disi no de a yoisti foto pe un mus de. Un waka na mi baka, dan mi o tyari un go na a man di un e suku.” Ma Elisa tyari den go na Samaria. ₂₀Fa den doro na Samaria, na so Elisa begi taki: “MASRA, meki den si baka.” Dan MASRA opo den ai èn den ben kan si èn den si taki den ben de ini Samaria. ₂₁Di a kownu fu Israel si den, a aksi Elisa taki: “Mi sa kiri den, mi p'pa, mi sa kiri den?” ₂₂Ma Elisa piki en taki: “Nono, yu no mus kiri den. Yu no e kiri srudati di yu grabu na ini wan feti. Gi den nyanyan nanga dringi dan yu e meki den drai go baka na den basi.” ₂₃Dan kownu sorgu taki den ben abi so furu fu nyan leki efu na wan fesa den ben de. Di den nyan èn den dringi, a meki den drai go baka na den basi. Baka dati, den srudati fu Aram no ben e broko kon ini grupu ini a kondre moro, fu teki sani gwe nanga tranga.

₂₄Baka wan pisten, kownu Benhadad fu Aram, kari a heri legre fu en kon na wan, dan den hari go na Samaria èn den tapu a foto fu ala sei. ₂₅Den lontu a foto so langa tak' wan bigi angriten broko ini Samaria. Gi wan buriki-ede den sma ben e pai aititenti solfrumoni, nanga feifi solfrumoni gi wan pontu doifimest.

₂₆Wan leisi di kownu ben e waka tapu a skotu fu a foto, wan uma bari taigi en taki: “Tye mi kownu, yepi mi!” ₂₇Ma kownu piki en taki: “Efu MASRA no e yepi yu, fa mi o man yepi yu? Mi no abi graan noso win. ₂₈Ma ferteri mi san de fu du nanga yu.” A uma piki en taki: “A uma disi ben taigi mi taki: ‘Meki wi nyan a boi fu yu tide, dan wi o nyan a di fu mi tamara.’ ₂₉So wi bori a boi fu mi, dan wi nyan en. Ma a tra dei di mi aksi en fu wi nyan a boi fu en, a kibri en.” ₃₀Di kownu yere san a uma taki, a priti en krosi èn di a e waka go moro fara tapu a skotu, den sma ben man si tak' a ben weri lowkrosi ondro a tapuseikrosi fu en. ₃₁Dan kownu taki: “Gado kan gi mi wan hebi strafu, efu mi no kapu a ede fu Elisa, a manpikin fu Safat, puru fu en neki tide.”

₃₂A pisten dati Elisa ben de na oso. Den edeman fu Israel ben de na en. Kownu ben seni wan man go na en fesi, ma fosi a man ben doro Elisa taigi den edeman taki: “Luku, a kiriman e seni wan sma kon fu puru mi ede tapu mi neki. Un sroto a doro te a boskopuman doro fu a no kon inisei. Mi e yere den futu fu en masra leti na en baka.” ₃₃Elisa no ben kba taki ete di a boskopuman doro. Dan kownu taki: “Luku sortu ongoloku MASRA e meki miti wi! Fu sanede meki mi mus poti mi howpu tapu MASRA ete?”

₃₆Di den ben e taki a tori ete, Yesus srefi kon tnapu na den mindri. A taigi den taki: “Freide mus de nanga unu!” ₃₇Den ben skreki te fu dede, bika den ben prakseri taki den e si wan yorka. ₃₈Dan Yesus aksi den taki: “Fu sanede un e skreki so? Sanede un de nanga tu ati? ₃₉Luku Mi anu nanga Mi futu, dan un o si taki na Mi srefi dya! Kon fasi Mi, dan un o si taki na Mi, bika wan yorka no abi meti nanga bonyo soleki fa Mi abi.” ₄₀Di A taki dati, A sori den En anu nanga En futu. ₄₁Den man ben breiti, èn den ben ferwondru sote taki den no ben man bribi. Ne Yesus aksi den taki: “Un abi wan sani dyaso fu nyan?” ₄₂Dan den gi En wan pisi baka fisi. ₄₃A teki en, dan A nyan en let' na den fesi. ₄₄Dan A taigi den taki: “Disi na san Mi ben taigi unu, di Mi ben de nanga unu ete: Ala sani san skrifi fu Mi na ini a wèt fu Moses, nanga den buku fu den profeiti, èn ini den Psalm mus kon tru.” ₄₅Dan A opo den ai fu den kan ferstan san skrifi ini a Santa Buku. ₄₆A taigi den taki: “A skrifi taki a Mesias ben mus nyan pina èn dede, dan tapu a di fu dri dei A ben mus kon baka na libi. ₄₇Dan bigin na Yerusalem, den mus preiki ini En nen gi ala folku taki den mus drai den libi fu kisi pardon fu den sondu. ₄₈Unu na kotoigi fu den sani disi. ₄₉Arki, Mi o seni a sani kon gi unu san Mi P'pa ben pramisi. Ma un mus tan ini a foto te leki un kisi a krakti san o kmopo na heimel.”

₅₀Dan A tyari den go te na Betania. A opo En anu, dan A blesi den. ₅₁Di A e blesi den, A opo go na heimel libi den. ₅₂Den anbegi En, dan nanga bigi prisiri den drai go baka na Yerusalem. ₅₃Ala yuru den ben de ini a tempel e opo Gado nen.