Dag 132 van 365- 2 Koningen 15-16 en Johannes 3:1-21

₁Di kownu Yerobeam fu Israel ben de tutenti-na-seibi yari na makti, Asarya, a manpikin fu Amasya tron kownu fu Yuda. ₂A ben abi tin-na-siksi yari di a tron kownu. A tan feifitenti-na-tu yari na makti ini Yerusalem. En m'ma ben nen Yekolya èn a ben de fu Yerusalem. ₃A ben e du san bun ini MASRA ai, neleki en p'pa Amasya. ₄Ma den presi pe den sma ben e tyari ofrandi ben tan. Den sma ben tan e srakti meti leki ofrandi èn bron wierook na den presi dati.

₅Dan MASRA strafu kownu nanga gwasi. A tan nanga gwasi te leki a dede. A ben go tan en wawan na ini wan aparti oso. Yotam, a manpikin fu en ben e sorgu taki sani ben e waka bun ini a kownu-oso èn a ben e tiri a kondre. ₆Den tra sani di psa ini a libi fu Asarya nanga ala den sani di a du skrifi poti ini a buku fu a historia fu den kownu fu Yuda. ₇Asarya dede èn den beri en ini a foto fu David. En manpikin Yotam teki en presi leki kownu.

₈Di kownu Asarya fu Yuda ben de dritenti-na-aiti yari na makti, Sekarya, a manpikin fu Yerobeam, tron kownu fu Israel. A ben e libi na Samaria, èn a tan siksi mun na makti. ₉A ben e du san no bun ini MASRA ai, neleki den afo fu en. A tan du den sondu di Yerobeam, a manpikin fu Nebat, ben meki Israel e du.

₁₀Salum, a manpikin fu Yabes, meki mofo fu kiri Sekarya èn a kiri en leti fesi ala sma dan a teki en presi leki kownu. ₁₁Den tra sani di psa ini a libi fu Sekarya skrifi poti ini a buku fu a historia fu den kownu fu Israel. ₁₂MASRA ben pramisi Yehu taki: “Yu pikin, granpikin nanga afopikin, o teki yu presi leki kownu fu Israel.” Èn na so a psa tu.

₁₃Di kownu Usia fu Yuda, ben de dritenti-na-neigi yari na makti, Salum, a manpikin fu Yabes, tron kownu. A tan wan mun na makti ini Samaria. ₁₄Dan Menakem, a manpikin fu Gadi, kmoto fu Tirsa go kiri Salum, a manpikin fu Yabes, na Samaria dan a teki en presi leki kownu. ₁₅Den tra sani di psa ini a libi fu Salum nanga a mofo di a ben meki fu kiri kownu, skrifi poti ini a buku fu a historia fu den kownu fu Israel. ₁₆Di Menakem ben e hari kmoto fu Tirsa, a broko a foto Tifsak èn a kiri ala den sma fu a foto dati nanga di fu a heri kontren drape, fu di den sma fu Tifsak no ben wani opo den bigi doro fu a foto gi en. A kiri ala den sma fu a foto èn a meki den priti ala den bere fu den uma opo di ben de nanga bere.

₁₇Di kownu Asarya fu Yuda ben de dritenti-na-neigi yari na makti, Menakem, a manpikin fu Gadi, tron kownu fu Israel. A ben e libi na Samaria èn a tan tin yari na makti. ₁₈A ben e du san no bun ini MASRA ai. A tan du den sondu di Yerobeam, a manpikin fu Nebat, ben meki Israel e du te leki a dede.

₁₉Dan Kownu Pul fu Asur hari go feti nanga Israel. Ma Menakem gi Pul dritenti dusun kilo solfru fu Pul ben kan yepi en fu a tan kownu fu a kondre. ₂₀Menakem ben puru a moni disi na anu fu den gudu sma fu Israel, fu a ben kan pai a kownu fu Asur. A ben meki ibri sma gi sowan afu kilo solfru. Dan a kownu fu Asur drai gwe libi a kondre. ₂₁Den tra sani di psa ini a libi fu Menakem nanga ala den sani di a du, skrifi poti ini a buku fu a historia fu den kownu fu Israel. ₂₂Menakem dede èn en manpikin Pekakya teki en presi leki kownu.

₂₃Di kownu Asarya fu Yuda ben de feifitenti yari na makti, Pekakya, a manpikin fu Menakem tron kownu fu Israel. A ben libi na Samaria èn a tan tu yari na makti. ₂₄A ben e du san no bun ini MASRA ai. A tan du den sondu di Yerobeam, a manpikin fu Nebat, ben meki Israel e du.

₂₅Pekak, a manpikin fu Remalyahu, wan fu den ofisiri fu kownu, meki mofo fu kiri en. A kiri kownu nanga Argob nanga Arye, ini a tranga kibripresi fu a kownu-oso na Samaria. A du disi nanga a yepi fu feifitenti man fu Gilead. Baka di Pekak kiri kownu a teki en presi leki kownu. ₂₆Den tra sani di psa ini a libi fu Pekakya nanga ala den sani di a du, skrifi poti ini a buku fu a historia fu den kownu fu Israel.

₂₇Di kownu Asarya fu Yuda ben de feifitenti-na-tu yari na makti, Pekak, a manpikin fu Remalyahu, tron kownu fu Israel. A ben e libi na Samaria èn a tan tutenti yari na makti. ₂₈A ben e du san no bun ini MASRA ai. A tan du den sondu di Yerobeam, a manpikin fu Nebat, ben meki Israel e du.

₂₉Di kownu Pekak fu Israel ben de na makti, kownu Tiglatpileser fu Asur, broko kon ini a kondre. A teki den foto Iyon, Abel-Bet-Maaka, Yanoak, Kedes nanga Hasor, abra. A teki den kontren Gilead, Galilea nanga a heri kontren fu Naftali abra tu dan a tyari den sma di ben e libi drape nanga tranga gwe na Asur.

₃₀Hosea, a manpikin fu Ela, ben meki mofo fu kiri Pekak, a manpikin fu Remalyahu. A kiri en dan a teki en presi leki kownu, di kownu Yotam, a manpikin fu Usia, ben de tutenti yari na makti. ₃₁Den tra sani di psa ini a libi fu Pekak nanga ala den sani di a du, skrifi poti ini a buku fu a historia fu den kownu fu Israel.

₃₂Di kownu Pekak fu Israel, a manpikin fu Remalyahu, ben de tu yari na makti, Yotam, a manpikin fu Usia, tron kownu fu Yuda. ₃₃A ben abi tutenti-na-feifi yari di a tron kownu èn a tan tin-na-siksi yari na makti ini Yerusalem. En m'ma ben nen Yerusa èn a ben de a umapikin fu Sadok. ₃₄Yotam ben e du san bun ini MASRA ai, neleki en p'pa Usia. ₃₅Ma den presi pe den sma ben e tyari ofrandi ben tan. Den sma ben tan e srakti meti leki ofrandi èn bron wierook na den presi dati.

Na Yotam meki a Tap'seipoort na a oso fu MASRA. ₃₆Den tra sani di psa ini a libi fu Yotam nanga ala den sani di a du, skrifi poti ini a buku fu a historia fu den kownu fu Yuda. ₃₇Ini a ten di Yotam ben de na makti, MASRA meki kownu Resin fu Aram, nanga kownu Pekak fu Israel, go feti na Yuda fu a fosi leisi. ₃₈Yotam dede èn den beri en na den afo fu en ini a foto fu David. En manpikin Akas teki en presi leki kownu.

₁Di Pekak, a manpikin fu Remalyahu, ben de tin-na-seibi yari na makti ini Israel, Akas, a manpikin fu Yotam, tron kownu fu Yuda. ₂Akas ben abi tutenti yari di a tron kownu èn a tan tin-na-siksi yari na makti ini Yerusalem. A no ben e du san bun ini MASRA ai, a Gado fu en, soleki en afo David. ₃A ben teki a eksempre fu den kownu fu Israel. A bron en eigi manpikin leki ofrandi, wan groskin sani di den folku ben e du di MASRA ben yagi gwe gi den Israelitisma. ₄A ben e srakti meti leki ofrandi èn bron wierook na den presi pe den sma ben e tyari ofrandi, tapu den pikin bergi nanga ondro ibri bon nanga furu wiwiri.

₅Dan kownu Resin fu Aram, nanga kownu Pekak, a manpikin fu Remalyahu, fu Israel hari kon feti nanga Yerusalem. Den lontu a foto na alasei, ma den no ben man wini Akas. ₆Na ini a ten dati kownu Resin fu Aram teki a foto Elat abra baka fu Yuda. A yagi den sma fu Yuda puru fu a foto èn den Edomitisma go libi drape te tide. ₇Dan kownu Akas seni boskopuman go na kownu Tiglatpileser fu Asur, nanga a boskopu disi: “Mi na yu knekti nanga yu manpikin. Kon fu ferlusu mi ini a makti fu a kownu fu Aram nanga di fu Israel, di hari kon feti nanga mi.” ₈Akas teki a solfru nanga a gowtu di ben de ini a oso fu MASRA nanga ini den kamra fu a kownu-oso pe den gudu ben e tan, dan a seni en leki kado gi a kownu fu Asur. ₉Dan a kownu fu Asur du san Akas aksi en. A hari go na Damaskus èn a teki en abra. A tyari den sma fu Damaskus nanga tranga go na Kir èn a kiri kownu Resin.

₁₀Baka dati, kownu Akas go na Damaskus fu miti nanga kownu Tiglatpileser fu Asur. Di Akas si a altari na Damaskus, a seni wan prenki fu a altari dati gi priester Uria, nanga wan tra papira pe a ben skrifi fin'fini fa a mus bow en. ₁₁Dan priester Uria meki a altari. A meki en fin'fini leki fa kownu Akas seni komanderi en fu Damaskus. Fosi kownu Akas ben drai kon baka fu Damaskus, priester Uria ben kba meki a altari. ₁₂Di kownu drai kon baka fu Damaskus, a si a altari. Dan a waka go na en, èn a kren go na en tapu. ₁₃Dan a bron wan meti leki ofrandi, a tyari wan graan-ofrandi, a kanti win leki ofrandi tapu a altari èn a fringi a brudu fu a freide-ofrandi tapu a altari. ₁₄Kownu Akas meki den puru a kopro altari di ben tnapu fesi a oso fu MASRA èn di ben meki spesrutu gi MASRA, fu en presi, bika a ben tnapu mindri a oso nanga nyun altari. Dan a meki den tyari en go poti na noordsei fu a nyun altari. ₁₅Dan kownu Akas komanderi priester Uria taki: “Tapu a bigi altari yu mus bron a ofrandi fu mamanten èn drape yu mus tyari a graan-ofrandi fu neti. Tapu a altari disi yu mus bron a meti tu di kownu nanga den sma fu a kondre e tyari leki ofrandi nanga a graan-ofrandi fu kownu nanga den sma fu a kondre. A win di den sma fu a kondre e tyari leki ofrandi yu mus kanti drape tu. Mora fara yu mus fringi a brudu fu den meti di bron leki ofrandi nanga a brudu fu den meti di srakti leki ofrandi drape tu. A kopro altari mi o teki fu misrefi fu suku a wani fu Gado.” ₁₆Priester Uria du ala sani leki fa kownu Akas komanderi en. ₁₇Dan kownu Akas koti den plaat puru fu den baki di ben meki tapu den kopro wiel, dan a puru den beki di ben de na ini den baki. A puru a bigi kopro beki tu tapu den kopro kaw, dan a poti en na tapu wan ston fundamenti. ₁₈A meki den puru a pisi di ben bow na a oso fu MASRA fu den sma ben kon makandra tapu a sabatdei nanga a spesrutu gadri pe kownu ben e waka. A meki den poti den sani disi na wan tra presi fu di a kownu fu Asur ben wani dati.

₁₉Den tra sani di psa ini a libi fu Akas nanga den sani di a du skrifi poti ini a buku fu a historia fu den kownu fu Yuda. ₂₀Akas dede èn den beri en na den afo fu en ini a foto fu David. En manpikin Hiskia teki en presi leki kownu.

₁Wan Fariseiman ben de di ben nen Nikodemus. A ben de wan fu den edeman fu den Dyusma. ₂Wan neti a man disi kon na Yesus dan a taigi En taki: “Meister, wi sabi taki na Gado seni Yu kon fu gi den sma leri. Bika no wan sma ben o man du den marki san Yu e du, efu Gado no ben de nanga en.” ₃Yesus piki en taki: “Fu tru Mi e taigi yu: Efu yu no kon gebore nyunyun, yu no man kon ondro a tiri fu Gado.” ₄Dan Nikodemus aksi En taki: “Fa wan sma di owru kba kan kon gebore baka? Yu no man go ini yu m'ma bere baka fu a meki yu ete wan leisi.” ₅Yesus piki en baka taki: “Fu tru Mi e taigi yu: No wan sma kan kon ondro a tiri fu Gado efu a no kon gebore fu watra nanga a Yeye. ₆Bika san libisma meki na libisma, ma san a Yeye e meki na yeye. ₇Yu no mus ferwondru di Mi taigi yu taki un mus kon gebore nyunyun. ₈A winti e wai go pe a wani. Yu e yere en, ma yu no sabi pe a kmopo nanga pe a e go. Na so a de tu te wan sma kon gebore fu a Yeye.” ₉Dan Nikodemus aksi En taki: “Fa a sani dati kan?” ₁₀Yesus piki en taki: “Fa yu leki wan leriman fu Israel no sabi den sani disi? ₁₁Fu tru Mi e taigi yu taki: Wi sabi san wi e taki èn wi e ferteri san wi ben si. Ma toku un no e bribi san wi e taigi unu. ₁₂Efu un no e bribi Mi te Mi e ferteri unu sani fu grontapu, dan fa un o bribi Mi te Mi e ferteri unu sani fu heimel? ₁₃No wan sma de di opo go na heimel, boiti a wan di saka kmopo fu heimel. Dati na a Manpikin fu Libisma.

₁₄Soleki fa Moses ben opo a sneki go na loktu ini a dreisabana, na so den mus opo a Manpikin fu Libisma go na loktu tu, ₁₅fu meki taki ala sma di e bribi ini En sa abi a libi fu têgo. ₁₆Bika Gado lobi libisma sote, tak' A gi En wan enkri Manpikin fu meki taki ala sma di e bribi ini En, no mus go lasi, ma fu den abi a libi fu têgo. ₁₇Bika Gado no seni En Manpikin kon na grontapu fu krutu libisma, ma fu A ferlusu den. ₁₈A sma di e bribi ini En, no o kisi strafu. Ma efu wan sma no e bribi ini En, dan a strafu de na en tapu kba. Bika a no bribi ini a wan enkri Manpikin fu Gado. ₁₉Na fu a sani disi den o kisi strafu: A faya kon na grontapu, ma sma ben lobi a dungru moro a faya, bika san den ben e du ben ogri. ₂₀A sma di e du ogri, no lobi a faya srefsrefi èn a no e kon ini a faya, fu sma no kon sabi san a e du. ₂₁Ma a sma di e du den sani san tru, a dati e kon ini a faya, fu sori taki san a e du na san Gado wani fu a du.”