Dag 133 van 365- 2 Koningen 17-18 en Johannes 3:22-36

₁Di kownu Akas fu Yuda ben de twarfu yari na makti, Hosea, a manpikin fu Ela, tron kownu fu Israel. A ben e libi na Samaria èn a tan neigi yari na makti. ₂A ben e du san no bun ini MASRA ai, ma a no ben takru so leki den kownu fu Israel di waka na en fesi.

₃Kownu Salmanasar fu Asur ben hari kon feti nanga Hosea. Hosea ben saka ensrefi gi en, èn a ben ferplekti fu pai Salmanasar wan moni ala yari. ₄Ma a kownu fu Asur ben meki den grabu Hosea èn tyari en go sroto na straf'oso fu di a ben kon sabi taki Hosea ben meki mofo fu du wan sani, bika Hosea ben seni boskopuman go na kownu So fu Egipte fu yepi en, èn a no ben pai a moni moro leki fa a ben gwenti du ala yari. ₅Ne a kownu fu Asur broko kon ini a kondre, a hari go na Samaria dan a lontu a kondre dri yari langa fu ala sei. ₆Di Hosea ben de neigi yari na makti, a kownu fu Asur teki Samaria abra. A tyari den Israelitisma gwe nanga tranga na Asur. Drape a poti sowan fu den fu libi ini a foto Halak, trawan na a syoro fu a Haborliba ini Gosan, nanga trawan ini den foto fu den Meden.

₇Den sani disi psa nanga den Israelitisma, fu di den no du a wani fu MASRA, den Gado, di puru den na ini Egipte ini a makti fu Farao, a kownu fu Egipte. Den ben dini tra gado, ₈den tan du den sani fu den folku di MASRA ben yagi puru fu a kondre gi Israel èn den tan du den sani di den kownu fu Israel meki den du. ₉Den Israelitisma ben e du sani di MASRA, den Gado, no ben lobi srefsrefi. Ini ala den foto den ben abi presi pe den sma ben e tyari ofrandi, fu a moro pikin wakti-oso te nanga den tranga foto. ₁₀Den ben poti ston nanga postu tnapu gi kruktu gado tapu ala pikin bergi nanga ondro ibri bon nanga furu wiwiri. ₁₁Na ala den presi pe den sma ben e tyari ofrandi, den bron meti leki ofrandi, leki fa den folku ben e du di MASRA ben yagi puru fu a kondre gi den. Den du MASRA wan hati sani nanga den ogri di den du. ₁₂Den ben e dini kruktu gado, wan sani gi san MASRA ben warskow den trangatranga taki den no mus du en. ₁₃MASRA ben meki ala den profeiti fu En nanga den man di A ben e sori sani, warskow Israel nanga Yuda dorodoro taki: “Un libi den sani di un e du di no bun. Un hori un na den gebod nanga den sani di un mus tan du, na a wèt di Mi gi den afo fu unu fu hori èn di Mi meki den knekti fu Mi, den profeiti, gi unu.” ₁₄Ma den no ben wani arki. Den sori tak' den ben trangayesi leki den afo fu den di no ben poti den fertrow na tapu MASRA, a Gado fu den. ₁₅Den ben poti den warskow, den sani di den ben mus tan du nanga a ferbontu di A ben meki nanga den afo fu den na wan sei. Den waka baka kruktu gado te leki densrefi kon kruktu. Den du densrefi sani tu di den folku ben e du di ben e libi lontu den, aladi MASRA ben komanderi den fu den no du den srefi sani fu den folku. ₁₆Den ben poti ala den gebod fu MASRA, den Gado, na wan sei. Den ben meki tu yongu kaw fu gowtu, den poti postu tnapu gi kruktu gado, den ben e anbegi a son, a mun nanga den stari, èn den ben dini Baal. ₁₇Moro fara den bron den manpikin nanga den umapikin fu den leki ofrandi, den ben e meki sma taigi den noso luku gi den san ben de fu kon ini a ten na den fesi èn den ben poti densrefi fu du san no bun ini MASRA ai. Tapu a fasi disi den ben e wiki a atibron fu Gado. ₁₈Na dat' meki MASRA atibron srefsrefi tapu Israel, tak' A poti den na wan sei. Soso a lo fu Yuda ben tan na baka. ₁₉Ma den sma fu Yuda srefi no ben e hori den gebod tu fu MASRA, den Gado, ma den ben e tan du den sani di Israel ben e du. ₂₀Na dat' meki MASRA poti ala den bakapikin fu Israel na wan sei. A broko den saka èn A gi den abra ini a makti fu folku di ben e kon fufuru ala den sani fu den tyari gwe. Te fu kba A no ben wani si den moro. ₂₁Di MASRA ben prati den Israelitisma fu a famiri fu David, den Israelitisma ben poti Yerobeam, a manpikin fu Nebat, leki den kownu. Ma Yerobeam ben meki den tapu fu dini MASRA èn a meki den du hebi sondu. ₂₂Den Israelitisma du den srefi sondu di Yerobeam du. Den tan du den sondu dati. ₂₃Te fu kba, MASRA puru den na En fesi, leki fa A ben meki ala den knekti fu En, den profeiti, taki. Leki straf'man den Israelitisma gwe libi den kondre. Feyanti tyari den sma fu Israel nanga tranga go na Asur, pe den de te leki tide.

₂₄A kownu fu Asur puru sma fu Babel, Kuta, Awa, Hamat nanga Sefarwaim, tyari go libi na Samaria na a presi fu den Israelitisma. Den sma disi teki Samaria abra èn den go libi ini den foto fu en. ₂₅Ini a bigin, di den sma go libi drape, den no ben e anbegi MASRA. Dat' meki MASRA ben seni lew go na den mindri di kiri wantu fu den. ₂₆Dan sma taigi a kownu fu Asur taki: “Den folku di yu tyari go libi ini den foto fu Samaria, no sabi fa den mus dini a Gado fu a kondre dati na a yoisti fasi. Dat' meki A seni lew go na den mindri, èn den lew e kiri den fu di den no sabi a yoisti fasi fu dini a Gado fu a kondre dati.” ₂₇Ne a kownu fu Asur komanderi taki: “Un tyari wan fu den priester di un ben teki fu drape tyari gwe, go libi drape baka. A mus leri den sma a yoisti fasi fu dini a Gado fu a kondre dati.” ₂₈Na so wan fu den priester, di den ben teki fu Samaria tyari gwe, go drape baka. A go libi na Betel, èn a leri den sma fa den ben mus anbegi MASRA. ₂₉Ma iniwan fu den folku ben meki den eigi popki fu den gado fu den. Den ben e poti den ini den tempel di den sma fu Samaria ben bow na den presi pe den ben e tyari ofrandi. Ala den sma fu den folku ben e du disi ini den foto pe den ben e tan. ₃₀Den sma fu Babel ben meki wan popki fu Sukot-Benot, den sma fu Kuta ben meki wan fu Nergal, den sma fu Hamat ben meki wan fu Asima, ₃₁èn den Awitisma ben meki fu Nibkas nanga Tartak. Den Sefarwitisma ben e bron den pikin fu den leki ofrandi gi Adramelek nanga Anamelek, den gado fu Sefarwaim. ₃₂Boiti den gado fu den, den ben e anbegi MASRA tu èn den ben teki sma na den mindri poti leki priester na den presi pe sma ben e tyari ofrandi. Den priester disi ben e du a wroko gi den ini den tempel na den presi pe den ben e tyari ofrandi. ₃₃Den ben e anbegi MASRA, ma den ben tan dini den gado fu den leki fa den ben gwenti du ini den eigi kondre.

₃₄Te nanga a dei fu tide den e tan du den owru gwenti fu den. Den no e anbegi MASRA, den no e du den sani di den ben mus tan du, den no e hori densrefi na den sani na san den ben mus tan hori densrefi, den no e hori densrefi na a wèt nanga den gebod, di MASRA ben gi den bakapikin fu Yakob, di A ben kari Israel. ₃₅Ma nanga den MASRA ben meki wan ferbontu, èn A ben komanderi den taki: “Un no mus anbegi tra gado, un no mus boigi gi den èn un no mus dini den noso tyari ofrandi gi den. ₃₆Ma un mus anbegi MASRA, di puru un ini Egipte nanga bigi krakti nanga makti. Na En un mus anbegi, gi En un mus boigi, èn gi En un mus tyari ofrandi. ₃₇Ala ten un mus hori unsrefi finifini na den sani di un mus tan du, na den sani na san un mus hori unsrefi, na a wèt nanga den gebod di A ben gi unu. Un no mus anbegi tra gado. ₃₈Un no fergiti a ferbontu di Mi meki nanga unu tak' un no mus anbegi tra gado. ₃₉Na MASRA, a Gado fu unu, un mus anbegi, dan A sa ferlusu unu fu a makti fu ala un feyanti.” ₄₀Ma den no arki, den tan du den owru gwenti fu den.

₄₁Na so den folku disi ben e anbegi MASRA, ma den ben e dini den popki fu den gado fu den tu. Te tide den pikin nanga den bakapikin fu den e du leki fa den afo fu den ben e du.

₁Di kownu Hosea fu Israel, a manpikin fu Ela, ben de dri yari na makti, Hiskia, a manpikin fu Akas tron kownu fu Yuda. ₂A ben abi tutenti-na-feifi yari di a tron kownu, èn a tan tutenti-na-neigi yari na makti ini Yerusalem. En m'ma ben nen Abi, èn a ben de wan umapikin fu Sekarya. ₃Neleki en afo David, a ben e du san bun ini MASRA ai. ₄A puru ala den presi pe sma ben e tyari ofrandi, a naki den ston broko di den sma ben poti tnapu gi kruktu gado èn a kapu den postu trowe di den ben poti tnapu gi kruktu gado. A naki a kopro sneki broko tu di Moses ben meki, bika te leki a ten dati den sma fu Israel ben e bron wierook leki ofrandi gi en. Den ben gi a sneki a nen fu Nekustan. ₅Hiskia ben poti en fertrow tapu MASRA, a Gado fu Israel. No wan fu den kownu fu Yuda di kon na en baka, nanga di waka na en fesi, ben de fu marki nanga en. ₆A ben e dini MASRA nanga en heri ati, a tan du En wani èn a hori ensrefi na den gebod di MASRA ben gi Moses. ₇MASRA ben de nanga Hiskia èn ala san a ben du ben e waka bun. A puru ensrefi ondro a tiri fu a kownu fu Asur èn a no ben e dini en moro. ₈A feti nanga den Filistijnsma èn a wini den. A teki a heri kontren abra go te na Gasa, fu a moro pikin wakti-oso te nanga den tranga foto.

₉Kownu Hiskia ben de fo yari na makti, èn kownu Hosea fu Israel, a manpikin fu Ela, ben de seibi yari na makti, di kownu Salmanasar fu Asur hari kon na Samaria dan a lontu a foto fu ala sei. ₁₀Baka dri yari a ben kan teki a foto abra. Di Hiskia ben de siksi yari na makti èn di kownu Hosea fu Israel, ben de neigi yari na makti, Salmanasar teki Samaria abra. ₁₁A kownu fu Asur tyari den Israelitisma gwe nanga tranga na Asur. Drape a poti sowan fu den fu libi ini a foto Halak, trawan na a syoro fu a Haborliba ini Gosan, nanga trawan ini den foto fu den Meden. ₁₂A sani disi psa fu di den no arki MASRA, den Gado. Den broko a ferbontu fu Gado nanga ala san A ben meki En knekti Moses komanderi den. Den no arki den sani dati èn den no du den tu.

₁₃Di kownu Hiskia ben de tin-na-fo yari na makti, kownu Sanherib fu Asur hari kon feti nanga ala den tranga foto fu Yuda èn a teki den abra. ₁₄Dan kownu Hiskia fu Yuda seni a boskopu disi gi a kownu fu Asur di ben de na Lakis: “Mi no du bun. Drai gwe nanga yu legre dan mi sa pai yu san yu wani.” Ne a kownu fu Asur ferplekti en fu pai en neigi dusun kilo solfru nanga neigi hondro kilo gowtu. ₁₅So Hiskia gi en ala a solfru di ben de ini a oso fu MASRA nanga ini den kamra fu a kownu-oso pe den gudu ben e tan. ₁₆Na a pisten dati Hiskia meki den puru a gowtu nanga a solfru di ensrefi ben meki den poti na den doro nanga doropostu ini a tempel fu MASRA, dan a gi a gowtu na a kownu fu Asur.

₁₇Ma baka dati, a kownu fu Asur seni a edeman fu en legre, a edeman fu den knekti fu en nanga wan ofisiri fu en nanga wan bigi legre fu Lakis go na kownu Hiskia na Yerusalem. Den hari go na Yerusalem èn di den doro drape den tan tnapu na a kba pisi fu den kokro di e tyari a watra kon fu a tapusei watrabaki. Dati ben de na a pasi di e go na a wei pe sma ben e wasi krosi. ₁₈Di den seni aksi fu taki nanga kownu, kownu seni Elyakim, a manpikin fu Hilkia, a edeman fu den knekti fu en, go na den. A seni en go makandra nanga Sebna, a sekretarsi fu kownu, nanga Yoak, a manpikin fu Asaf, di ben de a takiman fu a kownu. ₁₉Dan a ofisiri taigi den taki: “Un taigi Hiskia tak' a bigi kownu, a kownu fu Asur, seni aksi en disi: ‘Tapu san yu e poti yu fertrow? ₂₀Yu denki taki yu kan wini wan feti nanga moi wortu wawan? Tapu suma yu e poti yu fertrow so taki yu no wani saka yusrefi gi mi? ₂₁Efu na tapu Egipte yu e fertrow, di gersi wan broko tiki, a o boro yu anu te yu o anga na en tapu. Na dati e psa nanga ala sma di e fertrow tapu Farao, a kownu fu Egipte. ₂₂Efu yu taigi mi taki na tapu MASRA, a Gado fu unu, un e fertrow, dan mi o aksi unu efu a no den presi fu En pe sma e tyari ofrandi nanga den altari fu En Hiskia broko èn taigi den sma fu Yuda nanga Yerusalem taki na soso fesi a altari dyaso ini Yerusalem den mus boigi. ₂₃We dan, hori wan strei nanga a basi fu mi, a kownu fu Asur: Mi e gi un tu dusun asi efu un abi sma fu tyari den. ₂₄Yere, awinsi yu poti yu fertrow tapu den fetiwagi nanga den srudati tapu asi fu Egipte, yu no o man tapu wan enkri kapten srefi, wan fu den moro pikin knekti fu mi basi, te a hari kon fu feti nanga yu. ₂₅Na MASRA seni mi kon fu broko a presi disi. Na MASRA srefi ben komanderi mi taki: Hari go na a kondre dati, dan yu e broko en.’ ” ₂₆Ne Elyakim, a manpikin fu Hilkia, Sebna nanga Yoak, taigi a ofisiri taki: “Wi e begi yu fu yu taki Arameestongo nanga den knekti fu yu, bika wi e ferstan a tongo dati. Ma no taki ini a tongo fu den sma fu Yuda, bika den sma di de tapu a skotu e yere ala san un e taki.” ₂₇Ma a ofisiri piki taki: “Un no mus prakseri taki mi basi seni mi kon fu taki nanga unu èn nanga un basi wawan. Den sani di mi e taki de tu gi den man tapu a skotu. No langa moro dan den o nyan den eigi morsu èn den o dringi den eigi pisi, leki unu.” ₂₈Dan a ofisiri waka go na fesi, dan a bari trangatranga ini a tongo fu den sma fu Yuda taki: “Un arki san a bigi kownu, a kownu fu Asur, abi fu taki! ₂₉Na disi a kownu e taki: ‘No meki Hiskia kori unu, bika a no o man ferlusu unu. ₃₀Un no meki Hiskia taigi unu tu taki un mus poti un fertrow tapu MASRA, taki a no abi misi taki MASRA o ferlusu unu, fu a foto disi no o kon ini anu fu a kownu fu Asur.’ ₃₁Un no arki Hiskia, bika na disi a kownu fu Asur e taki: ‘Un saka unsrefi gi mi èn un gi unsrefi abra na mi, dan iniwan fu unu o man nyan fu un eigi droifibon nanga en eigi figabon èn dringi a watra fu en eigi peti, ₃₂te leki mi kon teki un tyari go na wan kondre leki di fu unu. Wan kondre fu graan nanga nyun win, wan kondre fu brede nanga droifidyari, fu oleifbon, oli nanga oni. Drape un o libi, un no o dede. Dat' meki un no mus arki Hiskia, bika na kori a e kori unu te a e taki: MASRA sa ferlusu unu. ₃₃No wan fu den gado fu den tra folku ben man ferlusu den fu a makti fu a kownu fu Asur. ₃₄Pe den gado fu Hamat, Arpad nanga den di fu Sefarwaim, Hena nanga Iwa de? Den no ben man ferlusu Samaria fu a makti fu mi. ₃₅No wan fu den gado fu den kondre dati ben man ferlusu a kondre fu den fu a makti fu mi. MASRA no o man ferlusu Yerusalem tu.’ ” ₃₆Ma a pipel tan tiri, den no piki a ofisiri noti, bika kownu ben komanderi den taki den no mus piki.

₃₇Dan Elyakim, a manpikin fu Hilkia, a edeman fu den knekti fu kownu, Sebna, a sekretarsi fu kownu, nanga Yoak, a manpikin fu Asaf, a takiman fu kownu, priti den krosi fu sori taki den e sari, dan den go na Hiskia go taigi en ala den sani di a ofisiri taki.

₂₂Baka dati Yesus nanga den man di ben e teki leri fu En go na a kontren fu Yudea. A tan nanga den drape, èn A dopu sma. ₂₃Yohanes ben e dopu sma tu na Enon, krosbei fu a foto Salim, bika furu watra ben drape. Den sma ben go drape na en fu a dopu den. ₂₄A pisten dati Yohanes no ben de na straf'oso ete. ₂₅Dan den man fu Yohanes kisi trobi nanga wan Dyu fu a fasi fa Dyusma mus krin densrefi. ₂₆Dan den kon na Yohanes èn den taigi en taki: “Meister, wan Man ben de na yu na a tra sei fu a Yordanliba èn yu ben ferteri unu suma na En. Now a Man dati e dopu sma tu èn ala sma e go na En.” ₂₇Ma Yohanes piki den taki: “No wan sma kan kisi wan sani, efu a no Gado na heimel gi en. ₂₈Un srefi yere di mi ben taki tak' mi a no Kristus, ma taki Gado ben seni mi kon na En fesi. ₂₉A trowmisi na fu a trowmasra. A mati fu a trowmasra e tnapu arki nomo oten a trowmasra e kon, èn a e breiti te a yere en sten. A sani disi e meki mi breiti fu tru. ₃₀Sma mus poti den ai moro nanga moro na En tapu, dan den puru den ai na mi tapu.”

₃₁A wan di kmoto na loktu bigi moro ala trawan. Ma a sma di de fu grontapu, na fu grontapu. Dat' meki a e si ala sani grontapu fasi. ₃₂A Wan di kmoto na heimel bigi moro ala trawan. A e ferteri fu san A si nanga san A yere, ma no wan sma e bribi san A e taki. ₃₃Ma te wan sma bribi san A taki, a e sori nanga dati tak' Gado abi leti. ₃₄Bika a wan di Gado seni kon e ferteri san Gado taki, bika Gado gi En a Santa Yeye psa marki. ₃₅A P'pa lobi a Manpikin, èn A poti ala sani na ini En anu. ₃₆A sma di e bribi ini a Manpikin, abi a libi fu têgo. Ma a sma di no wani du san a Manpikin e taki, no o kisi a libi, bika a atibron fu Gado e tan na en tapu.