Dag 136 van 365- 2 Koningen 24-25 en Johannes 5:1-23

₁Di Yoyakim ben de na makti, kownu Nebukadnesar fu Babel hari kon na Yuda èn teki en abra. Yoyakim ben abi fu saka ensrefi gi en dri yari langa. Ma baka dati a bigin kaka futu gi Nebukadnesar. ₂Dan MASRA ben e meki grupu fu Kaldeasma, fu Aram, fu Moab nanga fu den Amonitisma broko kon ini a kondre. A ben e seni den fu broko a kondre, soleki fa A ben meki den knekti fu En, den profeiti, ben taki na fesi kba. ₃Iya, na den sani disi miti Yuda, leki fa MASRA ben taki, fu di A ben wani puru den na En tapu fu den sondu di Manase ben du, ₄nanga fu a brudu di a meki lon fu soso. A ben furu Yerusalem nanga brudu di ben lon fu soso. Gi a sani dati MASRA no ben wani gi en pardon.

₅Den tra sani di psa ini a libi fu Yoyakim nanga ala den sani di a du, skrifi poti ini a buku fu a historia fu den kownu fu Yuda. ₆Yoyakim dede èn en manpikin Yoyakin teki en presi leki kownu. ₇A kownu fu Egipte no ben e kmoto moro fu en kondre go feti, bika a kownu fu Babel ben teki ala den presi abra di ben de fu a kownu fu Egipte, fu a Kriki fu Egipte go te na a Eufratliba.

₈Yoyakin ben abi tin-na-aiti yari di a tron kownu. A tan dri mun na makti ini Yerusalem. En m'ma ben nen Nekusta, èn a ben de wan umapikin fu Elnatan fu Yerusalem. ₉Yoyakin ben e du san no bun ini MASRA ai, neleki en p'pa.

₁₀Di Yoyakin ben de na makti, den ofisiri fu kownu Nebukadnesar fu Babel, hari go feti nanga Yerusalem dan den lontu a foto fu alasei. ₁₁Kownu Nebukadnesar fu Babel srefi kon drape di den srudati fu en ben lontu a foto. ₁₂Dan kownu Yoyakin fu Yuda gi ensrefi abra na a kownu fu Babel makandra nanga en m'ma, den knekti fu en, den ofisiri fu en nanga den heihei man fu a kownu-oso. Kownu Nebukadnesar ben de aiti yari na makti di a teki Yoyakin tyari gwe. ₁₃Nebukadnesar teki ala den gudu fu a oso fu MASRA nanga di fu a kownu-oso tyari gwe. A puru a gowtu teki tu fu ala den sani di kownu Salomo fu Israel ben meki gi a tempel fu MASRA, soleki fa MASRA ben taki na fesi kba tak' dati ben o psa. ₁₄Ala den sma fu Yerusalem a teki tyari gwe nanga tranga, ala den ofisiri nanga ala den man di ben fiti fu feti ini a legre, tin dusun sma. A teki ala den temreman tyari gwe tu nanga den smeti. Soso den moro pôti sma fu a kondre a libi na baka. ₁₅Nebukadnesar tyari Yoyakin nanga tranga go na Babel, makandra nanga en m'ma, den uma fu en, den man di ben e wroko ini a kownu-oso nanga den heihei sma fu a kondre. Den alamala a tyari nanga tranga gwe leki strafuman fu Yerusalem go na Babel. ₁₆A kownu fu Babel tyari seibi dusun man di ben fiti fu feti ini a legre, makandra nanga wan dusun temreman nanga smeti nanga tranga go na Babel. Ala den man dati ben tranga èn fiti fu go na feti. ₁₇Dan a kownu fu Babel poti Matanya, a omu fu Yoyakin, leki kownu ini en presi èn a gi en a nen fu Sedekia.

₁₈Sedekia ben abi tutenti-na-wan yari di a tron kownu. A tan erfu yari na makti ini Yerusalem. En m'ma ben nen Hamutal, èn a ben de wan umapikin fu Yirmeya fu Libna. ₁₉Sedekia ben e du san no bun ini MASRA ai, neleki fa Yoyakim ben du. ₂₀Te fu kba MASRA ben kisi sowan atibron tapu den sma fu Yerusalem nanga Yuda taki a drai En baka gi den.

Ma Sedekia ben kaka futu gi a kownu fu Babel.

₈Di kownu Nebukadnesar fu Babel ben de tin-na-neigi yari, feifi mun nanga seibi dei na makti, ofisiri Nebusaradan, a edeman fu den waktiman fu a kownu fu Babel, hari kon na Yerusalem. ₉Drape a sutu faya gi a oso fu MASRA, gi a kownu-oso, nanga gi ala den oso ini Yerusalem, spesrutu gi ala den oso fu den prenspari sma. ₁₀Dan makandra nanga a legre fu den Kaldeasrudati, a edeman broko a heri skotu fu Yerusalem. ₁₁Baka dati, Nebusaradan tyari den tra sma fu a kondre di ben de ini a foto ete gwe nanga tranga, makandra nanga den sma di ben gi densrefi abra na a kownu fu Babel. A heri grupu dati Nebusaradan, a edeman fu den waktiman fu kownu, tyari gwe nanga tranga. ₁₂A meki soso wantu fu den moro pina sma fu a kondre tan na baka fu wroko den droifidyari nanga den pranigron.

₁₃Den Kaldeasrudati broko den bigi kopro postu tu di ben de na a oso fu MASRA. Den broko den kopro baki nanga a bigi kopro beki di ben de ini a oso fu MASRA pis'pisi tu. Dan den tyari ala a kopro dati go na Babel. ₁₄Den teki den patu, den bigi spun, den nefi, den beki fu fanga brudu, den komki nanga ala den kopro sani nanga san den priester ben wroko, tyari gwe. ₁₅A edeman fu den waktiman fu Nebukadnesar teki ala gowtu nanga solfru sani tyari gwe tu soleki den skotriki, den embre fu syow krofaya, den beki, patu, den kandelaar, den skarki nanga den komki. ₁₆Den tu bigi postu, a bigi beki fu san wan nomo ben de nanga den kopro baki di Salomo ben meki gi a oso fu MASRA, ben meki fu someni kopro dati a kopro no ben de fu wegi. ₁₇Wan fu den bigi postu ben hei neigi meter èn a ben abi wan kopro ede. A ede fu a postu ben de wan nanga afu meter. Na loktu fu a ede fu a postu den ben brei wan kopro keti nanga granaki-apra na en. A srefi fasi a keti fu a tra sei ben meki.

₁₈A edeman fu den waktiman fu a kownu, teki granpriester Seraya, priester Sefanya di ben e yepi a granpriester, nanga den dri man di ben e hori wakti na mofodoro fu a tempel leki strafuman tu. ₁₉Moro fara a sroto a ofisiri di ben abi a frantwortu fu a legre, feifi man di ben e wroko krosbei fu kownu di ben de ini a foto, a sekretarsi fu a edeman fu a legre di ben abi a frantwortu fu teki sma ini a legre nanga siksitenti man fu a kondre di ben de ini a foto. ₂₀Nebusaradan, a edeman fu den waktiman fu a kownu, teki ala den man dati dan a tyari den gi a kownu fu Babel di ben de na Ribla. ₂₁Dan a kownu meki den kiri den alamala na Ribla ini a kontren fu Hamat.

Na so Nebukadnesar tyari den sma fu Yuda nanga tranga gwe. ₂₂Dan kownu Nebukadnesar fu Babel poti Gedalya, a manpikin fu Akikam nanga granpikin fu Safan, fu tiri den sma fu Yuda di a ben meki tan na baka. ₂₃Di den ofisiri fu a legre nanga den srudati fu den, yere a sani dati, den kon na Gedalya na Mispa. Den man dati ben de: Yismael, a manpikin fu Netanya, Yokanan, a manpikin fu Kareak, Seraya, a manpikin fu Tankumet fu Netofa, nanga Yaasanya, a manpikin fu wan man fu Maaka. Ala den man disi ben de nanga den man fu den. ₂₄Dan Gedalya meki wan sweri gi den ofisiri nanga gi den man fu den taki: “Un no abi fu frede gi den Kaldea ofisiri. Un tan libi ini a kondre èn un saka unsrefi gi a kownu fu Babel, dan a o go bun nanga unu.” ₂₅Ma seibi mun baka dati, Yismael, a manpikin fu Netanya, èn granpikin fu Elisama, di ben de famiri fu kownu fu Yuda, go nanga tin tra man dan den kiri Gedalya. Den kiri den sma fu Yuda nanga den Kaldeasma di ben de nanga Gedalya na Mispa. ₂₆Ne ala den sma fu Yuda, pikinwan nanga bigiwan go nanga den ofisiri na Egipte bika den ben e frede gi den Kaldeasma.

₂₇Ini a yari di Ewil-Merodak tron kownu fu Babel, a sori kownu Yoyakin fu Yuda sari-ati èn a meki den puru en na straf'oso. Dati psa dritenti-na-seibi yari baka di den ben tyari Yoyakim nanga tranga go drape, tapu a di fu tutenti-na-seibi dei, fu a di fu twarfu mun. ₂₈Kownu Ewil-Merodak taki switi nanga Yoyakin èn gi en wan moro hei presi dan den tra kownu di ben de leki strafuman ini Babel tu. ₂₉Yoyakin no ben abi fu weri straf'man krosi moro, èn solanga di a ben de na libi a ben e nyan makandra nanga a kownu fu Babel. ₃₀Kownu ben sorgu ala dei tu gi ala sani di Yoyakin ben abi fanowdu fu libi te leki a dede.

₁Baka dati Yesus go na Yerusalem, bika den Dyusma ben abi wan fesa. ₂Na Yerusalem yu ben abi wan bigi ston peti nanga feifi gadri lontu en, di ben de krosbei fu a Skapupoort. Ini a tongo fu den Dyusma den ben e kari en Betesda. ₃Furu sikisma ben e didon ini den gadri, soleki brenisma, lansma nanga malengrisma. Den ben e wakti fu a watra sek'seki. ₄Bika wanwan leisi wan engel fu Masra ben e saka kon na ini a watra, dan a watra ben e sek'seki. A fosi sma di ben saka go ini a watra te a sek'seki, ben e kon betre, awinsi sortu siki a ben abi. ₅Wan man ben drape di ben e siki dritenti-na-aiti yari kba. ₆Yesus si a man disi, èn fu di A ben sabi taki a de wan heri pisten drape kba, meki A aksi en taki: “Yu wani kon betre?” ₇A sikiman piki En taki: “Masra, mi no abi no wan sma fu saka mi ini a watra te a e beweigi. Te fu mi doro drape, wan trawan koti mi fesi kba.” ₈Dan Yesus taigi en taki: “Opo, teki yu matrasi, dan yu waka gwe.” ₉A srefi momenti dati a man kon betre. A teki en matrasi, dan a waka gwe. A sani disi psa tapu wan sabatdei. ₁₀Dan den fesiman fu den Dyusma taigi a man di ben kon betre taki: “Tide na sabatdei èn a wèt no wani fu yu tyari yu matrasi tapu a dei disi.” ₁₁Ma a man piki den taki: “A man di dresi mi, taigi mi fu teki mi matrasi dan mi waka gwe.” ₁₂Dan den aksi en taki: “Suma na a man di taigi yu fu du dati?” ₁₃Ma a man di ben kon betre no ben sabi, bika wan bigi grupu sma ben drape èn Yesus ben gwe na den mindri.

₁₄Baka dati Yesus miti a man ini a tempel, dan A taigi en taki: “Arki, yu kon betre. Ma yu mus tapu nanga a sondu libi, noso wan moro takru sani o psa nanga yu.” ₁₅Dan a man gwe go ferteri den fesiman fu den Dyusma taki na Yesus ben dresi en. ₁₆Fu dat'ede den fesiman fu den Dyusma bigin fu de nomo na Yesus baka fu du En ogri, bika A ben du a sani disi tapu wan sabatdei. ₁₇Ma Yesus taigi den taki: “Mi P'pa e wroko te nanga a dei fu tide. Dat' meki Mi e wroko tu.” ₁₈So den Dyu fesiman ben e du moro furu muiti fu kiri Yesus. Bika A no ben broko a wèt fu sabatdei wawan, ma A ben kari Gado En eigi P'pa tu. Tapu sowan fasi A ben taki tak' En nanga Gado na wan.

₁₉Dan Yesus taigi den taki: “Fu tru Mi e taigi un taki: A Manpikin no man du noti fu Ensrefi, ma A e du soso san A si taki a P'pa e du. San a P'pa e du, na dati a Manpikin e du tu. ₂₀Bika a P'pa lobi a Manpikin, èn A e sori En ala sani san Ensrefi e du. A o sori En moro bigi wroko leki disi di o meki unu ferwondru. ₂₁Bika soleki fa a P'pa e meki dedesma opo baka èn A e gi den libi, na so a Manpikin e gi libi tu na suma A wani. ₂₂Moro fara a P'pa no e krutu no wan sma, ma A o meki a Manpikin krutu ala sani. ₂₃A du dati fu ala sma gi a Manpikin grani, soleki fa den e gi a P'pa grani. A sma di no e gi a Manpikin grani, no e gi grani na a P'pa tu di seni En kon.