Dag 138 van 365- 1 Kronieken 4-6 en Johannes 6:1-21

₁Den pikin nanga bakapikin fu Yuda ben de: Peres, Hesron, Karmi, Hur nanga Sobal. ₂Reaya, a manpikin fu Sobal, ben de a p'pa fu Yakat. Yakat ben de a p'pa fu Akumai nanga Lahad. Den alamala ben de fu Sora.

₃Den manpikin fu Etam ben de Yisreel, Yisma nanga Yidbas. Den ben abi wan sisa di ben nen Haselelponi.

₄Mora fara yu ben abi Penuel, di bow a foto Gedor, nanga Eser, di bow a foto Husa. Disi ben de den bakapikin fu Hur, a fosi manpikin fu Efrat, di ben bow Betlehem.

₅Askur, a man di bow a foto Tekoa, ben abi tu uma: Hela nanga Naara. ₆Den pikin di Naara kisi gi en ben de Akusam, Hefer, den Temenitisma nanga den Akastaritisma. Disi na den pikin nanga bakapikin fu Naara. ₇Den pikin fu Hela ben de: Seret, Yesokar nanga Etnan.

₈Kos ben de a p'pa fu Anub nanga Hasobeba. Na en na afo tu fu ala den famiri fu Akarkel, a manpikin fu Harum.

₉Yabes ben de a moro prenspari wan na mindri den brada fu en. En m'ma ben gi en a nen fu Yabes fu di a ben kisi en nanga furu pen. ₁₀Ma Yabes ben begi a Gado fu Israel. A taki: “Blesi mi èn gi mi furu gron. Kibri mi fu ogri no miti mi, fu mi no sabi san na sari.” Dan Gado gi en san a aksi.

₁₁Kelub, a brada fu Suka, ben de a p'pa fu Mekir. Mekir ben de a p'pa fu Eston. ₁₂Eston ben de a p'pa fu Bet-Rafa, Paseak nanga Tekina, di bow a foto Ir-Nakas. Den ben de sma fu Reka.

₁₃Den manpikin fu Kenas ben de Otniyel nanga Seraya. Den manpikin fu Otniyel ben de Hatat nanga Meonotai. ₁₄Meonotai ben de a p'pa fu Ofra. Seraya ben de a p'pa fu Yoab, di bow Gai-Harasim. Den ben kari a presi dati so fu di na soso man di ben e wroko udu ben e libi drape.

₁₅Den manpikin fu Kaleb, a manpikin fu Yefune, ben de: Iru, Ela nanga Naam. A manpikin fu Ela ben de Kenas.

₁₆Den manpikin fu Yehalelel ben de: Sif, Sifa, Tireya nanga Asarel.

₁₇Den manpikin fu Esra ben de: Yeter, Mered, Efer nanga Yalon. Mered trow nanga Bitya, a umapikin fu Farao. Den pikin fu den ben de: Miryam, Samai nanga Yisba, di bow a foto Estemoa. ₁₈Mered ben abi wan uma fu Yuda tu. Den pikin fu a uma disi ben de Yered, di bow a foto Gedor, Heber, di bow a foto Soko nanga Yekutiyel, di bow a foto Sanoak.

₁₉Hodia ben trow nanga wan sisa fu Nakam. Den bakapikin fu den ben bow a foto Keila, pe den Garmitisma e libi, nanga a foto Estemoa, pe den Maakatitisma e libi.

₂₀Den manpikin fu Simon ben de: Amnon, Rina, Ben-Hanan nanga Tilon.

Den manpikin fu Yisi ben de Soket nanga Ben-Soket.

₂₁Den pikin nanga bakapikin fu Sela, wan fu den manpikin fu Yuda, ben de: Er, di bow a foto Leka, Lada, di bow a foto Maresa, nanga den famiri na Bet-Asbea di ben e meki linnen krosi. ₂₂Moro fara yu ben e kisi Yokim, den sma fu Koseba, Yoas nanga Saraf. Yoas nanga Saraf ben trow nanga Moabiti-uma. Ma den ben drai go baka na Betlehem, soleki fa a historia e leri unu. ₂₃A wroko fu den ben de fu meki difrenti sani fu kleidoti. Den ben e wroko gi kownu èn den ben e libi na Netaim nanga Gedera.

₂₄Den manpikin fu Simeon ben de: Nemuel, Yamin, Yarib, Serak nanga Saul. ₂₅Saul ben de a p'pa fu Salum, Salum ben de a p'pa fu Mibsam èn Mibsam ben de a p'pa fu Misma. ₂₆Misma ben de a p'pa fu Hamuel, Hamuel ben de a p'pa fu Sakur èn Sakur ben de a p'pa fu Simi. ₂₇Simi ben abi tin-na-siksi manpikin nanga siksi umapikin. Den brada fu en no ben abi furu pikin. Den bakapikin fu Simeon no ben furu so leki den di fu Yuda. ₂₈Den bakapikin fu Simeon ben e libi na ini Berseba, Molada, Hasar-Sual, ₂₉Bilha, Esem, Tolad, ₃₀Betuel, Horma, Siklag, ₃₁Bet-Hamarkabot, Hasar-Susim, Bet-Biri nanga Saaraim. Disi ben de den foto fu den te kon miti a ten di David tron kownu. ₃₂Den feifi foto Etan, Ain, Rimon, Token, Asan ₃₃nanga den dorpu di ben didon lontu den foto disi te go miti Baal, ben de fu den. Dati ben de den presi pe den bakapikin fu Simeon ben e libi.

Den ben abi den eigi buku pe den ben e skrifi den nen fu den famiri. _34-38Den edeman fu den famiri fu den ben de: Mesobab, Yamlek, Yosa, a manpikin fu Amasya, Yowel nanga Yehu. Yehu ben de a manpikin fu Yosibya, Yosibya ben de a manpikin fu Seraya èn Seraya ben de a manpikin fu Asiyel. Moro fara yu ben abi Elyoenai, Yaakoba, Yesokaya, Asaya, Adiyel, Yesimiyel, Benaya nanga Sisa a manpikin fu Sifi. Sifi ben de a manpikin fu Alon, Alon ben de a manpikin fu Yedaya, Yedaya ben de a manpikin fu Simri èn Simri ben de a manpikin fu Semaya. Ala den man disi di kari na nen ben de edeman fu den famiri. Fu di den famiri fu den man disi ben kon bigi srefsrefi, ₃₉den hari go na westsei na Gedor, te go miti oostsei fu a dal, fu suku tra gron fu wei den kaw nanga den skapu fu den. ₄₀Den feni wan bigi kontren pe a doti ben fatu èn pe grasi ben e gro bun. Den sma di ben e libi drape ben de bakapikin fu Ham. Den ben e libi tiri sondro broko ede. ₄₁Ma di kownu Yekiskia fu Yuda ben de na makti, den edeman fu den famiri di un ben kari, hari go drape èn den broko ala den tenti fu den bakapikin fu Ham. Den kiri den Mehunitisma tu di ben e libi drape. Den kiri den puru na pasi te leki a dei fu tide, dan den go libi drape, fu di drape ben abi wei nanga grasi gi den kaw nanga skapu fu den. ₄₂Wan grupu fu feifi hondro man fu a lo fu Simeon, ben hari go na a Seirbergi. Den fesiman fu den ben de Pelatya, Nearya, Refaya nanga Usiyel, den manpikin fu Yisi. ₄₃Drape den kiri den Amalekitisma di ben de na libi ete, dan den tan libi drape te tide.

₁Disi na den manpikin fu Ruben, a fosi manpikin fu Israel. Ruben ben de a fosi manpikin, ma fu di a ben go na bedi nanga wan fu den uma fu en p'pa, a lasi den leti di a ben abi leki fosi pikin. Den pikin fu Yosef, wan fu den tra manpikin fu Israel, kisi den leti dati. Ma a nen fu en no skrifi leki fosiwan ini a buku fu a famiri. ₂Yuda ben tranga moro den brada fu en èn wan fu den bakapikin fu en tron kownu, ma Yosef kisi den leti di a fosi pikin ben mus kisi. ₃Den manpikin fu Ruben, a fosi manpikin fu Israel, ben de: Hanok, Palu, Hesron nanga Karmi.

₄Den bakapikin fu Yowel: Yowel ben de a p'pa fu Semaya, Semaya ben de a p'pa fu Gog, Gog ben de a p'pa fu Simi, ₅Simi ben de a p'pa fu Mika, Mika ben de a p'pa fu Reaya, Reaya ben de a p'pa fu Baal, ₆Baal ben de a p'pa fu Beera. Beera ben de a edeman fu a lo fu Ruben, di kownu Tilegatpilneser fu Asur ben tyari gwe na en kondre leki straf'man. ₇Disi na den famiri fu den brada fu en di skrifi na ini den buku fu a lo fu Ruben: Yehiyel ben de a moro prenspari wan. Dan yu ben e kisi Sekarya ₈nanga Bela. Bela ben de a manpikin fu Asas, Asas ben de a manpikin fu Sema èn Sema ben de a manpikin fu Yowel. Den ben e libi ini a kontren fu Arower, te go miti Nebo nanga Baal-Meon. ₉Ma fu di den meti fu den ben kon furu ini a kondre Gilead, den teki gron na a oostsei tu di ben e waka sei a dreisabana go te na a Eufratliba. ₁₀Ini a ten fu kownu Saul, a lo fu Ruben ben feti nanga den Hagritisma. Den wini den Hagritisma dan den go libi ini den tenti fu den na a heri oostsei fu Gilead.

₁₁A kontren fu den bakapikin fu Gad ben e miti nanga di fu den Rubenitisma èn a ben e waka fu Basan te go miti Salka. ₁₂Yowel ben de a edeman fu den na ini Basan. A di fu tu edeman ben de Safam. Yanai nanga Safat ben e libi ini Basan tu. ₁₃Den famiri-edeman fu den seibi tra famiri ben de: Mikael, Mesulam, Seba, Yorai, Yakan, Sia nanga Eber. ₁₄Den ben de bakapikin fu Abikail, di ben de a manpikin fu Huri. Huri ben de a manpikin fu Yaroa, Yaroa ben de a manpikin fu Gilead, Gilead ben de a manpikin fu Mikael, Mikael ben de a manpikin fu Yesisai, Yesisai ben de a manpikin fu Yakdo èn Yakdo ben de a manpikin fu Bus. ₁₅Aki, a manpikin fu Abdiyel nanga granpikin fu Guni, ben de a edeman fu den famiri disi. ₁₆Den ben e libi ini Gilead, Basan nanga a kontren drape èn tapu den weigron fu Saron. ₁₇Ini a ten fu kownu Yotam fu Yuda nanga Yerobeam fu Israel, ala den famiri disi poti den nen na ini lantibuku.

₁₈Den lo fu Ruben, Gad nanga afu fu a lo fu Manase, ben abi wan legre fu fotenti-na-fo dusun seibi hondro siksitenti bun fetiman. Den ben sabi feti nanga schild, deigri, sosrefi nanga peiri nanga bo. ₁₉A legre disi go feti nanga den lo fu den Hagritisma. Den lo nanga san den feti ben de di fu Yetur, Nafis nanga Nodab. ₂₀Den Israelitisma ben kisi yepi, so den ben man wini den Hagritisma nanga den sma di ben e yepi den. Den ben aksi Gado fu yepi den èn Gado du san den ben aksi En, fu di den ben poti den fertrow na En tapu. ₂₁Den gwe nanga den meti fu den feyanti: feifitenti dusun kameel, tu hondro nanga feifitenti dusun skapu nanga tu dusun buriki. Den kisi wan hondro dusun sma fu den tyari gwe tu. ₂₂Bun furu fu den feyanti fu den ben lasi den libi, bika na Gado ben feti a feti. Den Israelitisma tan libi na den presi di den teki abra, te leki di feyanti fu den tyari den nanga tranga gwe.

₂₃Afu fu a lo fu Manase ben e libi ini a kontren dati èn den ben furu srefsrefi. Den ben e libi fu Basan, go te na Baal-Hermon, Senir nanga a Hermonbergi. ₂₄Den edeman fu den famiri ben de: Efer, Yisi, Eliyel, Asriyel, Yirmeya, Hodawya nanga Yakdiyel. Den ben de dyadya fetiman di den sma ben e lespeki leki edeman fu den famiri.

₂₅Ma baka wan pisten den no ben e dini a Gado fu den afo fu den wawan moro. Den bigin waka baka den gado fu den folku di Gado ben puru na pasi gi den. ₂₆Dat' meki a Gado fu Israel meki kownu Pul fu Asur, di sma sabi tu leki kownu Tilegatpilneser fu Asur, hari kon dan a tyari den lo fu Ruben, Gad nanga afu fu a lo fu Manase nanga tranga gwe. A tyari den go na Hala, Habor, Hara nanga na a liba fu Gosan. Drape den e libi te leki tide.

₁Den manpikin fu Lefi ben de: Gerson, Kehat nanga Merari. ₂Den manpikin fu Kehat ben de: Amram, Yishar, Hebron nanga Usiyel. ₃Den pikin fu Amram ben de Aaron, Moses nanga Miryam. Den manpikin fu Aaron ben de: Nadab, Abihu, Eleasar nanga Itamar. ₄Eleasar ben de a p'pa fu Pinekas èn Pinekas ben de a p'pa fu Abisua. ₅Abisua ben de a p'pa fu Buki èn Buki ben de a p'pa fu Usi. ₆Usi ben de a p'pa fu Serakya, èn Serakya ben de a p'pa fu Merayot. ₇Merayot ben de a p'pa fu Amarya èn Amarya ben de a p'pa fu Akitub. ₈Akitub ben de a p'pa fu Sadok èn Sadok ben de a p'pa fu Akimaas. ₉Akimaas ben de a p'pa fu Asarya èn Asarya ben de a p'pa fu Yokanan. ₁₀Yokanan ben de a p'pa fu Asarya, di ben de a fosi priester di wroko ini a tempel di Salomo ben meki ini Yerusalem. ₁₁Asarya ben de a p'pa fu Amarya èn Amarya ben de a p'pa fu Akitub. ₁₂Akitub ben de a p'pa fu Sadok èn Sadok ben de a p'pa fu Salum. ₁₃Salum ben de a p'pa fu Hilkia èn Hilkia ben de a p'pa fu Asarya. ₁₄Asarya ben de a p'pa fu Seraya èn Seraya ben de a p'pa fu Yosadak. ₁₅Di MASRA ben meki kownu Nebukadnesar tyari den sma fu Yuda nanga Yerusalem gwe nanga tranga, Yosadak ben de wan fu den tu.

₁₆Den manpikin fu Lefi ben de: Gerson, Kehat nanga Merari. ₁₇Den manpikin fu Gerson ben de Libni nanga Simi. ₁₈Den manpikin fu Kehat ben de: Amram, Yishar, Hebron nanga Usiyel. ₁₉Den manpikin fu Merari ben de Makli nanga Musi.

Disi na den bakapikin fu den Lefitisma, bigin na den afo fu den.

₂₀Fu Gerson: Gerson ben de a p'pa fu Libni, Libni ben de a p'pa fu Yakat èn Yakat ben de a p'pa fu Sima. ₂₁Sima ben de a p'pa fu Yoa, Yoa ben de a p'pa fu Ido, Ido ben de a p'pa fu Serak èn Serak ben de a p'pa fu Yeaterai.

₂₂Disi na den bakapikin fu Kehat: Kehat ben de a p'pa fu Aminadab, Aminadab ben de a p'pa fu Korak èn Korak ben de a p'pa fu Asir. ₂₃Asir ben de a p'pa fu Elkana, Elkana ben de a p'pa fu Ebyasaf èn Ebyasaf ben de a p'pa fu Asir. ₂₄Asir ben de a p'pa fu Takat, Takat ben de a p'pa fu Uriyel, Uriyel ben de a p'pa fu Usia èn Usia ben de a p'pa fu Saul. ₂₅Elkana ben de a p'pa tu fu Amasai, Akimot nanga Elkana. ₂₆A Elkana disi ben de a p'pa fu Sofai èn Sofai ben de a p'pa fu Nakat. ₂₇Nakat ben de a p'pa fu Eliab, Eliab ben de a p'pa fu Yerokam èn Yerokam ben de a p'pa fu Elkana. ₂₈Den manpikin fu Samuel ben de Yowel, a fosiwan, èn a di fu tu ben de Abia.

₂₉Disi na den bakapikin fu Merari: Merari ben de a p'pa fu Makli, Makli ben de a p'pa fu Libni, Libni ben de a p'pa fu Simi èn Simi ben de a p'pa fu Usa. ₃₀Usa ben de a p'pa fu Sima, Sima ben de a p'pa fu Hagia èn Hagia ben de a p'pa fu Asaya.

₃₁Baka di David ben tyari a santa kisi go poti ini a oso fu MASRA, a poti sma di ben mus go na fesi na ini singi. ₃₂Den singiman ben e du a wroko disi fesi a santa tenti, a tenti pe yu ben kan miti nanga Gado, te leki di Salomo bow a oso fu MASRA na Yerusalem. Den ben e du den wroko soleki fa a ben poti taki den mus du en. ₃₃Disi na den man di ben e du a singiwroko. P'pa nanga manpikin ben e du en: Heman ben de a singiman fu a famiri Kehat. A ben de a manpikin fu Yowel èn Yowel ben de a manpikin fu Samuel. ₃₄Samuel ben de a manpikin fu Elkana, Elkana ben de a manpikin fu Yerokam, Yerokam ben de a manpikin fu Eliyel èn Eliyel ben de a manpikin fu Toa. ₃₅Toa ben de a manpikin fu Suf, Suf ben de a manpikin fu Elkana, Elkana ben de a manpikin fu Makat èn Makat ben de a manpikin fu Amasai. ₃₆Amasai ben de a manpikin fu Elkana, Elkana ben de a manpikin fu Yowel, Yowel ben de a manpikin fu Asarya èn Asarya ben de a manpikin fu Sefanya. ₃₇Sefanya ben de a manpikin fu Takat, Takat ben de a manpikin fu Asir, Asir ben de a manpikin fu Ebyasaf èn Ebyasaf ben de a manpikin fu Korak. ₃₈Korak ben de a manpikin fu Yishar, Yishar ben de a manpikin fu Kehat, Kehat ben de a manpikin fu Lefi èn Lefi ben de a manpikin fu Israel. ₃₉Asaf, di ben de fu a srefi lo, ben tnapu na let'sei fu Heman. Asaf ben de a manpikin fu Berekya èn Berekya ben de a manpikin fu Sima. ₄₀Sima ben de a manpikin fu Mikael, Mikael ben de a manpikin fu Baaseya èn Baaseya ben de a manpikin fu Malkia. ₄₁Malkia ben de a manpikin fu Etni, Etni ben de a manpikin fu Serak èn Serak ben de a manpikin fu Adaya. ₄₂Adaya ben de a manpikin fu Etan, Etan ben de a manpikin fu Sima èn Sima ben de a manpikin fu Simi. ₄₃Simi ben de a manpikin fu Yakat, Yakat ben de a manpikin fu Gerson èn Gerson ben de a manpikin fu Lefi. ₄₄Na den kruktusei den bakapikin fu Merari ben tnapu di ben de fu a srefi lo tu: yu ben abi Etan a manpikin fu Kisi, Kisi ben de a manpikin fu Abdi èn Abdi ben de a manpikin fu Maluk. ₄₅Maluk ben de a manpikin fu Hasabya, Hasabya ben de a manpikin fu Amasya èn Amasya ben de a manpikin fu Hilkia. ₄₆Hilkia ben de a manpikin fu Amsi, Amsi ben de a manpikin fu Bani èn Bani ben de a manpikin fu Semer. ₄₇Semer ben de a manpikin fu Makli, Makli ben de a manpikin fu Musi, Musi ben de a manpikin Merari èn Merari ben de a manpikin fu Lefi.

₄₈Den tra Lefitiman ben mus du difrenti tra wroko ini èn lontu a santa tenti, a oso fu Gado. ₄₉Ma soso Aaron nanga den bakapikin fu en ben e bron meti leki ofrandi tapu a altari, na den wawan ben e bron switismeri tapu a altari pe wierook ben mus bron èn na den wawan ben e du den moro santa sani. Na den ben e sorgu taki Israel ben e meki en bun baka nanga Gado, leki fa Moses, a knekti fu Gado, ben poti taki a mus du. ₅₀Disi na den bakapikin fu Aaron: Aaron ben de a p'pa fu Eleasar, Eleasar ben de a p'pa fu Pinekas èn Pinekas ben de a p'pa fu Abisua. ₅₁Abisua ben de a p'pa fu Buki, Buki ben de a p'pa fu Usi èn Usi ben de a p'pa fu Serakya. ₅₂Serakya ben de a p'pa fu Merayot, Merayot ben de a p'pa fu Amarya èn Amarya ben de a p'pa fu Akitub. ₅₃Akitub ben de a p'pa fu Sadok èn Sadok ben de a p'pa fu Akimaas.

₅₄Disi na den presi pe den Lefitisma ben meki den tenti fu libi. A fosi lot ben hari gi den famiri fu den Kehatitisma, den bakapikin fu Aaron. Den kisi: ₅₅Hebron nanga den weigron fu en ini a kontren fu a lo fu Yuda. ₅₆Ma den pranigron nanga den dorpu lontu a foto dati, den ben gi na Kaleb, a manpikin fu Yefune. ₅₇Boiti Hebron, di ben de wan fu den foto pe wan sma ben kan lowe go te a ben kiri wan trawan sondro espresi, den bakapikin fu Aaron kisi den foto disi tu: Libna nanga den weigron fu en, Yatir, Estemoa, ₅₈Hilen nanga den weigron fu en, Debir nanga den weigron fu en ₅₉Asan nanga den weigron fu en nanga Bet-Semes nanga den weigron fu en. ₆₀Ini a kontren fu a lo fu Benyamin den kisi den foto Geba nanga den weigron fu en, Alemet nanga den weigron fu en nanga Anatot nanga den weigron fu en. Ala nanga ala den famiri disi kisi tin-na-dri foto. ₆₁Den tra bakapikin fu Kehat kisi tanpresi tu. A lot sori tak' den ben mus kisi tin foto ini a kontren fu den bakapikin fu Manase di ben e libi na westsei. ₆₂Den famiri fu den bakapikin fu Gerson kisi tin-na-dri foto ini a kontren fu den lo fu Isakar, Aser, Naftali nanga fu a lo fu Manase ini Basan. ₆₃A lot sori tak' den famiri fu den bakapikin fu Merari ben mus kisi twarfu foto ini a kontren fu den lo fu Ruben, fu Gad nanga fu Sebulon. ₆₄Na so a pipel fu Israel gi den Lefitisma foto nanga weigron. ₆₅Na a lot ben sori den foto di den ben mus kisi ini den kontren fu den lo fu Yuda, Simeon nanga Benyamin.

₆₆Den famiri fu den bakapikin fu Kehat kisi foto tu ini a kontren fu a lo fu Efraim. ₆₇Den foto dati ben de: Sikem nanga den weigron fu en. Sikem ben de wan fu den foto pe wan sma ben kan lowe go te a ben kiri wan trawan sondro espresi èn a ben didon ini a bergikontren fu Efraim. Moro fara Geser nanga den weigron fu en, ₆₈Yokmeam nanga den weigron fu en, Bet-Horon nanga den weigron fu en, ₆₉Ayalon nanga den weigron fu en nanga Gat-Rimon nanga den weigron fu en. Den kisi den foto dati nanga den weigron fu den. ₇₀Fu a lo Manase di ben e libi na westsei, den kisi den foto Aner nanga den weigron fu en nanga Bileam nanga den weigron fu en. Den foto dati ben de gi den tra famiri fu den bakapikin fu Kehat. ₇₁Fu a lo fu Manase di ben e libi na oostsei, den bakapikin fu Gerson kisi den foto Golan nanga den weigron fu en ini Basan nanga a foto Astarot nanga den weigron fu en. ₇₂Ini a kontren fu a lo fu Isakar, den kisi den foto: Kedes nanga den weigron fu en, Daberat nanga den weigron fu en, ₇₃Ramot nanga den weigron fu en nanga Anem nanga den weigron fu en. ₇₄Ini a kontren fu a lo fu Aser, den kisi den foto: Masal nanga den weigron fu en, Abdon nanga den weigron fu en, ₇₅Hukok nanga den weigron fu en nanga Rekob nanga den weigron fu en. ₇₆Ini a kontren fu a lo fu Naftali, den kisi a foto Kedes nanga den weigron fu en ini Galilea, Hamon nanga den weigron fu en nanga Kiryataim nanga den weigron fu en. ₇₇Fu a lo fu Sebulon den tra bakapikin fu Merari kisi den foto: Rimono nanga den weigron fu en nanga Tabor nanga den weigron fu en. ₇₈Ini a kontren fu a lo fu Ruben, na a tra sei fu a Yordanliba ini a birti fu Yeriko, den kisi den foto Beser nanga den weigron fu en ini a dreisabana, Yahas nanga den weigron fu en, ₇₉Kedemot nanga den weigron fu en nanga Mefaat nanga den weigron fu en. ₈₀Ini a kontren fu a lo fu Gad den kisi den foto Ramot nanga den weigron fu en ini Gilead, Makanaim nanga den weigron fu en, ₈₁Hesbon nanga den weigron fu en nanga Yaser nanga den weigron fu en.

₁Baka dati Yesus go na a tra sei fu a Meer fu Galilea, di den e kari a Meer fu Tiberias tu. ₂Wan bigi grupu sma ben e waka na En baka bika den ben si den marki di A ben du gi den sikisma. ₃Dan Yesus kren go sidon tapu wan bergi nanga den man di ben e teki leri fu En. ₄Now a ben de so taki a Paskafesa fu den Dyusma ben de krosbei.

₅Di Yesus luku lontu, A si taki wan heri ipi sma e kon na En. Dan A aksi Filipus taki: “Pe wi o bai brede fu den sma disi kan nyan?” ₆Yesus taki so fu yere san Filipus ben o taki, bika A ben sabi kba san A ben wani du. ₇Filipus piki En taki: “Tu hondro solfrumoni no ben o sari ete fu gi ala den sma disi wan pikin pisi brede.” ₈Dan Andreas, wan fu den man di ben e teki leri fu Yesus, di ben de a brada fu Simon Petrus, taigi En taki: ₉“Wan boi de dya di abi feifi brede nanga tu fisi. Ma dati no sari gi someni sma.” ₁₀Furu grasi ben de na a presi drape. Dan Yesus taki: “Meki den sma go sidon.” Ne den sma saka sidon. Wan feifi dusun mansma so ben de ini a grupu. ₁₁Dan Yesus teki den brede, A taki Gado tangi, dan A prati den gi den sma di ben e sidon drape. A du a srefi sani nanga den fisi tu. Ala den sma ben kisi someni leki den wani. ₁₂Di den sma nyan te den bere furu, Yesus taigi den man di ben e teki leri fu En taki: “Piki ala den pis'pisi san libi ete, fu noti no lasi.” ₁₃So den piki den pis'pisi di ben libi ete fu den feifi brede baka di den sma nyan, èn den furu twarfu baskita. ₁₄Di den sma si a marki san Yesus du, den taki: “Fu tru, disi na a Profeiti di ben o kon na grontapu.” ₁₅Yesus si taki den ben wani kon teki En nanga tranga fu poti En leki kownu, so A gwe libi den. A go baka na a bergi presi pe En wawan ben kan de.

₁₆Di neti tapu den man di ben e teki leri fu Yesus saka go na a meer. ₁₇Den go ini wan boto, dan den bigin koti abra go na Kafarnaum. A ben dungru kba èn Yesus no ben drai kon baka na den ete. ₁₈Dan wan hebi winti bigin wai èn den skwala kon hei. ₁₉Di den pari a boto wan feifi kilometer so, den si Yesus e waka tapu a watra e kon na a boto. Den man frede, ₂₀ma Yesus taigi den taki: “Na Mi! Un no abi fu frede.” ₂₁Den ben wani teki En ini a boto, ma a srefi momenti dati a boto doro a syoro pe den ben wani go.