Dag 14 van 365- Genesis 33-35 en Matteüs 10:1-20

₁Yakob opo en ede luku, dan a si Esau e kon nanga fo hondro man. Ne Yakob prati den pikin gi Lea, Rachel nanga den tu umasrafu. ₂A poti den umasrafu nanga den pikin na fes'sei. Baka dati yu ben e kisi Lea nanga den pikin fu en. Rachel nanga Yosef ben e kon te na baka. ₃Yakob srefi ben e waka te na fesi. A boigi seibi leisi di a e waka miti en brada, te leki a doro en. ₄Ma Esau lon miti en. A grabu en, a brasa en dan a bosi en. Ala tu ben e krei. ₅Baka dati Esau opo en ede luku lontu. Di a si den frow nanga den pikin a aksi taki: “Suma na den sma di yu abi drape nanga yu?” Yakob piki taki: “Na den pikin di Gado gi mi fu sori en knekti en bun-ati.” ₆Den umasrafu waka kon moro krosbei dan den boigi. ₇Baka dati Lea nanga den pikin fu en kon moro krosbei dan den boigi tu. Na a kba Yosef nanga Rachel waka kon dan den boigi. ₈Dan Esau aksi taki: “San yu wani du nanga ala den meti di mi miti na pasi?” Yakob piki taki: “Den ben de fu yu, fu yu kan abi prisiri nanga mi.” ₉Esau piki taki: “Mi abi nofo, brada. Yu kan hori den sani fu yu.” ₁₀Ma Yakob taigi en taki: “Kwet'kweti. Efu yu gi mi pardon trutru, dan yu mus teki a kado disi fu mi. Bika di mi si yu, a ben de leki mi tnapu ai na ai nanga Gado, ma mi no dede. ₁₁Mi e begi yu, teki a kado di mi seni gi yu. Bika Gado sori mi en bun-ati. Mi abi ala sani.” Yakob tan aksi te leki Esau teki a kado.

₁₂Dan Esau taki: “Meki wi hari go moro fara. Mi o go makandra nanga yu.” ₁₃Yakob piki taki: “Masra, yu sabi taki den pikin yongu ete. Mi abi skapu nanga krabita na mi tu, nanga kaw di e gi pikinwan bobi ete. Efu mi meki den waka wan dei nomo tumsi esi, a heri grupu e dede. ₁₄Yu kan go na fesi. Mi sa kon na baka te leki mi doro na yu na ini Seir. Mi o kon safrisafri, so esi leki den meti di e waka na mi fesi man waka èn so esi leki den pikin man go.” ₁₅Dan Esau taigi en taki: “Meki mi libi wantu man di kon nanga mi na baka gi yu.” Yakob piki taki: “Fu sanede? Ala san mi ben wani, na fu yu gi mi pardon.”

₁₆So Esau teki pasi a dei dati go baka na Seir. ₁₇Yakob broko en kampu dan a hari go na Sukkot. Dan a bow wan oso drape gi ensrefi nanga kampu gi den meti. So a kari a presi: Sukkot.

₁₈Yakob hari kmoto fu Padan-Aram èn a doro sondro problema na a foto Sikem ini Kanaan. Dan a opo en kampu na oostsei fu a foto. ₁₉A bai a gron pe a opo en kampu gi wan hondro pisi solfru moni fu den manpikin fu Hemor, a p'pa fu Sikem. ₂₀Dan Yakob meki wan altari drape dan a kari en: A Gado fu Israel na Gado.

₁Wan leisi Dina, a umapikin di Lea ben kisi gi Yakob, ben e go fu fisiti den umapikin fu a birti. ₂Di Sikem, a manpikin fu Hemor, si Dina, a grabu en dan a go didon nanga en nanga tranga. Hemor ben de wan Hiwitiman, èn a ben de a edeman fu a kontren. ₃Ma dan Sikem kon firi trutru lobi gi Dina, a umapikin fu Yakob. A ben lobi Dina èn a ben e suku fu wini en ati. ₄So Sikem aksi en p'pa taki: “Aksi fu a pikin disi trow nanga mi.”

₅Yakob ben kon yere fu a syen di Sikem gi en umapikin, ma a no taki noti fu di den boi fu en ben tyari den meti go na wei. A wakti te den ben drai kon na oso. ₆Dan Hemor, a p'pa fu Sikem, go taki nanga Yakob. ₇A srefi momenti dati den boi fu Yakob ben kmoto fu a wei kon na oso. A ben hati den èn den ati ben e bron srefsrefi. Bika Sikem ben du a moro don sani di a ben man du, fu go didon nanga a umapikin fu Yakob. So wan sani yu no kan du ini Israel. ₈Hemor taigi den taki: “Sikem, a boi fu mi, lobi Dina nanga en heri ati. Mi wan begi yu fu meki a trow nanga en, ₉dan so mi nanga yu kan tron famiri. Meki mi famiri trow nanga den umapikin fu yu èn meki yu famiri trow nanga den umapikin fu mi. ₁₀Yu kan tan libi dyaso na unu. A kondre didon na yu fesi yu kan go kon pe yu wani, yu kan libi pe yu wani.” ₁₁Dan Sikem aksi Dina p'pa nanga den brada fu en taki: “Mi e begi unu, meki mi trow nanga en. Mi sa gi un ala sani san un aksi. ₁₂Awinsi san mi mus pai fu di mi o trow nanga en, èn awinsi sortu kado un aksi mi, mi sa gi un dati. Ma mi e begi, meki mi trow nanga Dina.” ₁₃Ma fu kisi Sikem nanga en p'pa, fu a syen di Sikem ben gi den sisa Dina, meki den boi fu Yakob taigi den taki: ₁₄“Wi no man du so wan sani. Wi no man meki wi sisa trow nanga wan man di no besnei. Gi unu na wan syen sani. ₁₅Soso te yu besnei leki wi èn yu meki ala den mansma besnei tu, ₁₆dan fosi wi kan meki den umapikin fu wi trow nanga unu èn dan wi kan teki den umapikin fu yu trow. Dan fosi wi kan tan libi dyaso na unu èn tron wan folku. ₁₇Efu yu no wan arki wi èn yu no besnei, wi o teki Dina dan wi gwe.” ₁₈Hemor nanga en manpikin Sikem agri nanga a sani disi.

₁₉Sikem no draidrai fu di a ben lobi a umapikin fu Yakob. Ala sma ben e lespeki en tu ini en famiri. ₂₀Dan Hemor nanga en manpikin Sikem go na a bigi doro fu a foto. Den taigi den man fu a foto taki: ₂₁“Den man disi no abi takru prakseri nanga wi. Meki den tan libi dyaso èn meki den go kon pe den wani. A kondre bigi nofo gi den. Dan wi kan teki den umapikin fu den trow èn meki den trow nanga den umapikin fu wi. ₂₂Ma soso efu ala mansma fu wi besnei leki fa den besnei, dan fosi den o tan libi dyaso fu wi tron wan folku nanga den. ₂₃Ala den meti nanga den gudu fu den o tron fu wi tu. Kon meki wi du san den wani, fu den tan libi dyaso na unu.” ₂₄Ala den man di ben drape na a bigi doro fu a foto agri nanga Hemor nanga en manpikin Sikem. So den besnei ala den mansma.

₂₅Dri dei baka dati, di den man ben abi hebi skin ati, Simeon nanga Lefi, tu brada fu Dina, teki den owru. Den tu boi disi fu Yakob go ini a foto sondro fu wan sma si den, dan den kiri ala den mansma fu a foto. ₂₆Den kiri Hemor nanga en boi Sikem tu, dan den puru Dina ini a oso fu Sikem tyari gwe. ₂₇Di den tra boi fu Yakob doro ini a foto pe den dedeskin de, den teki den gudu fu a foto tyari gwe, fu a syen di den s'sa ben kisi. ₂₈Den teki ala skapu, krabita, kaw nanga buriki tyari gwe. Sosrefi ala sani di ben de ini a foto nanga sani di ben e gro ini den wei. ₂₉Ala gudu den tyari gwe, ala umasma nanga pikin den teki leki srafu èn den teki ala sani di ben de ini den oso.

₃₀Ma Yakob taigi Simeon nanga Lefi taki: “Un tyari mi kon ini bigi problema. Un pori mi fesi na den sma fu a kondre, den Kananitisma nanga den Perisitisma dan mi no abi furu sma. Efu den span anu feti nanga mi, den o wini mi. Den o figi mi nanga mi famiri puru na grontapu.” ₃₁Ma den piki en taki: “Dan a no ben mus teki un sisa leki wan motyo.”

₁Dan Gado taigi Yakob taki: “Opo, go tan na Betel, dan yu e meki wan altari drape gi a Gado di ben sori ensrefi na yu di yu ben e lowe gi yu brada Esau.” ₂Ne Yakob taigi den ososma fu en nanga ala den knekti nanga srafu fu en taki: “Un poti ala den gado fu tra folku na wan sei. Un krin unsrefi èn un weri tra krosi. ₃Kon meki wi opo fu go na Betel. Drape mi sa meki wan altari gi a Gado di ben piki mi di mi ben de ini bigi benawtu èn di ben kibri mi tapu a pasi di mi ben go.” ₄So den gi Yakob ala den popki di den ben abi fu tra gado nanga yesilinga di den ben e weri. Dan Yakob beri den ondro a bigi bon na Sikem. ₅Di den e kmoto fu drape, Gado meki sowan frede kon tapu den sma fu den foto ini a birti, taki den no hari go na baka den boi fu Yakob.

₆Dan so Yakob kon doro na a foto Lus, di den e kari Betel tu, ini Kanaan. A doro nanga ala den sma di ben de na en. ₇Drape a meki wan altari, dan a kari a presi: El-Betel, bika na drape Gado ben sori ensrefi na en, di a ben e lowe gi en brada. ₈Di Debora dede, den beri en ondro wan bigi bon na zuidsei fu Betel dan den kari a bon: A bon fu watra-ai. Debora ben de a uma di ben sorgu Rebeka di a ben pikin. ₉Di Yakob ben kmoto fu Padan-Aram, Gado ben sori ensrefi baka na en. A blesi en dan A taigi en taki: ₁₀“Yakob yu nen. Ma den no sa kari yu Yakob moro langa. Yu nen sa de Israel. Dan Gado gi en a nen fu Israel.” ₁₁Gado taigi en moro fara taki: “Mi na Gado, di abi ala makti. Meki furu pikin. Den bakapikin fu yu o tron wan folku, iya, den o tron difrenti folku. Bakapikin fu yu sa de kownu srefi. ₁₂Mi o gi yu a kondre disi di mi pramisi Abraham nanga Isak. Mi o gi en na den bakapikin fu yu.” ₁₃Di Gado kba taki nanga Yakob, A gwe fu drape. ₁₄Yakob poti wan ston tnapu fu memre pe a ben taki nanga Gado. A kanti win na en tapu leki wan ofrandi gi Gado. A kanti oli na en tapu tu. ₁₅Dan a kari a presi pe Gado ben taki nanga en: Betel.

₁₆Baka dati den kmoto na Betel. Di den ben de krosbei fu Efrat, Rachel kisi wan pikin, ma a kisi en nanga furu muiti. ₁₇Di a e pina fu kisi a pikin, a frow di ben e yepi en taigi en taki: “No frede, yu kisi wan boi baka.” ₁₈Ma Rachel firi taki a ben o dede, dat' meki a kari a boi Ben-Oni. Ma en p'pa kari en Benyamin. ₁₉Dan Rachel kon dede. Den beri en na sei a pasi di e go na Efrat. Disi na wan tra nen gi Betlehem. ₂₀Yakob poti wan ston tnapu fu memre pe a ben beri. Te nanga a dei fu tide a ston disi tnapu ete fu sori pe Rachel beri.

₂₁Israel hari go moro fara dan a meki en kampu di a psa Migdal-Eder. ₂₂Di Israel e libi drape, Ruben sribi nanga Bilha, wan fu den frow fu en p'pa. Dan Israel kon yere a sani disi.

Israel ben abi twarfu manpikin. ₂₃Den manpikin fu Lea ben de: Ruben, a fosi boi fu Israel, Simeon, Lefi, Yuda, Isakar nanga Sebulon. ₂₄Den manpikin fu Rachel ben de: Yosef nanga Benyamin. ₂₅Den manpikin fu Bilha, a umasrafu fu Rachel ben de: Dan nanga Naftali. ₂₆Den manpikin fu Silpa, a umasrafu fu Lea ben de: Gad nanga Aser. Disi na den manpikin fu Yakob di a kisi na Padan-Aram.

₂₇Dan Yakob kon doro na en p'pa na Mamre ini Kiryat-Arba. Dati na wan tra nen gi Hebron. Drape Abraham nanga Isak ben libi leki doroseisma. ₂₈Isak libi te leki a ben abi wan hondro nanga aititenti yari. ₂₉Dan en bro koti. Isak dede go na den bigisma fu en. A ben owru èn a ben libi te libi sari en. So den boi fu en, Yakob nanga Esau, kon beri en.

₁Yesus kari den twarfu man di ben e teki leri fu En kon. Dan A gi den makti fu yagi takruyeye puru na tapu sma, èn fu dresi ala sortu siki.

₂Disi na den nen fu den twarfu boskopuman fu Yesus: a fosi wan ben nen Simon, di den sma ben e kari Petrus, nanga en brada Andreas. Moro fara yu ben abi Yakobus a manpikin fu Sebedeus, nanga en brada Yohanes. ₃Dan yu ben abi Filipus nanga Bartolomeus, Tomas nanga Mateus, a man di ben piki lantimoni, Yakobus a manpikin fu Alfeus, nanga Tadeus. ₄Dan yu ben abi ete Simon, fu a grupu fu den Seloten, nanga Yudas Iskariot, a man di seri Yesus.

₅Na den twarfu man disi Yesus seni gwe èn A taigi den taki: “Un no mus go na den sma di no de Dyu, sosrefi un no mus go na den foto fu den Samariasma. ₆Ma un mus go na den sma fu Israel, bika den de leki skapu di lasi pasi. ₇Un go taigi den taki her'esi Gado o bigin tiri libisma. ₈Un dresi sikisma, un wiki dedewan, un meki a skin fu den gwasiman kon bun baka, èn un yagi takruyeye puru na tapu sma. Un kisi a makti fu du den sani disi fu soso, un mus du den fu soso tu. ₉Un no mus tyari no wan moni te unu e gwe, ₁₀sosrefi un no mus tyari wan saka fu te un de na pasi, noso tra krosi noso susu. Wan wakatiki srefi un no mus tyari. Bika a fiti taki wan wrokoman kisi san a abi fanowdu.” ₁₁Yesus taigi den man moro fara taki: “Te un doro ini wan foto noso wan dorpu, un mus suku wan sma di warti fu un kon ini en oso. Dan un mus tan ini a oso dati te leki un o gwe na wan tra presi. ₁₂Te un go ini a oso dati, un mus winsi den sma taki Gado sa blesi den. ₁₃Efu a sori taki den sma fu a oso warti fu kisi a blesi fu unu, a blesi sa tan nanga den. Ma efu a sori taki den sma no warti fu kisi a blesi fu unu, a sa drai kon baka na unu. ₁₄Èn efu a sori taki den sma no wani meki un tan na den, noso den no wani arki san un e taki, dan un mus naki a santi puru na un futu te un e gwe libi a oso noso a foto dati. ₁₅Fu tru Mi e taigi un taki: Tapu a dei di Gado o krutu libisma, a strafu fu a foto disi sa hebi moro a strafu fu den foto Sodom nanga Gomora.”

₁₆“Luku, Mi e seni unu leki skapu go na mindri den tigri. Dat' meki un mus de na ai, èn un no mus du no wan sma ogri. ₁₇Un luku bun nanga libisma. Bika den sa tyari un go na krutu, èn den o fon unu na ini den kerki fu den. ₁₈Fu Mi ede den o srepi un go na fesi granman nanga kownu. Dan un mus teki den okasi dati fu ferteri den, nanga den folku, fu Mi. ₁₉Te den sma tyari un go na krutu, un no abi fu broko un ede fa un mus taki noso san un mus taki. Bika Gado o gi unu san un mus taki a yuru dati. ₂₀Bika a no unu sa taki fu unsrefi, ma na a Yeye fu Gado un P'pa sa gi un den wortu fu un taki.”