Dag 15 van 365- Genesis 36-38 en Matteüs 10:21-42

₁Disi na den bakapikin fu Esau di den e kari Edom tu.

₂Esau ben trow nanga umasma fu Kanaan. A ben trow nanga Ada a umapikin fu Elon, wan Hetitiman. A ben trow tu nanga Oholibama, a umapikin fu Ana nanga granpikin fu Sibon, wan Hiwitiman. ₃Moro fara a ben trow nanga Basemat, a umapikin fu Ismael. Basemat ben de a s'sa fu Nebayot. ₄Ada ben kisi wan boi gi Esau di ben nen Elifas. Basemat ben kisi Rehuel gi en. ₅Oholibama ben kisi dri boi: Yehus, Yalam nanga Korak. Disi na den manpikin di Esau ben kisi na Kanaan.

₆Dan Esau teki den frow, den boi nanga den umapikin fu en. A teki ala den knekti fu en, den meti, nanga ala gudu san a ben abi na Kanaan, dan a gwe go tan na wan tra kondre farawe fu en brada Yakob. ₇Den gudu san den ben abi ben furu tumsi fu den tan libi makandra. A kondre pe den ben e libi leki doroseisma ben pikin tumsi fu hori ala den meti fu den. ₈Fu dat'ede Esau, di den e kari Edom tu, ben go tan tapu a bergi Seir.

₉Disi na den bakapikin fu Esau. En na a afo fu den Edomitisma, di e libi tapu a bergi Seir. ₁₀Disi na den nen fu den pikin fu Esau: Yu ben abi Elifas, a boi di Ada ben kisi gi Esau, nanga Rehuel, a boi di Basemat ben kisi gi en. ₁₁Den manpikin fu Elifas ben de Teman, Omar, Sefo, Gatam nanga Kenas. ₁₂Elifas, a manpikin fu Esau, ben abi ete wan frow di ben nen Timna. Timna ben kisi Amalek. Disi ben de den bakapikin fu Ada, a frow fu Esau. ₁₃Den manpikin fu Rehuel ben de Nakat, Serak, Sama nanga Misa. Disi ben de den bakapikin fu Basemat, a frow fu Esau. ₁₄Disi na den manpikin fu Oholibama, a frow fu Esau. Oholibama ben de a umapikin fu Ana nanga bakapikin fu Sibon. Nanga Oholibama Esau kisi Yehus, Yalam nanga Korak.

₁₅Yu ben abi bakapikin fu Esau di ben de edeman fu lo. Den manpikin fu Elifas, a fosi manpikin fu Esau, di ben de edeman, ben de: Teman, Omar, Sefo, Kenas, ₁₆Korak, Gatam nanga Amalek. Den na den manpikin fu Elifas, a manpikin fu Ada, di ben de edeman ini Edom. ₁₇Disi na den manpikin fu Rehuel, a manpikin fu Esau, di ben de edeman: Nakat, Serak, Sama nanga Misa. Den na den manpikin fu Rehuel, a manpikin fu Basemat, di ben de edeman ini Edom. ₁₈Disi na den manpikin fu Oholibama, a frow fu Esau, di ben de edeman: Yehus, Yalam nanga Korak. Den na den manpikin fu Oholibama, a umapikin fu Ana, di ben de edeman. ₁₉Den na de den bakapikin fu Esau di ben de edeman.

₂₀Disi na den bakapikin fu Seir. Den na den Horitisma di ben e tan ini a kondre. Yu ben abi Lotan, Sobal, Sibon, Ana, ₂₁Dison, Eser nanga Disan. Den ben de den edeman fu den Horitisma, bakapikin fu Seir, di ben e libi ini a kondre Edom. ₂₂Den manpikin fu Lotan ben de Hori nanga Heman. A sisa fu Lotan ben nen Timna. ₂₃Den manpikin fu Sobal ben de: Alwan, Manakat, Ebal, Sefo nanga Onam. ₂₄Den manpikin fu Sibon ben de: Aya nanga Ana. Na Ana ben feni den bron nanga faya watra ini a sabana, di a ben mus hori ai na tapu den buriki fu en p'pa. ₂₅Den pikin fu Ana ben de: Dison nanga Oholibama, di ben de wan umapikin. ₂₆Den manpikin fu Dison ben de: Hemdan, Esban, Yitran nanga Keran. ₂₇Den manpikin fu Eser ben de: Bilhan, Sawan nanga Akan. ₂₈Den manpikin fu Disan ben de: Us nanga Aran.

₂₉Disi ben de den edeman fu den Horitisma: Lotan, Sobal, Sibon, Ana, ₃₀Dison, Eser nanga Disan. Na den ben de den edeman fu den Horitisma ini Seir.

₃₁Disi na den kownu di ben e rigeri abra Edom. A pisten dati den sma fu Israel no ben abi wan kownu ete. ₃₂Yu ben abi Bela, a manpikin fu Beor. A ben e libi na Dinhaba. ₃₃Di Bela dede, Yobab, a manpikin fu Serak, teki en presi leki kownu. A ben kmoto fu Bosra. ₃₄Di Yobab dede, Husam teki en presi leki kownu. A ben kmoto fu a kondre fu den Temanitisma. ₃₅Di Husam dede, Hadad, a manpikin fu Bedad, teki en presi leki kownu. Hadad ben wini den Midyanitisma na Moab. A ben e libi na Awit. ₃₆Di Hadad dede, Samla fu Masreka teki en presi leki kownu. ₃₇Di Samla dede, Saul fu Rekobot teki en presi leki kownu. Rekobot ben didon na libakanti. ₃₈Di Saul dede, Baal-Hanan, a manpikin fu Akbor, teki en presi leki kownu. ₃₉Di Baal-Hanan, a manpikin fu Akbor dede, Hadar teki en presi leki kownu. Hadar ben e libi na Pau. A frow fu en ben nen Mehetabel. Mehetabel ben de a umapikin fu Matred nanga bakapikin fu Mesahab.

₄₀Den bakapikin fu Esau ben prati na ini difrenti famiri, di ben e libi na difrenti presi. Den famiri nanga den presi pe den ben e libi ben e tyari a nen fu a edeman fu a famiri. Den nen fu den edeman fu den famiri ben de: Timna, Alwa, Yetet, ₄₁Oholibama, Ela, Pinon ₄₂Kenas, Teman, Misbar ₄₃Magdiyel nanga Iram. Disi ben de den edeman fu Edom nanga den presi pe den ben e libi. Esau ben de a afo fu den Edomitisma.

₁Yakob tan libi ini Kanaan, a kondre pe en p'pa ben libi leki wan doroseisma. ₂Disi na a tori fa Yakob libi ben lon.

Leki wan yongu boi fu tin-na-seibi yari, Yosef ben gwenti fu hori ai na tapu den skapu makandra nanga den brada fu en. Dati ben de den boi fu Bilha nanga Silpa, den frow fu en p'pa. Ma Yosef ben e ferteri en p'pa fu den takru sani di a yere taki den brada fu en ben e du. ₃Israel ben lobi Yosef moro ala den tra boi fu en, fu di a ben grani di a kisi en. Fu dat'ede a ben meki wan moi langa dyakti gi en. ₄Ma di den brada fu en kon si taki den p'pa ben lobi en moro den alamala, den no ben lobi en moro èn den no ben man taki switi moro nanga en.

₅Dan Yosef dren wan dren. A ferteri den brada fu en a dren, ma dati ben meki taki den no ben wani si en na ai srefsrefi moro. ₆Bika a ben taigi den taki: “Un yere san mi dren. ₇Mi dren taki wi ben de na gron e tai graan ini bosu kon na wan. Ne a bosu fu mi opo dan a tan tnapu let' opu. Ma dan mi si taki den bosu fu unu kon tnapu lontu a di fu mi dan den boigi gi a bosu fu mi.” ₈Ne den brada fu en taigi en taki: “Na tron yu wani tron wi kownu? Na tiri yu wani tiri wi?” A dren fu Yosef nanga den sani di a taki ben meki taki now den brada fu en no ben wani si en na ai kwet'kweti. ₉Dan Yosef dren wan tra dren baka. A ferteri den brada fu en a dren. A taigi den taki: “Mi dren wan dren baka. Mi si fa a son, a mun nanga erfu stari boigi gi mi.” ₁₀Di a ferteri en p'pa nanga den brada fu en a sani disi, en p'pa warskow en taki: “San na a dren di yu dren? Yu denki taki mi nanga yu m'ma nanga den brada fu yu o kon boigi gi yu?” ₁₁Den brada fu Yosef ben kon dyarusu na en tapu, ma en p'pa no ben man fergiti den dren.

₁₂Wan leisi den brada fu Yosef ben tyari den skapu fu den p'pa go na wei, krosbei fu Sikem. ₁₃Dan Israel taigi Yosef taki: “Den brada fu yu e wei den skapu na Sikem. Kon, meki mi seni yu go na den.” Yosef piki taki: “Mi sa go.” ₁₄Ne en p'pa taigi en taki: “Go luku fa a e go nanga den brada fu yu, èn fa a e go nanga den skapu, dan yu e kon taigi mi.” Dan a meki Yosef kmoto fu a Hebrondal go na Sikem. ₁₅Di a e waka lontu ini a wei a miti nanga wan man. Dan a man aksi en taki: “San yu e suku?” ₁₆Yosef piki en taki: “Mi e suku den brada fu mi. Yu man taigi mi pe den e wei den skapu?” ₁₇Ne a man taigi en taki: “Den kmoto fu dyaso. Mi yere fa den taki tak': ‘Kon meki wi go na Dotan.’ ” So Yosef gwe na baka den brada fu en, dan a miti nanga den na Dotan.

₁₈Den brada fu en si en fu fara di a e waka kon. Ma fosi a doro den, den meki mofo taki den o kiri en. ₁₉Den taigi makandra taki: “Luku, a bigi drenman e kon. ₂₀Yere, kon meki wi kiri en dan wi e trowe en go ini wan fu den peti. Wi o taki tak' na wan krasi meti priti en. Dan wi sa si san o psa nanga den dren fu en.” ₂₁Di Ruben yere dati, a pruberi fu meki den no du Yosef ogri. A taigi den taki: “Kon meki wi no kiri en.” ₂₂A taigi den tu taki: “Kon wi no meki brudu lon. Un trowe en ini a peti disi, dyaso ini a sabana, ma un no mus kiri en.” Ruben taki so fu di a no ben wani fu den du en ogri, ma a ben wani fu tyari Yosef go baka na en p'pa. ₂₃Fa Yosef doro na den brada fu en, na so den hari a moi langa dyakti di a ben weri puru na en skin. ₂₄Den grabu en, dan den fringi en go ini a peti. A ben de wan drei peti. Watra no ben de na ini.

₂₅Baka dati den go sidon nyan. Di den ben e sidon nyan, den opo den ede luku dan den si wan grupu Ismaelitisma e kon. Den sma disi ben kmoto fu Gilead èn den ben e tyari gom, balsem nanga hars tapu kameel go na Egipte. ₂₆Dan Yuda taigi den brada fu en taki: “Sortu wini wi abi efu wi kiri wi brada dan wi du leki wi no sabi noti fu a dede fu en? ₂₇Kon meki wi seri en gi den Ismaelitisma prefu wi kiri en. Na wi brada, wi eigi brudu.” Dan den tra brada agri nanga Yuda. ₂₈Di den man fu Midyan, di e bai èn seri sani, ben e psa, den hari Yosef kmoto ini a peti, dan den seri en gi tutenti solfru moni gi den Ismaelitiman. Dan den man disi tyari Yosef go na Egipte.

₂₉Di Ruben drai kon baka na a peti, a si taki Yosef no ben de ini a peti moro. Ne a priti en krosi. ₃₀A go na den brada fu en dan a taki: “A boi no drape moro. San mi mus du now?” ₃₁Ne den srakti wan bokoboko, dan den teki a krosi fu Yosef dopu ini a brudu. ₃₂Den seni a moi langa dyakti go gi den p'pa nanga a boskopu taki: “Wi feni a sani disi. Luku efu a no de a krosi fu a boi fu yu.” ₃₃Di Yakob si a krosi a ben sabi taki na dati. Dat' meki a taki: “Na a krosi fu mi boi. Wan krasi meti nyan en. A mus de so taki a priti Yosef.” ₃₄Dan Yakob priti en krosi. A weri rowkrosi dan a row langa gi a boi fu en. ₃₅Ala den manpikin nanga den umapikin fu en ben e pruberi fu trowstu en. Ma Yakob no ben wani fu den trowstu en. A taki: “Kwet' kweti. Mi sa tan row te leki mi dede go na mi boi ini dedekondre.” So Yakob tan krei fu en boi.

₃₆Ma a pisten dati den Midyanitiman ben tyari Yosef go na Egipte dan den seri en gi Potifar. Potifar ben de wan ofisiri, a ben de a edeman fu den waktiman fu Farao.

₁A srefi ten dati Yuda gwe libi den brada fu en, dan a go tan na Hira, wan man fu Adulam. ₂Dan Yuda si a umapikin fu Sua, wan man fu Kanaan. Yuda trow nanga en dan a sribi nanga en. ₃A uma disi hori bere, dan a meki wan manpikin di a kari Er. ₄Baka dati a hori bere baka, dan a kisi ete wan boi di a kari Onan. ₅Di Yuda ben de na Kesib, a uma kisi wan manpikin baka di a kari Sela.

₆Dan Yuda teki wan frow gi en fosi boi Er, di ben nen Tamar. ₇Ma Er, a fosi boi fu Yuda, no ben libi bun ini MASRA ai, dat' meki MASRA kiri en. ₈Ne Yuda taigi Onan taki: “Go na yu brada frow. Trow nanga en leki fa a gwenti de, dan yu e meki pikin gi yu brada nanga en.” ₉Ma Onan ben sabi taki den pikin di a ben o meki no ben o de fu en. Dat' meki ala leisi te a ben go na bedi nanga a frow fu en brada, a ben e meki en manwatra fadon na gron, soso fu no meki pikin gi en brada. ₁₀Ma a sani disi no ben bun ini MASRA ai, so A kiri en tu. ₁₁Dan Yuda taigi Tamar, a frow fu en manpikin, taki: “Go libi leki wan uma di no abi masra moro na yu p'pa oso, te leki mi boi Sela kon bigi.” Ma Yuda ben e prakseri na ensrefi taki: “Dan a no abi fu dede leki den brada fu en.” So Tamar go tan na en p'pa oso.

₁₂Wan heri pisten baka dati a frow fu Yuda, a umapikin fu Sua dede. Baka di Yuda ben kba row, a go nanga en mati Hira fu Adulam na Timna, pe den man fu en ben e koti a wiwiri fu den skapu. ₁₃Dan Tamar kisi fu yere taki en masra p'pa ben go na Timna fu go koti wiwiri fu den skapu fu en. ₁₄Ne Tamar puru en rowkrosi, dan a tapu en fesi nanga wan duku. A weri so wan fasi taki sma no ben o sabi taki na en, dan a go sidon na a pasi di e go na Timna, pe yu e beni go na Enaim. Bika a ben si taki Sela ben kon bigi, ma den no ben meki a trow nanga en. ₁₅Di Yuda si en, a ben denki taki na wan huru. Bika Tamar ben tapu en fesi. ₁₆Yuda go na en na a sei pasi, dan a aksi en taki: “Mi kan sribi nanga yu?” Ma a no ben sabi taki a ben de a frow fu en manpikin. Dan Tamar aksi taki: “San yu o gi mi te yu sribi nanga mi?” ₁₇Yuda piki taki: “Mi o meki den seni wan pikin bokoboko fu a grupu fu mi gi yu.” Tamar piki baka taki: “Dan yu o abi fu libi wan sani leki panti, te leki yu seni en gi mi.” ₁₈Ne Yuda aksi en taki: “San mi mus gi yu leki panti?” Tamar piki taki: “Yu linga nanga san yu e poti yu marki, a titei na san a linga e anga nanga yu wakatiki.” Yuda gi en den sani, èn a sribi nanga en. Dan Tamar kon hori bere. ₁₉Baka di Yuda sribi nanga en, Tamar opo dan a drai go baka na oso. A puru a duku nanga san a ben tapu en fesi, dan a weri en rowkrosi baka.

₂₀Dan Yuda seni a bokoboko nanga en mati fu Adulam gi a uma, fu a ben kan kisi den sani baka di a ben gi leki panti. Ma en mati no si a uma. ₂₁So a aksi den man fu a presi drape taki: “Pe a uma de di ben sidon na sei a pasi na Enaim?” Den piki en taki: “No wan uma no ben dyaso.” ₂₂Ne a drai go baka na Yuda dan a taigi en taki: “Mi no si a uma. Den man fu a presi taigi mi taki: ‘No wan uma ben dyaso.’ ” ₂₃Yuda piki taki: “Dan meki a hori den fu den no teki un leki spot'popki. Yusrefi si taki mi seni a bokoboko gi en, ma yu no si en.”

₂₄Baka dri mun so den kon taigi Yuda taki: “Tamar, a frow fu yu manpikin, libi wan hurulibi. A uru dan a hori bere.” Ne Yuda taki: “Un tyari en go na dorosei fu a foto, dan un bron en.” ₂₅Ma di den e tyari Tamar gwe, a seni a boskopu gi en masra p'pa taki: “Na fu a man di abi den sani disi mi hori bere.” A taki tu taki: “Yu mus luku a linga, a titei nanga a wakatiki bun. Dan yu o sabi suma abi den.” ₂₆Dan Yuda kon si taki na den sani fu en. Ne a taki: “Mi abi fu gi en leti. Bika mi no meki mi manpikin Sela trow nanga en.” Baka dati Yuda no sribi moro nanga en.

₂₇Di a ten ben doro fu a kisi a pikin, a sori taki na tu pikin ben de ini en bere. ₂₈Di a kisi den pikin, wan fu den sutu en anu kon na doro. Dan a uma di ben e yepi en, hori a anu dan a tai wan redi titei na en. Ne a taki: “Disi na a fosiwan.” ₂₉Ma a pikin ben hari en anu go baka, dan a brada fosi kon na doro. Ne a frow taki: “Nanga krakti yu pusu kon na doro.” So a gi en a nen fu Peres. ₃₀Baka dati en brada kon na doro di ben abi a redi titei na en anu. Dan den kari en Serak.

₂₁Yesus taigi den boskopuman fu En moro fara taki: “Wan brada sa gi en eigi brada abra fu den kiri en. Wan p'pa sa du a srefi sani nanga en pikin. Pikin sa tron feyanti fu den m'ma nanga den p'pa, èn den o kiri den. ₂₂Fu Mi ede no wan sma no o man si un na ai. Ma Gado sa ferlusu a sma di sa hori doro te na a kba. ₂₃Te den sma fu a wan foto de na un baka fu du un ogri, un lowe go na wan tra foto. Bika fu tru Mi e taigi un taki: A Manpikin fu Libisma sa drai kon baka fosi un kba du un wroko ini ala den foto fu Israel.

₂₄Wan sma di e teki leri, no betre moro en leriman, èn wan knekti no hei moro en masra. ₂₅A mus de nofo gi a sma di e teki leri efu a kon de leki en leriman, èn a mus de nofo gi a knekti efu a kon de leki en masra. Efu den sma gi Mi leki a edeman fu a oso a nen fu Beelsebul, den sa gi un nen di takru moro dati.”

₂₆Yesus taigi den boskopuman fu En moro fara taki: “Un no mus frede libisma. Bika ala sani san de na dungru o kon na krin, èn ala sani di kibri o kon na doro. ₂₇Den sani di Mi e taigi unu na dungru, un mus taki den na a krin fu dei. San Mi e taigi unu safri, un mus bari na strati. ₂₈Un no abi fu frede libisma. Den kan kiri soso a skin, ma den no man kiri a sili. Ma un mus frede Gado di kan meki a skin nanga a sili go pori ini hel. ₂₉Un sabi taki yu kan bai tu gadotyo gi wan sensi. Ma toku no wan fu den e dede sondro taki Gado un P'pa sabi fu en. ₃₀Gado sabi srefi omeni wiwiri yu abi na tapu yu ede. ₃₁Dat' meki un no mus frede, bika un warti moro leki furu gadotyo. ₃₂So dan, a sma di e taigi trawan taki a sabi Mi, Mi sa taigi Mi P'pa na heimel taki Mi sabi en. ₃₃Ma a sma di e taigi trawan taki a no sabi Mi, Mi sa taigi Mi P'pa na heimel tu taki Mi no sabi en.”

₃₄“Un no mus prakseri taki Mi kon fu tyari freide na grontapu. Mi no kon fu tyari freide, ma na prati Mi kon fu prati. ₃₅Mi kon fu tyari prati na mindri wan man nanga en p'pa, na mindri wan uma nanga en m'ma, èn na mindri wan uma nanga en masra m'ma. ₃₆Den feyanti fu yu sa de yu eigi ososma. ₃₇Suma lobi en m'ma noso en p'pa moro Mi, no warti fu waka na Mi baka. Sosrefi a sma di lobi en manpikin noso en umapikin moro Mi, no warti fu waka na Mi baka. ₃₈A sma di no de klar'klari fu nyan pina te fu dede srefi te a e waka na Mi baka, no warti fu de wan sma fu Mi. ₃₉A sma di wani hori en libi, o lasi en. Ma a sma di e poti en libi na wan sei fu Mi ede, o feni en.”

₄₀“Suma opo en doro gi unu, e opo en gi Mi. Èn suma opo en doro gi Mi, e opo en gi a Wan di seni Mi kon. ₄₁Suma opo en doro gi wan profeiti, fu di a de wan profeiti, sa kisi a srefi pai di Gado o gi a profeiti fu En. Èn suma opo en doro gi wan sma di bun ini Gado ai, fu di a de wan sma di bun ini Gado ai, sa kisi a srefi pai di Gado o gi a sma di bun ini En ai. ₄₂Fu tru Mi e taigi un taki: Efu yu gi wan sma wan kan kowru watra nomo, fu di a e teki leri fu Mi, dan Gado no sa fergiti fu pai yu, awinsi a sma dati no de wan prenspari sma.”