Dag 16 van 365- Genesis 39-40 en Matteüs 11

₁Den Ismaelitisma ben tyari Yosef go na Egipte. Dan Potifar, wan man fu Egipte, bai en fu den. Potifar ben de wan ofisiri, a edeman fu den waktiman fu Farao. ₂Ma MASRA ben de nanga Yosef, dat' meki a ben e go bun nanga en. A ben e tan ini a oso fu en basi, a man fu Egipte. ₃A basi fu Yosef ben kon si taki MASRA ben de nanga en, èn taki MASRA ben e meki taki ala sani di a ben e du ben e go bun. ₄Fu dat'ede a ben kon abi prisiri nanga Yosef, dan a poti en leki a sma di ben mus du ala sani gi en. A poti en leki basi tu ini en oso èn a gi en a frantwortu abra ala sani di a ben abi. ₅Fu a momenti di a man disi fu Egipte poti Yosef leki basi abra ala en sani, MASRA bigin blesi a oso fu en. MASRA ben e blesi ala sani di a abi, fu Yosef ede. Den sani fu en oso nanga den sani fu en gron. ₆A gi Yosef frantwortu abra ala en sani, èn fu di a ben abi Yosef, a no ben abi fu broko en ede nanga no wan tra sani dan a nyanyan wawan di a ben e nyan.

Yosef ben moi fu en ede go te na en futu. ₇Dan a frow fu Yosef basi meki en ai fadon tapu Yosef. A taigi en taki: “Kon didon nanga mi.” ₈Ma Yosef no ben wani. A taigi en taki: “Luku, fu di mi basi abi mi, a no abi fu broko ede nanga en oso sani. A gi mi a frantwortu abra ala en sani. ₉No wan sma ini a oso disi abi makti moro mi. Noti a no hori gi mi na baka leki yu wawan, fu di yu na en frow. Dan fa mi bo man meki sowan bigi fowtu? A o de wan sani di Gado no wani mi du.” ₁₀Ala dei a frow ben e tan aksi Yosef. Ma Yosef no ben du san a ben wani, fu go nanga en na bedi. ₁₁Wan dei Yosef kon ini a oso fu du en wroko. No wan fu den tra knekti ben de na inisei. ₁₂Ne a frow grabu en hori na en krosi dan a taki: “Kon didon nanga mi.” Ma Yosef lon go na dorosei. A gwe libi en tap'sei krosi ini a frow anu. ₁₃Di a frow si taki Yosef lon go na dorosei, ma taki en krosi ben tan ini en anu, ₁₄a kari den tra knekti dan a taigi den taki: “Luku, mi masra tyari wan Hebrewsrafu kon dyaso fu gi wi syen. A kon na mi fu go na bedi nanga mi, ma mi meki babari. ₁₅Di a yere taki mi bigin bari fu suku yepi, a libi en krosi dyaso, dan a lon go na dorosei.” ₁₆Dan a hori a krosi na en, te leki a basi fu Yosef ben kon na oso. ₁₇A frow ferteri en a srefi sani taki: “A Hebrewsrafu di yu tyari kon dyaso, kon na mi fu poti mi na syen. ₁₈Ma di mi meki babari fu sma kon yepi mi, a lon go na dorosei dan a libi en krosi na mi na baka.” ₁₉Yosef basi ati bron di a yere en frow taki: “Na den sani disi a srafu fu yu du.” ₂₀A basi meki den grabu Yosef, fringi go ini straf'oso. A ben de a presi pe kownu ben e poti den straf'man fu en.

Na so Yosef doro na ini straf'oso. ₂₁Ma MASRA ben de nanga Yosef. A sori Yosef sari-ati. A meki taki a edeman fu a straf'oso ben abi prisiri nanga en. ₂₂Fu dat'ede a edeman fu a straf'oso ben gi Yosef a frantwortu abra ala den tra straf'man di ben drape, nanga ala sani di ben mus du. ₂₃A edeman no ben abi fu broko en ede nanga a frantwortu di a ben gi Yosef, fu di MASRA ben de nanga en. MASRA ben meki taki ala sani di a ben e du ben e go bun.

₁Baka wan pisten a edeman di ben e sorgu gi a win fu kownu, nanga a edeman fu den bakriman, du wan sani di no ben fiti den basi, a kownu fu Egipte. ₂Dan Farao ati bron tapu den tu edeman disi, a edeman di ben e sorgu gi en win nanga a edeman fu den bakriman. ₃A meki den poti den man disi na strafu. A ben de a srefi straf'oso pe Yosef ben de, na a oso fu a edeman fu den waktiman fu Farao. ₄A edeman fu den waktiman gi Yosef a frantwortu fu sorgu gi den. So den ben de wan heri pisten na straf'oso.

₅Dan ala tu man dren wan dren. A srefi neti ala den tu edeman fu a kownu fu Egipte, di ben de na strafu, dren wan dren. A edeman di ben e sorgu gi a win fu kownu, nanga a edeman fu den bakriman. Ibri dren ben wan taki wan spesrutu sani. ₆A tra mamanten fu en di Yosef kon na den, a si taki den ala tu no ben e luku switi. ₇Dan a aksi den tu edeman disi fu Farao, di ben de makandra nanga en na straf'oso ini a oso fu en basi, taki: “San meki un e luku so sari tide?” ₈Den piki en taki: “Un dren wan dren, ma no wan sma de di kan taigi wi san a dren wan taki.” Ne Yosef taigi den taki: “Na Gado wawan kan taki san wan dren wan taki. Un ferteri mi san un dren.”

₉Dan a edeman di ben sorgu gi a win fu kownu ferteri Yosef san a dren. A taki: “Ini mi dren mi si taki wan droifibon ben tnapu leti na mi fesi. ₁₀Dri taki ben de na a droifibon. Den no ben gi wiwiri wan bun fasi srefi ete, di bromki nanga bosu lepi droifi bigin kon. ₁₁Mi ben abi a kan fu Farao ini mi anu. Dan mi teki den droifi, mi masi den ini a kan fu Farao, dan mi poti a kan ini Farao anu.” ₁₂Yosef taigi en taki: “Disi na san a dren wan taki: Den dri taki na dri dei. ₁₃Fosi dri dei psa, Farao o gi yu wan hei presi baka. Yu o du a wroko baka di yu ben e du. Yu o poti Farao en kan baka ini en anu, leki fa yu ben gwenti fu du di yu ben de edeman fu den man di e sorgu gi en win. ₁₄Memre mi te a e go bun nanga yu. Du mi wan bun fu ferteri Farao fu mi, fu mi kan kmoto na a presi dyaso. ₁₅Bika nanga tranga den ben tyari mi kmoto ini a kondre fu den Hebrewsma. Dyaso srefi mi no du noti fu den poti mi ini a dungru-oso disi.”

₁₆Di a edeman fu den bakriman si taki a fasi fa Yosef ben puru a dren no ben takru, a taigi en taki: “Mi srefi ben dren wan dren. Ini a dren mi si taki dri baskita nanga brede ben de tapu mi ede. ₁₇Ini a tap'sei baskita ala sortu nyanyan ben de di wan bakriman e meki. A ben de gi Farao. Ma den fowru ben nyan a nyanyan ini a baskita tapu mi ede.” ₁₈Ne Yosef taigi en taki: “Na disi a dren wan taki: Den dri baskita na dri dei. ₁₉Fosi dri dei psa, Farao o gi yu wan hei presi. Den o puru yu ede fu yu skin. Yu o anga hei na wan postu, èn den fowru o tyopu a meti puru fu yu skin.”

₂₀Dri dei baka dati, tapu en friyaridei, Farao seti wan nyanyantafra gi ala den edeman fu en. Dan leti na fesi ala den man fu en a gi a edeman fu den man di ben e sorgu gi en win nanga a edeman fu den bakriman wan hei presi. ₂₁A gi a edeman fu den man di ben e sorgu gi en win en wroko baka. A ben mus poti a kan fu Farao ini en anu baka. ₂₂Ma a meki den anga a edeman fu den bakriman, leki fa Yosef ben puru a dren gi den. ₂₃A edeman fu den man di ben e sorgu gi a win fu kownu no ben e prakseri Yosef moro. A ben fergiti en.

₁Di Yesus kba taigi den twarfu man di ben e teki leri fu En ala den sani disi san den mus fu du, A kmoto drape go na ini den foto fu den Dyusma fu preiki èn fu gi den leri.

₂A pisten dati Yohanes a Dopuman ben de na straf'oso. Di a yere fu den wroko san a Mesias ben e du, a seni wantu man di ben e teki leri fu en fu go aksi Yesus taki: ₃“Na Yu na a Man di ben o kon, noso wi mus ferwakti wan tra sma?” ₄Yesus piki den taki: “Un go taigi Yohanes san un yere nanga san un si. ₅Un taigi en taki breniman e si baka, lanman e waka, gwasiman skin e kon bun baka, èn dofuman e yere. Owktu dedesma e wiki baka, èn pôtisma e yere a bun nyunsu fu Gado. ₆A sma di no lasi bribi ini Mi na wan blesi sma.”

₇Di den man fu Yohanes ben e gwe, Yesus bigin ferteri a bigi grupu sma drape fu Yohanes. A taigi den taki: “Di un ben go na ini a dreisabana, san un ben go fu luku? Un no ben go fu luku fa a winti e wai a grasi! ₈San un ben go luku dan? Wan man di weri diri krosi? Nono. Sma di e weri diri krosi e tan ini kownu-oso. ₉Fu sanede un go dan? Fu si wan profeiti? Iya, Mi e taigi unu: A de wan profeiti, ma a no dati wawan. ₁₀Bika fu Yohanes a skrifi taki: ‘Yere, Mi e seni Mi boskopuman go na Yu fesi, di sa meki a pasi klari gi Yu.’ ₁₁Fu tru Mi e taigi un taki: Fu ala sma di gebore, no wan no prenspari moro Yohanes a Dopuman. Ma toku a moro pikinwan na mindri den sma di Gado e tiri, prenspari moro en. ₁₂Sensi a ten di Yohanes a Dopuman bigin fu preiki, te leki now, moro nanga moro sma e kon ondro a tiri fu Gado. Ma tra sma de di e meki muiti fu puru sma fu a pasi fu Gado. ₁₃Moses nanga den profeiti ben taki fu a fasi fa Gado ben o tiri libisma, te leki a ten di Yohanes bigin preiki. ₁₄A de na unu efu un wani bribi en, ma di den taki tak' Elia ben o kon baka, na fu Yohanes den ben taki. ₁₅Suma abi yesi, meki a yere!”

₁₆Yesus taigi den sma moro fara taki: “Yu sabi fa Mi e si unu fu a ten disi? Unu e du leki pikin di e prei tapu wan pren, dan unu e bari gi den trawan taki:

₂₀Dan Yesus bigin sori finga na tapu den sma fu den foto pe A ben du moro furu fu den bigi sani, bika den sma dati no ben drai den libi kon na Gado. ₂₁A taki: “Un sma fu Korasin nanga Betsaida, un mus luku bun! Bika efu den bigi sani di psa na un mindri, ben psa na ini den foto Tirus nanga Sidon, someni langa den sma dati ben o drai den libi. Den ben o weri rowkrosi èn trowe asisi tapu den ede fu sori taki den e sari. ₂₂Mi e taigi un taki: Tapu a dei di Gado o krutu libisma, a strafu fu unu o hebi moro di fu den sma fu Tirus nanga Sidon. ₂₃Un sma fu Kafarnaum, un e prakseri taki un o doro na heimel? Na ini dedekondre un o feni unsrefi! Bika efu den bigi sani di psa ini a foto fu unu ben psa ini a foto Sodom, a foto dati ben o de ete te nanga a dei fu tide. ₂₄Ma Mi e taigi un taki: Tapu a dei di Gado o krutu libisma, a strafu fu unu o hebi moro di fu den sma fu Sodom.”

₂₅Dan Yesus begi taki: “P'pa, Yu di de Masra fu heimel nanga grontapu, Mi e taki Yu tangi taki Yu kibri den sani disi meki den koniman nanga den leriman no ferstan den, ma dan Yu sori den na den sma di no sabi furu. ₂₆Iya, P'pa, bika na so Yu ben wani en.” ₂₇Dan Yesus taigi den sma taki: “Mi P'pa gi Mi makti abra ala sani. Boiti a P'pa, no wan sma no sabi suma na a Manpikin. Èn no wan sma no sabi suma na a P'pa, boiti a Manpikin nanga den sma di a Manpikin wani fu sabi dati.”

₂₈Yesus taigi den sma moro fara taki: “Un kon na Mi, un di weri fu tyari un hebi lai. Na Mi un sa feni rostu. ₂₉Kon meki Mi tiri unu èn un teki leri fu Mi. Bika Mi abi safri nanga sakafasi maniri. Na Mi un sa feni rostu fu un sili. ₃₀Bika Mi no o tiri unu nanga tranga, èn den sani di Mi o aksi fu unu, no hebi.”