Dag 17 van 365- Genesis 41-42 en Matteüs 12:1-24

₁Tu yari baka dati Farao dren wan dren. Ini a dren a si taki a ben tnapu na a syoro fu a Nijl-liba. ₂Ne a si fa seibi moi fatu kaw kmoto ini a liba dan den bigin nyan a grasi na libakanti. ₃Ma dan a si seibi tra kaw kmoto ini a liba baka den fosiwan. Den kaw disi ben de takru, mangri kaw. Den go tnapu na sei den tra kaw na syoro. ₄Dan den takru, mangri kaw nyan den seibi moi fatu kaw. Baka dati Farao wiki. ₅Di a fadon na sribi baka, a dren a di fu tu dren. Ini a dren a si seibi moi fatu karu ben gro kmoto ini wan karubon. ₆Ma baka dati, seibi drei karu gro kon. Wan faya winti fu oostsei ben meki den kon drei èn proi. ₇Dan den drei karu swari den seibi fatu èn moi lontu karu. Ne Farao wiki, dan a si taki na dren a ben e dren.

₈A tra mamanten Farao no ben firi switi. A seni kari ala den lukuman nanga den koniman fu Egipte dan a ferteri den san a dren. Ma no wan sma ben man puru den dren gi Farao. ₉Ne a edeman fu den man di ben e sorgu gi a win fu kownu, taigi Farao taki: “Tide mi mus taki fu den fowtu di mi meki. ₁₀Farao, yu ati ben bron tapu den knekti fu yu, èn yu ben meki den poti mi nanga a edeman fu den bakriman na strafu ini a oso fu a edeman fu den waktiman. ₁₁Wan neti un ala tu ben dren wan dren. Ibri dren ben wan taki wan spesrutu sani. ₁₂Ma wan yongu Hebrewman ben drape nanga wi. A ben de a srafu fu a edeman fu den waktiman. Un ben ferteri en den dren, dan a puru den gi wi. Ibriwan fu unu a taigi san a dren ben wani taki. ₁₃Den sani psa leki fa a ben taigi wi. Farao meki mi du mi wroko baka, ma yu meki den anga a bakriman.”

₁₄Dan Farao meki den seni teki Yosef. Den go teki en es'esi puru ini a dungru-oso pe a ben de. Den krabu en barba, den gi en tra krosi fu weri, dan den tyari en kon gi Farao. ₁₅Dan Farao taigi Yosef taki: “Mi dren wan dren di no wan sma man puru gi mi. Ma den ferteri mi fu yu taki: ‘Na yere a mus yere a dren nomo fu a puru en gi a sma.’ ” ₁₆Yosef piki Farao taki: “Kwet'kweti. Na Gado sa gi Farao a bun nyunsu.” ₁₇Ne Farao taigi Yosef taki: “Ini a dren mi ben tnapu na a syoro fu a Nijl-liba. ₁₈Dan mi si seibi moi fatu kaw kmoto ini a liba, dan den bigin nyan a grasi na a libakanti. ₁₉Ma dan mi si seibi tra kaw kmoto ini a liba baka den fosiwan. Den kaw disi ben mangri èn den ben takru srefsrefi. Noiti ete mi si so takru kaw ini heri Egipte. ₂₀Dan den takru mangri kaw nyan den seibi fosi moi fatu kaw. ₂₁Ma no wan kenki ben de fu si na den di den swari den go ini den bere. Den ben takru leki bifo. Dan mi wiki ini a sribi. ₂₂Ma dan mi dren moro fara, mi si fa seibi moi fatu karu e gro kon bigi na wan karubon. ₂₃Ma baka dati, seibi drei karu gro kon. Wan faya winti fu oostsei ben meki den kon drei èn proi. ₂₄Dan den drei karu swari den seibi moi karu. Mi ferteri den lukuman ma no wan sma ben man taigi mi san a wan taki.”

₂₅Ne Yosef taigi Farao taki: “Den dren fu Farao wan taki a srefi sani. Gado sori Farao san A o du. ₂₆Den seibi moi kaw na seibi yari. Den seibi moi karu na seibi yari tu. Den wan taki a srefi sani. ₂₇Den seibi mangri takru kaw di ben kmoto ini a liba baka den moi wan nanga den seibi drei karu di a winti fu oostsei ben meki kon drei èn proi, na seibi yari fu angriten. ₂₈Na disi mi ben wani taki, di mi taigi Farao taki Gado sori en san A o du. ₂₉Luku, seibi yari o kon pe ala sani o de bogobogo ini Egipte. ₃₀Ma baka dati seibi yari fu angriten o broko. Dan den sma o fergiti a ten di sani ben de bogobogo ini Egipte fu di angri o priti den skin. ₃₁A angriten o de so hebi taki noti no o de fu memre fu a ten di sani ben de bogobogo. ₃₂Tu leisi Farao dren a dren disi. Dat' wani taki tak' Gado o meki a psa trutru. A o meki a psa es'esi. ₃₃Fu dat'ede mi wan taigi yu, Farao, suku wan koniman di e ferstan sani bun, fu gi en a frantwortu ini Egipte. ₃₄Yu mus poti sma di yu gi frantwortu abra a heri kondre. Ini den yari pe sani o de bogobogo den mus meki ibrisma prati a nyanyan fu en gron na feifi pisi, dan a e tyari wan pisi kon gi yu. ₃₅Den man di yu gi a frantwortu mus tyari ala a nyanyan fu den bun yari disi kon na wan gi Farao. Den mus kibri en bun poti ini den foto. ₃₆A nyanyan disi sa de nyanyan di poti na wan sei gi den yari fu angriten di o kon ini Egipte. Dan sma no sa dede fu angri.”

₃₇Farao nanga den edeman fu en ben agri nanga a sani di Yosef tyari kon na fesi. ₃₈Dan Farao aksi den edeman fu en taki: “Un ben o man feni wan tra man leki a man disi? A Yeye fu Gado de na ini en.” ₃₉Ne Farao taigi Yosef taki: “Fu di Gado meki yu kon sabi ala den sani disi, mi no denki taki wan tra koniman de di e ferstan sani so bun. ₄₀Mi o poti yu leki basi ini mi oso. Mi folku sa du san yu e taki. Soso fu di mi na kownu meki mi o hei moro yu.” ₄₁Dan Farao taigi Yosef taki: “Luku, mi e poti a heri kondre Egipte ini yu anu.” ₄₂Di Farao taki dati, a puru a linga nanga a marki fu en na en finga, dan a weri en gi Yosef na en finga. A meki den weri linnen krosi gi en, dan a anga wan gowtu keti gi en na en neki. ₄₃A meki Yosef rei ini a di fu tu wagi di a ben abi. Sma ben e waka fesi a wagi e bari: “Un sori lespeki!” Na so Farao poti a heri kondre ini anu fu Yosef. ₄₄A taigi Yosef taki: “Na mi na Farao, ma no wan sma ini Egipte o man puru futu noso opo en anu sondro taki na yu wani.” ₄₅Dan Farao gi Yosef a nen fu: Safenat-Paneak, èn a gi en Asnat leki frow. Asnat ben de a umapikin fu Potifera, a priester fu On. Na so Yosef ben kisi a makti abra a kondre Egipte. ₄₆Yosef ben abi dritenti yari di Farao, a kownu fu Egipte, poti a kondre ini en anu. Yosef kmoto fu a oso fu Farao dan a go lontu ini a heri kondre Egipte.

₄₇Di den seibi yari ben doro pe nyanyan ben o de bogobogo, a gron ben gi furu nyanyan. ₄₈Ini den seibi yari dati, Yosef meki den tyari ala a nyanyan fu Egipte kon na wan, dan a kibri en poti ini den foto. Ini ala foto a ben kibri a nyanyan poti fu den gron di ben de lontu a foto dati. ₄₉Yosef kibri someni nyanyan taki a no ben de fu teri. A ben furu sote taki den tapu fu teri. Yu no ben man teri moro.

₅₀Asnat a umapikin fu Potifera, a priester fu On, kisi tu boi gi Yosef, fosi a angriten ben broko. ₅₁Yosef kari a fosiwan Manase. A taki: “Gado meki mi fergiti ala mi problema, nanga ala sani san mi famiri du mi.” ₅₂A di fu tu a kari Efraim. A taki: “Gado meki mi kisi pikin ini a kondre disi pe mi nyan pina.”

₅₃Dan den seibi yari, pe nyanyan ben de bogobogo ini Egipte, kon psa. ₅₄Den seibi yari fu angriten ben broko, leki fa Yosef ben taki. Ini ala tra kondre nyanyan ben e pina, ma ini heri Egipte nyanyan ben de. ₅₅Dan heri Egipte bigin pina nyanyan. Den sma bigin bari gi Farao taki den wani nyanyan. Ne Farao taigi den sma fu Egipte taki: “Un go na Yosef dan un e du san a e taigi unu.” ₅₆Di a angriten ben de abra heri grontapu, Yosef opo den maksin dan a bigin seri graan gi den sma fu Egipte, bika a angriten ben kon hebi ini Egipte. ₅₇Heri grontapu ben e kon na Egipte fu kon bai graan na Yosef. Bika a angriten ben hebi na heri grontapu.

₁Di Yakob kisi fu yere taki graan ben de fu feni na Egipte, a aksi den boi fu en taki: “San meki un e sidon luku unsrefi ete?” ₂A taigi den taki: “Arki. Mi yere taki graan de fu feni na Egipte. Un gwe go bai graan gi unu fu un kan tan na libi.” ₃Dan tin brada fu Yosef hari go na Egipte fu go bai graan. ₄Yakob no ben meki Benyamin, a brada fu Yosef, go nanga den tra brada fu en fu di a ben frede taki wan sani ben kan psa nanga en.

₅Na mindri fu den sma di ben kon bai graan, yu ben abi den boi fu Israel tu, bika angriten ben de na Kanaan. ₆Yosef ben de a man di ben abi fu taki ini a kondre. Na en ben e seri graan gi ala sma fu a kondre. Di den brada fu en doro, den boigi gi en. ₇Fa Yosef si den brada fu en, na so a ben sabi taki na den. Ma a du leki a no sabi den. A taki tranga nanga den di a aksi den taki: “Fu pe un kmoto?” Den piki: “Un kmoto fu Kanaan fu kon bai nyanyan.” ₈Yosef ben sabi taki na den brada fu en, ma den no ben sabi taki na Yosef. ₉Dan Yosef memre den dren di a ben dren fu den. Ne a taigi den taki: “Na luku un kon luku fa sani e go dyaso. Na kon un kon fu luku fa un o man kon ini a kondre.” ₁₀Den piki en taki: “Kwet'kweti, masra. Den knekti fu yu kon fu bai nyanyan. ₁₁Wi alamala na fu wan p'pa. Wi na sma di yu kan fertrow. Den knekti fu yu no kon fu luku fa sani de dyaso.” ₁₂Ma Yosef taigi den baka taki: “A no tru. Un kon fu luku fa un o man kon ini a kondre.” ₁₃Den piki en baka taki: “Un ben de nanga twarfu brada. Wi alamala na manpikin fu a srefi man di e libi na Kanaan. A moro yonguwan de na wi p'pa, èn wan no de na libi moro.” ₁₄Yosef taigi den wantron moro taki: “Na leki fa mi taki: Na luku un kon luku fa sani e go dyaso. ₁₅Ma mi sa luku efu san un taki tru. Mi e sweri na a libi fu Farao, taki un no o kmoto dyaso solanga a moro yongu brada fu unu no kon dyaso. ₁₆Meki wan fu unu go teki en kon. Den trawan o tan na strafu. So mi sa kon sabi efu san un taki tru. Efu a no de so, dan mi e sweri na a libi fu Farao taki na luku un kon luku fa sani e go dyaso.” ₁₇Dan a poti den dri dei langa na strafu.

₁₈A di fu dri dei Yosef taigi den taki: “Fu di mi e lespeki Gado, mi o taigi un san un mus du fu un tan na libi. ₁₉Efu un de fu fertrow, dan wan fu unu mus tan na baka na straf'oso. Den trawan kan gwe nanga karu fu tapu a angri fu den famiri fu unu. ₂₀Ma un mus tyari a moro yongu brada fu unu kon gi mi, fu mi si taki san un ben taki tru, èn fu mi no kiri unu.” ₂₁Den agri nanga san Yosef taki. Den taigi makandra taki: “Fu tru, now wi e butu fu san un ben du nanga un brada. Un si fa a ben de ini benawtu di a ben e begi unu fu un sari en. Ma un no ben arki en. Dat' meki unu e broko benawtu now.” ₂₂Ne Ruben taigi den taki: “Mi ben taigi unu taki: Un no du a boi ogri. Ma un no ben wani arki mi. Now un o abi fu gi frantwortu fu a kiri di un kiri en.” ₂₃Den no ben sabi taki Yosef ben e ferstan den, bika densrefi ben abi wan sma fanowdu di ben man taki a tongo fu Egipte. ₂₄Dan Yosef waka kmoto drape go krei. Baka dati a drai go baka go taki nanga den. A meki den teki Simeon puru na den mindri, dan a meki den tai en leti na den fesi. ₂₅Yosef komanderi fu den furu den saka fu den brada fu en nanga karu. Den knekti ben mus poti a moni di den ben pai, baka ini den saka fu den èn den ben mus gi den nyanyan gi ondropasi. Den man du leki fa Yosef ben taki. ₂₆Baka dati den lai den saka na tapu den buriki dan den gwe.

₂₇Di den doro a presi pe den ben o psa a neti, wan fu den opo en saka fu gi en buriki nyanyan, ne a si a moni di ben de tapusei ini a saka. ₂₈A taigi den brada fu en taki: “Den gi mi mi moni baka. Luku srefi, a de ini mi saka.” A sani disi meki den lasi ati srefsrefi. Beifibeifi den drai luku makandra dan den taki: “San Gado du nanga wi?”

₂₉Den ferteri den p'pa Yakob ala sani di den doro na Kanaan. Den taigi en taki: ₃₀“A man di abi fu taki ini a kondre, taki tranga nanga unu. A ben denki taki na luku un go luku fa sani ben e go drape. ₃₁Ma un taigi en taki: ‘Wi na sma di de fu fertrow. Wi no kon fu kon luku fa sani e go dyaso. ₃₂Wi ben de twarfu brada, manpikin fu wan p'pa. Wan fu unu no de moro. A moro yonguwan tan na wi p'pa na Kanaan.’ ” ₃₃Ne a man di abi fu taki ini a kondre taigi unu taki: “Mi wan si efu unu na sma di de fu fertrow. Wan brada mus tan na mi na baka. Un teki karu fu go tapu a angri fu den famiri fu unu. ₃₄Dan un mus tyari a moro yongu brada fu unu kon na mi. So mi sa sabi taki un de fu fertrow èn taki un no ben kon fu kon luku fa sani e go ini a kondre. Efu un du dati, mi sa gi unu un brada baka dan un kan go kon ini a kondre sondro problema.” ₃₅Ma di den e leigi den saka, den si taki a moni fu ibriwan fu den ben de ini den saka. Di den nanga den p'pa si a moni den kon frede. ₃₆Den p'pa Yakob taigi den taki: “Un e puru ala mi pikin na mi anu. Yosef no de moro. Simeon no de moro. Dan now un wan teki Benyamin tyari gwe. Na mi e tyari ala den nowtu disi.” ₃₇Ne Ruben taigi en p'pa taki: “Efu mi no tyari en kon baka gi yu, yu kan kiri den tu boi fu mi. Gi mi a frantwortu fu en, dan mi sa tyari en kon baka gi yu.” ₃₈Ma Yakob piki en taki: “Mi no o meki mi boi go nanga unu bika en brada dede kba. Na en wawan mi abi ete. Efu wan san miti en ondropasi te un e go, un o meki sari tyari a owru man disi go na en grebi.”

₁Wan syatu pisten baka dati Yesus nanga den man di ben e teki leri fu En ben e waka tapu a sabatdei ini wan gron pe graan ben e gro. Dan den man di ben e teki leri fu En bigin broko wantu ai fu a graan e nyan, bika angri ben e kiri den. ₂Di den Fariseiman si a sani dati, den taigi Yesus taki: “Luku, den man fu Yu e du wan sani san a wèt no wani fu un du tapu a sabatdei.” ₃Yesus piki den taki: “Un no leisi san David du, di angri ben e kiri en nanga den man di ben de nanga en? ₄A go ini a oso fu Gado, dan a teki den brede san den ben poti aparti gi Gado. Dan en nanga den man fu en nyan den brede disi, di soso den priester ben kan nyan. ₅A skrifi tu ini a wèt fu Moses taki den priester e broko a wèt fu a sabatdei te den e wroko ini a tempel. Ma Gado no e si dati leki wan sondu. ₆Ma Mi e taigi un taki: Wan sma de dyaso di bigi moro a tempel. ₇Gadowortu e taki: ‘Mi no wani den meti di un e tyari leki ofrandi gi Mi, ma Mi wani fu un abi sari-ati nanga trawan.’ Efu un ben sabi san dati wani taki, dan un no ben o krutu sma di Gado no krutu. ₈Bika a Manpikin fu Libisma na a basi fu a sabatdei.”

₉Yesus kmoto fu drape, dan A go na ini a kerki fu den. ₁₀Now wan man ben drape di ben abi wan malengri anu. Wantu sma ben e suku wan sani fu kan tyari Yesus go na krutu. Dat' meki den aksi En taki: “Yu kan dresi wan sma tapu a sabatdei sondro fu broko a wèt?” ₁₁Ma Yesus taigi den taki: “Efu yu ben abi wan enkri skapu nomo, dan a fadon ini wan olo tapu a sabatdei, yu no ben o grabu en hari puru? ₁₂We, wan libisma warti bari moro wan skapu. Dat' meki a fiti fu du bun tapu a sabatdei.” ₁₃Dan Yesus taigi a man di ben abi a malengri anu taki: “Langa yu anu!” Di a man langa en anu, a kon gesontu leki a trawan. ₁₄Ma den Fariseiman kmoto fu drape go kruderi makandra fa den ben kan kiri Yesus.

₁₅Ma fu di Yesus ben sabi san den ben wani du, A kmoto drape. Furu sma ben waka na En baka, èn A dresi ala den sikisma di ben de na den mindri. ₁₆Dan A warskow den trangatranga taki den no mus taigi no wan sma san A du. ₁₇Na so den sani san a profeiti Yesaya ben taki kon tru. A ben taki:

₂₂Baka dati den tyari wan man di ben abi wan takruyeye na en tapu, kon na Yesus. A man disi no ben man si èn a no ben man taki. Dan Yesus dresi a man fu a ben kan si èn fu a ben kan taki baka. ₂₃Ala den sma drape ben ferwondru sote. Den aksi makandra taki: “Na En sa de a Manpikin fu David?” ₂₄Ma di den Fariseiman yere fu a sani disi, den taki: “Na Beelsebul, a edeman fu den takruyeye, e gi En makti fu yagi den takruyeye puru.”