Dag 140 van 365- 1 Kronieken 10-12 en Johannes 6:47-71

₁Den Filistijnsma ben e feti nanga Israel èn den man fu Israel ben lon gi den Filistijnsma. Furu fu den Israelitiman dede tapu a Gilboabergi. ₂Dan den Filistijnsrudati bigin go baka Saul nanga den boi fu en, èn den kon kiri den dri boi fu Saul: Yonatan, Abinadab nanga Malkisua. ₃Baka dati den Filistijnsrudati ben abi Saul wawan na ai. Di Saul si tak' den man nanga den bo ben e marki na en tapu, a ben e frede srefsrefi. ₄Ne a taigi a srudati di ben e tyari den fetisani fu en taki: “Hari a deigri fu yu dan yu e dyuku mi kiri. Mi no wani fu den man dati di no besnei kon dyuku mi kiri èn teki mi leki spot'popki.” Ma a srudati no ben wani, fu di a ben e frede fu du a sani dati. Ne Saul hari en eigi deigri dan a trowe ensrefi na en tapu. ₅Di a srudati si tak' Saul dede, a trowe ensrefi tu tapu a deigri fu en èn a dede makandra nanga Saul. ₆Na so Saul nanga den dri boi fu en dede. Ala den pikin fu Saul dede makandra nanga en. ₇Di den Israelitisma di ben e libi ini a Yisreeldal kisi fu yere tak' den srudati fu Israel lon gwe èn tak' Saul nanga den manpikin fu en dede, den lon gwe libi den foto fu den. Baka wan pisten den Filistijnsma go libi na ini den foto dati.

₈Di den Filistijnsrudati go a tra dei fu teki den sani fu den srudati fu Israel di ben dede ini a feti, den feni den dedeskin fu Saul nanga den boi fu en tapu a Gilboabergi. ₉Den teki ala sani fu en, den teki a ede fu Saul nanga den fetisani fu en dan den seni boskopuman go lontu ini a kondre fu den fu panya a bun nyunsu na den gado fu den nanga gi a folku. ₁₀Den fetisani fu Saul den poti ini a tempel fu a gado fu den. A ede fu en den fasi na a tempel fu Dagon. ₁₁Di den sma fu a foto Yabes ini Gilead yere san den Filistijnsma du nanga Saul, ₁₂den hari go nanga ala den bun fetiman fu den. Den puru den dedeskin fu Saul nanga den manpikin fu en tyari gwe. Den tyari den go na Yabes dan den beri den bonyo fu den ondro a bigi bon na Yabes. Baka dati den faste seibi dei langa.

₁₃Na so Saul dede fu di a no ben tan dini MASRA wawan. A no ben arki san MASRA ben taigi en. Iya, a go suku rai srefi na yeye fu dedesma, ₁₄prefu a ben aksi MASRA rai. Na dat' meki MASRA kiri en, èn meki David, a manpikin fu Isai, tron kownu na en presi.

₁Dan heri Israel go na David na Hebron èn den taigi en taki: “Yere, wi nanga yu na wan folku. ₂Fosi, srefi di Saul ben de wi kownu ete, na yu ben e hari gwe nanga a legre fu Israel èn tyari den kon baka. Boiti dati, MASRA, yu Gado, ben taigi yu taki: ‘Na yu sa sorgu gi Mi pipel Israel, na yu sa de a tiriman fu Mi pipel Israel.’ ” ₃Na dat' meki ala den fesiman fu Israel ben kon na kownu na Hebron. Dan drape na Hebron, kownu David meki wan ferbontu nanga den na MASRA fesi. Baka dati den salfu David leki kownu fu Israel, leki fa MASRA ben meki Samuel taki.

₄Dan David hari go nanga a heri legre fu Israel na Yerusalem, pe den Yebusitisma ben e libi. A foto dati ben nen Yebus fosi. ₅Den Yebusitisma ben taigi David taki: “Dyaso na inisei, yu no e kon!” Ma David teki Sion abra di ben de wan tranga kibripresi, dan a kari en: a foto fu David. ₆David ben taigi den man fu en taki: “A fosi sma di kiri wan Yebusitisma e tron edeman fu a legre.” Dan Yoab, a manpikin fu Seruya, tron a edeman fu di na en ben doro leki fosi wan na loktu ini a foto. ₇Dan David go libi ini a tranga foto. Dat' meki den e kari drape: a foto fu David. ₈Dan David meki a foto moro tranga fu ala sei, bigin na a Milow èn Yoab meki a tra pisi fu a foto moro tranga. ₉A makti fu David ben e kon bigi moro nanga moro, fu di MASRA, a Gado fu ala sani, ben de nanga en.

₁₀Disi na den edeman fu den dyadya fetiman fu David. Makandra nanga heri Israel den ben yepi en fu a teki en presi leki kownu, leki fa MASRA ben taigi Israel.

₁₁Disi na den nen fu den dyadya fetiman fu David:

Yasobam, a manpikin fu Hakmoni, ben de a edeman fu dritenti man. Wan leisi a kiri dri hondro srudati nanga en lansri na ini wan feti. ₁₂A di fu tu ben de Elasar, a manpikin fu Dodo fu Akoak. A ben de wan fu den dri dyadya fetiman. ₁₃A ben de nanga David na Pas-Damin pe den Filistijnsrudati ben seti densrefi fu feti. Wan pisi pranigron ben drape pe groto ben e gro. Den srudati fu Israel ben lon gi den Filistijnsrudati. ₁₄Ma en nanga David go tnapu mindrisei fu a gron, den fon den Filistijnsrudati èn den Filistijnsrudati no ben man teki a gron abra. Na so MASRA ben gi Israel wan bigi wini.

₁₅Wan leisi dri fu den dritenti edeman kon na David di ben de na a bergi-olo na Adulam. Den Filistijnsrudati ben meki den kampu ini a Refaimdal. ₁₆David ben de ini a tranga kibripresi èn den Filistijnsrudati ben abi wan kampu ini Betlehem. ₁₇Dan David soktu wan leisi èn a taki: “Mi winsi taki wan sma ben kan go teki pikinso watra fu a peti na a bigi doro fu Betlehem tyari kon gi mi.” ₁₈Ne den dri man disi boro psa ini a legrekampu fu den Filistijnsrudati go na a peti na a bigi doro fu Betlehem. Den peti watra dan den tyari en go gi David. Ma David no ben wani dringi a watra. A kanti en na gron leki wan ofrandi gi MASRA, dan a taki: ₁₉“Gado mus kibri mi fu mi no du a sani dati! A o de leki na a brudu fu den man mi o dringi di go teki a watra tyari kon gi mi, bika den ben kan lasi den libi di den go teki en gi mi.” Na dat' meki David no ben wani dringi a watra. Na den sortu sani dati den dri dyadya fetiman disi ben e du. ₂₀Abisai, a brada fu Yoab, ben de a edeman fu den dritenti dyadya fetiman. Wan leisi a kiri dri hondro srudati, dan a wai nanga en lansri leki winiman. Den dri moro dyadya fetiman ben e warderi en. ₂₁A ben de a edeman fu den dritenti dyadya fetiman, a ben abi a moro bigi nen fu a grupu dati, ma a no ben doro den dri moro dyadya fetiman. ₂₂Benaya, a manpikin fu Yoyada, fu a foto Kabseel, ben de wan bun fetiman tu di du bigi sani. Na en ben wini tu fu den moro bun fetiman fu Moab. Wan leisi di sneeuw ben e fadon, a ben meki den saka en go na ini wan olo pe wan lew ben de dan a kiri a lew. ₂₃A ben kiri wan man fu Egipte tu, wan man di ben langa sowan tu nanga afu meter. A man ben abi wan lansri di ben gersi wan pikin postu. Ma Benaya go nanga wan tiki na en tapu. A puru a lansri na en anu, dan a kiri en nanga en eigi lansri. ₂₄Na den dyadya sani dati Benaya, a manpikin fu Yoyada, ben e du. Den dri moro dyadya fetiman ben e warderi en. ₂₅Fu den dritenti dyadya fetiman, en ben de wan fu den moro prenspari wan, ma a no ben doro den dri moro dyadya wan. David ben poti en leki edeman fu den waktiman fu en.

₂₆Den tra dyadya fetiman ben de: Asael, a brada fu Yoab. Elkanan, a manpikin fu Dodo, fu Betlehem. ₂₇Samot fu Haror. Heles fu Pelon. ₂₈Ira, a manpikin fu Ikes fu Tekoa. Abiyeser fu Anatot. ₂₉Sibekai fu Husa. Ilai fu Akoak. ₃₀Maharai fu Netofa. Heled, a manpikin fu Baana, fu Netofa. ₃₁Itai, a manpikin fu Ribai, fu Gibea ini a kontren fu den bakapikin fu Benyamin. Benaya fu Piraton. ₃₂Hurai fu den dal fu Gaas. Abiyel fu Araba. ₃₃Asmawet fu Bakarum. Elyakba fu Saalbon. ₃₄Hasem fu Gison. Yonatan, a manpikin fu Sage fu Harar. ₃₅Akiam, a manpikin fu Sakar fu Harar. Elifal, a manpikin fu Ur. ₃₆Hefer fu Mekera. Akia fu Pelon. ₃₇Hesro fu Karmel. Naarai, a manpikin fu Esbai. ₃₈Yowel, a brada fu Natan. Mibkar, a manpikin fu Hagri. ₃₉Selek fu Amon. Nakrai fu Beerot, di ben e tyari den fetisani fu Yoab, a manpikin fu Seruya. ₄₀Ira nanga Gareb fu Yeter. ₄₁A Hetitiman Uria. Sabad, a manpikin fu Aklai. ₄₂Adina, a manpikin fu Sisa fu a lo fu Ruben. A ben de wan fu den edeman fu a lo, èn a ben tyari dritenti man kon nanga en. ₄₃Hanan, a manpikin fu Maaka. Yosafat fu Meten. ₄₄Usia fu Astarot. Sama nanga Yehiyel, den manpikin fu Hotam fu Arower. ₄₅Yediael, a manpikin fu Simri, makandra nanga en brada Yoka fu Tis. ₄₆Eliyel fu Makanaim. Yeribai nanga Yosawya, den manpikin fu Elnaam. Yitma fu Moab. ₄₇Eliyel, Obed nanga Yaasiyel fu Soba.

₁Disi na den man di ben go na David na Siklag fu waka nanga en, a pisten di David ben abi fu kibri gi Saul, a manpikin fu Kis. Den man disi ben de dyadya fetiman tu, di ben e yepi en ini a feti. ₂Den man disi ben man fringi ston nanga slinger èn sutu den bo nanga den kruktu anu èn nanga den leti anu. Den man disi di ben de fu a srefi lo fu Saul fu Benyamin, ben de: ₃Akiyeser nanga Yoas, den manpikin fu Semaa fu Gibea. Akiyeser ben de a edeman fu den. Moro fara: Yesiyel nanga Pelet, den manpikin fu Asmawet. Beraka nanga Yehu fu Anatot. ₄Yismaya fu Gibeon. A man disi ben de wan fu den dritenti dyadya fetiman èn a ben de a edeman fu den. Moro fara yu ben abi Yirmeya, Yakasiyel, Yokanan nanga Yosabad fu Gedera. ₅Elusai, Yerimot, Bealya, Semarya nanga Sefatya fu Harif. ₆Elkana, Yisia, Asarel, Yoeser nanga Yosobam. Den man disi ben de bakapikin fu Korak. ₇Yowela nanga Sebadya, den manpikin fu Yerokam fu Gedor.

₈Man fu a lo fu Gad ben go na David tu fu waka nanga en di David ben de ini a tranga kibripresi ini a dreisabana. Den man dati ben de dyadya fetiman, srudati di ben sabi a feti. Den ben de nanga schild nanga lansri. Den ben gersi lew èn den ben gaw leki dia. ₉A fesiman fu den ben de Eser. A di fu tu ben de Obadya. A di fu dri Eliab. ₁₀A di fu fo Mismana. A di fu feifi Yirmeya. ₁₁A di fu siksi Atai. A di fu seibi Eliyel. ₁₂A di fu aiti Yokanan. A di fu neigi Elsabad. ₁₃A di fu tin Yirmeya. A di fu erfu Makbanai. ₁₄Ala den man disi, fu a lo fu Gad, ben de edeman fu a legre. A moro pikinwan na den mindri ben man feti nanga wan hondro man, a moro heiwan nanga dusun man. ₁₅Na den man disi ben koti a Yordanliba abra ini a fosi mun fu a yari di a watra fu a liba ben hei kon te na syoro dan den yagi den sma di ben e libi na oostsei nanga westsei fu a dal.

₁₆Wan leisi wantu man fu den lo fu Benyamin nanga Yuda go na David na a kibripresi fu en. ₁₇David waka kon na dorosei, dan a taigi den taki: “Efu un kon nanga bun prakseri, fu kon yepi mi, mi e teki unu nanga opo anu. Ma efu un kon fu kan go konkru mi na mi feyanti, a Gado fu wi afo sa si dati èn strafu unu, bika mi no du no wan ogri.” ₁₈Ne a Yeye fu Gado kon tapu Amasai, a edeman fu den dritenti dyadya fetiman. A taki: “Wi na fu yu, David. Na yu wi kon yepi, manpikin fu Isai. Freide sa de nanga yu nanga den wan di e yepi yu, bika yu Gado e yepi yu!” Dan David teki den ini a grupu fu en èn a poti den leki fesiman!

₁₉Man fu a lo fu Manase ben teki a sei fu David tu di David ben e hari gwe nanga a legre fu den Filistijnsma fu go feti nanga Saul. Ma David no ben feti gi den Filistijnsrudati moro bika den kownu fu den Filistijnsma ben seni en gwe. Den ben prakseri taki David ben o feti nanga den èn kiri den efu a ben teki a besroiti fu drai go baka na Saul. ₂₀Na den man disi fu a lo fu Manase, ben teki a sei fu David di a ben go na a Siklag: Adna, Yosabad, Yediael, Mikael, Yosabad, Elihu nanga Siletai. Ala den man disi ben de edeman fu grupu fu wan dusun fetiman fu a lo fu Manase. ₂₁Na den ben e yepi David te a ben e go feti nanga tra grupu. Den alamala ben de dyadya fetiman en den tron tiriman fu a legre fu David. ₂₂Ala dei sma ben e kon fu waka baka David, èn so a legre fu en ben kon tron wan bun bigi legre.

₂₃Disi na den nomru fu den fetiman di kon nanga ala den fetisani na David na Hebron, fu yepi en tron kownu na a presi fu Saul, soleki fa MASRA ben pramisi: ₂₄fu a lo fu Yuda: siksi dusun aiti hondro fetiman nanga schild nanga lansri, di ben de klar'klari fu feti. ₂₅Fu a lo fu Simeon: seibi dusun wan hondro dyadya fetiman. ₂₆Fu a lo fu Lefi: fo dusun siksi hondro man. ₂₇Na den mindri yu ben abi Yoyada, wan edeman fu den bakapikin fu Aaron, di ben kon nanga dri dusun seibi hondro man fu en. ₂₈Moro fara Sadok, wan yongu dyadya fetiman, makandra nanga en famiri, tutenti-na-tu edeman. ₂₉Fu a lo fu Benyamin, a lo pe Saul ben kmoto tu, dri dusun man. Ma moro furu fu den sma fu a lo fu Benyamin ben tan na a sei fu a famiri fu Saul. ₃₀Fu a lo fu Efraim: tutenti dusun aiti hondro dyadya fetiman. Ala den man dati ben abi bigi nen ini den famiri. ₃₁Fu afu fu a lo fu Manase: tin-na-aitidusun. Den man disi ben kon spesrutu fu poti David leki kownu. ₃₂Fu a lo fu Isakar: tu hondro edeman makandra nanga den fetiman fu a lo fu den. Den sma fu a lo disi ben sabi fa fu luku efu a ben de a yoisti ten fu du wan sani, fu den ben kan sabi san Israel ben mus du. ₃₃Fu a lo fu Sebulon: feifitenti dusun man di ben klar'klari fu feti nanga ala sortu fetisani. ₃₄Fu a lo fu Naftali: wan dusun edeman, makandra nanga dritenti-na-seibi dusun fetiman nanga schild nanga lansri. ₃₅Fu a lo fu Dan: tutenti-na-aiti dusun nanga siksi hondro fetiman di ben klar'klari fu feti. ₃₆Fu a lo fu Aser: fotenti dusun fetiman di ben klar'klari fu feti. ₃₇Fu den lo di ben e libi na a tra sei fu a Yordanliba, a lo fu Ruben, Gad nanga a tra afu fu a lo fu Manase, wan hondro nanga tutenti dusun man di ben abi ala sortu fetisani.

₃₈Ala den bun fetiman disi, ben kon na Hebron nanga wan prakseri nomo, fu yepi David tron kownu fu heri Israel. Ala den tra Israelitisma ben agri nanga a sani dati tu, fu meki David tron kownu. ₃₉Dri dei langa den tan drape nanga David. Den ben e nyan, den ben e dringi, bika den famiri fu den ben seti ala sani poti gi den kba. ₄₀Den alamala, srefi den lo di ben e libi fara, soleki Isakar, Sebulon nanga Naftali, ben tyari nyanyan sani kon tapu buriki, kameel nanga kaw, soleki: blon, drei figa, rosen, win nanga oli. Den tyari bun furu kaw, skapu nanga krabita kon tu, bika Israel ben e prisiri.

₄₇Fu tru Mi e taigi un taki: A sma di e bribi, abi a libi fu têgo. ₄₈Mi na a brede san e gi libi. ₄₉Den afo fu unu ben nyan a mana ini a dreisabana, ma toku den dede. ₅₀Ma a sma di e nyan fu a brede disi di e saka kmopo fu heimel, no sa dede. ₅₁Mi na a brede san e gi libi, di saka kmopo fu heimel. A sma di e nyan fu a brede disi, sa libi fu têgo. Èn a brede san Mi o gi en na Mi skin, san Mi o gi fu ala sma na grontapu kan feni libi.”

₅₂Dan den Dyusma bigin krutu nanga makandra. Den taki: “Fa a Man disi kan gi un En skin fu nyan?” ₅₃Ne Yesus taigi den taki: “Fu tru Mi e taigi unu: Efu un no nyan a skin èn efu un no dringi a brudu fu a Manpikin fu Libisma, dan un no abi libi na ini unu. ₅₄A sma di e nyan Mi skin èn di e dringi Mi brudu, abi a libi fu têgo. Èn Mi sa meki a kon na libi baka tapu a laste dei. ₅₅Bika Mi skin na trutru nyanyan èn Mi brudu na trutru dringi. ₅₆A sma di e nyan Mi skin èn di e dringi Mi brudu, e tan wan nanga Mi èn Mi e tan wan nanga en. ₅₇A P'pa di e libi seni Mi kon, èn soleki fa A gi Mi libi, na so Mi o gi libi tu na a sma di e nyan Mi skin. ₅₈Disi na a brede di saka kmoto fu heimel. Den afo fu unu ben nyan mana, ma toku den dede. Ma a sma di e nyan a brede disi, sa libi fu têgo.” ₅₉Yesus taki den sani disi di A ben e gi leri ini a kerki na Kafarnaum.

₆₀Di furu fu den sma di ben e teki leri fu Yesus yere den sani di A taki, den taki: “A leri disi tranga. Suma o man teki en?” ₆₁Ma Yesus ben sabi taki den man di ben e teki leri fu En ben e krutukrutu abra a san disi. So A taigi den taki: “Na mandi un e mandi fu di Mi taki so? ₆₂San un o du dan te un si a Manpikin fu Libisma e opo go na a presi pe A ben de fosi? ₆₃Na a Yeye e gi libi, a skin na noti. Den sani san Mi taigi unu, na yeye sani èn den e gi libi. ₆₄Ma sonwan fu unu no e bribi.” Yesus ben sabi sensi na a bigin suma no ben o bribi, nanga suma ben o seri En. ₆₅Dan Yesus taki: “Fu dat'ede Mi taigi unu: No wan sma kan kon na Mi efu a no a P'pa meki a du dati.” ₆₆Sensi a pisten dati, furu fu den sma di ben e teki leri fu En, drai baka gi En. Den no waka moro langa nanga En.

₆₇Dan Yesus aksi den twarfu man fu En taki: “Ma unu dan, un o gwe libi Mi tu?” ₆₈Simon Petrus piki En taki: “Masra, na suma un o go dan? Na Yu abi wortu di e gi a libi fu têgo. ₆₉Wi e bribi Yu, èn wi sabi taki Yu na a Santa Wan fu Gado.” ₇₀Dan Yesus piki den taki: “Unu na den twarfu man di Mi teki. Ma wan fu unu na wan didibri.” ₇₁Yesus ben e taki fu Yudas, a manpikin fu Simon Iskariot. Bika fu den twarfu den man, Yudas ben de a wan di ben o seri En.