Dag 141 van 365- 1 Kronieken 13-15 en Johannes 7:1-32

₁Baka di David kenki prakseri nanga ala den tiriman fu a legre fu en, den edeman fu wan dusun nanga fu wan hondro srudati, ₂a taigi ala den Israelitisma taki: “Efu un feni en bun, èn efu a de a wani fu MASRA, a Gado fu wi, meki wi seni boskopuman go lontu na ala sei fu Israel. Den mus go kari den kondreman fu wi di no de dyaso, fu den kon makandra dyaso. Den mus go kari den priester nanga den Lefitisma tu di e libi ini den eigi kontren. ₃Dan meki wi go teki a santa kisi fu Gado tyari kon dyaso. Bika sensi a ten fu Saul no wan fu wi luku en na wan ai.” ₄Ala den sma drape ben agri nanga a tori dati, bika a pipel ben si en leki wan bun sani.

₅Dan David seni kari ala den Israelitisma fu a liba di e prati a kondre fu den nanga Egipte, te go miti a pasi di e go na Hamat, fu go teki a santa kisi fu Gado na Kiryat-Yearim. ₆Dan David hari go nanga heri Israel na Baala, na Kiryat-Yearim ini Yuda fu go teki a santa kisi fu Gado, a MASRA, di sidon tapu den kerub, a santa kisi, di e tyari a spesrutu nen. ₇Den go teki a santa kisi ini a oso fu Abinadab dan den poti en tapu wan nyun wagi. Usa nanga Akio ben e tyari a wagi. ₈David nanga ala den Israelitisma ben e dansi nanga den heri ati gi Gado. Den ben e singi èn den ben e meki poku nanga citer, harp, tamboerijn, cimbaal nanga trompet. ₉Ma di den doro na a presi pe Kidon e masi a buba puru na a graan, den kaw grati dan Usa langa en anu fu hori a santa kisi. ₁₀Ne MASRA lusu a atibron fu En tapu Usa. A strafu en, fu di a ben langa en anu go na a santa kisi. Usa dede leti drape na Gado fesi. ₁₁Dan David mandi taki MASRA ben strafu Usa so hebi. Dat' meki den e kari a presi Peres-Usa te leki tide. ₁₂Ma a srefi ten dati David kisi wan dipi lespeki gi Gado tu, èn a aksi ensrefi taki: “Fa mi o man tyari a frantwortu fu a santa kisi fu Gado?” ₁₃Fu dat'ede David no teki a santa kisi na en ini a foto fu David. A meki den tyari en go poti na a oso fu Obed-Edom, wan man fu Gat. ₁₄A santa kisi fu Gado tan dri mun ini a oso fu Obed-Edom, èn MASRA ben e blesi Obed-Edom, ala sma di ben e libi na ini en oso nanga ala sani di a ben abi.

₁Dan kownu Hiram fu Tyrus seni wantu spesrutu boskopuman fu en go na David. Den ben tyari sedre-udu gi en, temreman nanga man di ben sabi fu wroko nanga ston. Den ben mus bow wan kownu-oso gi David. ₂Dan David kon ferstan tak' na MASRA ben poti en leki kownu fu Israel èn tak' na En ben meki a tron wan bigi kownu fu En pipel Israel ede.

₃David teki moro uma ini Yerusalem èn a meki moro manpikin nanga umapikin. ₄Den nen fu den pikin di a kisi na Yerusalem ben de: Samua, Sobab, Natan, Salomo, ₅Yibkar, Elisua, Elpelet, ₆Noga, Nefeg, Yafia, ₇Elisama, Beelyada nanga Elifelet.

₈Di den Filistijnsma yere tak' den Israelitisma salfu David leki kownu fu heri Israel, den hari kon nanga a heri legre fu den fu grabu David. Ma di David kisi dati fu yere a hari go miti den. ₉Di den Filistijnsrudati ben panya densrefi ini a Refaimdal, ₁₀David aksi Gado taki: “Mi sa go feti nanga den Filistijnsrudati? Yu sa gi den abra na ini mi makti?” MASRA piki David taki: “Yu kan hari go, bika Mi o gi den abra na ini yu makti.” ₁₁Dan David nanga a legre fu Israel hari go na Baal-Perasim. Drape den wini den Filistijnsrudati dan David taki: “Gado teki mi dan A broko psa mindri mi feyanti leki fa watra e broko psa sani.” Na dat' meki sma e kari a presi Baal-Perasim. ₁₂Den Filistijnsrudati ben libi srefi den gado fu den na baka. Dan David gi a komanderi fu bron den nanga faya.

₁₃Ma den Filistijnsrudati ben kon fu kon feti ete wan leisi èn den ben panya densrefi baka na ini a Refaimdal. ₁₄Dan David go suku rai baka na Gado èn Gado piki en taki: “No go langalanga na den tapu. Ma un lontu go te na den moerbeibon, dan un broko go na den tapu fu bakasei. ₁₅A srefi momenti te un yere leki wan legre e psa abra den bon, un mus broko go na den tapu bika Gado e hari go na un fesi fu wini a legre fu den Filistijnsma.” ₁₆David du soleki fa Gado komanderi en, èn a wini den Filistijnsrudati fu Gibeon go te na Geser. ₁₇A sani dati gi David wan bigi nen ini ala den kondre. MASRA meki taki ala folku ben e beifi gi en.

₁David meki den bow wan kownu-oso gi en ini a foto fu David. A meki wan presi tu fu poti a santa kisi fu Gado, dan a meki den span wan tenti gi a kisi drape. ₂Baka dati David taigi den taki: “Na soso den Lefitisma mus tyari a santa kisi fu Gado bika na den MASRA ben teki fu tyari a santa kisi fu En, èn fu dini En ala ten.” ₃Dan David meki ala den Israelitisma kon makandra na Yerusalem, fu tyari a santa kisi fu MASRA go poti na a presi di a ben meki klari gi en. ₄Baka dati a seni kari den bakapikin fu Aaron nanga den Lefitiman. Den Lefitiman di kon ben de: ₅fu a famiri fu Kehat: a edeman Uriyel, makandra nanga wan hondro nanga tutenti man. ₆Fu a famiri fu Merari: a edeman Asaya, makandra nanga tu hondro nanga tutenti man. ₇Fu a famiri fu Gersom: a edeman Yowel, makandra nanga wan hondro nanga dritenti man. ₈Fu a famiri fu Elisafan: a edeman Semaya, makandra nanga tu hondro man. ₉Fu a famiri fu Hebron: a edeman Eliyel, makandra nanga aititenti man. ₁₀Fu a famiri fu Usiyel: a edeman Aminadab, makandra nanga wan hondro nanga twarfu man.

₁₁Dan David seni kari priester Sadok nanga Abyatar, nanga den Lefitiman Uriyel, Asaya, Yowel, Semaya, Eliyel nanga Aminadab. ₁₂A taigi den taki: “Unu na den edeman fu den famiri fu a lo fu Lefi. Dat' meki un mus krin unsrefi, unu nanga den tra Lefitiman, fu un kan go teki a santa kisi fu MASRA, a Gado fu Israel, tyari kon poti na a presi di mi meki klari gi en. ₁₃Bika fu di unu no ben de a fosi leisi fu tyari en, meki MASRA, a Gado fu wi, strafu wi hebi. Wi no ben du sani finifini leki fa En ben wani taki den mus du.” ₁₄So den priester nanga den Lefitiman krin densrefi fu ben kan tyari a santa kisi fu MASRA, a Gado fu Israel, kon drape. ₁₅Den Lefitiman tyari a santa kisi fu Gado nanga den syowtiki fu en tapu den skowru, soleki fa MASRA ben komanderi Moses fu du. ₁₆David komanderi den edeman fu den Lefitiman tu fu den meki singiman klari di ben kan singi prisirisingi nanga instrumenti, harp, citer nanga cimbaal. ₁₇Den Lefitiman meki Heman, a manpikin fu Yowel, kon, makandra nanga tu famiri fu en: Asaf, a manpikin fu Berekya, nanga Etan, a manpikin fu Kusayahu, fu a famiri Merari. ₁₈Tra Lefitiman di ben o yepi den ben de: Sekarya, Ben, Yaasiyel, Semiramot, Yekiyel, Uni, Eliab, Benaya, Maaseya, Matitya, Elifelehu, Mikneyahu nanga Obed-Edom nanga Yehiyel, den man di e hori wakti. ₁₉Den singiman Heman, Asaf nanga Etan ben e prei den cimbaal, ₂₀Sekarya, Asiyel, Semiramot, Yekiyel, Uni, Eliab, Maaseya nanga Benaya ben o prei den harp, di ben stem hei. ₂₁Matitya, Elifelehu, Mikneyahu, Obed-Edom, Yehiyel nanga Asasyahu ben o prei den citer, di ben stem aiti noto moro lagi. ₂₂Kenanya, wan fu den edeman fu den Lefitiman, ben abi a frantwortu fa den ben mus waka. A kisi a wroko frantwortu dati fu di a ben abi wan krin ferstan. ₂₃Berekya nanga Elkana ben e hori wakti na a santa kisi. ₂₄Den priester Sebanya, Yosafat, Netanel, Amasai, Sekarya, Benaya nanga Eliyeser ben waka fesi a santa kisi en den ben e bro trompet. Obed-Edom nanga Yekia ben e hori wakti na a santa kisi.

₂₅Na so David, den fesiman fu Israel nanga den edeman fu wan dusun srudati, hari go nanga bigi prisiri na a oso fu Obed-Edom, fu go teki a santa kisi fu a ferbontu fu MASRA. ₂₆Gado ben e yepi den Lefitiman di ben e syow a santa kisi fu a ferbontu fu MASRA èn den tyari seibi bulu nanga seibi man skapu leki ofrandi. ₂₇David ben weri wan langa dyakti di ben meki fu diri linnen krosi. Den Lefitiman di ben e syow a santa kisi, den singiman, nanga Kenanya, di ben abi a frantwortu abra den singiman nanga a fasi fa den ben mus waka, ben weri diri linnen krosi tu. Ma David ben weri wan linnen efod tu.

₂₈Heri Israel ben go teki a santa kisi fu a ferbontu fu MASRA tyari kon. Den ben e meki babari èn den ben e bro tutu nanga trompet, den ben e naki cimbaal èn prei tapu harp nanga citer. ₂₉Di den doro nanga a santa kisi fu a ferbontu fu MASRA na a foto fu David, Mikal, a umapikin fu Saul, luku na a fensre. Di a si fa kownu David ben e dyompo èn dansi, a ben e si David fu noti.

₁Baka dati Yesus hari fu a wan presi go na a trawan ini Galilea. A no ben wani tan na Yudea, bika den fesiman fu den Dyusma ben e suku fu kiri En. ₂Ma a ten fu den Dyusma hori a Sukotfesa fu den, ben de krosbei. ₃Dan den brada fu Yesus taigi En taki: “Yu mus kmopo dya go na Yudea, meki den sma fu Yu si den sani san Yu e du. ₄Bika no wan sma e du wan sani kibrifasi, efu a wani fu sma kon sabi en. Efu Yu e du den sani disi, dan meki heri grontapu kon sabi Yu!” ₅Den brada fu Yesus taki so, fu di den srefi no ben e bribi na ini En. ₆Dan Yesus piki den taki: “Un kan go oten un wani, ma a yuru fu Mi no doro ete. ₇Den sma fu grontapu no man mandi nanga unu. Ma Mi den no man si na ai, fu di Mi e taigi den tak' na ogri den e du. ₈Un kan go na a fesa. Mi no e go, bika a yuru fu Mi no doro ete.” ₉Di A taigi den dati, A tan na Galilea.

₁₀Baka di den brada fu En go na a fesa, Yesus srefi go tu. Ma A go kibrifasi fu no wan sma sabi. ₁₁Den fesiman fu den Dyusma ben e luku fu En tapu a fesa, èn den ben e aksi pe A de. ₁₂Den furu sma di ben drape ben e taki safrisafri fu En. Sonwan ben e taki tak' Yesus na wan bun sma, ma trawan ben feni taki na kori A e kori den sma. ₁₃Ma no wan sma ben prefuru fu taki fu En meki ala sma yere, bika den ben frede den fesiman fu den Dyusma.

₁₄Di afu fu den dei fu a fesa ben psa kba, Yesus go na a tempel dan A bigin gi den sma leri. ₁₅Den fesiman fu den Dyusma ben ferwondru, èn den aksi taki: “Fa a Man disi du sabi someni sani sondro fu A kisi leri?” ₁₆Yesus piki den taki: “Den sani di Mi e leri no kmoto fu Misrefi, ma fu a Wan di seni Mi kon. ₁₇Efu wan sma wani du a wani fu Gado, dan a sa kon sabi efu a leri san Mi e gi, kmoto fu Gado noso efu Mi kon nanga Mi eigi leri. ₁₈Efu wan sma kon nanga en eigi leri, a e suku grani gi ensrefi. Ma a sma di e suku grani gi a wan di seni en kon, de fu fertrow èn a no e lei. ₁₉Moses ben gi unu a wèt, ma no wan fu unu e du san a wèt e taki. Fu sanede un wani kiri Mi?” ₂₀Den sma taigi En taki: “Suma wani kiri Yu? Na wan takruyeye Yu abi na Yu tapu!” ₂₁Yesus piki den taki: “Mi du wan wondru nomo, dan un alamala ferwondru. ₂₂Luku, Moses ben taigi un taki un mus besnei den boi fu unu. A sani disi no ben kmoto fu ensrefi, ma fu den afo fu wi. Dat' meki un e besnei, awinsi na wan sabatdei. ₂₃Efu un e besnei tapu a sabatdei fu no broko a wèt fu Moses, dan fu sanede un ati e bron na Mi tapu fu di Mi meki wan sma kon betre tapu a sabatdei? ₂₄Un no mus krutu wan sma fu san un si, ma un mus krutu tapu wan leti fasi.”

₂₅Sonwan fu den sma fu Yerusalem aksi taki: “A no En na a man di den wani kiri? ₂₆Luku, A e gi leri na ala sma fesi, èn no wan sma e taigi En wan sani. Kande den edeman kon si now trutru tak' En na a Mesias. ₂₇Un sabi pe a man disi kmoto, ma te a Mesias kon, no wan sma o sabi pe A kmoto.” ₂₈Dat' meki di Yesus ben e leri den sma ini a tempel, A bari taki: “Un sabi Mi èn un sabi pe Mi kmoto. Ma Mi no kon ini Mi eigi nen. Na a Trutru Wan seni Mi kon. Un no sabi En, ₂₉ma Mi sabi En, bika Mi kmopo na En èn na En seni Mi kon.” ₃₀Di den yere dati, den suku fu grabu En. Ma no wan sma no fasi En, bika a yuru fu En no ben doro ete. ₃₁Ma furu fu den sma bigin bribi ini En. Den taki: “Te a Mesias kon, A o man meki un si moro marki leki a man disi?” ₃₂Den Fariseiman yere san den sma ben e taki safrisafri fu Yesus. Dat' meki den nanga den prenspari priester seni waktiman fu a tempel fu go grabu En.