Dag 142 van 365- 1 Kronieken 16-18 en Johannes 7:33-53

₄David poti wantu Lefitiman na a santa kisi fu MASRA fu dini En drape: fu gi MASRA, a Gado fu Israel, bigi nen, fu gi En grani èn fu prijse En. ₅Asaf ben de a edeman fu den, dan yu ben e kisi Sekarya. Moro fara yu ben abi Yehiyel, Semiramot, Yekiyel, Matitya, Eliab, Benaya, Obed-Edom nanga Yehiyel di ben mus prei den harp nanga den citer èn Asaf ben o naki den cimbaal. ₆Den priester Benaya nanga Yakasiyel ben mus tan bro trompet fesi a santa kisi fu a ferbontu fu Gado. ₇Tapu a dei dati, David komanderi Asaf nanga den tra Lefitiman fu a fosi leisi taki na so den mus prijse MASRA:

₃₇Dan David libi Asaf nanga den famiri fu en na a santa kisi fu a ferbontu fu MASRA, fu tan dini En dorodoro, fesi a santa kisi. Ibri dei ben abi en eigi fasi fa den ben mus du dati. ₃₈A poti Obed-Edom nanga siksitenti-na-aiti famiri fu en, fu yepi den. Obed-Edom, a manpikin fu Yedutun, nanga Hosa ben e hori wakti. ₃₉Ma priester Sadok nanga den tra priester fu a famiri, a poti na a santa tenti fu MASRA di ben de na a presi pe den ben e tyari ofrandi na Gibeon. ₄₀Ala mamanten nanga ala neti den ben mus bron meti leki ofrandi tapu a altari di ben meki spesrutu fu bron ofrandi. Den ben mus du ala tra sani drape tu di ben skrifi ini a wèt di MASRA ben gi Israel. ₄₁Heman nanga Yedutun ben drape nanga den tra man di den ben kari spesrutu fu singi: “Prijse MASRA, bika a bigi lobi fu En na fu têgo.” ₄₂Na den, Heman nanga Yedutun, ben e sorgu gi den trompet, den cimbaal nanga den tra instrumenti di ben mus prei te den ben e singi fu gi Gado grani. Den manpikin fu Yedutun ben e hori wakti na a doro fu a tempel.

₄₃Baka dati ala sma drai go baka na den oso. David srefi drai gwe fu go blesi den sma fu en oso.

₁Baka di David go libi ini en kownu-oso, a taigi a profeiti Natan taki: “Luku, mi e libi na ini wan oso di meki fu sedre-udu, ma a santa kisi fu a ferbontu fu MASRA de na ondro wan tenti.” ₂Ne Natan piki David taki: “Du ala san yu ati firi fu du, bika Gado de nanga yu.” ₃Ma a srefi neti dati Gado taki nanga Natan. A taigi en taki: ₄“Go na Mi knekti David, dan yu e taigi en taki: ‘Na disi MASRA e taki: A no yu o bow wan oso gi Mi fu Mi tan. ₅Sensi a dei di Mi bigin fu tyari den sma fu Israel kon dyaso, te kon miti now, mi no libi na ini wan oso. Na ini wan tenti, ini wan santa tenti Mi ben e tan. ₆Di Mi e hari fu a wan presi ini Israel go na a trawan, noiti Mi taigi wan fu den krutubakra fu Israel di Mi ben poti fu tiri Mi pipel, taki: fu sanede un no e bow wan oso fu sedre-udu gi Mi? ₇We dan, taigi Mi knekti, taigi David taki: Na disi MASRA fu ala sani, e taki: Na Misrefi ben puru yu ini a wei, pe yu ben e luku skapu, èn Mi meki yu tron tiriman fu Mi pipel Israel. ₈Alape yu ben e go Mi ben de nanga yu. Ala yu feyanti mi puru na pasi gi yu. Mi sa gi yu wan bigi nen tu leki di fu den bigiwan fu grontapu. ₉Mi gi Mi pipel, Israel, wan tanpresi. Mi poti den drape fu den kan abi den eigi tanpresi. Den ati no o de na dyompo drape èn ogri-ati folku no sa pina den moro leki fosi, ₁₀leki ini a ten di Mi ben poti krutubakra fu tiri Mi pipel Israel. Mi meki ala den feyanti fu yu saka densrefi gi yu. Mi e taigi yu taki: na MASRA o bow wan oso gi yu. ₁₁Te yu dede èn den beri yu pe den afo fu yu beri, Mi o meki wan fu den eigi manpikin fu yu teki yu presi, èn Mi o meki a de wan tranga kownu. ₁₂Na en o meki wan oso gi Mi, èn Mi o sorgu tak' na soso pikin nanga bakapikin fu en sa de kownu ala ten. ₁₃Mi o de leki wan p'pa gi en, èn a sa de leki wan manpikin gi Mi. Mi no sa tapu fu sori en a bigi lobi fu Mi, leki fa Mi ben tapu fu sori en na a wan di ben de kownu na yu fesi. ₁₄Mi sa poti en fu tiri Mi pipel nanga Mi kondre fu têgo èn noiti wan sma sa man puru unu leki kownu.’ ”

₁₅Dan Natan go taigi David ala san a si nanga ala san a yere. ₁₆Dan kownu David go ini a tenti, a go sidon na MASRA fesi dan a begi taki: “MASRA Gado, suma na mi èn suma na mi famiri tak' Yu opo mi so? ₁₇Tye Gado, efu dati no sari, Yu taki tu fa a o de nanga a famiri fu Yu knekti ini wan ten di de fara na wi fesi. MASRA Gado, Yu e si mi leki wan fu den moro hei libisma fu grontapu. ₁₈San mi o man taki moro fu a grani di Yu e gi Yu knekti? Yu sabi Yu knekti. ₁₉MASRA, fu Yu knekti ede, èn soleki fa yu besroiti na ini yu ati, Yu du ala den bigi sani disi èn taki fu den. ₂₀MASRA, a de leki fa wi yere, no wan no de leki Yu èn no wan Gado no de boiti Yu. ₂₁Èn sortu folku de leki Israel? Den na a enkri folku na grontapu di Yu go ferlusu, fu meki den tron Yu eigi folku, fu Yu kan kisi bigi nen nanga den bigi èn ferwondru sani di Yu du. Yu yagi tra folku gwe gi a folku fu Yu di Yu ben ferlusu puru na Egipte. ₂₂Na so Yu meki Yu folku Israel tron Yu eigi folku fu têgo, èn Yu, MASRA, na den Gado. ₂₃We now, MASRA, mi e begi fu Yu hori Yu ala ten na den sani di Yu pramisi mi nanga mi famiri. Meki a psa soleki fa Yu taki. ₂₄Dan sma sa opo Yu nen èn gi Yu bigi nen fu têgo, fu di den o taki: ‘MASRA fu ala sani, a Gado fu Israel, na a Gado fu Israel.’ Na so wawan den famiri fu mi sa tan leki tiriman fu a kondre. ₂₅Bika Yu, mi Gado, ben meki Yu knekti kon sabi taki na Yu o bow wan oso gi en. Na dat' meki a teki a dek'ati fu begi a begi disi. ₂₆We MASRA, Yu na Gado, èn na Yu taki den bun sani disi fu Yu knekti. ₂₇Abi prisiri now fu blesi Yu knekti nanga en famiri, fu wi kan tan tiriman fu têgo na Yu fesi. Bika na Yu blesi mi nanga mi famiri, dat' meki a blesi fu Yu san tan na wi tapu fu têgo.”

₁Baka dati David wini den Filistijnsma èn a tyari den kon ondro a tiri fu en. A puru a foto Gat nanga den dorpu fu en na den anu. ₂David wini den Moabitisma tu. Den tron knekti fu David di ben mus tan tyari sani gi en di a ben komanderi den fu tyari kon. ₃David wini kownu Hadadeser fu Soba tu. A du dati na Hamat, di Hadadeser ben e go fu tyari a kontren na a Eufratliba kon baka ondro a tiri fu en. ₄David ben kan teki wan dusun fu den fetiwagi fu Hadadeser, seibi dusun srudati di ben e sidon tapu asi nanga tutenti dusun srudati di ben de nanga futu. A meki den srudati fu en hori wan hondro nomo fu den asi di ben e hari den fetiwagi. Fu ala den trawan a meki den koti den bakafututitei. ₅Dan den Arameesma fu Damaskus kon fu yepi kownu Hadadeser fu Soba. Ma David kiri tutenti-na-tu dusun fu den. ₆Baka dati David poti srudati na difrenti prenspari presi ini Damaskus èn den Arameesma tron knekti fu David di ben mus tan tyari sani gi en di a ben komanderi den fu tyari kon. MASRA ben e meki David wini alasei pe a ben e go.

₇David teki den gowtu schild di den waktiman fu Hadadeser ben e tyari dan a tyari den go na Yerusalem. ₈David teki bun furu kopro tyari gwe tu fu Tibkat nanga Kun, tu foto di Hadadeser ben e tiri. Nanga a kopro dati Salomo meki a bigi kopro beki, den bigi kopro postu nanga den kopro wrokosani. ₉Di kownu Tohu fu Hamat yere tak' David wini a heri legre fu kownu Hadadeser fu Soba, ₁₀a seni en manpikin Hadoram go na David fu aksi en fa a e go nanga en, èn fu fersteri en nanga a wini di a wini Hadadeser. A seni ala sortu gowtu, solfru nanga kopro sani leki kado gi David tu. Tohu du dati fu di en nanga Hadadeser ben de feyanti. ₁₁Kownu David poti den kado dati aparti gi MASRA tu, neleki fa a ben du nanga a gowtu nanga a solfru di a ben teki fu den folku tyari gwe. Dati ben de: den Edomitisma, den Moabitisma, den Amonitisma, den Filistijnsma nanga den Amalekitisma.

₁₂Abisai, a manpikin fu Seruya, wini tin-na-aiti dusun Edomitisrudati ini a Sowtudal. ₁₃Alasei ini a kondre fu den Edomitisma David ben poti srudati èn so ala den Edomitisma ben tron knekti fu en. MASRA ben e meki David wini alasei pe a ben e go.

₁₄Baka di David tron kownu fu heri Israel, a ben e tiri a heri folku na tapu wan bun èn leti fasi. ₁₅Yoab, a manpikin fu Seruya, ben de edeman fu a legre. Yosafat, a manpikin fu Akilud, ben de a takiman fu kownu. ₁₆Sadok, a manpikin fu Akitub, nanga Abimelek, a manpikin fu Abyatar, ben de priester. Sawsa ben de sekretarsi. ₁₇Benaya, a manpikin fu Yoyada, ben de edeman fu den Keretitiman nanga den Peletitiman. Den manpikin fu David ben de den moro prenspari sma di ben e yepi en.

₃₃Dan Yesus taki: “Wan syatu pisten nomo Mi o de ete nanga unu, dan Mi o drai go baka na a Wan di ben seni Mi kon. ₃₄Un o suku Mi, ma un no o feni Mi. Bika pe Mi de, un no man kon.” ₃₅Den fesiman fu den Dyusma aksi makandra taki: “Pe a man disi o go dan, taki un no o man feni En? Kande A o go na den Dyusma di panya go na tra kondre, dan A o gi den sma drape di no sabi Gado a leri fu En. ₃₆A taki tak' wi o suku En, ma un no o feni En, èn pe A de, un no man kon. San A wani taki nanga a sani dati?”

₃₇A laste dei fu a Sukotfesa na a moro bigi dei. A dei dati Yesus opo tnapu dan A bari taki: “Efu watra e kiri wan sma, meki a kon na Mi fu dringi! ₃₈A Santa Buku e taki: Liba fu watra di e gi libi, o lon kmoto inisei fu a sma di e bribi ini Mi.” ₃₉Di Yesus taki a sani dati, A ben e taki fu a Santa Yeye san den sma ben o kisi di teki bribi ini En. Bika te leki a ten dati a Santa Yeye no ben kon ete, fu di Yesus no ben go na heimel ete.

₄₀Di den sma yere san Yesus taki, sonwan fu den taki: “Trutru, a man disi na a Profeiti!” ₄₁Trawan taki: “Disi na a Mesias!” Trawan baka taki: “A Mesias no o kmoto fu Galilea. ₄₂Bika a Santa Buku e taki tak' a Mesias o de wan bakapikin fu David, èn A o kmoto fu Betlehem, a foto pe David ben e libi.” ₄₃Na so prati ben kon mindri den sma fu Yesus ede. ₄₄Sonwan fu den ben wani grabu En, ma no wan sma no fasi En.

₄₅Den waktiman drai go baka na den prenspari priester nanga den Fariseiman, dan den man dati aksi den taki: “Sanede un no tyari En kon?” ₄₆Den waktiman piki den taki: “Noiti ete wan man taki leki fa a man disi e taki.” ₄₇Dan den Fariseiman taigi den taki: “Na drai A drai un ede tu? ₄₈No wan edeman fu unu èn no wan fu den Fariseiman e bribi ini En. ₄₉Ma Gado sa fluku ala den sma disi di no sabi a wèt fu Moses!” ₅₀Dan Nikodemus, wan fu den Fariseiman di ben kon wan leisi na Yesus, taigi den taki: ₅₁“A wèt fu unu e taki tak' un no kan leisi strafu gi wan sma efu un no arki fosi san a e taki èn ondrosuku san a e du.” ₅₂Den piki en taki: “Yu na fu Galilea tu? Go ondrosuku Gadowortu, dan yu o si taki no wan profeiti e kmoto fu Galilea.”

₅₃Baka dati ala sma go na den oso,