Dag 143 van 365- 1 Kronieken 19-21 en Johannes 8:1-30

₁Baka wan pisten kownu Nakas fu den Amonitisma kon dede. En manpikin teki en presi leki kownu. ₂Ne David taki: “Mi sa libi bun nanga Hanun, a manpikin fu Nakas, bika en p'pa ben libi bun nanga mi.” Dan David seni boskopuman go na en fu trowstu en nanga a dede fu en p'pa. Ma di den boskopuman fu David doro na Hanun ini a kondre fu den Amonitisma, ₃den edeman fu den Amonitisma taigi Hanun taki: “Yu no mus prakseri taki na grani David wani gi yu p'pa so nanga a seni di a seni boskopuman kon fu trowstu yu. A no abi misi tak' na luku den kon luku kibrikibri fa sani e waka ini a kondre, fu a kan kon broko en. Na fu a sani dati a seni den boskopuman kon na yu.” ₄Dan Hanun seni grabu den boskopuman fu David. A meki den koti den barba puru, a meki den koti den krosi taki afu den bakasei ben de na doro, dan a seni den gwe so. ₅Di den man ben de na pasi, David kisi fu yere san miti den. Ne a seni boskopuman go na den man dati, di ben e syen srefsrefi, fu taigi den taki: “Un tan ini Yeriko te leki a barba fu un gro baka. Baka dati un kan drai kon.”

₆Den Amonitisma ben kon ferstan tak' a sani di den du no ben switi srefsrefi na David. Ne Hanun nanga den Amonitisma seni dritenti dusun kilo solfru gi den Arameesma fu Naharaim, Aram-Maaka nanga Soba, fu yuru fetiwagi nanga srudati di e tyari den wagi dati. ₇Den yuru dritenti-na-tu dusun fetiwagi, sosrefi a kownu fu Maaka nanga a legre fu en. Di a legre disi doro den meki den kampu na Medeba. Den Amonitisrudati srefi hari kmoto fu den tanpresi èn bondru densrefi gi a feti. ₈Di David kisi dati fu yere, a seni Yoab nanga a heri legre fu den dyadya fetiman go feti nanga den. ₉Den Amonitisrudati hari go seti densrefi fesi a bigi doro fu a foto fu den. Den kownu di ben kon yepi den, ben seti densrefi nanga den eigi grupu ini a wei. ₁₀Ma Yoab ben kon si tak' a feyanti ben kan kon na den tapu fu fes'sei nanga fu bakasei. Ne a piki den moro bun srudati puru na ini a legre fu den dyadya fetiman fu Israel, dan a poti den fu feti nanga den Arameesrudati. ₁₁Den trawan a poti ondro a tiri fu en brada Absai. Den dati go feti nanga den Amonitisrudati. ₁₂Dan Yoab taigi en taki: “Efu den Arameesrudati tranga moro mi, yu mus kon yepi mi. Ma efu den Amonitisrudati tranga moro yu, dan mi o kon yepi yu. ₁₃Kon meki wi teki dek'ati èn feti leki dyadya fetiman gi wi pipel èn gi den foto fu wi Gado. MASRA o du san A feni bun.” ₁₄Dan Yoab nanga den srudati di ben de nanga en, hari go feti nanga den Arameesrudati èn den Arameesrudati lon gi en. ₁₅Di den Amonitisrudati si tak' den Arameesrudati lon, densrefi lon gi Abisai èn den hari go baka ini a foto fu den. Baka dati Yoab drai go baka na Yerusalem.

₁₆Di den Arameesma si tak' den lasi a feti nanga Israel, den seni boskopuman go na den Arameesma di ben e libi na a tra sei fu a Eufratliba. Den dati hari kmoto drape ondro a tiri fu Sofa, a edeman fu a legre fu Hadadeser. ₁₇Di David kisi a sani dati fu yere, a meki ala den srudati fu Israel kon na wan. Den koti a Yordanliba abra, fu hari go miti den, dan a seti a legre fu en abra di fu den. Di David du dati den Arameesrudati bigin feti nanga en. ₁₈Ma den Arameesrudati ben abi fu lon gi den di fu Israel, èn David kiri seibi dusun fu den asi fu den di ben e hari den fetiwagi, nanga fotenti dusun srudati di ben de nanga futu. A kiri Sobak, a edeman fu a legre, tu. ₁₉Ala den knekti fu Hadadeser, ben kon ferstan tak' den lasi a feti nanga Israel. Ne den tapu a feti, èn den saka densrefi gi David. Den Arameesma no ben prefuru moro fu go yepi den Amonitisma.

₁Na a bigin fu a yari ini a ten pe den kownu gwenti fu go na feti, Yoab hari gwe nanga a legre fu en na den Amonitisma. A broko a kondre èn a kiri wan lo fu den Amonitisma. Baka dati a hari go na Rabba dan a lontu a foto fu alasei. David ben tan na baka ini Yerusalem. Di Yoab teki Rabba abra èn a broko a foto, ₂David puru a kroon tapu a ede fu a kownu fu den. A kroon ben meki fu dritenti kilo gowtu èn wan diri ston ben fasi na ini. Dan den poti a kroon tapu a ede fu David. David teki bun furu sani fu a foto tyari gwe tu. ₃A meki den srudati fu en tyari den sma go na dorosei fu a foto èn koti den pisipisi nanga sa èn nanga beiri. A du a srefi sani nanga ala den tra foto fu den Amonitisma. Baka dati David drai go na Yerusalem nanga a heri legre.

₄No langa na baka wan feti ben broko baka nanga den Filistijnsrudati na Geser. Ma Sibekai fu a foto Husa, kiri Sipai, wan bakapikin fu den Refaitisma èn den Filistijnsrudati ben abi fu gi densrefi abra. ₅Wan tra leisi wan feti ben broko baka nanga den Filistijnsrudati. Dan Elkanan, a manpikin fu Yair, kiri Lakmi, wan brada fu Goliat fu a foto Gat. A tiki fu a lansri fu a man dati ben deki leki wan pikin postu. ₆Baka dati wan feti broko na Gat. Wan Refaitiman ben drape di ben bigi srefsrefi. A ben abi siksi finga na ibri anu nanga siksi futufinga na ibri futu. Ala nanga ala, a ben abi tutenti-na-fo finga na en anu nanga futu. ₇A man disi ben e afrontu Israel, ma Yonatan, a manpikin fu David brada Sima, kiri en. ₈Ala den man disi di David nanga den srudati fu en kiri ben de Refaitisma fu Gat.

₁Didibri ben wan poti Israel na ini problema, dat' meki a meki David teri den Israelitisma. ₂Dan David taigi Yoab nanga den fesiman fu a pipel taki: “Un go teri den Israelitisma, fu a foto Berseba go te na Dan, dan un kon taigi mi omeni sma de. Mi wani sabi o bigi a folku de.” ₃Ne Yoab piki en taki: “Mi kownu, mi e winsi tak' MASRA, sa meki a folku kon wan hondro tron moro bigi leki san a de now. Ma awinsi A du dati, masra mi kownu, den alamala e tan knekti fu yu. Dan fu sanede yu wani du a sani disi? Fu sanede yu wani fu Israel sondu?” ₄Ma san kownu ben komanderi ben e wegi moro leki san Yoab ben e taki. So Yoab gwe dan a waka ini heri Israel. Di a kba, a drai go baka na Yerusalem. ₅Dan a go piki David omeni sma a teri: Israel ben abi wan milyun nanga wan hondro dusun mansma di ben o man feti nanga deigri, èn Yuda ben abi fo hondro seibitenti dusun. ₆Yoab no ben teri den lo fu Lefi nanga Benyamin, bika a sani di kownu ben komanderi en, ben de wan groskin sani gi en.

₇Gado ben si a sani di psa leki wan ogri, dat' meki A strafu Israel. ₈Dan David taigi Gado taki: “Mi sondu hebi nanga a sani di mi du. Mi e begi Yu tangitangi fu Yu gi Yu knekti pardon fu a sondu disi. Na wan tumsi don sani mi du” ₉Dan MASRA taki nanga Gad, a man di A ben e sori sani gi David. ₁₀A taigi en taki: “Go na David, dan yu e taigi en taki: ‘Na disi MASRA e taki: Mi o strafu yu nanga wan fu den dri strafu disi. Teki wan fu den.’ ” ₁₁Gad go na David, dan a taigi en taki: “Na disi MASRA e taki: yu mus teki wan fu den dri strafu disi: ₁₂dri yari angriten sa de, dri mun langa yu sa abi fu lon gi feyanti, noso dri dei pe a owru fu MASRA e rigeri ini a kondre: dati o de wan takru siki di o de ini a kondre, a engel fu MASRA o kiri sma alasei ini a kondre. Prakseri bun, dan yu taigi mi san mi mus piki a Wan di seni mi.” ₁₃Dan David piki Gad taki: “Mi no sabi kwet'kweti san mi mus du! Ma a moro betre wi fadon ini MASRA anu, bika A sari-ati fu En bigi. Ma no meki mi fadon ini anu fu libisma.”

₁₄Ne MASRA meki wan takru siki broko ini Israel di kiri seibitenti dusun Israelitisma. ₁₅Gado seni a engel fu En go na Yerusalem tu fu tyari dede drape. Ma di MASRA si a pori di a engel ben e tyari, A sari den sma. Ne A taigi a engel di ben e tyari dede gi den sma taki: “A sari! Saka yu anu.” A engel ben tnapu a momenti dati na a presi fu a Yebusitiman Ornan, pe a e masi a graan puru na a buba. ₁₆Di David opo en ede luku, a si a engel fu MASRA di ben tnapu na loktu, mindri heimel nanga grontapu. A ben hori wan deigri ini en anu èn a ben langa a anu dati go na Yerusalem. Ne David nanga den fesiman fu a pipel trowe densrefi na gron nanga lowkrosi. ₁₇Dan David taigi Gado taki: “Na mi ben wani fu teri a pipel. Iya, na mi sondu. Na mi meki a bigi fowtu dati. Ma den pôti skapu, den no du noti. MASRA, mi Gado, mi e begi Yu fu Yu strafu mi nanga mi famiri, ma no strafu a pipel.”

₁₈Dan a engel fu MASRA komanderi Gad fu taigi David tak' a ben mus go na a gron pe a Yebusitiman Ornan e masi buba puru na a graan. A ben mus go meki wan altari gi MASRA drape. ₁₉David go, soleki fa Gad ben taigi en ini a nen fu MASRA. ₂₀Ornan, di ben e masi tarwe, si a engel di a opo en ede. Den fo boi fu en, di ben de na en, lon go kibri. ₂₁Leki fa Ornan si David, di ben e kon na en, a waka kmoto fu a presi pe a ben e masi a tarwe, go na en. Dan a boigi dipi gi en. ₂₂David taigi Ornan taki: “Seri a gron disi, pe yu e masi graan, gi mi. Mi wani meki wan altari gi MASRA fu wan kba kan kon na a ogri di e miti a pipel. Mi o pai yu san yu o aksi fu en.” ₂₃Ma Ornan piki David taki: “MASRA, mi kownu, yu kan teki en. Du san bun na ini yu ai. Yere, mi e gi yu den kaw, di yu kan bron leki ofrandi. A udu di den kaw e hari fu masi a tarwe, yu kan teki fu meki a faya. A tarwe fu mi yu kan teki fu tyari wan graan-ofrandi. Ala sani mi e gi yu.” ₂₄Ma kownu David taigi Ornan taki: “Nono, mi wani pai yu ala san yu ben o aksi fu den. Mi no wani gi san na fu yu na MASRA, èn mi no wani bron meti leki ofrandi di mi kisi fu soso.” ₂₅So David kon pai Ornan siksi hondro gowtu moni fu a pisi gron. ₂₆Dan David meki wan altari gi MASRA drape, a bron meti leki ofrandi èn a tyari freide-ofrandi tu. A begi MASRA dan MASRA piki en nanga faya fu heimel di bron a meti tapu a altari. ₂₇Baka dati MASRA komanderi a engel fu a sutu a deigri baka ini a kokro na en seibere.

₂₈Di David si tak' MASRA piki en drape, na a gron di ben de fu a Yebusitiman Ornan, a tyari moro ofrandi drape. ₂₉A santa tenti fu MASRA, di Moses ben meki ini a dreisabana, nanga a altari tapu san meti ben e bron leki ofrandi, ben de a ten dati na a presi pe den ben tyari ofrandi na Gibeon. ₃₀Ma David no ben abi a dek'ati fu go fesi Gado drape, fu di a ben frede fu a deigri fu a engel fu MASRA di a ben si.

₁₂Wan tra leisi Yesus taigi den sma taki: “Mi na a faya fu grontapu. A sma di e waka na Mi baka, no sa waka ini dungru noiti moro, ma a sa abi a faya di e gi libi.” ₁₃Dan den Fariseiman taigi En taki: “Yu e taki gi Yusrefi. A sani san Yu taki no abi warti.” ₁₄Yesus piki den taki: “Awinsi Mi e taki gi Misrefi, a abi warti, bika Mi sabi pe Mi kmopo èn pe Mi o go. Ma un dati no sabi pe Mi kmopo noso pe Mi o go. ₁₅Un e krutu libisma fasi. Ma Mi no e krutu no wan sma. ₁₆Ma efu Mi e krutu wan sma, dan Mi e krutu tapu wan leti fasi. Bika Mi no de Mi wawan, ma a P'pa di seni Mi kon de nanga Mi. ₁₇Na ini un eigi wèt a skrifi taki: Efu tu sma e kotoigi fu wan sani, dan a sani tru. ₁₈Mi e taki gi Misrefi, èn Mi P'pa di seni Mi kon, e taki fu Mi tu.” ₁₉Dan den aksi En taki: “Pe Yu P'pa de?” Yesus piki den taki: “Un no sabi Mi èn un no sabi Mi P'pa. Efu un ben sabi Mi, dan un ben o sabi Mi P'pa tu.” ₂₀Yesus taki den sani disi di A ben e gi den sma leri ini a tempel pe a kisi de pe yu mus poti moni. Ma no wan sma no grabu En, bika En yuru no ben doro ete.

₂₁Dan Yesus bigin taki baka nanga den sma. A taigi den taki: “Mi e gwe èn un o suku Mi. Un o dede sondro fu un kisi pardon fu un sondu. Pe Mi e go, un no man kon.” ₂₂A sani disi meki den Dyusma taki: “Fu sanede A taki: ‘Pe Mi e go, un no man kon?’ Na kiri A o kiri Ensrefi?” ₂₃Ma Yesus taigi den taki: “Unu na fu dya, ma Mi na fu loktu. Unu na fu a grontapu disi, ma Mi a no fu a grontapu disi. ₂₄Mi taigi un kba tak' un o dede sondro fu un kisi pardon fu un sondu. Bika efu un no e bribi taki Mi de suma Mi de, dan un o dede ini un sondu.” ₂₅Dan den aksi En taki: “Suma na Yu dan?” Yesus piki den taki: “Na dati Mi taigi unu someni langa kba. ₂₆Mi abi furu sani san Mi kan taki fu unu, nanga furu sani fu san Mi kan krutu unu. A Wan di seni Mi kon, na a Trutru Wan. Èn san Mi yere fu En, na dati Mi e taigi den sma na grontapu.” ₂₇Ma den no ben ferstan taki Yesus ben e taki nanga den fu a P'pa. ₂₈Dan Yesus taigi den taki: “Baka te un opo a Manpikin fu Libisma na loktu, dan un o si taki na Mi. Dan un o si taki Mi no e du noti fu Misrefi, ma tak' Mi e taki soso san Mi P'pa leri Mi. ₂₉A Wan di seni Mi kon de nanga Mi. A no libi Mi wawan, bika Mi e tan du san A lobi.”

₃₀Di Yesus taki den sani disi, furu sma bigin bribi ini En.