Dag 145 van 365- 1 Kronieken 25-27 en Johannes 9:1-23

₁Dan David nanga den man di ben de frantwortu fu a wroko ini tempel poti en so taki den bakapikin fu Asaf, Heman nanga Yedutun no ben abi fu du aladei wroko. Den man dati ben o taki san Gado ben gi den fu taki, te citer, harp nanga cimbaal ben o prei. Den man di ben o du a wroko dati ben de: ₂den manpikin fu Asaf: Sakur, Yosef, Netanya nanga Asarela. Asaf ben e tiri den èn na kownu srefi ben poti Asaf fu taki san Gado ben e gi en fu taki. ₃Den manpikin fu Yedutun: den ben de nanga siksi, Gedalya, Seri, Yesaya, Hasabya, Matitya nanga Simi. Den p'pa Yedutun ben e tiri den. Te a citer ben e prei, Yedutun ben e prijse MASRA èn gi En grani èn a ben e taki san Gado ben e gi en fu taki. ₄Den manpikin fu Heman: Bukiahu, Matanya, Usiyel, Sebuel, Yerimot, Hananya, Hanani, Eliata, Gidalti, Romamti-Eser, Yosbekasa, Maloti, Hotir nanga Makasiot. ₅Den alamala ben de manpikin fu Heman, a man di Gado ben e sori sani gi kownu. Heman ben man taigi kownu san den sani di Gado ben sori en ben wani taki èn a ben e du en tapu wan krakti fasi. Gado ben gi Heman tin-na-fo manpikin nanga dri umapikin. ₆Ala den man disi ben e meki poku nanga cimbaal, harp nanga citer te Asaf, Yedutun nanga Heman, den p'pa fu den, ben e singi ini a oso fu MASRA. Den ben e du en leki fa kownu David ben taigi den fu du en. ₇Makandra nanga den tra famiri fu den, di ben kisi leri fu singi gi MASRA, a grupu fu den alamala di ben kba teki leri, ben de tu hondro aititenti-na-aiti.

₈Den meki a lot sori oten sortu grupu ben o wroko. Den du dati sondro fu luku efu yu ben yongu noso owru, èn efu yu ben kba teki leri noso efu yu ben e teki leri ete. ₉A fosi lot sori Yosef fu a famiri fu Asaf. A di fu tu sori Gedalya, den manpikin nanga den famiri fu en ben de twarfu sma. ₁₀A di fu dri sori Sakur. Den manpikin nanga den famiri fu en ben de twarfu sma. ₁₁A di fu fo sori Yisri. Den manpikin nanga den famiri fu en ben de twarfu sma. ₁₂A di fu feifi sori Netanya. Den manpikin nanga den famiri fu en ben de twarfu sma. ₁₃A di fu siksi sori Bukiahu. Den manpikin nanga den famiri fu en ben de twarfu sma. ₁₄A di fu seibi sori Yesarela. Den manpikin nanga den famiri fu en ben de twarfu sma. ₁₅A di fu aiti sori Yesaya. Den manpikin nanga den famiri fu en ben de twarfu sma. ₁₆A di fu neigi sori Matanya. Den manpikin nanga den famiri fu en ben de twarfu sma. ₁₇A di fu tin sori Simi. Den manpikin nanga den famiri fu en ben de twarfu sma. ₁₈A di fu erfu sori Asarel. Den manpikin nanga den famiri fu en ben de twarfu sma. ₁₉A di fu twarfu sori Hasabya. Den manpikin nanga den famiri fu en ben de twarfu sma. ₂₀A di fu tin-na-dri sori Subael. Den manpikin nanga den famiri fu en ben de twarfu sma. ₂₁A di fu tin-na-fo sori Matitya. Den manpikin nanga den famiri fu en ben de twarfu sma. ₂₂A di fu tin-na-feifi sori Yeremot. Den manpikin nanga den famiri fu en ben de twarfu sma. ₂₃A di fu tin-na-siksi sori Hananya. Den manpikin nanga den famiri fu en ben de twarfu sma. ₂₄A di fu tin-na-seibi sori Yosbekasa. Den manpikin nanga den famiri fu en ben de twarfu sma. ₂₅A di fu tin-na-aiti sori Hanani. Den manpikin nanga den famiri fu en ben de twarfu sma. ₂₆A di fu tin-na-neigi sori Maloti. Den manpikin nanga den famiri fu en ben de twarfu sma. ₂₇A di fu tutenti sori Eliata. Den manpikin nanga den famiri fu en ben de twarfu sma. ₂₈A di fu tutenti-na-wan sori Hotir. Den manpikin nanga den famiri fu en ben de twarfu sma. ₂₉A di fu tutenti-na-tu sori Gidalti. Den manpikin nanga den famiri fu en ben de twarfu sma. ₃₀A di fu tutenti-na-dri sori Makasiot. Den manpikin nanga den famiri fu en ben de twarfu sma. ₃₁A di fu tutenti-na-fo sori Romamti-Eser. Den manpikin nanga den famiri fu en ben de twarfu sma.

Fu den Korakitisma: Meselemya, a manpikin fu Kore, wan bakapikin fu Asaf. ₂Den manpikin fu Meselemya ben de: Sekarya, a fosi manpikin. A di fu tu ben de Yediael, a di fu dri ben de Sebadya, a di fu fo Yatniyel, ₃a di fu feifi Elam, a di fu siksi Yokanan nanga Elyoenai a di fu seibi. ₄Den manpikin fu Obed-Edom ben de: Semaya, a fosi manpikin. A di fu tu ben de Yosabad, a di fu dri ben de Yoa, a di fu fo ben de Sakar, a di fu feifi ben de Netanel, ₅a di fu siksi ben de Amiyel, a di fu seibi ben de Isakar nanga a di fu aiti Pehuletai. Gado ben blesi a man disi. ₆Den manpikin fu Semaya, a fosi manpikin fu Obed-Edom, ben de edeman fu den famiri bika den ben de dyadya fetiman. ₇Den manpikin fu Semaya ben de: Otni, Refael, Obed, Elsabad. Elihu nanga Semakyahu, famiri fu den, ben de dyadya man tu. ₈Ala den man disi ben de bakapikin fu Obed-Edom: den, den manpikin fu den nanga den famiri fu den. Den ben de dyadya man di ben sabi du den wroko bun. Den ben de nanga siksitenti-na-tu man fu a famiri fu Obed-Edom. ₉Den manpikin nanga den famiri fu Meselemya ben de tin-na-aiti. Den alamala ben dyadya man. ₁₀Fu Hosa, wan bakapikin fu Merari, den manpikin ben de: Simri, di no ben de a fosiwan, ma en p'pa ben poti en leki edeman. ₁₁A di fu tu ben de Hilkia, a di fu dri ben de Tebalyahu nanga Sekarya a di fu fo. Den manpikin nanga den famiri fu Hosa ben de tin-na-dri.

₁₂Den man di ben e hori wakti na den doro ben prati ini grupu di ben abi wan edeman èn leki den tra famiri fu den, den ben e du wroko tu na a oso fu MASRA. ₁₃Den ben e meki a lot sori sortu edeman ben mus go na sortu doro, sondro fu luku efu a ben de wan yonguwan noso wan owruwan. ₁₄Gi a doro na oostsei a lot sori Selemya. Di den fringi a lot gi en manpikin Sekarya, a lot sori a doro na noordsei. Sekarya ben de wan koni man di ben e gi bun rai. ₁₅Obed-Edom kisi a Zuidpoort, den manpikin fu en kisi den kamra pe den priester ben e kibri sani. ₁₆Gi Supim nanga Hosa a lot sori a Westpoort nanga a Saleketpoort na a kba pisi fu a strati di e waka go na loktu. Ala den wakti ben mus koti so: ₁₇aladei siksi Lefitiman na oostsei, fo na noordsei, fo na zuidsei èn ala leisi na tu waktiman ben mus tnapu na den kamra pe den priester ben e kibri sani. ₁₈Na a westsei fo waktiman ben mus de na strati pe a gadri de, nanga tu na a gadri srefi. ₁₉Disi ben de den grupu fu den bakapikin fu Korak nanga Merari di ben e hori wakti na den doro.

₂₀Tra Lefitiman ben kisi a frantwortu fu hori wakti na den kamra fu a oso fu Gado pe den gudu ben e tan, nanga na den kamra pe den gudu ben e tan di sma ben poti aparti na wan sei gi Gado. ₂₁Dati ben de den manpikin fu Ladan, wan bakapikin fu Gerson. A edeman fu den famiri fu Ladan, wan bakapikin fu Gerson ben de Yekiyeli. ₂₂Setam nanga en brada Yowel, den manpikin fu Yekiyeli, ben abi a frantwortu gi den gudu fu a oso fu MASRA.

₂₃Fu den bakapikin fu Amram, Yishar, Hebron nanga Usiyel, ₂₄Sebuel, wan bakapikin fu Gerson, a manpikin fu Moses, ben de edeman fu den waktiman di ben e luku den gudu. ₂₅Den famiri fu en fu a sei fu Eliyeser ben de: Rekabya, a manpikin fu Eliyeser. Rekabya ben de a p'pa fu Yesaya, Yesaya ben de a p'pa fu Yoram, Yoram ben de a p'pa fu Sikri èn Sikri ben de a p'pa fu Selomit. ₂₆Na a Selomit disi nanga den famiri fu en, kisi a frantwortu fu den kamra nanga gudu di ben poti aparti na wan sei gi Gado. Na kownu David, den edeman fu den famiri, den edeman fu wan dusun srudati, den edeman fu wan hondro srudati, nanga tra legre edeman ben poti den gudu dati na wan sei gi Gado. ₂₇Den ben puru den sani disi fu den gudu di den ben teki fu den feyanti èn den ben poti den aparti fu te wan sani ben mus du na a oso fu MASRA. ₂₈Den gudu di furu trawan soleki: Samuel, a man di Gado ben e sori sani, Saul, a manpikin fu Kis, Abner, a manpikin fu Ner, nanga Yoab, a manpikin fu Seruya, ben gi na MASRA, ben kon ondro a frantwortu fu Selomit nanga en famiri.

₂₉Kenanya, wan bakapikin fu Yishar, nanga den manpikin fu en, ben tron fesiman nanga krutubakra, dorosei fu Yerusalem. ₃₀Hasabya nanga en famiri, wan dusun seibi hondro dyadya man di ben de bakapikin fu Hebron, ben abi a frantwortu abra Israel na a westsei fu a Yordanliba. Den ben e sorgu fu ala a wroko fu MASRA nanga di fu kownu. ₃₁Yeria ben de a edeman fu den bakapikin fu Hebron. Di kownu David ben de fotenti yari na makti, wan ondrosuku feni presi ini den famiri disi dan a kon na krin tak' ini a foto Yaser ini Gilead bun dyadya fetiman fu den ben e libi. ₃₂Den edeman fu den famiri fu Yeria ben de tu dusun seibi hondro dyadya man. David poti den ini den kontren fu den lo fu Ruben, Gad nanga afu fu a lo fu Manase, fu sorgu gi a wroko fu Gado nanga den tori fu kownu.

₁Disi na den Israelitisma di ben e seti legretori gi kownu: den edeman fu den famiri, den edeman fu wan dusun srudati, den edeman fu wan hondro srudati, makandra nanga den ofisiri fu den. Ala mun fu a yari wan tra grupu ben mus kon na wroko. Iniwan grupu ben e teri tutenti-na-fo dusun srudati. ₂A edeman fu a fosi grupu, fu a fosi mun, ben de Yasobam, a manpikin fu Sabdiyel. A grupu fu en ben e teri tutenti-na-fo dusun srudati. ₃Yasobam ben de wan bakapikin fu Peres. Na en ben de a edeman fu ala den tra legre-edeman fu a fosi mun. ₄A edeman fu a grupu fu a di fu tu mun, ben de Dodai, wan bakapikin fu Akoki. A grupu fu en ben e teri tutenti-na-fo dusun srudati èn na Miklot ben e tiri a grupu fu en. ₅A edeman fu a di fu dri grupu, fu a di fu dri mun, ben de Benaya, a manpikin fu granpriester Yoyada. A grupu fu en ben e teri tutenti-na-fo dusun srudati. ₆Benaya ben de wan fu den dritenti dyadya fetiman. Di a tron a edeman fu den, en manpikin, Amisabad, tron fesiman fu a grupu fu en. ₇A edeman fu a di fu fo grupu, fu a di fu fo mun, ben de Asael, a brada fu Yoab. A grupu fu en ben e teri tutenti-na-fo dusun srudati. Di a dede, en manpikin Sebadya teki en presi. ₈A edeman fu a di fu feifi grupu, fu a di fu feifi mun, ben de a edeman Samhut, wan bakapikin fu Yisra. A grupu fu en ben e teri tutenti-na-fo dusun srudati. ₉A edeman fu a di fu siksi grupu, fu a di fu siksi mun, ben de Ira, a manpikin fu Ikes, fu Tekoa. A grupu fu en ben e teri tutenti-na-fo dusun srudati. ₁₀A edeman fu a di fu seibi grupu, fu a di fu seibi mun, ben de Heles, wan bakapikin fu Efraim, fu Pelon. A grupu fu en ben e teri tutenti-na-fo dusun srudati. ₁₁A edeman fu a di fu aiti grupu, fu a di fu aiti mun, ben de Sibekai fu Husa. A ben de fu a famiri Serak. A grupu fu en ben e teri tutenti-na-fo dusun srudati. ₁₂A edeman fu a di fu neigi grupu, fu a di fu neigi mun, ben de Abiyeser fu Anatot. A ben de wan bakapikin fu Benyamin. A grupu fu en ben e teri tutenti-na-fo dusun srudati. ₁₃A edeman fu a di fu tin grupu, gi a di fu tin mun, ben de Maharai fu Netofa. A ben de fu a famiri Serak. A grupu fu en ben e teri tutenti-na-fo dusun srudati. ₁₄A edeman fu a di fu erfu grupu, gi a di fu erfu mun, ben de Benaya fu Piraton. A ben de wan bakapikin fu Efraim. A grupu fu en ben e teri tutenti-na-fo dusun srudati. ₁₅A edeman fu a di fu twarfu grupu, gi a di fu twarfu mun, ben de Heldai fu Netofa. A ben de wan bakapikin fu Otniyel. A grupu fu en ben e teri tutenti-na-fo dusun srudati.

₁₆Disi na den man di ben e tiri den lo fu Israel: a tiriman fu a lo fu Ruben ben de Eliyeser, a manpikin fu Sikri. A tiriman fu a lo fu Simeon ben de Sefatya, a manpikin fu Maaka. ₁₇A tiriman fu a lo fu Lefi ben de Hasabya, a manpikin fu Kemuel. A tiriman fu den bakapikin fu Aaron ben de Sadok. ₁₈A tiriman fu a lo fu Yuda ben de Elihu, wan fu den brada fu David. A tiriman fu a lo fu Isakar ben de Omri, a manpikin fu Mikael. ₁₉A tiriman fu a lo fu Sebulon ben de Yismaya, a manpikin fu Obadya. A tiriman fu a lo fu Naftali ben de Yerimot, a manpikin fu Asriyel. ₂₀A tiriman fu a lo fu Efraim ben de Hosea, a manpikin fu Asasyahu. A tiriman fu afu fu a lo fu Manase ben de Yowel, a manpikin fu Pedaya. ₂₁A tiriman fu afu fu a lo fu Manase di ben e libi na Gilead, ben de Yido, a manpikin fu Sekarya. A tiriman fu a lo fu Benyamin ben de Yaasiyel, a manpikin fu Abner. ₂₂A tiriman fu a lo fu Dan ben de Asarel, a manpikin fu Yerokam. Na den man disi ben de den edeman fu den lo fu Israel.

₂₃David no ben teri den sma di no ben doro tutenti yari, bika MASRA ben pramisi en taki A ben o meki den sma fu Israel kon furu leki den stari na heimel. ₂₄Yoab, a manpikin fu Seruya, ben bigin fu teri a pipel, ma a no ben go doro bika a sani dati ben tyari wan hebi strafu gi Israel. Dat' meki a no skrifi ini a buku fu a historia fu kownu David omeni sma ben de ini Israel.

₂₅Asmawet, a manpikin fu Adiyel, ben abi a frantwortu fu den maksin fu kownu. Yonatan, a manpikin fu Usia, ben abi a frantwortu fu den maksin ini den wei, ini den foto nanga den dorpu nanga fu den maksin di meki wan spesrutu tranga fasi. ₂₆Esri, a manpikin fu Kelub, ben abi a frantwortu fu den wrokoman fu den pranigron. ₂₇Simi, fu Rama, ben abi a frantwortu fu den droifidyari. Sabdi, fu Sefam, ben abi a frantwortu fu a win. ₂₈Baal-Hanan, fu Geder, ben abi a frantwortu fu den oleifbon nanga den moerbeifigabon ini a kontren na den bergifutu. Yoas ben abi a frantwortu fu den olimaksin. ₂₉Sitrai, fu Saron, ben abi a frantwortu fu den meti di den ben e wei na Saron. Safat, a manpikin fu Adlai, ben abi a frantwortu fu den meti di den ben e wei ini den dal. ₃₀Obil, fu Ismael, ben abi a frantwortu fu den kameel. Yekdeyahu, fu Meronot, ben abi a frantwortu fu den umaburiki. ₃₁Yasis, wan bakapikin fu Hagar, ben abi a frantwortu fu den skapu nanga den krabita. Ala den man disi ben abi a frantwortu fu den sani fu kownu David.

₃₂Yonatan, wan omu fu David, ben de raiman. A ben de wan man di ben srapu èn a ben de a sekretarsi tu. Yekiyel, a manpikin fu Hakmoni, ben abi a frantwortu fu kweki den manpikin fu kownu. ₃₃Akitofel ben de wan raiman fu kownu tu èn nanga Husai, a Arkitiman, kownu ben e taki ala en tori. ₃₄Di Akitofel dede, Yoyada, a manpikin fu Benaya, nanga Abyatar, teki en presi. Yoab ben de edeman fu a legre fu kownu.

₁Di Yesus ben e gwe moro fara, A si wan man di ben breni sensi a gebore. ₂Dan den man di ben e teki leri fu En aksi En taki: “Meister, fu sanede a man disi gebore so? Na fu di a sondu, noso fu di en m'ma nanga en p'pa sondu?” ₃Yesus piki den taki: “A no den sondu fu en, noso di fu en m'ma nanga en p'pa, meki a breni. Ma a sani disi psa fu sma kan si san Gado kan du gi en. ₄Solanga dei krin ete, wi mus du den wroko fu a Wan di seni Mi kon. Bika neti yuru e kon, dan no wan sma no o man wroko. ₅Solanga Mi de na grontapu, Mi na a faya fu grontapu.” ₆Baka di Yesus taki a sani disi, A spiti na gron, A meki tokotoko fu en, dan A lobi a tokotoko gi den ai fu a man. ₇Dan A taigi en taki: “Go wasi yusrefi ini a watra fu Siloam.” Siloam wani taki: Seni. Dan a man go wasi ensrefi. Di a e drai kon baka, a ben e si.

₈Den sma fu en birti, nanga trawan di ben sabi en leki wan begiman, aksi taki: “A no a man disi ben e sidon e begi moni?” ₉Sonwan fu den taki: “Na en.” Trawan taki: “No, ma a gersi en.” Ne a man srefi taki: “Na mi.” ₁₀Dan den aksi en taki: “Fa a du kon dan taki yu e si now?” ₁₁A piki den taki: “A man di den e kari Yesus, meki tokotoko lobi gi mi ai, dan A taigi mi fu go wasi misrefi ini a watra fu Siloam. So mi go wasi misrefi, dan mi ben kan si.” ₁₂Dan den sma aksi en taki: “Pe A de now?” A man piki taki: “Mi no sabi.”

₁₃Dan den tyari a man di ben breni go na den Fariseiman. ₁₄A ben de wan sabatdei dei di Yesus meki a tokotoko dresi a ai fu a man. ₁₅Dan den Fariseiman srefi aksi a man fa a du kon taki a kan si. A man taigi den taki: “Yesus lobi tokotoko gi mi ai. Dan mi go wasi misrefi, èn now mi kan si.” ₁₆Dan sonwan fu den Fariseiman taki: “A no Gado seni a man disi kon, bika A no e hori a sabatdei.” Ma trawan taki: “Fa wan sondusma kan du den marki disi?” A sani disi tyari prati kon na den mindri. ₁₇Dan den aksi a breniman baka taki: “San yu e taki fu En? Na yu ai A dresi!” A man piki den taki: “En na wan profeiti.”

₁₈Den fesiman fu den Dyusma no ben wani bribi taki a man ben breni, ma taki a e si now, te leki den seni kari en m'ma nanga en p'pa kon. ₁₉Den aksi den taki: “A man disi na yu manpikin? A tru taki a ben breni di a gebore? Fa a du kon taki a e si now?” ₂₀Den piki taki: “Wi sabi taki a man disi na wi manpikin èn tak' a ben breni sensi a gebore. ₂₁Ma fa a du kon tak' a e si now, wi no sabi. Èn wi no sabi tu suma dresi en ai fu a si. Aksi en, a bigi nofo fu taki gi ensrefi.” ₂₂A m'ma nanga a p'pa taki so fu di den ben e frede den fesiman fu den Dyusma. Bika den man dati ben meki mofo kba taki efu wan sma sa taki tak' Yesus na a Mesias, den ben o puru a sma dati ini a kerki. ₂₃Fu dat'ede a m'ma nanga a p'pa piki den taki: “A bigi nofo. Aksi en.”