Dag 149 van 365- 2 Kronieken 7- 9 en Johannes 11:1-31

₁Di Salomo kba begi, faya kmopo fu heimel èn bron den meti di den ben o bron leki ofrandi nanga den tra meti di den srakti leki ofrandi. Dan a glori fu MASRA furu a tempel. ₂Den priester no ben man go ini a oso fu MASRA, bika a glori fu MASRA ben furu a oso fu MASRA. ₃Di ala den Israelitisma si fa a faya nanga a glori fu MASRA saka kon tapu a oso, den kindi tapu a ston fu a dyari nanga den fesi go na gron. Dan den prijse MASRA taki: “MASRA bun, a bigi lobi fu En na fu têgo.”

₄Dan kownu nanga a heri pipel bron meti leki ofrandi gi MASRA. ₅Kownu Salomo srakti tutenti-na-tu dusun kaw nanga wan hondro nanga tutenti dusun skapu nanga krabita. Na so kownu nanga a heri pipel opo a oso fu Gado. ₆Dan den priester go tnapu na den presi. Den Lefitiman teki den presi tu nanga den instrumenti di kownu David ben meki spesrutu gi MASRA. Den ben e prijse MASRA nanga a singi: “A bigi lobi fu En na fu têgo”, leki fa den ben e du en di kownu David ben de na libi. Den priester di ben e bro den trompet, ben tnapu abrasei fu den, èn a heri pipel fu Israel ben opo tnapu. ₇Salomo santa a mindri pisi fu a pren di ben de fesi a oso fu MASRA. Drape den bron meti leki ofrandi nanga den fatu pisi fu den freide-ofrandi, bika a kopro altari ben pikin tumsi gi ala den ofrandi.

₈Na a fasi dati Salomo hori a fesa seibi dei langa makandra nanga ala den Israelitisma, wan bigi grupu di ben kmoto fu a pasi di e go na Hamat te go miti a kriki di e stotu na Egipte. ₉Den ben hori wan fesa seibi dei langa di den ben e krin a altari èn meki en klari fu tyari ofrandi na en tapu. Tapu a di fu aiti dei, den ben abi wan konmakandra di den hori leki wan fesa. Baka dati den hori wan fesi baka fu seibi dei, pe den ben e memre taki den ben libi wan pisten na ini kampu. ₁₀Dan tapu a tutenti-na-dri dei fu a di fu seibi mun, kownu seni den sma go na den oso baka. Den drai gwe nanga prisiri na ini den ati fu a bun di MASRA du gi David, gi Salomo nanga gi En pipel Israel.

₁₁Di Salomo ben kba bow a oso fu MASRA, a kownu-oso nanga ala den tra sani di a ben wani meki ini a oso fu MASRA nanga en eigi oso, ₁₂MASRA sori Ensrefi na Salomo wan neti. A taigi Salomo taki: “Mi yere a begi fu Yu èn Mi teki a oso disi leki a presi pe sma kan tyari ofrandi gi Mi. ₁₃Te Mi hori a alen fu a no fadon, te Mi komanderi sprenka fu pori ala san prani ini a kondre, noso meki takrusiki panya mindri a pipel, ₁₄èn a pipel fu Mi di e tyari a nen fu Mi, saka ensrefi èn den begi èn suku Mi èn tapu nanga den ogridu, Mi sa yere ini heimel. Mi sa gi den pardon fu den sondu èn meki sani go bun baka ini den kondre. ₁₅Now Mi o luku èn Mi o arki na den begi di sa begi dyaso. ₁₆Now Mi teki a oso disi èn Mi poti en leki wan spesrutu presi pe sma kan anbegi Mi fu têgo. Noiti Mi sa puru Mi ai na en tapu èn Mi ati sa opo gi ala san o psa drape. ₁₇Efu yu dini Mi tapu wan tru fasi leki yu p'pa David èn du ala sani san Mi komanderi yu fu du, efu yu du den sani di yu mus tan du èn yu hori yusrefi na den sani na san yu mus tan hori yusrefi, ₁₈dan Mi sa meki tak' na soso den pikin nanga den bakapikin fu yu sa de kownu fu Israel. Mi ben pramisi yu p'pa David taki na den pikin nanga bakapikin fu en ben o sidon tapu a kownusturu fu Israel. ₁₉Ma efu yu sa drai yu baka gi Mi, efu yu no hori yusrefi na den sani di yu mus tan du èn na den sani na san yu mus tan hori yusrefi èn yu go dini tra gado èn boigi gi den, ₂₀dan Mi sa puru a pipel fu Israel nanga tranga fu a kondre fu Mi di Mi gi den. Mi sa puru a oso na Mi tapu di Mi ben poti fu sma kan anbegi Mi. Ala den tra folku sa koti odo gi en èn meki spotu fu en. ₂₁Ala sma di sa waka psa na a tempel disi, di ben abi so wan bigi nen, sa tnapu nanga opo mofo èn aksi ferwondru taki: Fu sanede MASRA du so nanga a kondre èn nanga a oso disi? ₂₂Dan sma sa piki den taki: ‘Na fu di den gwe libi MASRA, a Gado fu den afo fu den, di ben puru den na Egipte. Den go poti den fertrow na tapu tra gado èn den go anbegi èn dini den. Na dat' meki MASRA meki a bigi ogri disi miti den.’ ”

₁Tutenti yari Salomo ben abi fanowdu fu meki a oso fu MASRA nanga a eigi oso fu en. ₂Baka dati a go bow den foto di kownu Huram ben gi en moro tranga dan a poti Israelitisma fu libi drape. ₃Salomo hari go na Hamat-Soba èn a teki en abra. ₄Baka dati a go bow Tadmor di ben de ini a bigi dreisabana, moro tranga, nanga ala den foto di a ben bow ini Hamat fu kibri nyanyan. ₅A bow den foto Hei-Bet-Horon nanga Lagi-Bet-Horon kon moro tranga tu. Den ben kon tron bun tranga foto di ben abi skotu, bigi doro nanga greni. ₆Salomo bow Baalat nanga ala den tra foto pe nyanyan ben e kibri, pe den fetiwagi nanga en asi ben e tan, kon moro tranga tu. Salomo bow ala san a ben wani, ini Yerusalem, tapu a Libanon nanga ini a heri kondre di a ben e tiri.

₇Fu den folku di no ben de Israelitisma: den Amoritisma, den Hetitisma, den Perisitisma, den Hiwitisma nanga den Yebusitisma, ₈ala den bakapikin fu den, di den Israelitisma no ben kiri, Salomo poti fu wroko fu soso leki srafu gi en te leki a dei fu tide. ₉Ma Salomo no meki no wan Israelitisma wroko leki srafu gi en. Den Israelitisma ben de srudati, edeman fu den waktiman fu kownu, edeman fu den fetiwagi nanga edeman fu den man di ben e tyari den asi fu kownu. ₁₀Kownu Salomo poti tu hondro feifitenti edeman fu luku den wrokoman fu en.

₁₁Dan Salomo meki a umapikin fu Farao froisi kmopo fu a foto fu David go na a kownu-oso di a meki gi en. Bika a taki: “No wan uma fu mi no kan libi ini a oso fu David, a kownu fu Israel, bika den presi pe a santa kisi fu MASRA kon, na santa presi.”

₁₂Dan Salomo bron meti leki ofrandi gi MASRA tapu a altari di a ben bow fesi a fes'sei gadri fu a tempel. ₁₃Drape a ben e tyari den ofrandi di ben mus bron ala dei, den ofrandi fu a sabat, fu den nyunmunfesa nanga gi den fesa di ben e hori dri leisi wan yari: a fesa pe den e nyan brede di meki sondro dyesi, a fesa fu den wiki nanga a fesa fu memre taki den ben e tan wan pisten ini kampu. Moses ben poti fa den ofrandi disi ben mus tyari. ₁₄Salomo seti a wroko fu den grupu fu den priester tu nanga di den Lefitiman di ben mus singi èn yepi den priester, soleki fa en p'pa David ben taki tak' a mus du ala dei. A seti a wroko tu fu den grupu fu den man di ben e hori wakti na den doro, sortu grupu ben o hori wakti na sortu doro, bika na so David, a man fu Gado ben komanderi taki a mus du. ₁₅Den hori den fin'fini na san kownu ben komanderi, gi den priester, gi den Lefitiman, nanga gi den sma di ben abi a frantwortu fu den gudu fu a tempel. ₁₆Kownu Salomo tyari a bow kon na wan bun kba, fu a dei di den diki a fundamenti fu a oso fu MASRA, te kon miti a dei di a kba.

₁₇Baka dati Salomo go na Esyon-Geber nanga Elot, na a syoro fu Edom. ₁₈Dan kownu Huram seni knekti fu en go na Salomo nanga sipi nanga man di ben sabi a se bun. Makandra nanga den knekti fu Salomo den hari go na Ofir, pe den go teki tin-na-feifi dusun kilo gowtu tyari kon gi Salomo.

₁A uma di ben de kownu fu Seba, ben yere fu a bigi nen di Salomo ben abi. Dat' meki a go na Yerusalem fu tesi Salomo nanga aksi di no ben makriki fu piki. A go drape nanga bun furu sma nanga kameel di ben e syow spesrei, bun furu gowtu nanga diriston. Di a doro na Salomo, a aksi en ala sani di ben de tapu en ati. ₂Salomo piki en tapu ala den aksi fu en. Ala den dipidipi sani a ben tyari kon na krin gi en. ₃Di a kownu fu Seba si fa Salomo koni, di a si a kownu-oso tu di a bow, ₄a nyanyan di ben de tapu tafra, a fasi fa den wrokoman fu en ben e sidon na tafra, a fasi fa den sma di ben e sorgu gi a nyanyan ben tnapu èn fa den ben e weri, den man di ben e kanti win gi kownu nanga a fasi fa den ben weri nanga den meti di Salomo ben e bron leki ofrandi ini a oso fu MASRA, a fruwondru srefsrefi. ₅Dat' meki a taigi kownu taki: “Den sani tru di mi yere ini mi kondre fu yu nanga a fasi fa yu koni. ₆Mi no ben e bribi te leki mi kon dyaso èn si nanga mi eigi ai. Ma den no ben ferteri mi afu srefi fu san mi si. A koni nanga a gudu fu yu no de fu marki nanga den tori di mi yere fu yu. ₇Den sma di yu e tiri, den knekti fu yu di e dini yu èn di e yere den koni sani di yu e taki, na blesi sma. ₈Mi e prijse MASRA, a Gado fu yu, di abi sowan prisiri nanga yu tak' A poti yu tapu a kownusturu, leki kownu fu MASRA, yu Gado. Na fu di Gado lobi Israel èn A wani fu a tan fu têgo, meki a poti yu leki kownu fu tiri a kondre tapu wan bun èn leti fasi.”

₉Dan a gi Salomo dritenti-na-siksi hondro kilo gowtu nanga bun furu switismeri sani nanga diriston. Noiti moro so bun spesrei, leki san a kownu fu Seba ben gi kownu Salomo ben de fu feni ini Israel. ₁₀Boiti dati, den knekti fu Huram nanga Salomo di ben e go teki gowtu na Ofir, ben tyari sandel-udu nanga diriston kon tu. ₁₁Nanga a sandel-udu kownu meki trapu gi a oso fu MASRA nanga gi a kownu-oso fu en. A meki citer nanga harp tu gi den singiman. Noiti bifo so wan sani ben de fu si ini Yuda. ₁₂Kownu Salomo gi a kownu fu Seba ala san ben e angri fu abi nanga san a ben aksi. Salomo gi en moro dan san a ben tyari kon gi en. Baka dati a kownu nanga den knekti fu en drai go baka na a kondre fu den.

₁₃A gowtu di Salomo ben e kisi ala yari, ben de tutenti dusun kilo, ₁₄boiti san den bai nanga seriman ben e tyari kon. Ala den kownu fu Arabia nanga den man di kownu ben poti fu tiri den foto, ben e tyari gowtu nanga solfru kon gi Salomo tu.

₁₅Kownu Salomo meki tu hondro bigi schild fu fini gowtu. Ibri schild ben meki fu siksi kilo gowtu. ₁₆A meki dri hondro pikin schild tu fu fini gowtu. Ibriwan fu den ben meki fu wan nanga afu kilo gowtu. Dan kownu poti den ini a oso: Busi fu Libanon. ₁₇Moro fara kownu meki wan bigi kownusturu fu ivoor. Dan a poti lala gowtu na en tapu. ₁₈A kownusturu ben abi siksi tree nanga wan futubangi fu gowtu di ben fasi na a kownusturu. A sturu ben abi tu pisi fu poti yu anu èn sei iniwan fu den pisi fu poti yu anu wan lew ben tnapu. ₁₉Twarfu lew ben tnapu tapu den tree fu a trapu, siksi na a wan sei nanga siksi na a tra sei. Noiti ete sowan kownusturu ben meki ini wan kondre. ₂₀Ala den sani fu dringi fu kownu Salomo ben de fu gowtu. Ala den tra kukru sani fu a oso: Busi fu Libanon ben de fu lala gowtu. Solfru no ben abi warti ini a ten fu Salomo. ₂₁Kownu ben abi sipi di ben e go nanga den knekti fu Huram na Tarsis. Wan leisi na ini dri yari den sipi dati ben e drai kon fu Tarsis nanga gowtu, solfru, ivoor, yapyapi nanga prodokaka.

₂₂No wan kownu fu grontapu ben gudu noso koni moro kownu Salomo. ₂₃Ala den kownu fu grontapu ben e kon na Salomo fu arki a koni di Gado ben gi en. ₂₄Iniwan fu den ben e kon nanga kado: solfru nanga gowtu sani, krosi, fetisani, spesrei, asi nanga buriki. Na so a ben e go ala yari.

₂₅Salomo ben abi fo dusun presi fu poti den asi nanga den fetiwagi fu en. A ben abi twarfu dusun man di ben e tyari den wagi. Dan a poti afu fu den ini den foto di ben meki spesrutu fu poti den wagi, a tra afu ben de na en ini Yerusalem.

₂₆Ala den kownu fu a Eufratliba te go miti a kondre fu den Filistijnsma nanga Egipte ben saka densrefi gi Salomo. ₂₇Kownu ben meki tu taki solfru ben furu leki ston na ini Yerusalem. Sedre-udu ben lai tu leki den figabon di e gro bogobogo ini den kontren na den bergifutu. ₂₈Den asi fu Salomo ben e kmoto fu Egipte nanga ala tra kondre.

₂₉Den tra sani di psa ini a libi fu Salomo, fu a bigin go te na a kba, skrifi poti ini a buku fu a historia fu a profeiti Natan. Akia fu Silo taki tu fu den ini den sani di Gado ben gi en fu taki èn Yedo, a man di Gado ben e sori sani, taki fu den di Gado ben e sori en sani fu Yerobeam, a manpikin fu Nebat. ₃₀Ini Yerusalem, Salomo tiri heri Israel fotenti yari langa. ₃₁Baka dati a dede èn den beri en ini a foto fu en p'pa David. En manpikin Rekabeam teki en presi leki kownu.

₁Wan man Lasarus ben e siki. A ben de fu a dorpu Betania, pe Maria nanga en sisa Marta ben e libi. ₂A Maria disi na a uma di ben kanti a switismeri-oli tapu Yesus, dan a drei den futu fu En nanga en edewiwiri. Na en brada Lasarus ben e siki. ₃So den tu s'sa seni boskopu gi Yesus taki: “Masra, a wan di Yu lobi so, e siki.” ₄Di Yesus kisi a boskopu, A taki: “Dede no sa de a kba fu a siki disi, ma a psa fu Gado nanga En Manpikin kisi grani.” ₅Yesus ben lobi Marta, nanga en s'sa, nanga Lasarus. ₆Ma di A yere taki Lasarus e siki, A tan ete tu dei na a presi pe A ben de. ₇Baka den tu dei, A taigi den man di ben e teki leri fu En taki: “Kon meki un drai go baka na Yudea.” ₈Ne den man di ben e teki leri fu En taki: “Ma Meister, a no langa di den Dyusma ben wani ston Yu kiri. Dan Yu wani drai go drape baka?” ₉Yesus piki den taki: “Twarfu yuru fu wan dei na deiten. Efu wan sma e waka deiten, a no e stotu en futu, bika a e si pe a e go. ₁₀Ma efu a e waka neti yuru, a e stotu en futu, bika ensrefi no abi faya.” ₁₁Baka di Yesus taki a sani disi, A taigi den moro fara taki: “Un mati Lasarus e sribi, ma Mi e go wiki en.” ₁₂Dan den man di ben e teki leri fu En taigi En taki: “Ma Masra, efu na sribi a e sribi, a o kon betre baka.” ₁₃San Yesus ben wani taki, na taki Lasarus dede. Ma den man di ben e teki leri fu En ben ferstan taki na sribi Lasarus e sribi. ₁₄Ne A taigi den krin taki: “Lasarus dede. ₁₅Ma Mi breiti gi unu taki Mi no ben drape, bika now a bribi fu unu kan kon moro tranga. Kon meki un go na en.” ₁₆Wan fu den man di ben e teki leri fu Yesus di ben nen Tomas, ma den ben e kari en Didimus tu, taigi den trawan taki: “Kon meki un go, dan un dede nanga En.”

₁₇Di Yesus doro, A kisi fu yere taki Lasarus ben beri fo dei kba. ₁₈Betania ben de krosbei fu Yerusalem, a no ben doro dri kilometer srefi. ₁₉Furu fu den Dyusma ben kon na Marta nanga Maria fu trowstu den fu di den lasi den brada. ₂₀Di Marta yere taki Yesus e kon, a waka go miti En. Ma Maria tan sidon na oso. ₂₁Dan Marta taigi Yesus taki: “Masra, efu Yu ben dya, mi brada no ben o dede. ₂₂Ma aladi a dede kba, mi sabi taki Gado o gi Yu ala san Yu e aksi En.” ₂₃Dan Yesus taigi en taki: “Yu brada o kon na libi baka.” ₂₄Marta piki taki: “Mi sabi taki a o kon na libi baka tapu a laste dei, te ala dedesma o opo baka.” ₂₅Yesus taki: “Na Mi e wiki dede èn na Mi e gi libi. A sma di e bribi na ini Mi sa libi, awinsi a dede. ₂₆Èn iniwan sma di e libi èn di e bribi na ini Mi, no sa dede noiti moro. Yu e bribi dati?” ₂₇Marta piki En taki: “Iya Masra, mi e bribi taki Yu na a Mesias, a Manpikin fu Gado di ben o kon na grontapu.”

₂₈Di Marta taki disi, a drai go kari en s'sa Maria, dan a taigi en safrisafri taki: “A Meister doro. A seni kari yu.” ₂₉Di Maria yere dati, a opo wantron go na Yesus. ₃₀Yesus no ben doro ini a dorpu ete. A ben tnapu ete pe Marta ben miti En. ₃₁Den Dyusma di ben de nanga Maria ini a oso fu trowstu en, si fa a opo es'esi go na dorosei, dan den waka go na en baka. Den ben prakseri taki na krei a e go krei na a grebi.