Dag 151 van 365- 2 Kronieken 13-14 en Johannes 12:1-26

₁Di Yerobeam ben de tin-na-aiti yari na makti, Abia tron kownu fu Yuda. ₂A ben de dri yari na makti ini Yerusalem. En m'ma ben nen Mikaya èn a ben de wan umapikin fu Uriyel fu Gibea.

Abia nanga Yerobeam ben e feti nanga makandra. ₃Abia hari go na a feti nanga wan legre fu fo hondro dusun dyadya fetiman. Yerobeam go miti en nanga wan legre fu aiti hondro dusun dyadya fetiman. ₄Abia go tnapu tapu a Semaraimbergi, ini a bergikontren fu Efraim, dan a taki: “Yerobeam, yu nanga heri Israel, un arki mi! ₅Na sabi un no sabi tak' nanga wan ferbontu di stampu nanga sowtu, MASRA, a Gado fu Israel, taki tak' David nanga den bakapikin fu en sa de kownu fu Israel fu têgo. ₆Ma Yerobeam, a manpikin fu Nebat, no ben wani saka ensrefi moro ondro en basi Salomo, a manpikin fu David. ₇Makandra nanga wantu takru-ati man di no warti srefsrefi, a kaka futu gi Rekabeam, a manpikin fu Salomo. Rekabeam ben yongu èn a no ben abi dek'ati ete, dat' meki a no ben sabi san fu du. ₈Un prakseri taki un o man feti MASRA fu puru den bakapikin fu David leki kownu, fu di yu kon nanga wan bigi legre nanga den gowtu bulu di Yerobeam meki gi unu leki gado? ₉Srefi den priester fu MASRA, den bakapikin fu Aaron, nanga den Lefitiman, un yagi èn un poti un eigi priester neleki den tra folku. Ibrisma di ben kon nanga wan yongu bulu nanga seibi man skapu, ben kan tron priester gi den sani di no de gado. ₁₀Ma gi wi, MASRA, na wi Gado. Wi no drai wi baka gi En. Den bakapikin fu Aaron e du a wroko leki priester fu MASRA èn den Lefitiman e yepi den du a wroko. ₁₁Ala mamanten nanga ala neti den e bron meti leki ofrandi gi MASRA, nanga wierook di e smeri switi. Na den e poti den brede di mus poti spesrutu gi Gado, tapu a tafra fu lala gowtu èn na den e leti den lampu ini den gowtu kandelaar ala neti tu. Wi e hori wisrefi na den sani di MASRA, a Gado fu wi, komanderi wi, ma unu gwe libi En. ₁₂Luku, na Gado srefi na wi edeman ini a feti èn den priester fu En tnapu klar'klari fu bro tapu den trompet fu gi a marki fu wi broko kon na un tapu. Israelitisma, un no feti nanga MASRA, a Gado fu den afo fu unu, bika un no o man wini a feti!”

₁₃Ma a pisten dati Yerobeam ben meki wan pisi fu a legre fu en waka lontu fu kon baka a legre fu Yuda. A moro bigi pisi fu a legre fu en ben tnapu abra a legre fu Yuda èn a tra pisi ben de na den baka. ₁₄Di den srudati fu Yuda drai luku den si tak' a feyanti ben de na den fesi nanga na den baka. Ne den kari MASRA fu yepi den. Den priester bro tapu den trompet ₁₅èn den srudati fu Yuda meki wan fetibabari. Di den fetiman fu Yuda meki a fetibabari, Gado meki Yerobeam nanga a legre fu Israel lasi a feti fu Abia nanga a legre fu Yuda. ₁₆A legre fu Israel lon gi a di fu Yuda èn Gado gi den abra ini a makti fu Yuda. ₁₇Abia nanga den srudati fu en kiri bun furu fu den srudati fu Israel. Feifi hondro dusun fu den srudati fu Israel lasi den libi. ₁₈Tapu a fasi dati Gado broko den sma fu Israel. Den sma fu Yuda wini fu di den ben poti den fertrow tapu MASRA, a Gado fu den afo fu den. ₁₉Abia go na baka Yerobeam èn a teki sonwan fu den foto nanga den dorpu fu Yerobeam abra soleki: Betel nanga den dorpu fu en, Yesana nanga den dorpu fu en nanga Efron nanga den dorpu fu en. ₂₀Noiti moro Yerobeam kisi nofo krakti baka fu go feti nanga Abia, solanga leki di Abia ben de na makti. Te fu kba MASRA meki a dede.

₂₁Ma Abia ben e kisi makti moro nanga moro. A teki tin-na-fo uma fu libi èn a meki tutenti-na-tu manpikin nanga tin-na-siksi umapikin. ₂₂Den tra sani di psa ini a libi fu Abia, a fasi fa a tyari ensrefi nanga den sani di a taki, skrifi poti ini a buku fu a profeiti Ido.

₁Abia dede èn den beri en ini a foto fu David. En manpikin Asa teki en presi leki kownu. Di Asa ben de na makti, feti no feti ini a kondre tin yari langa.

₂Asa ben e du san bun èn leti ini a ai fu MASRA, a Gado fu en. ₃A puru den altari fu den tra gado nanga den presi pe den sma ben e tyari ofrandi, èn a naki den ston nanga den postu broko di den sma ben meki gi kruktu gado. ₄A taigi den sma fu Yuda tak' den mus suku den yepi na MASRA, a Gado fu den afo fu den, èn tak' den mus du san a wèt nanga den gebod e taki. ₅A puru den presi pe den sma ben e tyari ofrandi nanga den altari pe den sma ben e bron wierook ini ala den foto fu Yuda. Di Asa ben de na makti, freide ben de ini a kondre. ₆Fu di freide ben de ini a kondre èn feti no ben e feti, Asa ben abi a okasi fu bow tranga foto na ini Yuda, bika MASRA ben meki taki freide ben de ini a kondre. ₇A taigi den sma fu Yuda taki: “Meki wi meki den foto disi tron foto di tranga fu teki abra. Meki wi meki skotu lontu den nanga hei toren, doro nanga greni. A kondre na fu wi ete, fu di wi aksi MASRA, wi Gado, fu yepi wi èn A meki taki wi abi freide na alasei.” So den ben man bow sondro problema. ₈Asa ben abi wan legre fu dri hondro dusun man fu a lo fu Yuda, di ben e waka nanga lansri nanga schild. A ben abi wan legre tu fu tu hondro nanga aititenti dusun man fu a lo fu Benyamin. Den man disi ben e waka nanga wan pikin schild èn di ben e sutu nanga peiri nanga bo. Ala den man disi ben de dyadya fetiman.

₉Wan leisi Serak fu Nubia hari kon feti ini a kondre nanga wan legre fu wan milyun srudati nanga dri hondro fetiwagi. A ben doro te na Maresa. ₁₀Dan Asa hari go miti en. Den tu legre seti densrefi fu feti ini a Sefatadal na Maresa. ₁₁Dan Asa begi MASRA, a Gado fu en, fu yepi en. A taki: “MASRA, boiti Yu no wan sma de fu yepi den swakiwan te den mus feti nanga den wan di abi makti. Yepi wi MASRA, Gado fu unu, bika tapu Yu wi e fertrow èn ini Yu nen wi hari kon feti nanga a bigi legre disi. MASRA, Yu na wi Gado, no meki libisma opo fu feti Yu.” ₁₂Dan MASRA meki a legre fu Nubia lasi a feti fu Asa nanga den sma fu Yuda. A legre fu Nubia ben abi fu lowe gi den. ₁₃Asa nanga a legre fu en teki na den baka te kon miti Gerar. Den teki sowan bigi wini èn den kiri someni man fu a legre fu Nubia taki not'noti fu a legre ben tan abra fesi MASRA nanga a legre fu en. Den teki furu sani fu a legre fu Nubia tu. ₁₄Baka dati den teki ala den foto ini a birti fu Gerar abra, fu di den sma dati ben frede srefsrefi gi MASRA. Den teki ala den sani gwe fu den foto dati di ben abi furu gudu. ₁₅Den teki den tenti abra tu fu den man di ben e kweki èn den tyari furu skapu, krabita nanga kameel gwe. Baka dati den drai go na Yerusalem baka.

₁Siksi dei fosi a Paskafesa, Yesus doro na Betania pe Lasarus, di A ben meki kon na libi baka, ben e tan. ₂Drape den hori wan fesa gi Yesus. Marta ben e yepi nanga nyansani èn Lasarus ben de wan fu den sma di ben de na tafra nanga En. ₃Dan Maria teki wan afu liter diri switismeri-oli san ben meki fu nardus rutu. A kanti a oli na Yesus futu dan a drei den nanga en edewiwiri. A switi smeri fu a oli panya ini a heri oso. ₄Ne Yudas Iskariot, wan fu den man di ben e teki leri fu Yesus di ben o seri En bakaten, taki: ₅“Fu sanede un no seri a oli disi gi dri hondro solfrumoni, dan un prati a moni gi pôtisma?” ₆A no taki disi fu di a ben prakseri den pôtisma, ma fu di a ben de wan fufuruman. Na en ben hori a moni, èn a ben gwenti fu teki gi ensrefi. ₇Dan Yesus taki: “Un libi en. A ben kibri a oli disi fu meki Mi klari fu Mi beri. ₈Pôtisma de ala ten nanga unu, ma Mi no o de ala ten nanga unu.”

₉Wan bigi grupu Dyusma ben kon yere taki Yesus de na Betania. So den go drape, ma a no fu Yesus wawan. Den ben wani si Lasarus tu, di A ben meki kon na libi baka. ₁₀Dan den prenspari priester meki mofo fu kiri Lasarus tu, ₁₁bika fu en ede furu fu den Dyusma ben libi den, dan den bribi ini Yesus.

₁₂A tra dei fu en a bigi grupu sma di ben kon na a fesa yere taki Yesus e kon na Yerusalem. ₁₃So den koti palmtaki, dan den waka go miti En. Den ben e bari taki:

“Hosana! Blesi de tapu a Wan di e kon ini a nen fu Masra! Blesi fu a Kownu fu Israel!” ₁₄Yesus si wan yongu buriki, dan A go sidon na en tapu. A psa leki fa a skrifi taki: ₁₅“Sma fu Yerusalem, no frede! Luku, yu Kownu e kon. A e sidon tapu wan yongu buriki.” ₁₆Di den sani disi psa, den man di ben e teki leri fu Yesus no ben ferstan ete san den ben wani taki. Ma baka di Yesus opo go na heimel, dan fosi den memre taki den sani disi ben skrifi fu En, èn taki den du den sani disi nanga En. ₁₇Di Yesus kari Lasarus kmoto fu a grebi meki a kon na libi baka, wan bigi grupu sma ben drape. Den sma dati ben e ferteri trawan fu a sani disi. ₁₈Fu dat'ede furu sma waka go miti En, bika den ben yere fu a marki san A ben meki den sma si. ₁₉Ne den Fariseiman taigi makandra taki: “Un e si taki noti san un du e yepi. Luku, heri grontapu e waka na En baka!”

₂₀Na mindri den sma di ben go fu anbegi Gado na a Paskafesa, yu ben abi wantu Grikisma. ₂₁Den man disi go na Filipus, di ben kmoto fu Betsaida ini Galilea, dan den aksi en taki: “Masra, un wani si Yesus.” ₂₂Dan Filipus go taigi Andreas, dan den ala tu go taigi Yesus. ₂₃Yesus piki den taki: “A yuru doro taki a Manpikin fu Libisma mus kisi grani. ₂₄Fu tru Mi e taigi un taki: Efu wan ai padi no fadon na gron dan a dede, a e tan wan ai padi. Ma efu a dede, dan a e gi furu nyanyan. ₂₅A sma di lobi en libi, o lasi en. Ma a sma di no lobi en libi dya na grontapu, e kibri en fu a libi fu têgo. ₂₆Efu wan sma e dini Mi, a mus waka na Mi baka. Dan pe Mi de, drape Mi knekti sa de tu. Efu wan sma e dini Mi, dan Mi P'pa sa gi en grani.