Dag 153 van 365- 2 Kronieken 17-18 en Johannes 13:1-20

₁Dan Yosafat, a manpikin fu Asa, teki en presi leki kownu. A meki Yuda kon moro tranga fu Israel no teki en abra. ₂A poti srudati ini ala den tranga foto fu Yuda èn a poti wakti-oso nanga srudati ini heri Yuda nanga ini den foto fu Efraim, di en p'pa ben teki abra. ₃MASRA ben de nanga Yosafat fu di a ben teki a eksempre fu en afo David: a no ben e dini Baal, ma a ben e dini a Gado fu en p'pa. ₄A ben e libi leki fa Gado wani. A no ben e libi leki den sma fu Israel. ₅MASRA ben meki Yosafat tnapu tranga leki kownu. Heri Yuda ben e tyari kado kon gi en. Disi meki taki a ben abi furu gudu nanga grani. ₆A sani dati gi en moro dek'ati fu libi leki fa MASRA wani. A puru den presi pe den sma ben e tyari ofrandi ini Yuda tu, nanga den postu di den sma ben meki gi den kruktu gado. ₇Di a ben de dri yari na makti, a seni wantu heihei man fu en fu go gi leri ini den foto fu Yuda. Den man dati ben de: Ben-Hail, Obadya, Sekarya, Netanel nanga Mikaya. ₈Den Lefitiman: Semaya, Netanya, Sebadya, Asael, Semiramot, Yonatan, Adonia, Tobia nanga Tob-Adonia, ben go nanga den. Den priester Elisama nanga Yoram ben go nanga den tu. ₉Den ben abi a buku nanga a wèt fu MASRA na den, èn den ben e go na ala den foto fu Yuda fu gi den sma leri.

₁₀MASRA ben meki taki ala den kondre lontu Yuda ben e frede fu go feti nanga Yosafat. ₁₁Wan tu fu den Filistijnsma tyari kado gi en nanga bun furu solfru. Srefi den Arabiri ben tyari skapu nanga krabita gi den: seibi dusun seibi hondro man skapu nanga seibi dusun seibi hondro bokoboko. ₁₂So Yosafat ben kisi makti moro nanga moro. A bow tranga foto ini Yuda nanga foto fu kibri nyanyan poti. ₁₃A ben abi furu nyanyan ini den foto fu Yuda. Ini Yerusalem a ben abi dyadya fetiman. ₁₄Den ben seti na ini grupu fu famiri. Disi na den edeman fu Yuda di ben de edeman fu wan dusun srudati: Yu ben abi Adna di ben de edeman fu dri hondro dusun dyadya fetiman. ₁₅Moro fara: Yokanan, di ben de edeman fu tu hondro aititenti dusun man, ₁₆Amasya, a manpikin fu Sikri, ben de edeman fu tu hondro dusun dyadya fetiman. Sondro fu sma aksi en, Amasya ben poti ensrefi fu du a wroko disi gi MASRA. ₁₇Elyada, wan dyadya fetiman, fu Benyamin, ben de edeman fu tu hondro dusun man di ben e waka nanga bo nanga schild. ₁₈Yosabad, ben de edeman fu wan hondro aititenti dusun fetiman di ben abi ala den fetisani na den. ₁₉Disi ben de a legre fu kownu. Den srudati di ben de ini den tranga foto no ben teri makandra nanga den disi.

₁Di Yosafat ben abi bun furu gudu nanga grani, a meki wan sma fu en famiri trow nanga a famiri fu kownu Akab fu Israel. ₂Wantu yari na baka, a go na Akab na Samaria. Ne Akab srakti bun furu skapu, krabita nanga kaw gi en nanga den sma di ben kon nanga en. Dan Akab kisi Yosafat so fara fu a hari go feti nanga en nanga a foto Ramot ini Gilead. ₃Kownu Akab fu Israel aksi kownu Yosafat fu Yuda taki: “Yu o hari go nanga mi na Ramot ini Gilead?” Yosafat piki en taki: “Mi nanga yu na wan, a legre fu mi na a legre fu yu. Mi sa go feti nanga yu.” ₄Ma Yosafat taigi a kownu fu Israel tu taki: “Ma mi e begi yu, suku fu sabi fosi san MASRA e taki.” ₅Ne a kownu fu Israel kari den profeiti kon na wan, fo hondro man, dan a aksi den taki: “Wi sa hari go feti nanga Ramot ini Gilead noso wi no mus go?” Den piki taki: “Yu kan go. Gado sa gi yu a foto.” ₆Ma Yosafat aksi taki: “Wan profeiti fu MASRA de dyaso ete di wi kan aksi?” ₇A kownu fu Israel piki en taki: “Wan man de ete di wi kan aksi. A man dati na Mika, a manpikin fu Yimla. Ma mi no lobi en srefsrefi, bika a no e taigi mi bun sani, ma soso ogri a e taki tak' o miti mi.” Ma Yosafat piki en taki: “Yu no mus taki so.” ₈Dan a kownu fu Israel kari wan spesrutu knekti fu en, dan a taigi en taki: “Go wantron go teki Mika, a manpikin fu Yimla, kon.” ₉A kownu fu Israel nanga kownu Yosafat fu Yuda ben sidon na tapu kownusturu nanga ala den moi krosi, na wan presi pe sma e masi a buba puru na a graan, krosbei fu a bigi doro fu Samaria. Ala den profeiti ben e tan gi boskopu nomo. ₁₀Wan fu den, di ben nen Sidkia, a manpikin fu Kenana, ben poti tu isri tutu tapu en ede, dan a taki: “Na so MASRA e taki: Nanga den tutu disi yu o dyuku den Arameesma te leki den dede.” ₁₁Ala den tra profeiti ben e taki den srefi sani disi tu. Den taki: “Hari go na Ramot ini Gilead. Sani sa waka bun gi yu. MASRA o gi kownu a foto.”

₁₂A boskopuman di ben go kari Mika kon, taigi en taki: “Ala den profeiti taigi kownu bun sani. Mi howpu taki den sani di yu sa taki sa de bun sani tu leki di fu den.” ₁₃Ma Mika piki en taki: “Mi e sweri na a libilibi MASRA, tak' na soso san mi Gado taigi mi, mi o taki.” ₁₄Di a doro na kownu, kownu aksi en taki: “Mika, wi sa hari go feti nanga Ramot ini Gilead noso wi no mus go?” Mika piki taki: “Yu kan hari go. Sani sa waka bun. Yu sa teki a foto abra.” ₁₅Ma kownu taigi en taki: “Omeni leisi kba mi meki yu sweri gi mi tak' yu no mus kibri den tru sani gi mi san MASRA e taigi yu fu taigi mi?” ₁₆Ne Mika taigi en taki: “Mi si fa ala den srudati fu Israel e waka panyapanya tapu den bergi, leki wan grupu skapu sondro skapuman. Dan MASRA taigi mi taki: ‘Den no abi fesiman moro, meki den tapu a feti èn drai go baka na den oso.’ ” ₁₇Ne a kownu fu Israel taigi Yosafat taki: “Yu si san mi ben taigi yu! No wan bun sani a e si fu taigi mi, ma soso ogri.” ₁₈Ma Mika piki en taki: “Arki san MASRA e taigi yu ete: Mi si MASRA sidon na tapu en kownusturu. A heri legre fu heimel ben tnapu na let'sei nanga kruktusei fu En. ₁₉Dan MASRA aksi taki: ‘Sortu wan fu unu wan go kori kownu Akab fu Israel fu go feti na Ramot ini Gilead, fu a lasi en libi?’ Dan a wan ben e taki disi, a trawan ben e taki dati. ₂₀Te fu kba wan yeye kon tnapu na fesi MASRA, dan a taki: ‘Mi sa go kori en.’ Dan MASRA aksi en taki: ‘Fa yu o du dati?’ ₂₁A yeye piki taki: ‘Mi o meki ala den profeiti fu en taigi en soso sani di no tru.’ Ne MASRA taigi en taki: ‘Yu kan go kori en, yu o man du en tu.’ ₂₂Na dati meki MASRA meki ala den profeiti fu yu dyaso taki soso sani di no tru. Bika A teki a besroiti kba fu puru yu na pasi.” ₂₃Ne Sidkia, a manpikin fu Kenana, waka go na Mika, a naki en ini en fesi, dan a taigi en taki: “Yu wani taigi mi taki a Yeye fu MASRA gwe libi mi fu taigi yu now san Gado wani?” ₂₄Mika piki en taki: “Dati yu o si tapu a dei pe yu o suku wan kibripe te ini wan baka kamra.” ₂₅Dan a kownu fu Israel komanderi taki: “Un grabu Mika, dan un tyari en go na Amon, a edeman fu a foto, nanga gi Yoas, a boi fu mi. Un taigi den taki: ₂₆‘Kownu komanderi taki un mus sroto en, èn taki un mus gi en pikinso brede nanga watra nomo fu a tan na libi, te leki a drai kon bun baka dyaso.’ ” ₂₇Ma Mika piki kownu taki: “Efu yu drai kon baka trutru, dan a no MASRA meki mi taki.” Mika taigi den sma drape tu taki: “Un alamala di dyaso, un arki san mi taki!”

₂₈Dan a kownu fu Israel nanga kownu Yosafat fu Yuda hari go feti nanga Ramot ini Gilead. ₂₉Ma a kownu fu Israel taigi Yosafat taki: “Mi o kenki mi krosi fu den no man si tak' na mi, ma yu kan tan nanga yu kownu-krosi.” Dan a kownu fu Israel weri so wan fasi tak' den feyanti no ben o man si tak' na en, dan a go ini a feti. ₃₀A kownu fu Aram ben komanderi den edeman fu den fetiwagi fu en taki: “Un no mus feti nanga no wan srudati, ma soso nanga a kownu fu Israel.” ₃₁Fa den edeman fu den fetiwagi si Yosafat, na so den prakseri tak' na en ben de a kownu fu Israel. Ne den lontu en fu feti nanga en. Ma Yosafat bari trangatranga èn MASRA yepi en. Gado meki den drai go na wan tra sei. ₃₂Fa den edeman si taki a no ben de a kownu fu Israel, den drai gwe libi en. ₃₃Ma wan fu den srudati fu Aram sutu wan peiri sondro taki a ben e luku spesrutu fu Akab. A peiri sutu a kownu fu Israel leti mindri tu pisi fu a isri bosroko di a ben weri. Dan kownu Akab komanderi a srudati di ben e tyari a fetiwagi fu en taki: “Drai a wagi, puru mi ini a feti, bika mi kisi mankeri!” ₃₄Ma a momenti dati a feti ben kon so hebi taki den ben abi fu hori kownu tnapu te leki neti ini a wagi fu si den Arameesrudati. Ma di neti e fadon, a dede.

₁Fosi a Paskafesa doro, Yesus ben sabi taki a ten doro fu A libi grontapu go na En P'pa. Èn A lobi den sma fu En di A ben lobi na grontapu, te na a kba. ₂A pisten di Yesus nanga den man di ben e teki leri fu En ben e nyan, dan didibri ben gi Yudas, a manpikin fu Simon Iskariot, a prakseri kba fu a seri En. ₃Yesus ben sabi taki a P'pa ben poti ala sani na ini En anu. A ben sabi taki A ben kmopo fu Gado èn taki A ben o drai go baka na En. ₄Dat' meki A opo, A puru En tap'sei krosi, dan A tai wan duku lontu En bere. ₅Baka dati A kanti watra na ini wan beki, dan A bigin wasi den futu fu den man di ben e teki leri fu En. Dan A drei den nanga a duku san ben tai lontu En bere. ₆Di A doro na Simon Petrus, a dati aksi En taki: “Masra, na wasi Yu wani wasi mi futu?” ₇Yesus piki en taki: “Yu no man ferstan san Mi e du now, ma wan dei yu o sabi.” ₈Dan Petrus taki: “Masra, solanga mi e libi, Yu no sa wasi mi futu!” Ma Yesus piki en taki: “Efu Mi no wasi yu futu, yu no man de wan sma fu Mi.” ₉Ne Simon Petrus piki En taki: “Masra, dan Yu no mus wasi mi futu wawan, ma mi anu nanga mi ede tu.” ₁₀Yesus taigi en taki: “A sma di wasi en skin, krin kba. A abi fu wasi en futu nomo. Un krin, ma a no un alamala.” ₁₁Yesus taki so bika A ben sabi kba suma ben o seri En. Dat' meki A taigi den taki den alamala no krin.

₁₂Di A kba wasi den futu, A weri En tap'sei krosi, dan A go sidon na En presi baka. Dan A taigi den taki: “Un ferstan san Mi du gi unu? ₁₃Unu e kari Mi Meister nanga Masra, èn un abi leti, bika na dati Mi de tu. ₁₄Efu Mi leki un Masra nanga un Meister, wasi un futu, dan un mus wasi makandra futu tu. ₁₅Bika Mi gi un wan eksempre, fu un kan du leki fa Mi ben du gi unu. ₁₆Fu tru Mi e taigi un taki: Wan knekti no hei moro en masra, èn wan boskopuman no hei moro a wan di seni en. ₁₇Now di un sabi den sani disi, Gado sa blesi unu efu un du den. ₁₈San Mi e taki no de gi un alamala. Mi sabi den sma di Mi ben teki. Ma a musu psa leki fa a skrifi ini a Santa Buku. A skrifi taki: ‘A wan di nyan Mi brede, opo en bakafutu fu trapu Mi.’ ₁₉Mi e taigi un a sani disi na fesi, fu te a psa un kan bribi taki Mi de suma Mi de. ₂₀Fu tru Mi e taigi un taki: A sma di opo en doro gi a wan di Mi seni, e opo en gi Mi. Èn a sma di opo en doro gi Mi, e opo en gi a Wan di seni Mi.”