Dag 154 van 365- 2 Kronieken 19-20 en Johannes 13:21-38

₁Kownu Yosafat fu Yuda drai go baka na Yerusalem sondro fu wan sani psa nanga en. ₂Dan Yehu, a man di Gado e sori sani, a manpikin fu Hanani, waka go miti kownu Yosafat, dan a taigi en taki: “Fa yu kan yepi den ogri-ati sma èn lobi den sma di no lobi MASRA srefsrefi? Fu a sani disi ede a atibron fu MASRA kon na yu tapu. ₃Ma yu du bun sani tu bika yu puru den postu ini a kondre di den sma ben meki gi kruktu gado èn yu ben teki a besroiti fu dini Gado.”

₄Yosafat ben e libi na Yerusalem ma a ben go baka na a pipel, fu Berseba go te na a bergikontren fu Efraim, fu meki den drai kon baka na MASRA, a Gado fu den afo fu den. ₅Dan a poti krutubakra ini a kondre, ini ibriwan fu den tranga foto fu Yuda. No wan ben de di no ben abi wan krutubakra. ₆A taigi den krutubakra taki: “Un ferstan bun sortu wroko un teki na un tapu. Bika a no sma poti unu fu koti krutu, ma na Gado, di sa de nanga unu te un o koti krutu. ₇Un lespeki MASRA. Luku bun san un e du, bika MASRA, a Gado fu wi, no abi noti fu du nanga kruktudu, A no e teki no wan sma sei tu èn A no e teki kado tu fu yepi wan sma.” ₈Yosafat poti wantu Lefitiman, priester nanga edeman fu famiri, di ben mus luku tak' den sma e hori den na a wèt fu MASRA èn fu koti krutu gi den sma fu a foto. Den ben e koti krutu na Yerusalem. ₉A komanderi den taki: “Un mus du un wroko nanga lespeki gi MASRA, un mus de fu fertrow èn un du a wroko nanga un heri ati. ₁₀Te den kondreman fu unu fu den tra foto kon na unu, fu un koti krutu ini wan tori fu wan kiri, fu wan tra ogri pe brudu lon, fu a wèt, fu den gebod, fu den sani di wi mus tan du noso fu den sani na san wi mus tan hori wisrefi, un mus gi den rai fu den no sondu na MASRA fesi. Dan so a atibron fu En no sa kon tapu unu nanga kondreman fu unu. Efu un du san mi taigi unu, un no o sondu. ₁₁Luku, mi e poti granpriester Amarya leki a moro hei krutubakra fu den tori fu MASRA, èn Sebadya, a manpikin fu Yismael, a edeman fu a lo fu Yuda, mi e poti leki a moro hei krutubakra fu den tori fu kownu. Den Lefitiman o yepi unu te krutu o koti. Un du a wroko nanga dek'ati, MASRA sa de nanga den sma di e du bun.”

₁Baka wan pisten den Moabitisma nanga den Amonitisma makandra nanga wantu Mehunitisma hari kon fu feti nanga Yosafat. ₂Boskopuman kon piki Yosafat taki: “Wan bigi legre hari kon fu feti nanga yu. Den kmoto fu Edom na abrasei fu a se. Den doro na Haseson-Tamar kba.” Dati na Engedi. ₃Yosafat skreki srefsrefi. Dan a besroiti fu suku rai na MASRA. A taigi ala sma fu Yuda taki den mus faste. ₄Dan den sma fu Yuda kon na makandra fu suku yepi na MASRA. Iya, den kmoto na ala den foto fu Yuda fu suku MASRA.

₅Yosafat go tnapu na mindri fu den sma fu Yuda nanga Yerusalem tapu a nyun pren ini a oso fu MASRA, ₆dan a taki: “MASRA, Gado fu den afo fu wi, Yu na Gado ini heimel èn Yu e rigeri abra den kondre fu ala folku. Na ini Yu anu krakti nanga makti de. No wan sma kan hori feti nanga Yu. ₇Yu na wi Gado, di yagi den sma di ben e libi ini a kondre disi gwe gi Yu pipel Israel èn Yu gi a kondre fu têgo na den bakapikin fu Yu mati Abraham. ₈Den go libi drape èn den bow wan santa presi pe sma kan anbegi Yu. Dan den taki: ₉‘Te wan ongoloku miti wi, soleki efu feti broko fu strafu wi, takru siki noso angriten, dan wi sa kon tnapu fesi a oso disi na Yu fesi, bika ini a oso disi den e anbegi Yu. Te wi kari Yu ini wi benawtu, Yu sa yere en yepi wi.’ ₁₀We, luku, now den Amonitisma, den Moabitisma nanga den sma fu a Seirbergi, kon fu feti nanga wi. Yu no ben gi Israel primisi fu feti nanga den, di Israel ben e kmoto ini Egipte. Yu ben meki Israel waka psa sondro fu kiri den. ₁₁Ma luku now fa den e pai wi baka fu hari kon feti nanga wi fu puru wi ini a kondre di Yu gi wi taki na fu wi. ₁₂Gado fu wi, strafu den fu dati. Bika wi no o man feti nanga sowan bigi legre di hari kon fu feti nanga wi. Wi no sabi tu san wi mus du, ma na fu Yu wi e ferwakti yepi.”

₁₃Ala den sma fu Yuda ben tnapu na MASRA fesi, srefi den umasma, den pikin, nanga den manpikin. ₁₄Ne a Yeye fu MASRA kon na tapu a Lefitiman Yakasiyel, a manpikin fu Sekarya. Sekarya ben de a manpikin fu Benaya, Benaya ben de a manpikin fu Yehiyel, Yehiyel ben de a manpikin fu Matanya, Matanya ben de wan manpikin fu Asaf. ₁₅Dan Yakasiyel taki: “Kownu Yosafat, sma fu Yuda nanga Yerusalem, un arki mi! Na disi MASRA e taki: Un no frede èn un no lasi ati gi a bigi legre disi. Bika a no unu o feti a feti disi, ma Gado. ₁₆Tamara un mus hari go na den. Den o kren a pasi fu Sis. Dan un o miti nanga den na a kba fu a dal, fesi a sabana fu Yeruel. ₁₇Ma unu no abi fu feti. Un go seti unsrefi drape, dan un tan tnapu. Dan un o si tak' MASRA o gi unu a wini. Yuda nanga Yerusalem, un no frede èn un no lasi ati. Tamara un mus hari go na den, MASRA de nanga unu.” ₁₈Ne Yosafat boigi nanga en fesi go na gron, èn ala den sma fu Yuda nanga den sma fu Yerusalem boigi gi MASRA, fu anbegi En. ₁₉Dan den Lefitiman, den bakapikin fu Kehat nanga Korak, opo tnapu èn den prijse MASRA, a Gado fu Israel, nanga tranga sten.

₂₀A tamara mamanten den hari go frukufruku na a dreisabana fu Tekoa. Di den e hari gwe, Yosafat waka kon na fesi, dan a taki: “Sma fu Yuda nanga Yerusalem, un arki mi! Un poti un fertrow tapu MASRA, wi Gado, dan wi o tnapu tranga. Bribi den profeiti fu En, dan sani o waka bun gi unu.” ₂₁Baka dati, a aksi a pipel rai, dan a poti wantu man di ben mus waka fesi den fetiman ini santa krosi èn den ben mus singi èn prijse MASRA. Den ben e singi: “Prijse MASRA, bika a bigi lobi fu En na fu têgo.” ₂₂A srefi momenti di den bigin singi èn prijse MASRA, MASRA meki sma di ben kibri e luru, broko go tapu den Amonitisma, den Moabitisma nanga den sma fu a Seirbergi, di ben hari kon fu feti nanga Yuda, èn den wini den. ₂₃Den Amonitisma nanga den Moabitisma bigin feti nanga den sma fu a Seirbergi èn den kiri den puru na pasi. Baka di den kiri den sma fu a Seirbergi den bigin kiri makandra tu. ₂₄Di a legre fu Yuda doro na a presi pe den ben man si go ini a sabana, den luku fu si pe a legre fu a feyanti de, den si den dedeskin di ben didon na gron. No wan ben tan na libi. ₂₅Dan Yosafat nanga a legre go teki den sani fu den. Den feni furu sani, krosi nanga gudu. Den teki moro leki den ben man tyari èn den sani ben de so furu taki den ben abi dri dei fanowdu fu tyari ala sani gwe. ₂₆Tapu a di fu fo dei den kon makandra ini a Dal fu Prijse èn den prijse MASRA drape. Dat' meki den e kari a presi dati te tide Dal fu Prijse. ₂₇Nanga prisiri den man fu Yuda nanga Yerusalem drai go baka na Yerusalem nanga Yosafat leki den edeman, bika MASRA ben meki den prisiri fu san ben miti den feyanti fu den. ₂₈Di den doro na Yerusalem, den hari go, nanga harp, citer nanga trompet, na a oso fu MASRA.

₂₉Ala den tra kondre ben kon frede gi Gado di den yere fa MASRA feti nanga den feyanti fu Israel. ₃₀No wan feti ben e feti moro nanga a kondre fu Yosafat, bika Gado ben sorgu taki freide ben de nanga ala den kondre lontu den.

₃₁Yosafat ben de na makti ini Yuda. A ben abi dritenti-na-feifi yari di a tron kownu. A tan tutenti-na-feifi yari na makti ini Yerusalem. En m'ma ben nen Asuba, èn a ben de a umapikin fu Silki. ₃₂Yosafat teki a eksempre fu en p'pa Asa, fu du san bun ini MASRA ai, èn a tan du so. ₃₃Ma den presi pe den sma ben e tyari ofrandi ben tan èn a pipel fu Yuda no ben e dini a Gado fu den afo fu den trutru ete. ₃₄Den tra sani di psa ini a libi fu Yosafat, fu a bigin go te na a kba, skrifi poti ini a historia fu Yehu, a manpikin fu Hanani, di de fu feni ini a buku fu den kownu fu Israel.

₃₅Baka dati kownu Yosafat fu Yuda meki wan ferbontu nanga kownu Akasya fu Israel, di ben de wan takru-ati sma. ₃₆Den agri fu bow sipi fu tyari lai go na Tarsis. Den sipi meki na Esyon-Geber. ₃₇Ma Eliyeser, a manpikin fu Dodawahu, fu Maresa, gi Yosafat wan boskopu fu Gado. A taigi en taki: “MASRA e pori a wroko fu yu, fu di yu meki wan ferbontu nanga Akasya.” Ne ala den sipi sungu èn den no doro Tarsis.

₂₁Baka di Yesus taki den sani disi, A firi wan dipi sari, dan A taigi den taki: “Fu tru Mi e taigi unu: Wan fu unu o seri Mi.” ₂₂Den man di ben e teki leri fu En luku makandra ferwondru. Den no ben sabi suma A e taki. ₂₃Wan fu den man di ben e teki leri fu En, a wan di Yesus ben lobi, ben de let' na En sei. ₂₄Dan Simon Petrus sori en fu a aksi Yesus suma A e taki. ₂₅So a man disi dribi go moro krosbei, dan a aksi Yesus taki: “Masra, suma na en?” ₂₆Yesus piki en taki: “Mi o dopu a pisi brede disi ini a komki, dan Mi o langa en gi a sma dati.” So Yesus dopu a pisi brede ini a komki, dan A langa en gi Yudas, a manpikin fu Simon Iskariot. ₂₇Di Yudas teki a pisi brede, Satan kon ini en ati. Dan Yesus taigi en taki: “Opo, go du es'esi san yu wani du.” ₂₈Ma no wan fu den trawan drape ben ferstan fu sanede Yesus taigi en a sani disi. ₂₉Yudas ben de a man di ben e hori a moni gi den. Dat' meki sonwan fu den ben prakseri taki Yesus seni en fu go bai den sani di ben de fanowdu fu hori a Paskafesa. Trawan fu den ben prakseri taki Yesus seni en go fu gi den pôtisma wan sani. ₃₀So Yudas teki a pisi brede, dan a gwe wantron. A ben de neti yuru.

₃₁Baka di Yudas gwe, Yesus taki: “A ten doro now taki a Manpikin fu Libisma e kisi glori, èn so Gado e kisi glori tu. ₃₂Efu a Manpikin meki Gado kisi glori, dan Gado sa meki a Manpikin kisi glori tu. Èn A o du dati wantron. ₃₃Mi pikin, na wan syatu pisten ete Mi de nanga unu. Un o suku Mi, ma Mi taigi unu a srefi sani san Mi ben taigi den Dyusma: ‘Pe Mi e go, un no man kon.’ ₃₄Wan nyun sani Mi e komanderi un fu du: Un mus lobi makandra. Leki fa Mi ben lobi unu, na so un mus lobi makandra tu. ₃₅Efu un lobi makandra, dan ala sma o sabi taki un na sma fu Mi.”

₃₆Simon Petrus aksi En taki: “Masra, pe Yu e go?”

Yesus piki en taki: “Pe Mi e go, yu no man kon now nanga Mi. Ma baka wan pisten yu o kon tu.” ₃₇Dan Petrus aksi En taki: “Masra, fu sanede mi no man kon now nanga Yu? Mi klari fu dede gi Yu.” ₃₈Yesus piki en taki: “Yu klari fu dede gi Mi? Fu tru Mi e taigi yu taki: Fosi kakafowru bari, yu o taki dri leisi taki yu no sabi Mi.”