Dag 165 van 365- Ezra 9-10 en Handelingen 1

₁Baka dati den edeman fu a pipel kon na mi. Den taigi mi taki: “A pipel fu Israel, den priester nanga den Lefitiman, no hori densrefi aparti fu den tra folku di e libi ini a kondre. Den e du den groskin sani tu fu den Kananitisma, den Hetitisma, den Perisitisma, den Yebusitisma, den Amonitisma, den Moabitisma, den sma fu Egipte nanga den Amoritisma. ₂A de so tak' den man teki uma fu den folku dati gi densrefi nanga gi den manpikin fu den. Dan so a santa pipel kon moksi nanga den tra folku dati. Den edeman nanga den tiriman e waka na fesi ini a sondu dati.”

₃Di mi yere a sani dati, mi priti mi krosi nanga a langa dyakti di mi ben e weri na en tapu, mi hari den wiwiri puru na mi ede nanga mi barba, dan mi saka sidon. Mi no ben sabi srefsrefi san fu du. ₄Dan ala den sma kon na mi di ben frede den sani di a Gado fu Israel ben taki tak' A o du nanga a sondu di den sma du di drai kon baka fu pe den feyanti fu den ben tyari den go nanga tranga. Ma mi tan sidon sondro fu sabi san mi ben mus du te kon miti a yuru fu a neti ofrandi. ₅Di a yuru fu a neti ofrandi doro, mi opo, èn mi tapu nanga a saka di mi ben e saka misrefi fesi Gado. Dan so, nanga den priti krosi fu mi, mi fadon go na tapu mi kindi èn mi langa mi anu go na MASRA, a Gado fu mi. ₆Mi taki: “Mi Gado, mi e syen èn mi no abi a dek'ati fu opo mi ai luku Yu. Mi Gado, den kruktudu fu wi furu psa marki èn den sondu fu wi doro te na heimel. ₇Sensi a ten fu den afo fu wi te kon miti tide, wi du furu sondu. Fu den kruktudu fu wi ede Yu gi wi, den kownu nanga den priester fu wi, abra ini a makti fu den kownu fu tratra kondre. Yu meki den kiri wi na ini feti èn grabu wi tyari gwe. Yu meki den fufuru ala wi sani tyari gwe tu èn Yu poti wi leki spot'popki, leki fa wi de now. ₈Ma no langa di psa, MASRA, a Gado fu wi, sori wi a bunfasi fu En. A meki wantu sma fu a pipel fu wi kmoto ini a pina pe wi ben de èn gi wi wan presi pe wi kan libi sondro frede ini a santa presi fu En. A Gado fu wi gi wi howpu nanga dek'ati baka ini a katibo ini san wi de. ₉Bika wi na srafu, ma Gado no gwe libi wi ini wi katibo. A meki den kownu fu Persia sori wi a bunfasi fu den. A meki den gi wi dek'ati fu wi kan meki a oso fu a Gado fu wi, di ben broko fadon, tnapu baka. Den ben de leki wan skotu gi wi tu ini Yuda nanga Yerusalem. ₁₀Ma now, Gado fu wi, san wi kan taki, baka di Yu du den sani dati gi wi? Soso dati wi no hori wisrefi moro na den gebod fu Yu, ₁₁den gebod di Yu ben meki den knekti fu Yu, den profeiti, gi wi nanga den wortu disi: ‘A kondre pe wi e hari go fu teki abra, na wan doti kondre. Den folku di e libi drape doti en nanga den groskin sani fu den. Den doti a heri kondre, fu a wan sei go na a tra sei, nanga a doti libi fu den. ₁₂Dat' meki wi no mus meki den umapikin fu wi trow nanga den manpikin fu den, èn wi no mus meki den umapikin fu den trow nanga den manpikin fu wi. Noiti wi mus du wan sani fu yepi den fu sani go bun nanga den. Dan wi o kon tranga èn nyan a bun fu a kondre, di wi o man libi na baka leki wan têgo gudu gi den pikin fu wi.’ ₁₃Ala den sani di miti wi na a bakapisi fu den takrudu nanga den bigi sondu fu wi. Ma Gado fu wi, Yu no gi wi a strafu di wi ben fiti fu kisi èn Yu sorgu taki someni fu wi kmopo fu pe wi ben de. ₁₄Dan fa a kan dan tak' wi e broko den gebod fu Yu agen fu meki den manpikin nanga den umapikin fu wi trow nanga sma fu den groskin folku dati? Na wan sani fu meki Yu kisi sowan atibron na wi tapu taki Yu kan kiri un alamala. No wan fu wi ben o man tan na libi, no wan fu wi ben o man kmopo fu pe wi ben de. ₁₅MASRA, Gado fu Israel, Yu e krutu sani na tapu wan leti fasi. Bika Yu meki wi ala di ben kan kmopo fu pe wi ben de, tan na libi, te tide. Luku, wi tnapu na Yu fesi nanga wi sondu. Ma fu taki leti, no wan fu wi abi a leti fu tnapu so na Yu fesi.”

₁Esra ben e krei èn trowe ensrefi na gron fesi a oso fu Gado. A ben e begi èn taki den sondu fu a pipel. Ne bun furu Israelitisma, man, uma nanga pikin, kon tnapu lontu en, e krei trangatranga. ₂Dan Sekanya, a manpikin fu Yekiyel di ben de wan manpikin fu Elam, bigin taki nanga Esra. A taigi en taki: “Wi no hori wisrefi na den sani di Gado taki, bika wi trow nanga uma fu den tra folku di e libi ini a kondre. Ma howpu de gi Israel ete. ₃Meki wi meki wan ferbontu nanga wi Gado, taki wi o seni ala den uma dati nanga den pikin di den meki, gwe. Wi wani du san yu, wi masra, nanga den di abi dipi lespeki gi a gebod fu wi Gado, e taigi wi. Wi mus libi soleki fa a wèt e taki. ₄Opo Esra, na yu mus seti a tori disi. Wi tnapu na yu baka. Teki dek'ati èn du san yu mus du!” ₅Ne Esra opo, dan a meki den edeman fu den priester, den edeman fu den Lefitiman nanga den edeman fu heri Israel, sweri taki den o du a sani di Sedekia taki. Den man meki a sweri tu.

₆Baka dati Esra kmopo fesi a oso fu Gado go na a kamra fu Yokanan, a manpikin fu Elyasib. A psa a neti drape. Ma a no nyan brede èn a no dringi watra fu di a ben e sari sote fu di den sma di drai kon fu pe den feyanti ben tyari den go nanga tranga, no ben hori den na den sani di Gado taki.

₇Dan den seni wan boskopu di ben mus panya ini heri Yuda nanga Yerusalem, tak' ala den sma di ben drai kon fu pe den feyanti ben tyari den go nanga tranga, mus kon makandra na Yerusalem. ₈Den edeman fu a pipel nanga den owrusma ben teki a besroiti tak' disi o psa nanga iniwan sma di no kon ini dri dei: den o teki ala sani fu a sma gi Gado èn den no ben o si sowan sma moro leki wan fu den sma fu a grupu di ben drai kon baka fu pe den feyanti ben tyari den go nanga tranga. ₉Fosi den dri dei psa ala den man fu Yuda nanga Benyamin kon na wan na Yerusalem. A heri pipel go sidon tapu a pren fesi a oso fu Gado. Den ben e beifi, fu di den ben e frede nanga fu a hebi alen di ben e fadon. A kon makandra dati feni presi tapu a di fu tutenti dei fu a di fu neigi mun.

₁₀Dan priester Esra opo tnapu, dan a taigi den taki: “Wi no hori wisrefi na den sani di Gado taki, bika wi trow nanga uma fu tra folku. Nanga dati wi meki den sondu fu Israel kon moro furu. ₁₁Ma now wi mus gi MASRA, a Gado fu den afo fu wi, grani. Meki wi du san e gi En prisiri èn meki wi hori wisrefi aparti fu den tra folku di e libi ini a kondre tu, nanga fu den uma fu den tra folku.” ₁₂Ala den sma piki nanga tranga sten taki: “Wi sa du san yu taigi wi. ₁₃Ma wi, a pipel, wi furu èn na alenten wi de. Wi no o man tnapu langa na dorosei. A sani disi a no wan sani di kan du ini wan noso tu dei, bika na furu fu wi du a sondu disi. ₁₄Dat' meki wi e aksi efu den edeman fu wi kan tnapu gi wi alamala. Dan so iniwan sma fu wan fu den foto fu wi, di trow nanga wan uma fu tra folku, kan kon dyaso tapu wan spesrutu ten, makandra nanga den owruwan nanga krutubakra fu a foto dati. A sani dati mus go doro te leki Gado ati no e bron moro na wi tapu fu a tori disi.” ₁₅Na soso Yonatan, a manpikin fu Asael, nanga Yakseya, a manpikin fu Tikwa, no ben agri fu sani waka so. Mesulam nanga a Lefitiman Sabetai, ben e kraka den. ₁₆Ma den tra sma di ben drai kon fu pe den feyanti ben tyari den go nanga tranga, du soleki fa sani ben seti. Dan priester Esra teki wantu man puru na den trawan mindri, famiri-edeman di ben mus tnapu gi den famiri. Den nen fu den man dati skrifi poti, èn na den ben mus ondrosuku a tori. A fosi konmakandra fu den ben de tapu a fosi dei fu a di fu tin mun. ₁₇Tapu a fosi dei fu a fosi mun, den ben kba ondrosuku a tori fu ala den man di ben trow nanga uma fu tra folku.

₁₈Den priester di ben trow nanga uma fu tra folku ben de:

Maaseya, Eliyeser, Yarib nanga Gedalya. Den ben de bakapikin fu Yesua, a manpikin fu Yosadak, nanga fu den brada fu en. ₁₉Den pramisi taki den o seni den uma fu den gwe, èn leki paiman den gi wan man skapu fu den leki ofrandi fu kisi pardon fu den sondu.

₂₀Moro fara: fu den bakapikin fu Imer yu ben abi Hanani nanga Sebadya.

₂₁Fu den bakapikin fu Harim yu ben abi Maaseya, Elia, Semaya, Yekiyel nanga Usia. ₂₂Fu den bakapikin fu Paskur yu ben abi Elyoenai, Maaseya, Yismael, Netanel, Yosabad nanga Elasa.

₂₃Den Lefitiman di ben abi uma fu tra folku ben de: Yosabad, Simi, Kelaya, di den sabi moro bun leki Kelita, Petakya, Yehuda nanga Eliyeser.

₂₄A singiman fu a tempel di ben abi wan uma fu wan tra folku ben de Elyasib.

Den waktiman fu den a tempel di ben abi uma fu tra folku ben de: Salum, Telem nanga Uri.

₂₅Den tra Israelitisma di ben e libi nanga uma fu tra folku ben de:

fu den bakapikin fu Paros: Ramya, Yisia, Malkia, Miamin, Elasar, Malkia nanga Benaya.

₂₆Fu den bakapikin fu Elam yu ben abi: Matanya, Sekarya, Yekiyel, Abdi, Yeremot nanga Elia.

₂₇Fu den bakapikin fu Satu yu ben abi: Elyoenai, Elyasib, Matanya, Yeremot, Sabad nanga Asisa.

₂₈Fu den bakapikin fu Bebai yu ben abi: Yokanan, Hananya, Sabai nanga Atlai.

₂₉Fu den bakapikin fu Bani yu ben abi: Mesulam, Maluk, Adaya, Yasub, Seal nanga Yeramot.

₃₀Fu den bakapikin fu Pakat-Moab yu ben abi: Adna, Kelal, Benaya, Maaseya, Matanya, Besaleyel, Binui nanga Manase.

₃₁Fu den bakapikin fu Harim yu ben abi: Eliyeser, Yisia, Malkia, Semaya, Simeon, ₃₂Benyamin, Maluk nanga Semarya.

₃₃Fu den bakapikin fu Hasum yu ben abi: Matenai, Matata, Sabad, Elifelet, Yeremai, Manase nanga Simi.

₃₄Fu den bakapikin fu Bani yu ben abi: Maadai, Amram, Uwel, ₃₅Benaya, Bedeya, Keluhu, ₃₆Wanya, Meremot, Elyasib, ₃₇Matanya, Matenai, Yaasai, ₃₈Bani, Binui, Simi, ₃₉Selemya, Natan, Adaya, ₄₀Maknadbai, Sasai, Sarai, ₄₁Asarel, Selemya, Semarya, ₄₂Salum, Amarya nanga Yosef.

₄₃Fu den bakapikin fu Nebo yu ben abi: Yehiyel, Matitya, Sabad, Sebina, Yadai, Yowel nanga Benaya. ₄₄Ala den man disi ben teki uma fu tra folku trow, èn sowan fu den ben abi pikin srefi nanga den uma dati.

₁Teofilus, ini a fosi buku di mi skrifi, mi ben ferteri yu fu ala den sani san Yesus ben du nanga san A ben leri, ₂te kon miti a dei di Gado teki En go na heimel. Ma fosi dati, A ben komanderi den man di A ben teki leki boskopuman fu En, san den ben mus du. A du dati nanga yepi fu a Santa Yeye. ₃Baka di Yesus nyan pina èn dede, A sori Ensrefi na den man disi èn A du furu sani fu meki den kon si krin tak' A kon na libi baka. A du dati ini wan ten fu fotenti dei, èn A ferteri den fu a fasi fa Gado wani tiri libisma.

₄Wan fu den dei dati, di Yesus ben e nyan makandra nanga den, A taigi den taki: “No gwe libi Yerusalem, ma un mus tan wakti tapu san mi P'pa ben pramisi unu. Mi ben taigi unu fu a pramisi dati kba. ₅Yohanes ben e dopu sma nanga watra, ma baka wantu dei un sa dopu nanga a Santa Yeye.”

₆Di den ben de makandra nanga Yesus, den aksi En taki: “Masra, na now Yu o gi Israel en eigi kownu baka leki fa a ben de fosten?” ₇Yesus piki den taki: “Un no abi fu sabi a ten noso a yuru di a sani dati o psa. Na a P'pa abi makti èn na En o meki a psa oten A wani. ₈Ma unu o kisi krakti te a Santa Yeye kon na un tapu. Dan un sa de kotoigi fu Mi na ini Yerusalem, na ini heri Yudea nanga Samaria, èn te na den moro fara presi fu grontapu.”

₉Baka di A taki den sani disi, Gado teki En go na heimel let' na den fesi. Dan wan wolku tapu En, èn den no ben kan si En moro. ₁₀Di den ben e luku go na loktu ete, fa A e gwe, dan wantron so tu man ini weti krosi ben tnapu na den sei. ₁₁Den man taigi den taki: “Un man fu Galilea, fu sanede un tnapu dyaso e luku go na loktu? A srefi Yesus disi, di Gado teki go na heimel, o drai kon baka tapu a srefi fasi fa un si taki A go na heimel.”

₁₂Dan den man kmopo fu a bergi di den e kari Oleifbergi, go baka na Yerusalem. A bergi disi no ben de fara fu Yerusalem. A no ben doro wan kilometer. ₁₃Di den doro ini a foto, den go na a kamra na sodro pe den ben e tan a ten dati. Den nen fu den man ben de: Petrus, Yohanes, Yakobus, Andreas, Filipus, nanga Tomas. Bartolomeus, Mateus, nanga Yakobus a manpikin fu Alfeus. Dan yu ben abi ete Simon fu a grupu fu den Seloten, nanga Yudas a manpikin fu Yakobus. ₁₄Ala den man disi ben tan begi leki wan man makandra nanga Maria a m'ma fu Yesus, den brada fu En, nanga wantu tra umasma.

₁₅Wan fu den dei dati, Petrus opo tnapu fu taki nanga den bribisma. A dei dati wan hondro nanga tutenti sma so ben kon makandra. ₁₆Petrus taigi den taki: “Brada, a sani san skrifi ini a Santa Buku abra Yudas Iskariot ben musu fu psa. Langa ten na fesi, a Santa Yeye ben meki kownu David taki fu Yudas, di ben tyari den sma go grabu Yesus. ₁₇Yudas ben de wan fu unu, èn a ben kisi a srefi wroko fu du leki unu. ₁₈Nanga a moni di Yudas ben kisi fu a ogri di a du, a bai wan pisi gron. A fadon langalanga nanga fesi, en bere priti opo, èn en heri inibere kon na doro. ₁₉Ala den sma fu Yerusalem kon yere a tori dati. Dat' meki den e kari a pisi gron dati na ini den eigi tongo: Akeldama. Dati wani taki: Brudu gron.” ₂₀Petrus taki moro fara taki: “A skrifi ini a buku fu den Psalm taki: ‘Meki a oso fu en tan leigi, no meki no wan sma go libi drape.’ A skrifi tu taki: ‘Meki wan tra sma du a wroko fu en.’ _21-22Fu dat'ede un mus teki wan tra sma di kan ferteri makandra nanga wi, tak' Yesus opo baka na dede. A mus de wan sma di ben waka nanga unu sensi a pisten di Masra Yesus teki dopu na Yohanes, te kon miti a dei di Gado teki En go na heimel.”

₂₃So den bribisma tyari tu man kon na fesi: Matias nanga Yosef. Den sma ben sabi Yosef tu leki Barsabas, èn tra sma ben kari en Yustus. _24-25Dan den sma begi taki: “Masra, Yu sabi ala sma ati. Sori wi sortu wan fu den tu man disi Yu ben teki na fesi kba fu wroko leki Yu boskopuman na a presi fu Yudas, di libi a wroko fu go na a presi di fiti en.” ₂₆Baka dati den hari wan lot èn a lot fadon tapu Matias. So a tron wan boskopuman fu Yesus tu neleki den tra erfu man.