Dag 166 van 365- Nehemia 1-3 en Handelingen 2:1-21

₁Den sani di Nehemia, a manpikin fu Hakalya, du.

Ini a mun Kislew, ini a di fu tutenti yari, mi ben e wroko ini a tranga foto Susan. ₂Dan Hanani, wan fu den brada fu mi, kon luku mi. Makandra nanga wantu tra man a ben kmoto fu Yuda. Mi aksi den fa fu den sma fu Yuda di ben kmoto fu a kondre pe den ben de strafuman, èn fa a de nanga Yerusalem. ₃Den taigi mi taki: “Den sma fu Yuda di ben kmoto libilibi fu a kondre pe den ben de strafuman, èn di e libi baka ini Yuda, de ini bigi nowtu èn sma e teki den e meki spotu. A skotu fu Yerusalem dati broko fadon èn den bigi doro fu a foto bron.”

₄Di mi yere den sani dati, mi saka sidon èn mi bigin krei. Wantu dei langa mi sari sote, mi faste èn mi begi a Gado fu heimel, ₅taki: “O MASRA, Gado fu heimel, Yu bigi sote èn Yu de fu frede. Yu e hori Yu na Yu ferbontu èn Yu e tan lobi den sma di lobi Yu èn di e hori den gebod fu Yu. ₆Tangitangi, teki ten fu arki, èn luku fa Yu knekti e begi dei nanga neti gi den knekti fu Yu, den Israelitisma. Mi e taigi Yu tak' wi Israelitisma, sondu na Yu fesi; owktu mi nanga mi famiri sondu. ₇Wi sondu hebi na Yu fesi, fu di wi no hori wi na den gebod, den sani di wi mus tan du nanga den sani na san wi ben mus tan hori wisrefi. Na Yu ben gi yu knekti Moses den sani disi. ₈Ma MASRA, memre tak' Yu ben taigi Yu knekti Moses taki: ‘Efu un drai un baka gi Mi, Mi o panya un go mindri den tra folku. ₉Ma efu un drai kon baka na Mi èn hori den gebod fu Mi, Mi o tyari un kon baka awinsi o fara un ben de. Mi o tyari un kon na a presi di Mi ben teki leki a presi pe sma mus gi Mi nen grani.’ ₁₀MASRA, den Israelitisma na den knekti fu Yu, den na Yu pipel. Yu ben ferlusu den nanga a bigi krakti èn tranga anu fu Yu. ₁₁Tye MASRA, tangitangi, poti yesi arki mi begi, nanga den begi fu den di e dini Yu nanga prisiri. Meki sani waka bun gi mi tide, èn meki a kownu du mi wan bun.” Na mi ben e kanti win gi kownu a pisten dati.

₁Ini a mun Nisan, di kownu Artaksasta ben de tutenti yari na makti, den tyari win gi en. Mi kanti gi en èn mi langa a kan gi en. Ma mi ben e sari, èn na a fosi leisi kownu ben si mi so. ₂Dat' meki a aksi mi taki: “Fu sanede yu e luku so sari? Na wan sani mus e dangra yu, bika a no siki yu e siki.” Mi skreki sote. ₃Dan mi taigi en taki: “Mi kownu, mi e winsi yu wan langa libi! Mi no man prisiri, fu di a foto pe den afo fu mi beri, broko te na gron èn den bigi doro fu a foto bron.” ₄Ne kownu aksi mi taki: “San yu wani dan?” Mi begi a Gado fu heimel, ₅dan mi piki kownu taki: “Mi kownu, efu a no o de wan problema gi yu, èn efu yu wani du yu knekti wan bun, dan yu seni mi go na Yuda fu go meki a foto baka, pe den afo fu mi beri.” ₆A wefi fu kownu ben sidon na en sei, di a aksi mi taki: “Omeni ten yu o abi fanowdu èn o ten yu o drai kon baka?” Di kownu agri fu seni mi go, mi taigi en oten mi o gwe. ₇Ma mi begi en tu taki: “Mi kownu, efu a no o de wan problema gi yu, skrifi wan brifi gi mi fu mi gi den komsarsi fu a kontren na westsei fu Eufratliba, fu den kan meki mi psa go na Yuda. ₈Yu o man gi mi wan brifi tu gi Asaf, a edeman fu a busi fu yu, fu a gi mi udu? Bika mi o abi udu fanowdu gi den postu fu den bigi doro fu a fort na a tempel, fu yepi meki a skotu fu a foto, nanga gi a oso pe mi o libi.” Dan fu di Gado ben de nanga mi, kownu gi mi den brifi di mi aksi en. ₉Kownu ben meki wantu ofisiri nanga srudati tapu asi, go nanga mi. Dan di un doro na den komsarsi fu a kontren na westsei fu Eufratliba, mi langa den brifi fu kownu gi den. ₁₀Sanbalat fu Horon nanga Tobia, wan Amonitisrafu, kisi bigi atibron di den yere tak' wan sma kon di ben wani yepi den Israelitisma.

₁₁Dri dei baka di mi ben doro na Yerusalem, ₁₂mi opo neti dan mi go na waka nanga wantu man. Mi no ben taigi no wan sma san a Gado fu mi ben poti tapu mi ati fu du gi Yerusalem. Mi no ben abi no wan tra meti na mi dan a buriki tapu san mi ben e sidon. ₁₃A neti dati, mi waka na a Dalpoort, psa na sei a Snekiwatrapeti, kon fadon na a Mestpoort. Drape mi ondrosuku den skotu fu Yerusalem di ben broko fadon, nanga den bigi doro fu a foto di ben bron. ₁₄Baka dati, mi go moro fara na a Bronpoort nanga a Kownupeti. Ma a buriki fu mi no ben man psa den brokobroko ston tapu a pasi fu go moro fara. ₁₅Dat' meki mi kren a srefi neti dati, fu a lagi pisi pe mi ben de, go na loktu, go ondrosuku a skotu. Baka dati mi drai gwe èn mi waka na a Dalpoort go na oso baka. ₁₆Den tiriman fu a foto no ben sabi pe mi ben go èn san mi ben go du. Bika te na a ten dati, mi no ben ferteri no wan fu den kondreman fu mi, den Dyusma, noti; no den priester, no den heihei sma, no den tiriman, no den man di bo yepi du a wroko, mi ferteri wan sani. ₁₇Ma now mi taigi den taki: “Un srefi e si a bigi nowtu ini san wi de. Bika Yerusalem broko fadon èn den bigi doro fu a foto bron. We, meki un meki a skotu fu a foto baka, dan sma no sa teki un e meki spotu moro langa.” ₁₈Dan mi ferteri den fa Gado ben de nanga mi èn fu a taki fu mi nanga kownu. Ne den taki: “Dan meki un opo wantron fu bigin meki en baka.” Èn nanga dek'ati den bigin nanga a bun wroko. ₁₉Di Sanbalat fu Horon, Tobia, a Amonitisrafu, nanga a Arabiri Gesem, yere a tori, den lafu unu èn den bigin afrontu unu. Den taki: “San un e du drape? Na seti un kon seti unsrefi fu broko nanga kownu?” ₂₀Ma mi piki den taki: “A Gado fu heimel, o yepi wi fu ala sani waka bun. Wi leki knekti fu En, o bigin bow baka. Ma un dati, un no abi noti dyaso ini Yerusalem, no wan leti noso rutu un abi dyaso.”

₁Dan granpriester Elyasib nanga den tra priester, bigin bow a Skapupoort baka. Di den kba, den poti en ini Gado anu, dan den anga den doro na en. Den poti a pisi tu fu a skotu di e waka fu a Skapupoort go miti a Meatoren nanga a Hananeltoren, ini Gado anu. ₂Den sma fu Yeriko, bow wan pisi fu a skotu sei a pisi di den priester meki. Sakur, a manpikin fu Imri, ben e bow na den sei. ₃A famiri Senaa bow a Fisipoort baka; den poti den postu, den fasi den doro, dan den poti bowtu nanga greni leki sroto. ₄Meremot, a manpikin fu Uria, a granpikin fu Hakos, bow a pisi skotu na den sei baka. Mesulam, a manpikin fu Berekya, a granpikin fu Mesesabel, ben e bow na en sei. Èn Sadok, a manpikin fu Baana, bow a pisi sei Mesulam, baka. ₅Den sma fu Tekoa, bow a pisi skotu baka na en sei. Ma den heihei man na den mindri, no ben wani du a wroko di a edeman fu den gi den. ₆Yoyada, a manpikin fu Paseak, bow a Owrupoort baka, makandra nanga Mesulam, a manpikin fu Besodya. Den poti den postu, den fasi den doro, dan den poti bowtu nanga greni leki sroto. ₇Dan Melatya fu Gibeon bow na den sei makandra nanga Yadon fu Meronot, den sma fu Gibeon nanga den di fu Mispa. Na Mispa a kownu-oso fu a komsarsi fu a kontren na a westsei fu Eufratliba ben de. ₈Usiyel, a manpikin fu Harhaya, di famiri ben de gowtusmeti, bow sei a pisi dati. Èn Hananya, a man di e meki zalf, bow a pisi skotu na en sei baka. Na so den meki a skotu fu Yerusalem go te na a bradi skotu. ₉Dan Refaya, a manpikin fu Gur, teki a pisi sei a bradi skotu. Refaya ben de edeman fu wan fu den tu pisi fu a distrikti Yerusalem. ₁₀Yedaya, a manpikin fu Harumaf, wroko tapu a tra pisi skotu, di ben de leti na abra sei fu en eigi oso. Hatus, a manpikin fu Hasabneya, ben e wroko na en sei. ₁₁Èn Malkia, a manpikin fu Harim, nanga Hasub, a manpikin fu Pakat-Moab, bow a tra pisi skotu sei di fu Hatus baka. Na den bow a toren baka tu di ben abi den onfu. ₁₂Salum, a manpikin fu Halokes, ben e wroko na den sei, makandra nanga den umapikin fu en. Salum ben de a edeman fu a tra pisi fu a distrikti Yerusalem. ₁₃Hanun, makandra nanga den sma fu Sanoak, bow a Dalpoort baka. Den seti en poti baka, den poti doro na en, dan den poti bowtu nanga greni leki sroto. Dan den bow a skotu go te na a Mestpoort baka. A pisi dati ben langa sowan feifi hondro meter. ₁₄Dan Malkia, a manpikin fu Rekab, bow a Mestpoort baka. A seti en poti baka, dan a poti doro, bowtu nanga greni na en. Malkia ben de edeman fu a distrikti Bet-Hakerem. ₁₅Salum, a manpikin fu Kolkosa, bow a Bronpoort baka. A seti en poti baka nanga wan daki èn a poti doro na en. Dan a poti bowtu nanga greni leki sroto. Di a kba, a meki a skotu baka di ben e bigin na a watrapeti tapu a dyari fu kownu, èn di ben e go te na den trapu fu a foto fu David. Salum ben de edeman fu a distrikti Mispa. ₁₆Baka a pisi di Salum meki, Nekemya, a manpikin fu Asbuk, meki a pisi fu a skotu di ben bigin abrasei fu a berpe pe kownu David nanga den famiri fu en beri. A skotu dati ben e psa na a watrapeti di ben meki drape, go te na a Oso fu den Dyadya Fetiman. ₁₇Regum, a manpikin fu Bani, ben e tiri den Lefitiman di meki a tra pisi fu a skotu baka. Èn Hasabya, a edeman fu wan fu den tu pisi fu a distrikti Keila, bow a pisi na en sei baka, gi a distrikti fu en. ₁₈Den tra Lefitiman di ben e wroko na den sei ben de: Binui, a manpikin fu Henadad, di ben de edeman fu a tra pisi fu a distrikti Keila, ₁₉Eser, a manpikin fu Yesua, èn edeman fu Mispa. En bow a pisi skotu baka sei Binui, abrasei fu a pasi di e waka go na loktu na a maksin fu den fetisani na a Uku. ₂₀Baruk, a manpikin fu Sabai. En bow a tra pisi skotu nanga ala prisiri baka. A pisi dati ben e bigin na a Uku, go te na a mofodoro fu a oso fu granpriester Elyasib. ₂₁Meremot, a manpikin fu Uria, a granpikin fu Hakos. En bow a tra pisi skotu baka di ben e bigin na mofodoro fu a oso fu Elyasib, go te na a kba fu a oso. ₂₂Dan den priester fu a kontren fu Yordanliba, bow a tra pisi fu a skotu baka. ₂₃Benyamin nanga Hasub bow a tra pisi, leti na abrasei fu pe den e libi, baka. Asarya, a manpikin fu Maaseya, a granpikin fu Ananya, bow a pisi skotu baka di ben de sei a oso fu en. ₂₄Binui, a manpikin fu Henadad, bow a pisi baka di bigin na a oso fu Asarya, go te na a Uku nanga a pisi di e yepi kraka a skotu. ₂₅Palal, a manpikin fu Usai, bow a pisi skotu baka abrasei fu a Uku nanga a hei wakti-oso. A wakti-oso dati ben de fu si dorosei fu a kownu-oso èn a ben de tapu a dyari fu a strafu-oso. Pedaya, a manpikin fu Paros, ₂₆makandra nanga den man di ben e yepi ini a tempel, di e libi tapu a pikin bergi Ofel, bow a tra pisi baka di go te na a Watrapoort na oostsei nanga a hei wakti-oso di ben de fu si. ₂₇Sei a pisi dati, den sma fu Tekoa bow wan pisi baka, di ben e bigin na a bigi hei wakti-oso di ben de fu si, go te na a skotu na a pikin bergi Ofel. ₂₈Den priester bow a pisi baka di ben e bigin na a Asipoort. Ibriwan fu den ben meki a pisi abrasei fu en eigi oso. ₂₉Èn Sadok, a manpikin fu Imer, bow a skotu baka abrasei fu en oso. Dan Semaya, a manpikin fu Sekanya, bow a skotu sei a pisi dati baka. En ben de a waktiman fu a Oostpoort tu. ₃₀Hananya, a manpikin fu Selemya, bow a tra pisi baka, makandra nanga Hanun a di fu siksi boi fu Salaf. Èn Mesulam, a manpikin fu Berekya, bow a pisi fu a skotu abrasei fu en eigi oso baka. ₃₁A gowtusmeti Malkia, teki a tra pisi fu a skotu. A bow en baka go te na a oso pe den man di ben yepi ini a tempel nanga den baiman nanga seriman e libi na abrasei fu a Waktipoort, èn a hari en go te na a kamra tapu a skotu na a noordoost uku. ₃₂Dan den gowtusmeti nanga den seriman, bow a pisi skotu baka di ben de mindri a kamra tapu a skotu na a noordoost uku, nanga a Skapupoort.

₁Tapu a Pinksterdei ala den sma fu Yesus ben kon makandra. ₂Dan wantron so den yere wan babari kmopo fu heimel leki te wan tranga winti e wai. A ben furu a heri oso pe den ben de. ₃Ne den si fa wan sani leki pikinpikin faya panya go tapu a ede fu ibriwan fu den. ₄Dan ala den sma kon furu nanga a Santa Yeye èn den bigin taki ini tra tongo leki fa a Santa Yeye ben wani fu den taki.

₅A pisten dati yu ben abi Dyusma ini Yerusalem di ben kmopo na ala sei fu grontapu. Den sma disi ben hori densrefi trutru na a Dyubribi. ₆Di den yere a babari, wan bigi grupu kon makandra. Den no ben man ferstan fa a kan tak' iniwan fu den ben e yere fa den man ben e taki nanga den ini den eigi tongo. ₇Den ben ferwondru sote taki den aksi taki: “Ala den man di e taki drape, a no sma fu Galilea? ₈Fa a du kon dan taki wi alamala e yere san den e taki ini wi eigi tongo? ₉Wi kmopo fu Partia, Media, Elam, Mesopotamia, Yudea, Kapadosia, Pontus nanga Asia. ₁₀Trawan fu wi na fu Frigia, Pamfilia, Egipte, nanga den kontren fu Libia ini a birti fu a foto Sirena. Sma de dya fu Roma tu, Dyusma nanga sma di kon teki a Dyubribi. ₁₁Sosrefi sma fu Kreta nanga Arabia de dya tu. Èn un alamala e yere fa den e taki na ini un eigi tongo fu den bigi sani san Gado du.” ₁₂Den ben ferwondru sote èn den no ben sabi san den ben mus prakseri. A wan ben e aksi a trawan taki: “San a sani disi wani taki?” ₁₃Ma tra sma ben e meki spotu taki: “Na drungu den drungu.”

₁₄Dan Petrus opo tnapu nanga den tra erfu boskopuman fu Yesus. A opo en sten èn a taigi den taki: “Un Dyusma di kmopo fu ala sei, nanga unu di e libi ini Yerusalem, un yere! Arki bun san mi o taigi unu, bika disi na wan sani san un mus sabi. ₁₅Den man disi no drungu soleki fa un denki, bika na neigi yuru mamanten un de. ₁₆Ma san un e si dya, na san a profeiti Yow ben taki kba. A ben taki: