Dag 167 van 365- Nehemia 4-6 en Handelingen 2:22-47

₁Di Sanbalat yere tak' wi e bow a skotu baka, en ati bron sote taki a ben e nyan en niri. Dan a bigin teki den Dyusma e meki spotu, ₂let' fesi den heihei sma nanga den srudati fu Samaria. A taki: “San den swakiswaki Dyusma denki tak' den e du? Den denki taki den o man meki a skotu baka? Na trutru den wani tyari ofrandi baka? Den denki taki na ini wan dei den o man meki a skotu baka? Èn fa den o man meki wan steifi skotu nanga den bron ston di didon brokobroko drape?” ₃Dan Tobia fu Amon, di ben tnapu na en sei, taki: “Meki den meki nomo, wan krab'dagu wawan kan lon tuka nanga a ston skotu fu den èn a e fadon kba.”

₄Ne mi begi taki: “Gado, yere fa den e teki un e meki spotu. Meki den butu fu a broko di den e broko un saka. Meki den feyanti kisi den tyari gwe leki strafuman na wan dorosei kondre. ₅No gi den pardon fu den kruktu du èn no fergiti den sondu fu den, bika den afrontu den man di e bow a skotu leti na trawan fesi.”

₆Wi fu wi sei, go moro fara fu bow a skotu, èn un hari a heri skotu go afu fu a hei fu en. Bika a pipel ben de fayafaya e du a wroko.

₇Ma Sanbalat, Tobia, den Arabiri, den Amonitisma nanga den sma fu Asdod, atibron sote di den yere tak' a wroko na a skotu fu Yerusalem e go, èn taki pikinso moro ala den opo pisi na a skotu, ben tapu. ₈Dat' meki den meki mofo fu kon feti nanga Yerusalem, fu bruya den sma. ₉Ma unu ben e begi un Gado, èn dei nanga neti un ben e poti waktiman na a skotu, fu di un ben sabi san den wani du. ₁₀A ten dati den sma fu Yuda bigin krutu, taki:

₁₅Di den feyanti fu unu kon yere tak' wi sabi san den wani du èn tak' na Gado pori a prakseri fu den, iniwan fu unu ben kan drai go baka na a wroko di un ben e du na a skotu. ₁₆Ma now mi poti afu fu den man fu mi na a wroko; a tra afu mi poti fu hori wakti nanga lansri, schild, bo, nanga isri bosroko. Den ofisiri ben tnapu baka ala den man disi fu Yuda. ₁₇Na so a wroko ben e wroko na a skotu; den syowman ben e wroko nanga wan sei anu, èn den ben e hori wan lansri ini den tra anu. ₁₈Ala den man di ben e bow, ben anga den deigri na den sei bere. A man di ben mus bro a tutu te a feyanti bo wan du wan sani, ben tnapu na mi sei. ₁₉Dan mi taigi den heihei sma, den tiriman nanga den tra sma taki: “Un prati un srefi na a heri skotu fu di furu wroko de fu du. Ma so, un tnapu fara fu unsrefi. ₂₀Dat' meki, te un yere tak' a tutu bro, un mus kon wantron pe wi de. A Gado fu unu o feti a feti gi unu.” ₂₁Na so un ben e wroko a wroko; dei no ben e krin wan leti fasi, un ben de na a wroko kba, èn un ben tan te leki a ben e dungru. Èn afu fu den man fu mi, ben e hori den lansri ini den anu. ₂₂A srefi ten dati, mi komanderi a pipel tu taki: “Ala sma mus sribi na ini Yerusalem nanga en knekti. Dan un kan hori wakti te neti èn wroko te dei.” ₂₃Mi, den brada fu mi, den knekti nanga den waktiman fu mi, ben e tan nanga un krosi na un skin. Ini wan fu unu ben hori un lansri ini un anu tu, srefi te un ben e go na a watrapeti.

₁Now den Dyusma di ben e libi na den dorpu, man makandra nanga den uma, bigin krutu trangatranga abra den gudu kondreman fu den. ₂Sowan fu den taki: “Den manpikin nanga den umapikin fu unu furu, wi abi karu fanowdu fu tan na libi.” ₃Trawan fu den taki: “Angri ben e kiri un sote ini a angriten, tak' un ben abi fu panti un pranigron, un droifidyari nanga un oso.” ₄Wan tra grupu tak' baka taki: “Un dati na moni un leni tapu un pranigron nanga un droifidyari fu ben kan pai kownu a moni di un ferplekti fu pai. ₅Ma wi nanga den gudu kondreman na fu a srefi folku. Den manpikin fu unu no e du ondro gi den di fu den. Ma now unu mus gi den un manpikin nanga un umapikin leki panti, èn den e teki sowan fu den umapikin fu unu leki srafu kba. Not'noti un man du, bika sowan fu den abi un pranigron nanga un droifidyari kba.”

₆Di mi yere den kragi disi, èn di mi si tak' den sani tru, mi atibron sote. ₇Dan mi wegi a heri tori go, mi wegi en kon. Ne mi piri ai gi den heihei sma nanga den tiriman. Mi sori den tak' den no kan teki panti fu den eigi kondreman. Dan fu tyari wan kba kon na a tori, mi kari wan bigi konmakandra. ₈Mi taigi den drape taki: “Nanga ala san un ben abi un bai den kondreman fu un baka di ben seri gi dorosei folku. Ma unu, iya unu, e dwengi den fu den seri densrefi baka.” Den tan tiri, den no ben man piki noti. ₉Mi taigi den moro fara taki: “San un e du no bun. A mus de fu si tak' un e lespeki Gado, bika na so wawan un man tapu den folku di no lobi wi, fu no teki un e meki spotu. ₁₀Misrefi, den brada nanga den man fu mi, leni den sma moni nanga karu. Ma meki un tyari wan kba kon now na a pai di den mus pai un baka. ₁₁Tidetide un mus gi den den pranigron baka, sosrefi den droifidyari, den dyari nanga den oleifbon èn owktu den oso. Èn un mus gi den a wan prosenti baka di den ben pai unu tapu a moni, a karu, a win nanga a oleif-oli di un ben leni den.” ₁₂Den man piki taki: “Un sa du san yu taki. Un sa gi den ala den sani fu den baka, èn den no abi fu pai un noti moro.” Ne mi kari den priester, dan mi meki den heihei sma nanga den tiriman fu a foto sweri na den priester fesi tak' den o du san den pramisi. ₁₃Dan mi seki mi dyakti tu, èn mi taki: “Na so Gado o seki ala sani puru fu a sma di no hori en na a pramisi disi. Gado o puru en oso nanga ala en tra sani na en anu; ala sani Gado o puru na en anu.” Ala sma di ben drape taki: “Iya, meki a psa so.” Dan den gi MASRA grani, èn ala den sma hori den na a pramisi.

₁₄Ma mi du moro. Kownu Artaksasta ben poti mi twarfu yari langa leki komsarsi fu Yuda. Dati ben de di a ben de tutenti yari na makti te leki di a ben de dritenti-na-tu yari na makti. Ini den twarfu yari dati, mi nanga den brada fu mi no ben wani taki a pipel ben mus sorgu gi unu, aladi a ben de den plekti fu du dati gi mi leki komsarsi. ₁₅Den komsarsi di waka na mi fesi, no ben meki en makriki gi a pipel. Aladei den sma ben mus sorgu taki den abi brede nanga win, ma owktu fotenti solfru moni. Srefi den wrokoman fu den ben wani prei basi gi a pipel. Ma fu di mi ben e frede Gado, no wan fu den sani dati mi du. ₁₆Misrefi ben e yepi fu meki a skotu baka; ma un no teki no wan pisi gron gi unsrefi. Ala den man fu mi ben drape tu tapu a wroko. ₁₇Doro mi ben e kari den heihei Dyusma, nanga den edeman, wan hondro feifitenti man makandra, fu kon nyan nanga mi. Den sma srefi fu den kondre na wi lontu, di ben kon tapu fisiti, ben e nyan nanga mi. ₁₈Ala dei, mi ben e sorgu gi wan kaw, siksi fu den moro bun skapu nanga bus'fowru. Baka ibri tin dei, a win maksin fu mi ben mus lai baka. Ma awinsi fa mi ben e du den sani dati, toku mi no ben wani tak' a pipel ben mus sorgu gi mi leki komsarsi, bika mi ben sabi tak' a libi no ben makriki gi den. ₁₉Mi Gado, memre ala a bun di mi du gi a pipel disi.

_1-2Leki fa Sanbalat, Tobia, a Arabiri Gesem nanga ala den tra feyanti fu unu, yere tak' mi ben kba meki a skotu èn tak' opo presi no ben de na en moro, Sanbalat nanga Gesem seni wan boskopu gi mi. A pisten dati mi no ben anga den doro fu den poort srefi ete. A boskopu ben taki so: “Wi ben wani fu un miti unsrefi na Kefirim ini a Onodal.” Ma fu di den ben wani du mi ogri, ₃mi seni boskopuman go na den nanga a boskopu disi: “Mi no o man kon, bika mi abi furu prenspari wroko fu du. A wroko o tapu efu mi mus libi en fu kon na unu.” ₄Fo leisi den seni a srefi boskopu gi mi, ma ala leisi mi seni piki den a srefi sani. ₅Sanbalat hori doro èn fu a di fu feifi leisi a seni en knekti kon nanga wan opo brifi ini en anu. ₆Ini a brifi ben skrifi taki:

“Wan tori e lolo mindri a pipel, èn Gesem taigi mi tak' a tru tak' yu e meki a skotu baka fu di yu nanga den Dyusma wani bigin wan feti. A tori e taki tu tak' yu wani tron den kownu. ₇Yu poti profeiti srefi fu waka lontu na ini Yerusalem fu bari taki: ‘Yuda abi wan kownu baka!’ Yu sa ferstan tak' kownu sa yere den sani disi. Na dat' meki mi e aksi fu un konmakandra fu taki.”

₈Ma mi seni piki en taki: “Den sani di yu e taki no tru, na yusrefi meki den.” ₉Den ben e meki muiti fu tapu skreki gi unu. Nanga dati den ben e howpu tak' un ben o tapu a wroko, fu a no kba. Ma mi ben e aksi Gado fu A gi mi krakti.

₁₀Wan leisi mi go fisiti Semaya, a manpikin fu Delaya èn granpikin fu Mehetabel, di ben tapu ensrefi ini en oso. A taigi mi taki:

₁₅Un meki a skotu ini feifitenti-na-tu dei. A ben kba tapu a di fu tutenti-na-feifi dei fu a mun Elul. ₁₆Di den feyanti fu wi, nanga den folku lontu wi, yere dati, den kon frede gi wi. Den no ben abi wan hei denki fu densrefi moro, fu di den ben kon ferstan tak' na Gado yepi un du a wroko.

₁₇A srefi ten di a skotu ben e meki, heihei sma fu Yuda nanga Tobia ben e skrifi furu brifi gi makandra. ₁₈Fu di Tobia ben trow nanga a umapikin fu Sekanya, a manpikin fu Arak, a ben abi wan banti nanga furu sma fu Yuda. Yokanan, a manpikin fu Tobia, ben trow tu nanga a umapikin fu Mesulam, a manpikin fu Berekya. ₁₉Te den sma dati ben de na mi, den ben e taki soso bun fu en; te den ben de na en, den ben e ferteri en ala san mi nanga den taki. Dan Tobia ben e seni brifi kon baka fu tapu skreki gi mi.

₂₂Petrus taigi den moro fara taki: “Un sma fu Israel, un arki san mi e taki. Na Gado srefi ben seni Yesus fu Nasaret kon. Dati ben de fu si ini den bigi sani, den wondru, nanga den marki di Gado meki A du na un mindri, leki fa un sabi. ₂₃Ma un tyari a Yesus disi gi sma di no sabi a wèt fu Gado, fu den spikri En kiri na wan kroisi. Bika na Gado srefi ben wani meki a psa so. ₂₄Ma dan Gado puru Yesus ini a pina fu dede, èn A meki A kon na libi baka. Bika dede no ben man hori En. ₂₅David srefi ben taki fu Yesus di a taki:

₂₉Petrus taigi den moro fara taki: “Brada, mi kan taigi unu krinkrin tak' wi afo David dede kba èn den beri en. A grebi fu en de dya te nanga a dei fu tide. ₃₀David ben de wan profeiti, èn a ben sabi taki Gado ben pramisi en nanga wan sweri tak' A o poti wan bakapikin fu en leki kownu na ini en presi. ₃₁Bika David ben si na fesi taki a Mesias ben o kon na libi baka di a ben taki tak' Gado no ben o libi En na ini dedekondre, èn taki A no ben o meki a dedeskin fu En pori. ₃₂Gado meki a Yesus disi kon baka na libi èn un alamala na kotoigi fu a sani dati. ₃₃Dan Gado teki En na heimel èn A gi En a moro hei presi na En let'anu sei. Gado gi En a Santa Yeye di A ben pramisi. Dan Yesus poti a Santa Yeye na wi tapu. Dati na san un e si èn san un e yere now. _34-35Bika David srefi no ben opo go na heimel, ma a taki: ‘Masra Gado taigi mi Masra taki: Kon sidon na Mi let'anu sei, te leki Mi meki den feyanti fu Yu tron Yu futubangi.’ ₃₆Fu dat'ede ala sma fu Israel mus sabi krin tak' Gado meki a Yesus disi, di unu spikri na wan kroisi, tron Masra nanga Mesias.”

₃₇Di den sma yere a sani disi, den firi en srefsrefi. Dan den aksi Petrus nanga den tra boskopuman fu Yesus taki: “Brada, san un mus du dan?” ₃₈Petrus piki den taki: “Un mus drai un libi, èn un mus teki dopu ini a nen fu Yesus Kristus, fu un kisi pardon fu un sondu. Dan Gado sa gi unu a Santa Yeye. ₃₉Bika Gado pramisi fu gi a Santa Yeye na unu nanga den pikin fu unu, sosrefi na den sma di de farawe. Masra Gado o gi a Santa Yeye na ala sma di A kari kon na En.” ₄₀Nanga furu tra wortu Petrus taki nanga den fu Yesus èn a warskow den taki: “Un drai un libi kmopo na mindri den sma di no e du Gado wani srefsrefi.”

₄₁So den sma di bribi san Petrus taki teki dopu. Tapu a dei dati, wan dri dusun sma so kon ini a grupu fu den bribisma. ₄₂Den ben e tan hori na a leri fu den boskopuman fu Yesus èn den ben e libi leki wan nanga makandra. Sosrefi den ben nyan èn begi nanga makandra tu. ₄₃Ala den sma ben kisi bigi lespeki gi Gado, èn den boskopuman fu Yesus ben du furu wondru èn den ben sori den sma furu marki fu Gado. ₄₄Ala den sma di ben teki bribi, ben e kon makandra èn den no ben e hori noti gi densrefi. ₄₅Den ben e seri san den abi dan den prati a moni. Ibri sma ben kisi san a ben abi fanowdu. ₄₆Ala dei den bribisma ben e kon makandra ini a tempel. Den ben nyan na makandra oso nanga prisiri èn nanga wan krin ati. ₄₇Den ben e prijse Gado, èn a heri folku ben e lespeki den. Ala dei Masra ben e tyari moro sma di A ferlusu, kon na a grupu.