Dag 175 van 365- Job 1-2 en Handelingen 7:22-43

₁Fos'fosi wan man ben e libi ini a kondre Us di ben nen Yob. Sma no ben man sori finga tapu Yob, a ben de fu fertrow, a ben e lespeki Gado èn a no ben wani abi not'noti fu du nanga ogridu. ₂Yob ben abi seibi manpikin nanga dri umapikin. ₃Moro fara a ben abi seibi dusun skapu nanga krabita, dri dusun kameel, wan dusun kaw di ben wroko tu na tu, nanga feifi hondro umaburiki. A ben abi bun furu umasrafu nanga mansrafu tu. Yob ben de a moro guduman fu a sei pe a son e opo. ₄Den manpikin fu en ben abi a gwenti fu hori fesa èn den ben e kari den dri s'sa fu den kon fu nyan èn dringi makandra nanga den. Wan fru wan den brada ben e du a sani dati na den eigi oso. ₅Ma baka te iniwan fu den brada ben hori so wan fesa, Yob ben kari ala den pikin fu en kon na en, fu ben krin den. Dan Yob ben e opo fruku mamanten fu bron wan meti leki ofrandi gi Gado gi iniwan fu den. Bika a ben e prakseri na ini ensrefi taki: “Kande den pikin fu mi sondu èn afrontu Gado ini den prakseri.” Ala leisi baka Yob ben e du a sani dati.

₆Wan dei den engel go fesi MASRA èn satan, a wan di e kragi libisma, ben go tu. ₇Ne MASRA aksi satan taki: “San yu ben e du so den ten disi?” Satan piki MASRA taki: “Mi ben go teki wan koiri na grontapu èn mi wakawaka na alasei fu en.” ₈Dan MASRA taigi satan taki: “Dan yu mus fu si fa Mi knekti Yob e tyari ensrefi. Bika no wan tra sma na grontapu de leki en. Sma no man sori finga na en tapu, a de fu fertrow, a e lespeki Mi èn a no wani abi not'noti fu du nanga ogridu.” ₉Satan piki MASRA taki: “Ma a no fu soso meki a e lespeki Yu. ₁₀Bika Yu e kibri en, Yu e kibri a uma nanga den pikin fu en, sosrefi ala san a abi. Yu e blesi a wroko di a e du owktu, dat' meki den meti fu en furu sote tak' den kan furu a heri kondre. ₁₁Ma efu Yu sa teki ala san a abi, Yu o si tak' a o fluku Yu na ala sma fesi.” ₁₂Dan MASRA taigi satan taki: “A bun, Mi e gi yu a makti fu yu teki ala san a abi, ma ensrefi yu no mus fasi.” Dan satan kmopo na fesi MASRA.

₁₃Wan dei di den manpikin nanga den umapikin fu Yob ben de na a oso fu a moro bigi brada fu den, e nyan èn dringi win, ₁₄wan fu den knekti fu Yob lon go na Yob go taigi en taki: “Un ben e wroko nanga den kaw fu drai a doti èn den buriki ben e nyan grasi krosbei fu unu, ₁₅di wantronso wan grupu Sabeasma broko kon na un tapu. Den kiri den tra knekti nanga deigri èn den fufuru den meti. Mi wawan ben kan lowe fu kon taigi yu san psa.” ₁₆A knekti no ben kba taki ete, di wan trawan lon kon. A dati taki: “Faya di e koti na heimel kisi den skapu, den krabita nanga den knekti di ben e luku den. A bron den èn den alamala dede. Mi wawan ben kan lowe fu kon taigi yu san psa.” ₁₇A knekti dati ben e taki ete, di wan trawan lon kon. A dati taki: “Den Kaldeasma broko kon fu dri sei na un tapu. Den kiri den tra knekti nanga deigri, èn den fufuru ala den kameel tyari gwe. Mi wawan ben kan lowe fu kon taigi yu san psa.” ₁₈A di fu dri knekti ben e taki ete, di ete wan trawan lon kon. A dati taki: “Den manpikin nanga den umapikin fu yu ben e nyan èn den ben e dringi win ini a oso fu den brada, a fosi manpikin fu yu, ₁₉di wantronso wan hebi winti kmoto fu a bigi dreisabana go tuka nanga a oso fu en. Ala den fo skotu broko fadon tapu den pikin fu yu. Den alamala dede. Mi wawan ben kan lowe fu kon taigi yu san psa.” ₂₀Ne Yob opo, a priti a langa dyakti fu en, èn a piri en ede leki marki taki a ben e sari. Baka dati a fadon go tapu en kindi èn a boigi en ede go te na gron, ₂₁dan a taki: “Nanga leigi anu mi kon na grontapu, nanga leigi anu mi sa drai gwe baka. Na MASRA ben gi mi ala san mi ben abi, na MASRA teki ala sani baka. Prijse a nen fu MASRA!” ₂₂Ala den sani dati di miti Yob, no meki Yob sondu fu sori finga tapu Gado.

₁Wan dei den engel go fesi MASRA èn satan ben go nanga den fesi MASRA tu. ₂Ne MASRA aksi satan taki: “San yu ben e du so den ten disi?” Satan piki MASRA taki: “Mi ben go teki wan koiri na grontapu èn mi wakawaka na alasei fu en.” ₃Dan MASRA taigi satan taki: “Dan yu mus fu si fa Mi knekti Yob e tyari ensrefi. Bika no wan tra sma na grontapu de leki en. Sma no man sori finga na en tapu, a de fu fertrow, a e lespeki Mi èn a no wani abi not'noti fu du nanga ogridu. Èn yu e si tak' a e tan lespeki Mi, awinsi yu meki Mi meki bigi ogri miti en, sondro fu a du wan sani.” ₄Satan piki MASRA taki: “Iya dati tru! A libi fu en prenspari gi en moro ala sani. Libisma no abi trobi fu lasi ala sani, efu den kan tan na libi nomo. ₅Ma efu yu sa meki tak' wan siki naki en na en skin, te kon miti en bonyo srefi, Yu o si efu a no o fluku Yu na ala sma fesi.” ₆Dan MASRA taigi satan taki: “A bun, Mi e gi en abra na ini yu makti, ma na a libi fu en yu no mus go.” ₇Dan satan kmopo fesi MASRA, èn a naki Yob nanga takru sweri, fu en ede go miti en futu. ₈A sani dati meki Yob, di ben sidon ini asisi a pisten dati, teki wan pisi broko kleipatu èn bigin krasi en skin nanga en. ₉Dan a uma fu Yob taigi en taki: “Yu e tan lespeki Gado ete? A moro betre yu fluku En, dan yu dede!” ₁₀Ma Yob piki en taki: “Yu e tak' leki wan sma di no sabi Gado srefsrefi. Efu un e teki a bun fu di Gado, un mus teki a ogri tu!” Ala den sani dati di miti Yob, no meki Yob sondu nanga en mofo fu afrontu Gado.

₁₁Yob ben abi dri mati: Elifas fu Teman, Bildad fu Suak nanga Sofar fu Naama. Di den yere fu a ogri di miti Yob, den teki a besroiti fu go luku en. Den bo miti densrefi na ondropasi èn den bo go na Yob fu low nanga en èn fu trowstu en. ₁₂Den ben de pikinso fara ete di den si Yob, ma den no ben man bribi taki na en ben kon tan so. Ne den bari krei, den priti den krosi èn den fringi santi go na loktu fu fadon tapu den ede leki marki taki den ben e sari. ₁₃Dan den go sidon sei Yob na gron, seibi dei nanga seibi neti langa. No wan fu den opo en mofo fu taki nanga Yob, bika den si taki a ben e pina srefsrefi.

₂₂Moses kisi leri ini ala koni fu den Egiptesma. A tron wan bun takiman èn a ben du bigi sani. ₂₃Di a ben abi fotenti yari, a teki a besroiti fu go luku fa a ben e go nanga den brada fu en, den sma fu Israel. ₂₄Dan a si fa wan fu den e kisi fonfon fu soso. So a dyompo gi a wan di ben kisi a fonfon fu yepi en, èn a naki a man fu Egipte kiri fu pai en baka. ₂₅Moses ben prakseri taki den sma fu en ben o ferstan taki Gado seni en fu puru den na ini katibo. Ma den no ben ferstan a sani dati. ₂₆A tra dei di Moses go baka na den sma fu en, a si fa tu fu den e feti. A go na den fu tapu a feti, èn a taigi den taki: ‘Unu na brada, fu sanede un e feti?’ ₂₇Ma a wan di ben meki a trobi, pusu Moses go na wan sei dan a taigi en taki: ‘Suma poti yu leki wi edeman nanga wi krutubakra? ₂₈Na kiri yu wani kiri mi tu, leki fa yu kiri a man fu Egipte esde?’ ₂₉Di a man taki a sani dati, Moses lowe gwe go tan leki wan doroseisma ini Midyankondre. Drape a kisi tu boi. ₃₀Baka fotenti yari wan engel sori ensrefi na Moses ini a dreisabana krosbei fu a bergi Sinai. A sori ensrefi ini a faya fu wan pikin bon di ben e bron. ₃₁Moses ferwondru di a si a sani dati. Ma di a ben e waka go fu luku a sani moro bun, a yere a sten fu Masra taigi en taki: ₃₂‘Mi na a Gado fu den afo fu yu, a Gado fu Abraham, Isak nanga Yakob.’ Moses skreki tak' a beifi èn a no ben abi dek'ati fu go luku moro. ₃₃Dan Masra taigi Moses moro fara taki: ‘Puru yu susu na yu futu, bika a gron tapu san yu e tnapu na santa gron. ₃₄Mi si bunbun fa den e pina Mi pipel ini Egipte èn Mi yere fa den e dyeme. Dat' meki Mi saka kon fu ferlusu den. So, kon dya, Mi o seni yu go baka na Egipte.’

₃₅A srefi Moses disi, den sma poti na wan sei di den taki: ‘Suma poti yu leki edeman nanga krutubakra?’ Ma Gado poti en leki edeman nanga ferlusuman fu a pipel, nanga a yepi fu a engel di ben sori ensrefi ini a pikin bon di ben e bron. ₃₆Moses du furu wondru nanga marki di a tyari den kmopo fu Egipte, sosrefi di den abra a Redi Se, nanga di den ben de ini a dreisabana fotenti yari langa. ₃₇Na a srefi Moses dati taigi a pipel fu Israel taki: ‘Gado o seni wan profeiti leki mi kon gi unu di sa kmopo na un mindri.’ ₃₈Na a Moses disi ben de nanga a pipel di den kon makandra ini a dreisabana. A ben de nanga den bigisma fu wi èn a ben de nanga a engel di ben taki nanga en tapu a bergi Sinai. Na en kisi wortu san e gi libi, fu gi unu. ₃₉Ma den bigisma fu unu no ben wani du san Moses taigi den. Den poti en na wan sei, èn ini den ati den ben angri fu go baka na Egipte. ₄₀Dan den taigi Aaron taki: ‘Meki popki gi unu fu un anbegi leki gado, dan den sa tyari unu go moro fara. Bika un no sabi san psa nanga a man Moses di tyari unu kmopo fu Egipte.’ ₄₁So den meki wan popki di ben gersi wan yongu kaw fu anbegi leki gado. Den tyari ofrandi gi en èn den ben abi prisiri nanga san den srefi meki. ₄₂Ma Gado drai En baka gi den, èn A libi den fu dini den sani di de fu si na loktu. Ala den sani disi skrifi ini a buku fu den profeiti. Drape a skrifi taki: ‘Sma fu Israel, na gi Mi un ben kiri meti? Na gi Mi un ben tyari ofrandi den fotenti yari ini a dreisabana? ₄₃Nono! Un ben syow a tenti fu Molok nanga a stari fu Romfa. Un srefi meki den sani dati fu anbegi den. Fu dat'ede Mi sa tyari un gwe te psa Babilon.’