Dag 178 van 365- Job 8-10 en Handelingen 8:26-40

₂“Olanga yu o go doro fu taki den sortu sani dati?

Yu e tak' so furu, ma den sani no wani tak' noti.

₃Gado e krutu sani tapu wan leti fasi,

a Wan di abi ala makti no e beni a leti.

₄Efu na sondu den pikin fu yu sondu,

dan Gado gi den abra na a bakapisi fu a sondu.

₅Ma efu yu sa aksi Gado fu A yepi yu,

èn begi a Wan di abi ala makti,

fu a abi sari-ati nanga yu,

₆efu yu ati krin èn yu de fu fertrow,

dan a no abi misi tak' A o kibri yu,

èn gi yu, yu famiri nanga yu oso baka di yu fiti fu kisi.

₇San yu ben abi bifo o luku pikinso,

te yu o poti en sei ala a gudu di yu o kisi bakaten.

₈Mi e begi yu fu yu go ondrosuku

sortu leri den sma kisi di ben e libi langa na fesi,

èn poti yu prakseri tapu a koni fu den bigisma fu unu.

₉Bika wi na kon wi e kon,

wi no sabi noti,

a libi fu wi dyaso na grontapu e psa gwe so esi leki a winti.

₁₀Ma yu kan teki leri fu den bigisma fu unu,

fu san den sabi, den o taigi yu taki:

₁₁‘Mokomoko e gro soso na ini swampu,

pankukuwiwiri no man gro pe watra no de.

₁₂Efu a swampu drei,

den wiwiri disi na den fosiwan di e dede,

srefi fosi den gro kon bigi fu sma koti den.’

₁₃Na so e psa nanga ala den sma di no wani du san Gado e taki.

Na so a howpu fu den sma di no wani dini Gado, e lasi gwe.

₁₄A sma dati e bow tapu sani di e broko es'esi.

Den e fertrow tapu sani di swaki leki anansititei.

₁₅A e bow na tapu den gudu fu en,

ma den gudu no man yepi en.

A e hori steifi na den sani di ensrefi abi,

ma den sani dati no man hori en tnapu.

₁₆A e opo leki wan moi wiwiri di sma e nati fosi a son opo,

den pransun fu en e panya na tapu a dyari.

₁₇Den rutu fu en e gro psa na tapu ston,

den e boro psa mindri den ston srefi.

₁₈Ma te den rutu en puru fu en presi,

sma o taki:

‘Noiti un ben sabi tak' sowan sani ben drape.’

₁₉Na so a de nanga a prisiri fu sowan sma,

a no e tan langa.

Dan trawan e gro kon ini en presi.

₂₀Yere, Gado noiti no e poti wan sma na wan sei,

tapu san trawan no man sori finga.

Ma noiti A no e langa anu tu fu yepi wan sma di e du ogri.

₂₁Ma Gado o meki yu lafu baka wanten,

A o meki yu singi fu prisiri.

₂₂Dan A o meki syen teki den wan di no man si yu na ai,

èn A o wai den oso puru na pasi fu den wan di no e dini En.”

₂“Iya, mi sabi san yu e taki.

Wan libisma no o man wini fu Gado fesi krutu.

₃Efu toku wan sma wani go na krutu nanga En,

a sma no o man piki En,

awinsi A aksi a sma wan dusun sani.

₄Gado koni èn A tranga sote,

no wan sma kan kaka futu gi En dan noti no psa nanga en.

₅A e puru bergi fu den presi sondro fu gi wan warskow,

A e drai den tapu na ini En atibron.

₆A e meki grontapu seki na tapu en fundamenti,

den postu di hori en srefi e beifi.

₇A e komanderi a son fu a no opo,

A e kiri a faya fu den stari.

₈En wawan hari a heimel span na loktu,

èn A e waka tapu den bigi skwala fu a se.

₉Na En meki den grupu stari di den e kari Bigi Beer,

Orion nanga Pleiaden,

sosrefi a grupu di de na zuidsei tu.

₁₀Gado e du bigi sani di libisma no man ferstan,

den wondru di A e du no de fu teri.

₁₁Te A e psa na mi sei,

mi no e si En,

te A e psa krosbei fu mi,

mi no sabi srefsrefi tak' A de drape.

₁₂Suma sa man tapu En te A wani teki wan sani?

Suma sa man aksi En taki: ‘San Yu e du?’

₁₃A atibron fu Gado no e kowru es'esi,

srefi den feyanti fu En di ben yepi a bun bigi sneki Rahab,

ben abi fu boigi gi En.

₁₄Dan fa mi o man opo mi mofo?

Pe mi o feni wortu fu man taki gi misrefi?

₁₅Awinsi mi no fowtu, a moro betre mi tan tiri

èn begi mi Krutubakra,

fu A abi sari-ati nanga mi.

₁₆Efu mi kari En fu kon na krutu èn A piki tak' A o kon,

a o de wan fruwondru sani gi mi tak' A arki mi.

₁₇A e meki wan tranga winti naki mi trowe,

A e gi mi mankeri moro nanga moro,

sondro tak' mi du wan sani.

₁₈A no e gi mi a okasi fu mi teki bro srefi,

mi e fuga fu ala a pina di mi e nyan.

₁₉Te a kon fu luku suma moro tranga,

a no abi misi tak' na En.

Te a kon fu gi frantwortu,

A e taki: ‘suma o man tyari Mi go na krutu?’

₂₀Awinsi mi abi leti, A o meki mi eigi mofo krutu mi,

awinsi mi no du ogri, A o krutu mi tak' mi du.

₂₁Mi sabi tak' mi no du ogri,

ma mi no abi trobi moro san wani psa nanga mi,

a libi fu mi e fuga mi.

₂₂Ma Gado no abi trobi nanga den sani dati.

Na dat' meki mi e taki:

‘A e tyari wan kba kon na a libi fu a wan di e du ogri

nanga a wan di no e du ogri srefsrefi.’

₂₃Efu wantronso wan takru siki panya,

Gado e lafu te A si fa den sma di no e du ogri, e bruya.

₂₄Gado gi a grontapu abra ini a makti fu ogri-ati sma,

èn A breni a ai fu den krutubakra,

fu den no kan koti krutu nanga leti.

Efu a no En e du den sani dati, dan suma dan?

₂₅Leki wan boskopuman di e lon es'esi,

na so esi den dei fu mi e psa gwe.

no wan bun den e no tyari kon.

₂₆Es'esi den e psa gwe, leki boto,

leki wan aka, di e frei go grabu wan meti.

₂₇Gado, awinsi mi taigi Yu tak' mi no o krutu moro,

tak' mi no o poti wan sari fesi moro,

ma tak' mi o lafu,

₂₈mi e frede gi a pen di Yu kan seni kon baka,

bika mi sabi tak' Yu e si mi leki wan sma di du ogri.

₂₉Efu a krin gi Yu tak' mi du ogri,

dan na fu soso mi e tan suku mi leti.

₃₀Awinsi mi wasi mi skin nanga a moro krin watra di de,

krin den anu fu mi nanga sopo,

₃₁Yu o fringi mi ini wan olo pe den e trowe doti,

tak' srefi den krosi fu mi o fisti fu mi.

₃₂Gado a no wan libisma leki mi,

noso mi bo man tak' gi misrefi

te mi nanga En ben tnapu fesi krutubakra.

₃₃Mi e winsi tak' wan sma ben de

di ben kan koti a krutu fu unu,

wan sma di abi makti abra un ala tu.

₃₄Dan Gado no bo man strafu mi so moro,

A no bo man meki mi e frede so moro.

₃₅Dan mi bo man tak' gi misrefi tu

sondro fu frede gi En,

bika mi sabi fu misrefi taki mi no du ogri.

₁Mi kon weri fu a libi,

dat' meki mi o tyari den kragi fu mi kon na fesi now,

awinsi fa mi ati broko, mi o taki now.

₂Mi o taigi Gado taki: ‘No krutu mi tak' mi du ogri,

ma taigi mi fu sanede Yu tyari mi go na krutu.

₃Sortu bun a e du yu fu pina mi so?

Sortu bun a e du Yu

fu poti san Yu meki nanga Yu eigi anu na wan sei?

Sortu bun a e du yu fu agri nanga den sani

di ogri-ati sma e prakseri fu du?

₄Yu no e si sani leki fa libisma e si sani,

èn a ferstan fu Yu no smara leki di fu libisma tu.

₅A libi fu Yu no e kon na wan kba,

a no syatu leki di fu wan libisma.

₆Dat' meki Yu no abi fu suku fowtu so na mi,

Yu no abi fu ondrosuku mi so fu luku efu sondu de ini mi.

₇Yu sabi tak' mi no e du ogri,

ma no wan sma de di kan ferlusu mi puru na ini Yu anu.

₈Nanga den eigi anu fu Yu, Yu ben meki mi,

dan now Yu wani puru mi na pasi.

₉Gado, memre tak' na fu kleidoti Yu ben meki mi,

dan fu sanede Yu wani naki mi broko

fu mi tron a soso doti baka?

₁₀Soleki fa den e kanti merki poti na ini baki,

fu tron kasi,

na so Yu teki a manwatra fu mi p'pa

seti mi poti ini a bere fu mi m'ma.

₁₁Yu meki a skin fu mi fu bonyo nanga titei,

dan Yu tapu en nanga meti èn nanga buba.

₁₂Yu gi mi libi èn Yu sori mi a bunfasi fu Yu,

nanga Yu heri ati Yu ben kibri a libi fu mi tu.

₁₃Ma Yu ben kibri sani

Ma mi sabi now san na den sani:

₁₄fu hori ai na mi tapu fu luku efu mi o sondu,

èn krutu mi fu den sondu dati.

₁₅Efu mi ben du ogri trutru, mi bo de fu sari!

Ma srefi efu mi e libi soleki fa Gado wani,

mi no man opo mi ede

bika mi lasi ala a grani di mi ben abi

èn a nowtu fu mi bigi.

₁₆Efu mi e prefuru fu opo mi ede,

Yu e dyompo na mi tapu leki wan lew

fu sori mi a bigi makti fu Yu baka.

₁₇Yu no e tapu fu tyari mi go na krutu,

a atibron fu Yu e bigi moro nanga moro,

dorodoro Yu e seni nyun problema kon na mi tapu,

leki fa den e seni nyun srudati go dorodoro ini wan feti.

₁₈Gado, fu sanede Yu meki mi kmopo ini a bere fu mi m'ma?

Fu sanede Yu no meki mi dede fosi wan sma ben si mi?

₁₉Dan mi bo kmopo ini a bere fu mi m'ma

go langalanga na berpe.

Noiti mi bo de na libi.

₂₀Gado, dyonsro a libi fu mi e kon na wan kba.

Libi mi, fu mi kan prisiri pikinso.

₂₁Bika dyonsro mi o go na dedekondre,

a presi fu pe mi no o drai kon moro,

drape soso dungru de.

₂₂Dedekondre dungru srefsrefi,

na soso dipi dungru nanga bruya e rigeri drape.

Drape a faya srefi dungru.’ ”

“Neleki wan skapu,

den tyari En go srakti,

èn soleki fa wan pikin skapu

no e meki babari

te den e puru den wiwiri

na en skin,

na so A no ben opo En mofo tu.

₃₃Den broko En saka,

èn den no gi En no wan leti.

Sma no o man taki

fu bakapikin fu En,

bika den kiri En

puru na grontapu.”