Dag 179 van 365- Job 11-13 en Handelingen 9:1-22

₂“Wan sma mus fu gi piki tapu den someni sani di yu taki.

A no te yu e tak' so furu yu o kisi leti.

₃Yu no mus prakseri tak' den lawlaw sani di yu e taki

o meki un tapu un mofo,

noso taki no wan sma no o piri ai gi yu.

₄Yu feni taki: ‘mi e si a tori disi a yoisti fasi,

èn tak' mi no du ogri na fesi Gado.’

₅O, fa mi e winsi tak' Gado ben sa opo En mofo,

tak' Ensrefi ben kan taki nanga yu.

₆Dan A bo sori yu kibri sani fu a koni fu En,

sani di a ferstan fu libisma no man grabu.

Dan a bo kon na krin gi yu

tak' Gado no e gi yu ala a strafu srefi di yu fiti fu kisi.

₇Yu o man kon sabi suma Gado de trutru?

Yu o man grabu den dipi sani fu a Wan di abi ala makti?

₈Den hei leki heimel,

yu o man doro na den?

Den dipi moro leki dedekondre,

yu o man ferstan den?

₉Den langa moro leki grontapu,

den bradi moro leki den se.

₁₀Efu Gado teki a besroiti fu grabu wan sma,

èn tyari en go na krutu, suma o man tapu En?

₁₁Bika A sabi den bedrigiman,

A e si den kruktudu fu den krinkrin.

₁₂Wan don sma no e kisi ferstan,

wan buriki e tan wan buriki.

₁₃Ma Yob, drai go baka na Gado,

èn langa yu anu go na En ini begi.

₁₄Efu yu e sondu, tapu nanga en,

èn no meki ogri psa na ini yu oso.

₁₅Dan yu o man opo yu ede,

sondro fu yu konsensi fon yu,

yu no o degedege moro

èn yu no o abi fu frede gi noti moro tu.

₁₆Iya, dan yu o fergiti a pina di yu e pina,

yu o fergiti en leki fa sma e fergiti watra di lon gwe.

₁₇A libi sa kon lekti baka gi yu,

den problema fu yu o abi fu meki pasi,

neleki fa neti abi fu meki pasi gi dei.

₁₈Yu o kisi nyun bribi, nyun howpu,

èn fu di Gado o kibri yu,

yu o man go sribi tiri fu yu.

₁₉Yu o sribi sondro fu wan sma meki yu skreki wiki,

èn furu sma o wani tron yu mati.

₂₀Ma den ogri-ati sma o luku lontu nomo

fa den o kmopo na ini den problema fu den.

Den no o man feni no wan fasi fu kmopo,

a wan enkri angri di den abi, na fu den bro kan koti.”

₂“Iya, na unu abi ala koni,

te un dede, koni sma no o de moro.

₃Ma mi e ferstan sani heri bun tu, neleki unu,

mi no e du ondro gi unu.

Ala sma sabi den sani di un e taki.

₄Mi tron wan spot'popki gi den mati fu mi,

mi di Gado ben e piki te mi ben e begi.

Mi e libi bun èn mi e libi tu soleki fa Gado wani,

toku den e teki mi e meki spotu.

₅Den sma di abi en bun e si den sma di ongoluku miti, leki noti,

a ongoluku tnapu klari'klari fu pusu den sma trowe

di abi problema kba.

₆Ma den sma di e gi trawan mankeri fu kan fufuru den sani,

e libi sondro wan broko ede na ini den oso,

noti e psa tu nanga den wan di e wiki a atibron fu Gado.

Ma den sortu sma dati e prakseri

tak' den kan du san den wani nanga Gado.

₇Ma un aksi den meti,

meki den leri unu abra Gado,

un aksi den fowru di e frei na loktu,

den o taigi unu.

₈Un aksi a doti fu grontapu tu, a o leri unu,

un aksi den fisi fu a se, den o ferteri unu.

₉Sortu wan fu den sani dati no sabi

taki na MASRA du ala den sani dati.

₁₀Gado abi makti abra ala sani di e libi,

sosrefi abra a bro fu libisma.

₁₁Neleki fa mofo e tesi nyanyan,

na so yesi e arki fin'fini sa a e yere.

₁₂A no te wan sma ede weti na wan marki tak' a koni,

noso te wan sma owru na wan marki

tak' a man ferstan sani.

₁₃Ma na Gado koni nanga krakti de,

na En abi sabi nanga ferstan.

₁₄Te Gado broko wan sani, no wan sma kan meki en baka.

Te A sroto wan sma, no wan sma kan lusu en.

₁₅Te A tapu a alen fu a no fadon, a gron e drei,

te A meki a fadon, a e sungu grontapu.

₁₆Gado tranga, A e wini ala ten,

A abi makti abra den sma di trawan kori

èn abra den sma di e kori trawan.

₁₇A e meki bigiman fu kondre tron pinaman,

èn A e meki krutubakra lasi den ferstan.

₁₈A e hari a moi krosi puru na kownu skin

dan a tai wan feskoki gi den.

₁₉A e meki priester waka soso futu,

èn A e broko den wan di prakseri tak' den de kba.

₂₀A e tapu a mofo fu raiman,

èn A e puru a koni na owrusma fu kan krutu sani nanga leti.

₂₁A e si den bigiman fu kondre leki noti,

èn A e puru a makti ini anu fu tiriman.

₂₂A e tyari den sani di de ini dipi dungru kon na krin,

èn A e tyari faya ini den moro dipi dungru presi.

₂₃A e meki folku gro kon bigi,

dan A e puru den na pasi.

A e meki folku kon tranga,

dan A e meki feyanti tyari den gwe.

₂₄A e meki tiriman fu folku lasi den ferstan,

A e meki den waka lontu nomo na ini sabana,

sondro fu sabi pe den e go.

₂₅Den e waka leki drunguman,

e firifiri nomo ini a dungru.

₁Un yere, ala den sani dati mi si,

fu di mi teki mi ai luku sani bun,

èn poti mi yesi arki sani fin'fini.

₂San un sabi, mi sabi tu,

mi no e du ondro gi unu.

₃Ma now mi o tak' nanga a Wan di abi ala makti,

na Gado mi wani sori tak' mi no du ogri.

₄Bika unu, na soso lei un e lei gi mi,

un alamala de leki datra di e gi sma dresi di no e yepi.

₅Efu un ben sa tan tiri!

Dan sma ben kan denki ete taki na koni un koni

₆Un arki fa mi o tyari a tori fu mi kon na fesi,

un poti un yesi fu arki fa mi o taki gi misrefi.

₇Un no abi fu prakseri tak' na yepi un e yepi Gado

te un e lei èn bedrigi.

₈Na teki un wani teki a sei fu En?

Na tak' un wani taki gi Gado leki En afkati?

₉Ma efu En tyari un go na krutu,

a no o waka bun gi unu,

bika un no o man bedrigi En

leki fa un e bedrigi libisma.

₁₀A no abi misi tak' A o strafu unu,

efu bakabaka un wani teki a sei fu En.

₁₁Na frede un no e frede Gado?

A makti fu En no sa meki un beifi?

₁₂Den sani di un e taki de leki asisi, den no warti noti,

den sani di un e taki gi unsrefi, no abi krakti.

₁₃Dat' meki un mus tan tiri, meki mi taki:

san wani kon, meki a kon.

₁₄Mi no abi trobi fu lasi mi libi.

₁₅Iya, Gado kan kiri mi efu A wani,

mi no abi noti moro fu lasi,

ma mi sa tan taki leti na En fesi, tak' mi no du ogri.

₁₆Na dati wawan sa ferlusu mi,

bika sma di no wani dini En

no e prefuru fu kon na En fesi.

₁₇So un arki bun san mi o taki,

un no mus misi noti.

₁₈Un luku, mi seti ala sani kba

fa mi o tyari a tori fu mi kon na fesi,

mi sabi taki mi tnapu na ini mi leti.

₁₉Ma efu wan sma sa kon èn sori krin tak' mi du ogri,

mi o tan tiri èn mi no abi trobi fu dede.

₂₀Ma Gado, efu Yu sa du den tu sani disi gi mi,

a no sa de wan problema gi mi fu go na fesi krutu nanga Yu:

₂₁tapu fu strafu mi,

èn no meki mi e frede so.

₂₂Dan mi no abi trobi efu Yu wani taki fosi,

baka dati mi sa piki,

noso mi sa taki fosi tu,

dan baka dati Yu e piki.

₂₃Taigi mi Gado: Omeni leisi mi du ogri? Omeni leisi mi sondu?

Sori mi den fowtu di mi meki, sori mi den sondu di mi du.

₂₄Gado, fu sanede Yu e koti pasi gi mi?

Fu sanede Yu e si mi leki Yu feyanti?

₂₅Mi de leki wan wiwiri di fadon kmopo na wan bon,

dan Yu wani frede mi ete?

Mi de leki wan drei karutiki,

dan Yu wani kon na Mi baka ete?

₂₆Leki wan krutubakra Yu e skrifi ogri poti tapu papira,

fu kan krutu mi,

Yu e meki mi pai fu den ogri di mi du ini mi yongu yari.

₂₇Yu e fasi mi futu nanga bui.

Yu e luku mi alasei pe mi e go,

Yu e ondrosuku den futumarki fu mi srefi.

₂₈Yu sa du dati nanga wan sma di e pori gwe leki wan pisi udu,

leki wan krosi di kakalaka e nyan?