Dag 185 van 365- Job 28-29 en Handelingen 13:1-25

₁“Yu abi presi pe sma e diki solfru

nanga presi pe sma e bron gowtu puru ala a doti.

₂Sma e puru isri tu ini a gron

èn bron ston puru a kopro di de na ini.

₃Te den e go diki ondro a gron,

den e tyari faya,

den e diki te pe den kan go

fu ondrosuku den ston ini a dipi dungru.

₄Farawe fu pe sma e libi

den e meki olo ini a gron,

nanga titei den e saka go ini a olo,

den e firifiri pe den kan poti den futu,

sma no e psa drape srefsrefi.

₅Tapusei a karu e gro fu en,

ma ondro a gron, faya e bron leki not'noti.

₆Bika na drape abi a diri ston safier,

èn gowtu fasi na den diri ston dati leki puiri.

₇No wan aka sabi a pasi di e go drape,

no wan tingifowru man si en tu.

₈Tranga bus'meti no e go na en tapu,

lew srefi no e waka drape.

₉Libisma e naki a tranga ston broko,

den e diki go te na den fundamenti fu den bergi.

₁₀Den e kapu pasi ini den bergiston fu watra kan lon,

den e luku fin'fini fu kan si ibri diri ston drape.

₁₁Den e tapu a watra fu pe a e kmopo ini a gron,

èn den e tyari den gudu kon na krin di kibri drape.

₁₂Ma koni, pe a de fu feni?

Pe a tanpresi fu ferstan de?

₁₃Libisma no sabi a warti fu en,

èn a no de fu feni tu na grontapu pe den e libi.

₁₄Den watra di de dipi ondro a gron e taki:

‘A no de ini mi,’

a se e taki:

‘A no de na mi.’

₁₅Koni no de fu bai nanga gowtu,

yu no kan pai fu en nanga solfru.

₁₆A diri moro a fini gowtu fu Ofir,

èn moro leki difrenti diri ston.

₁₇Gowtu nanga grasi srefi no diri leki en,

a no de fu kenki tu gi skarki fu lala gowtu.

₁₈Koraal nanga kristal no man tnapu na en sei tu,

koni diri moro redi koraal.

₁₉A no de fu marki nanga a diri ston topaas fu Etiopia,

noso nanga lala gowtu.

₂₀A koni disi, pe a kmopo dan?

Pe a tanpresi fu ferstan de?

₂₁A kibri gi a ai fu ala libisani,

srefi den fowru di e frei na loktu no man si en.

₂₂Dedekondre nanga dede e taki:

‘Na yere nomo den yesi fu wi yere fu en.’

₂₃Na Gado wawan sabi a pasi fu go na en,

na En wawan sabi pe a de fu feni.

₂₄Bika Gado e si go te na a kba pisi fu grontapu,

ala sani ondro a heimel A e si.

₂₅Di Gado poti o hebi a winti mus de,

o bigi a se mus de,

₂₆di A meki wan wèt gi a alen,

nanga wan pasi gi a faya fu a dondru,

₂₇dan A luku koni bun,

A luku en go, A luku en kon,

dan A poti en leki wan sani di bun.

₂₈Ma libisma A taigi taki:

‘Un arki, lespeki MASRA, dati na koni,

fu libi a ogri, dati na ferstan.’ ”

₂“Tye, efu sani ben kan go mi bun leki fosi,

leki den dei di Gado ben e kibri mi,

₃di A ben e hori a lampu fu En tapu mi ede,

èn a faya fu En ben e sori mi a pasi ini a dungru.

₄Den dei di mi ben abi ala mi krakti ete,

èn Gado ben de leki wan mati ini mi oso,

₅a Wan di abi ala makti ben de nanga mi,

èn den pikin fu mi ben e lontu mi.

₆A ten dati mi ben gudu psa marki,

èn a oleif-oli fu mi ben e lon bogobogo

na a presi pe den ben e meki a oli.

₇Te mi ben e go na a bigi doro fu a foto,

èn go sidon na mi presi tapu a pren,

₈yongu boi ben e kmopo drape, leki fa den ben e si mi,

man di ben owru bari moro mi, ben e opo tnapu.

₉Tiriman ben e tapu fu taki

èn den ben e poti den anu tapu den mofo.

₁₀Prenspari man ben e tapu den mofo wantron tu,

a tongo fu den ben e fasi loktusei fu den mofo.

₁₁Ala sma di ben e yere mi ben e gi mi grani,

ala sma di ben e si mi ben e taki bun fu mi.

₁₂Bika te mofinawan ben e bari suku yepi,

mi ben e yepi den,

sosrefi pikin di no abi p'pa nanga m'ma moro

noso wan tra sma fu yepi den.

₁₃Sma di ben de fu dede, ben e blesi mi,

mi ben e meki a ati fu uma di masra dede kba,

furu nanga prisiri.

₁₄Neleki fa krosi ben gwenti de na mi skin,

na so mi ben gwenti du bun.

Neleki fa mi ben gwenti weri mi langa dyakti

nanga wan duku lontu mi ede,

na so mi ben gwenti koti krutu nanga leti.

₁₅Mi ben de den ai gi brenisma,

èn den futu gi lansma.

₁₆Mi sorgu gi pôtisma leki wan p'pa,

èn mi taki gi sma di mi no ben sabi,

fu den ben kan kisi den leti.

₁₇Mi naki den tifi broko fu ogri-ati sma

èn mi ferlusu den sma ini den mofo.

₁₈Dat' meki mi ben e prakseri taki:

Mi o libi langa

èn mi o dede wan switi fasi ini mi oso.

₁₉Mi ben de leki wan bon,

di rutu de ini bogobogo watra,

èn na tapu den taki fu mi

a dow ben e kon sribi te neti.

₂₀Dorodoro sma ben e gi mi grani,

èn noiti mi ben firi swaki,

mi ben de leki wan bo di hari span.

₂₁Te mi ben e gi rai, sma ben e tan tiri,

den ben e arki bun san mi ben e taki.

₂₂No wan sma ben e tak' moro te mi ben kba taki,

a gersi leki na dringi den ben e dringi den wortu fu mi.

₂₃Den ben e wakti na mi tapu leki fa sma e wakti alen,

leki fa gronman e angri fu a alen.

₂₄Te mi ben e lafu nanga den,

den no ben man bribi en,

a lafu tapu mi fesi no ben e meki den lasi ati.

₂₅Mi ben de den fesiman èn mi ben e sori den a pasi.

Mi ben e tiri den leki fa wan kownu e tiri a legre fu en.

Mi ben e trowstu den tu te den ben e sari.