Dag 19 van 365- Genesis 46-48 en Matteüs 13:1-30

₁Dan so Israel hari go na Egipte nanga ala sani di a ben abi. Di a doro na Berseba a bron meti leki ofrandi gi a Gado fu en p'pa Isak. ₂Dan Gado meki Israel si wan sani neti. A si fa Gado e taigi en taki: “Yakob, Yakob.” A piki: “Mi de dyaso.” ₃Ne Gado taigi en taki: “Mi na Gado. A Gado fu yu p'pa. Yu no abi fu frede fu hari go na Egipte. Bika drape mi sa meki den bakapikin fu yu tron wan bigi folku. ₄Misrefi sa go nanga yu na Egipte. Mi sa tyari yu kon baka tu èn Yosef sa tapu yu ai gi yu te yu dede.” ₅Dan Yakob gwe libi Berseba. Den manpikin fu Israel ben tyari den p'pa, den pikin nanga den frow fu den gwe tapu den wagi di Farao ben seni kon fu kon teki den. ₆Den tyari den meti fu den gwe tu nanga ala sani di den ben abi ini a kondre Kanaan. So Yakob nanga den pikin fu en ben doro na Egipte. ₇A ben tyari den manpikin, den umapikin nanga den granpikin fu en, manwan nanga umawan, go nanga en na Egipte.

₈Disi na den nen fu den manpikin fu Israel di ben go na Egipte.

Ruben, a fosi manpikin fu Yakob. ₉Den manpikin fu Ruben ben de: Hanok, Palu, Hesron nanga Karmi. ₁₀Den manpikin fu Simeon ben de: Yemuel, Yamin, Ohad, Yakin, Sokar nanga Saul. A m'ma fu Saul ben de wan uma fu Kanaan. ₁₁Den manpikin fu Lefi ben de: Gerson, Kehat nanga Merari. ₁₂Den manpikin fu Yuda ben de: Er, Onan, Sela, Peres nanga Serak. Er nanga Onan ben dede ini Kanaan. Den manpikin fu Peres ben de Hesron nanga Hamul. ₁₃Den manpikin fu Isakar ben de Tola, Puwa, Yob nanga Simron. ₁₄Den manpikin fu Sebulon ben de Sered, Elon nanga Yakleel. ₁₅Disi ben de den manpikin di Lea ben kisi gi Yakob ini Padan-Aram. Boiti den manpikin a ben kisi wan umapikin gi en tu di ben nen Dina. Ala den pikin nanga bakapikin ben de makandra dritenti-na-dri sma.

₁₆Den manpikin fu Gad ben de Sifyon, Hagi, Suni, Esbon, Eri, Arodi nanga Areli. ₁₇Den manpikin fu Aser ben de Yimna, Yiswa, Yiswi nanga Beria. Den ben abi wan sisa tu di ben nen Serak. Den manpikin fu Beria ben de Heber nanga Malkiyel. ₁₈Disi ben de den manpikin di Silpa ben kisi gi Yakob. Silpa ben de a umasrafu di Laban ben gi en umapikin Lea. Den manpikin nanga den bakapikin fu Silpa ben de tin-na-siksi.

₁₉Den manpikin fu Rachel, a frow fu Yakob, ben de Yosef nanga Benyamin. ₂₀Na ini Egipte Asnat, a umapikin fu Potifera, a priester fu On, ben kisi Manase nanga Efraim gi Yosef. ₂₁Den manpikin fu Benyamin ben de Bela, Beker, Asbel, Gera, Naaman, Eki, Ros, Mupim, Hupim nanga Ard. ₂₂Disi ben de den manpikin fu Rachel di a ben kisi gi Yakob. Den manpikin nanga den bakapikin fu Rachel ben de tin-na-fo.

₂₃A manpikin fu Dan ben de Husim. ₂₄Den manpikin fu Naftali ben de Yakseel, Guni, Yeser nanga Silem. ₂₅Disi ben de den manpikin fu Bilha. Bilha ben de a umasrafu di Laban ben gi en umapikin Rachel. Den manpikin nanga den bakapikin fu Bilha ben de seibi.

₂₆Ala den sma di ben go nanga Yakob na Egipte ben de siksitenti-na-siksi sma. Den frow fu den manpikin no ben teri. ₂₇Ini Egipte Yosef ben kisi tu boi. So ala sma fu a oso fu Yakob di ben go na Egipte ben de seibitenti sma.

₂₈Dan Yakob seni Yuda go na fesi na Yosef, fu Yosef miti en na Gosen. Di Yakob doro nanga en famiri ini a kontren fu Gosen, ₂₉Yosef seti en wagi dan a hari go na Gosen fu go miti en p'pa Israel. Di den miti, a brasa en dan a anga wan heri pisten na en neki e krei. ₃₀Ne Israel taigi Yosef taki: “Now mi kan dede. Bika mi si yu ai na ai, mi si taki yu e libi.”

₃₁Dan Yosef taigi den brada fu en nanga ala den famiri taki: “Mi sa go taigi Farao taki: ‘Den brada nanga den famiri fu mi di ben de na Kanaan kon na mi. ₃₂Den na skapuman, sma di e kweki meti. Den tyari den skapu, krabita, kaw nanga ala sani di den abi kon.’ ₃₃Dat' meki te Farao seni kari unu dan a aksi unu sortu wroko un e du, ₃₄un mus piki en taki: ‘Den knekti fu yu na sma di e kweki meti sensi den e gro kon. Den afo fu unu ben e du a srefi wroko.’ Dan a o meki un libi ini a kontren fu Gosen. Bika den sma fu Egipte no lobi sma di e kweki skapu srefsrefi.”

₇Yosef tyari en p'pa Yakob kon tu fu Farao kon leri sabi en. Dan Yakob blesi Farao. ₈Ne Farao aksi Yakob taki: “O owru yu de?” ₉Yakob piki Farao taki: “Wan hondro nanga dritenti yari mi waka lontu na grontapu leki wan doroseisma. Den yari fu mi no furu, ma den ben lai nanga problema. Den yari fu mi no furu leki den yari fu den afo fu mi, di den ben de leki doroseisma na grontapu.” ₁₀Ne Yakob blesi Farao, dan a gwe.

₁₁Yosef du san Farao taigi en fu du. A gi en p'pa nanga den brada fu en wan pisi gron leki tanpresi na ini a kontren Rameses, a moro bun pisi fu a kondre. ₁₂A ben e sorgu taki en p'pa, den brada fu en nanga den famiri ben abi nyanyan, someni leki den ben abi fanowdu.

₁₃A angriten ben kon de so hebi, taki nyanyan no ben de fu feni ini a heri kondre moro. Den sma fu Egipte nanga Kanaan ben kon swaki fu angri. ₁₄Yosef ben e tyari ala a moni kon na wan nanga san den sma fu Kanaan nanga Egipte ben e kon bai nyanyan. Dan a ben e tyari a moni go na Farao oso.

₁₅Di den sma fu Egipte nanga Kanaan no ben abi moni moro, den sma fu Egipte kon na Yosef dan den taigi en taki: “Un no abi moni moro. Gi wi nyanyan noso wi o dede leti dyaso na yu fesi.” ₁₆Yosef taigi den taki: “Un tyari den meti fu un kon efu un no abi moni moro. Dan mi sa kenki den gi unu gi nyanyan.” ₁₇So den sma tyari den meti fu den kon gi Yosef. Dan Yosef teki den asi, den skapu nanga krabita, den kaw nanga den buriki fu den sma, dan a gi den nyanyan. A yari dati a teki ala den meti fu den sma dan a gi den nyanyan.

₁₈Di a yari dati psa, den sma kon ini a di fu tu yari na Yosef dan den taigi en taki: “Masra, wi no o man kibri en gi yu taki noti no libi gi wi moro, dan fu yu teki wi skin nanga a gron fu unu. Bika wi no abi moni moro èn ala den meti fu wi na fu yu now. ₁₉Fu sanede yu o luku fa wi e dede dyaso na yu fesi, dan a gron fu wi e tan fu soso? Bai wi nanga den gron fu wi, dan yu e gi wi nyanyan. Dan wi sa de srafu fu Farao èn a gron fu wi sa de fu en. Gi un siri fu un kan tan na libi èn fu a gron fu wi no tan didon fu soso.” ₂₀Dan so Yosef bai ala den gron fu den sma fu Egipte gi Farao. Bika fu di a angriten ben hebi tumsi gi den, ibriwan fu den ben seri en gron. So ala den gron kon ini anu fu Farao. ₂₁A ben meki a heri folku, fu a wan sei fu Egipte go te na a tra sei, wroko leki srafu. ₂₂Soso a gron fu den priester a no bai. Bika den priester ben e kisi den nyanyan tapu fasti ten fu Farao. Dat' meki den no ben seri a gron fu den. ₂₃Dan Yosef taigi den sma taki: “Arki, bigin fu tide unu nanga a gron fu unu na fu Farao. Luku siri dyaso fu un go sai tapu den gron. ₂₄Ma te a gron gi nyanyan, un mus prati a nyanyan ini feifi pisi. Wan pisi na fu Farao. Den tra fo pisi na fu unu, den sma fu un oso nanga den pikin fu unu nyan èn fu un sai a gron baka.” ₂₅Den sma piki taki: “Na yu hori wi na libi. Wi e taki yu grantangi. Wi sa de srafu fu Farao.” ₂₆Yosef ben poti disi leki wan sani di den sma ben mus tan du èn a de te leki a dei fu tide, taki wan pisi fu a nyanyan fu a gron na fu Farao. Soso a gron fu den priester no ben de fu Farao.

₂₇Na so Israel tan libi ini a kontren fu Gosen na ini Egipte. Den kisi den eigi gron drape. Den kisi furu pikin tu èn so den ben kon furu moro nanga moro.

₂₈Yakob libi ete tin-na-seibi yari ini Egipte. A ben kon doro a libimarki fu wan hondro fotenti-na-seibi yari. ₂₉Di a ten doro taki Israel ben o dede, a kari en boi Yosef dan a taigi en taki: “Poti yu anu ondro mi bowtu efu yu lobi mi. Dan yu e sweri gi mi taki yu lobi mi èn taki mi kan fertrow na yu tapu taki yu no o beri mi ini Egipte. ₃₀Mi wani beri na den bigisma fu mi. Dat' meki yu mus tyari mi kmoto fu dyaso, dan yu e beri mi pe den bigisma fu mi didon.” Ne Yosef piki taki: “Mi sa du san yu taki.” ₃₁Dan Yakob taki: “Sweri en dan.” Ne Yosef sweri gi en p'pa. Dan Israel kindi na edesei fu en bedi fu gi grani.

₁Wan pisten baka dati den kon taigi Yosef taki: “Yu p'pa e siki.” Dan Yosef go na en nanga den tu boi fu en, Manase nanga Efraim. ₂Di den taigi Yakob taki: “Luku, yu manpikin Yosef kon luku yu,” Yakob du muiti fu a ben kan opo sidon ini en bedi. ₃Dan a taigi Yosef taki: “Gado, di abi ala makti, sori ensrefi na mi di mi ben de na Lus, ini Kanaan. A blesi mi ₄dan A taigi mi taki: ‘Arki, Mi sa gi yu furu pikin nanga bakapikin èn den sa tron bigi folku. Mi o gi a kondre disi na den bakapikin fu yu fu têgo.’ ₅Fu dat'ede mi e teki den tu boi fu yu, di yu kisi dyaso na Egipte fosi mi ben doro dyaso, leki mi eigi pikin. Efraim nanga Manase sa de leki Ruben nanga Simeon gi mi. ₆Den pikin di yu sa kisi baka den tu disi, sa de yu pikin. Den sa kisi wan pisi gron fu a pisi fu Efraim nanga Manase. ₇Mi e teki den tu pikin disi leki mi pikin, fu di Rachel dede di mi ben kmoto fu Padan. A dede ondro pasi ini Kanaan, krosbei fu Efrat. Dan mi beri en sei a pasi di e go na Efrat, di den e kari Betlehem tu.”

₈Di Israel si den tu boi fu Yosef a aksi taki: “Suma na den?” ₉Yosef piki en p'pa taki: “Na den boi fu mi, di Gado gi mi dyaso.” Ne Yakob taki: “Tyari den kon na mi, meki mi blesi den.” ₁₀Israel ai ben kon dungru. A no ben e si so bun moro. So Yosef tyari den boi go moro krosbei. Dan Israel bosi den èn a brasa den. ₁₁A taigi Yosef taki: “Mi no ben prakseri taki mi ben o si yu moro. Ma luku, Gado meki mi si den pikin fu yu srefi.” ₁₂Yosef meki den boi saka fu en p'pa kindi, dan a boigi nanga en fesi go na gron. ₁₃A ben hori den tu boi fu en. Efraim a ben hori nanga en leti anu. Disi ben meki taki Efraim ben tnapu na Israel kruktu-anu. Manase a ben hori nanga en kruktu anu èn disi ben meki taki Manase ben tnapu na Israel leti-anu. Dan a tyari den go moro krosbei na Yakob. ₁₄Ma dan Israel kroisi en anu di a e langa den. A poti en leti anu tapu a ede fu Efraim, aladi en ben de a pikinwan. En kruktu anu a poti tapu a ede fu Manase, aladi en ben de a fosi pikin. ₁₅Dan Yakob blesi Yosef. A taki: “Meki a Gado fu mi afo Abraham nanga Isak, di ben taigi den fu libi leki fa A wani, a Gado, di tiri mi leki wan skapuman mi heri libi langa te leki a dei fu tide, ₁₆meki a Engel fu Gado, di ferlusu mi na ini ala nowtu, blesi den boi disi. Dan den sa tyari mi nen moro fara, nanga a nen fu Abraham nanga Isak, den afo fu mi. Meki den abi furu bakapikin na grontapu.”

₁₇A no ben bun na Yosef di a si taki en p'pa poti en leti anu tapu Efraim ede. So a grabu a anu fu en p'pa di ben de tapu a ede fu Efraim fu poti en tapu a ede fu Manase. ₁₈A taigi en p'pa taki: “Nono mi p'pa, yu no e du en bun. Disi na a fosiwan, na tapu en ede yu mus poti yu let'anu.” ₁₉Ma en p'pa no ben wani. A taki: “Mi sabi, mi boi, mi sabi. Den bakapikin fu en sa tron wan bigi folku tu, ma en pikin brada sa bigi moro en. Den bakapikin fu en pikinbrada o tron difrenti bigi folku.” ₂₀Na so Yakob blesi den boi a dei dati. A taki: “A pipel fu Israel sa blesi densrefi nanga den nen fu unu. Den sa taki: ‘Meki Gado bun gi yu, leki fa A ben bun gi Efraim nanga Manase.’ ” Dan a poti Efraim tnapu fesi Manase.

₂₁Dan Israel taigi Yosef taki: “Arki, mi o dede gwe. Ma Gado sa de nanga yu. A sa tyari yu go baka na a kondre fu den afo fu yu. ₂₂Mi o gi yu a foto Sikem, di mi no gi na den brada fu yu. Nanga mi deigri èn nanga mi bo mi ben puru en na anu fu den Amoritisma.”

₁A srefi dei dati, Yesus kmoto fu oso go sidon na a syoro fu a meer. ₂Di wan bigi grupu sma bigin lontu En, A opo go sidon ini wan boto. Ma ala den sma tan tnapu na syoro. ₃Dan A bigin leri den furu sani nanga agersitori. A taigi den taki: “Arki, wan man ben go sai siri na ini en gron. ₄Di a e fringi den siri, wantu fadon tapu a pasi. Dan den pikinfowru kon nyan den. ₅Tra siri fadon pe furu ston ben de ondro a doti. Den sproiti es'esi, bika den no ben abi furu doti. ₆Ma di a son kon faya, a bron den pransun. Den drei gwe fu di den rutu no ben beri go dipi ini a gron. ₇Trawan fu den siri fadon tapu gron pe makamaka grasi e gro. Di a makamaka grasi bigin gro, a no gi den siri okasi fu gro doro. ₈Ma tra siri fadon tapu bun doti. Den dati gi nyanyan: sonwan gi wan hondro, trawan siksitenti, trawan dritenti tron moro furu. ₉Suma abi yesi, meki a yere!”

₁₀Baka dati den man di ben e teki leri fu Yesus kon na En, dan den aksi En taki: “Fu sanede Yu e taki agersitori nanga den sma?” ₁₁Yesus piki den taki: “A fasi fa Gado o tiri libisma na wan kibritori. Gado meki un kon ferstan a kibritori disi. Ma A no wani meki den tra sma ferstan en. ₁₂Bika a sma di ferstan a sani disi, Gado o meki a ferstan en moro, èn a sa sabi bun furu. Ma a sma di no ferstan en, Gado o puru a pikinso san a ben ferstan. ₁₃Na dat' meki Mi e taki agersitori nanga den. Bika den e luku, ma den no e si, èn den e arki, ma den no e yere èn den no e ferstan. ₁₄Den sani san a profeiti Yesaya ben taki, de fu si ini a libi fu den sma disi. A ben taki:

₁₈Dan Yesus taigi den man di ben e teki leri fu En taki: “Disi na san a agersitori fu a man di ben go sai siri wani taki. ₁₉Te wan sma arki a boskopu fa Gado e tiri libisma, ma a no ferstan en, dan a de leki a siri di fadon tapu a pasi. Didibri e kon puru a boskopu di sai na ini en ati. ₂₀A siri di fadon pe furu ston de ondro a doti, na den sma di yere a boskopu, dan den teki en wantron nanga prisiri. ₂₁Ma a boskopu no e beri rutu. Dat' meki den e bribi fu wan syatu pisten nomo. Te sma e pina den èn te sma de na den baka fu du den ogri fu di den e bribi a boskopu, dan wantron den e lasi bribi. ₂₂A siri di fadon pe makamaka grasi e gro, na den sma di yere a boskopu, ma den e broko den ede nanga a libi èn grontapu gudu e hari den. Dati e meki taki a boskopu no man du en wroko ini den ati. ₂₃A siri di fadon na tapu a bun doti, na sma di e ferstan a boskopu te den yere en. Leki fa a siri e gi nyanyan, na so den sma disi e gi nyanyan ini den libi tu, sonwan hondro, trawan siksitenti, nanga trawan dritenti leisi moro furu.”

₂₄Dan Yesus gi den ete wan agersitori. A taki: “Un kan si a fasi fa Gado e tiri libisma leki wan man di ben sai bun siri ini en gron. ₂₅Ma di ala sma ben e sribi, a feyanti fu en kon sai grasi mindri a graan, dan a gwe. ₂₆Leki fa a graan bigin gro èn a bigin gi nyanyan, so a grasi gro tu. ₂₇Dan den knekti fu a man go aksi en taki: ‘Masra, a no bun siri yu ben sai ini yu gron? Pe a grasi kmopo dan?’ ₂₈A man piki den taki: ‘Na wan feyanti du a sani dati.’ ₂₉Dan den knekti aksi en taki: ‘San un mus du? Un mus hari a grasi puru?’ Ma a man taigi den taki: ‘No, bika te unu e hari a grasi, un kan hari a graan tu. ₃₀Meki ala tu gro te leki a ten doro fu koti a graan. Dan mi o taigi den sma di o koti a graan fu puru a grasi fosi, tai en ini bosu, dan den bron en. Ma a graan den mus poti ini mi maksin.’ ”