Dag 197 van 365- Psalm 16-17 en Handelingen 20:1-16

Kibri mi, mi Gado,

bika Yu na mi kibripe.

₂Mi taigi MASRA taki:

“Yu na mi MASRA,

ala bun e kon fu Yu.”

₃Ma den gado ini a kondre disi,

den makti di misrefi ben e dini,

mi e taigi taki:

₄“Furu sari e wakti den sma di e waka na un baka.”

Mi no e trowe brudu na gron moro gi den leki ofrandi.

Srefi a nen fu den no e kmopo ini mi mofo moro.

₅MASRA, Yu na a pisi gron di mi kisi.

Na Yu e gi mi san mi abi fanowdu.

A libi fu mi de na ini Yu anu.

₆Mi kisi wan moi pisi gron,

iya, a pisi di mi kisi e gi mi prisiri.

₇Mi e prijse MASRA fu den rai di A e gi mi,

srefi neti mi konsensi e taki nanga mi.

₈Dorodoro mi e prakseri MASRA.

Mi no sa fadon fu di A tnapu na mi let'sei fu yepi mi.

₉Na dat' meki mi ati e prisiri, dat' meki mi breiti,

mi sabi taki noti no kan miti mi.

₁₀Yu no o meki mi dede fosi mi yuru kisi,

Yu no o meki a sma di e tan waka na Yu baka,

go na en grebi.

₁₁Yu o sori mi a pasi go na a libi.

Krosbei na Yu mi abi bogobogo prisiri.

Mi o abi wan switi presi na Yu sei fu têgo.

MASRA, yere mi te mi e aksi Yu fu du san fiti,

arki te mi e kari Yu,

poti yesi arki a begi fu mi,

bika lei no e kmopo na ini mi mofo.

₂Krutu a tori fu mi èn sori taki mi no du ogri,

meki den ai fu Yu si san reti.

₃Efu yu ondrosuku a ati fu mi,

efu yu kon na mi te neti,

efu yu tesi mi,

Yu no o feni no wan ogri ini mi,

mi no e sondu nanga mi mofo.

₄Mi e hori misrefi na den sani di Yu taki,

awinsi fa tra sma wani tyari densrefi.

Mi no wani abi noti fu du nanga sma di e du sani nanga tranga.

₅Mi tan waka a pasi di Yu sori mi,

mi no beni kmopo srefsrefi.

₆Tye Gado, na Yu mi e kari, bika na Yu e piki mi.

Poti Yu yesi, arki a begi fu mi.

₇Sori a bigi lobi fu Yu tapu wan spesrutu fasi,

bika Yu na a Ferlusuman,

fu den sma di e kibri na Yu let'anu

gi den feyanti fu den.

₈Kibri mi leki a moro diri sani fu Yu,

kibri mi na ondro Yu frei,

₉gi den ogri-ati sma di wani puru mi na pasi,

gi den feyanti fu mi di tapu mi fu alasei fu kiri mi.

₁₀Den no abi no wan sari-ati

èn den e taki bigi.

₁₁Den e kon na mi baka nomonomo,

den e tapu mi fu alasei.

Den e wakti wan okasi fu seni mi go na mi grebi.

₁₂Den de leki lew di e didon e luru,

leki wan yongu lew di wani dyompo na mi tapu èn priti mi.

₁₃MASRA, du wan sani.

Waka miti den èn naki den trowe.

Ferlusu mi nanga a deigri fu Yu fu den ogri-ati sma.

₁₄MASRA, meki Yu anu ferlusu mi fu den man disi,

kiri den puru na grontapu,

meki den dede gwe fu mindri den libiwan!

Meki a strafu di Yu abi gi den go na den skin,

meki den pikin fu den firi en tu,

èn meki srefi den granpikin fu den tesi fu en.

₁₅Ma mi di du bun o si a fesi fu Yu.

Te mi wiki mi o prisiri srefsrefi fu di mi o si Yu.