Wan begi ini bigi benawtu
1Gi a tiriman fu a singigrupu fu a tempel. A mus singi a srefi fasi leki: A dia fu mus'dei. Wan psalm fu David.
2Mi Gado, mi Gado!
Fu sanede Yu gwe libi mi?
Fu sanede Yu e tan fara èn Yu no e yepi mi?
Fu sanede Yu no e piki te mi e bari suku yepi?
3Deiten mi e kari Yu, mi Gado, Yu no e piki,
te neti srefi mi e du dati, ma sani no e kowru gi mi.
4Ma Yu na a Santawan,
a Wan di sidon tapu a kownusturu
èn di a pipel fu Israel e gi grani nanga singi.
5Na tapu Yu den afo fu wi ben fertrow,
den ben fertrow na Yu tapu èn Yu ferlusu den.
6Na Yu den ben kari èn Yu yepi den,
den ben poti den fertrow na Yu tapu
èn den no kon na syen.
7Ma mi no betre moro wan woron,
mi a no wan man,
libisma e teki mi meki spotu,
a folku e si mi leki noti.
8Ala sma di e si mi, e teki mi e meki spotu,
den e langa den tongo gi mi,
èn den e seki den ede.
9Den e taigi mi taki:
“Go na MASRA meki A yepi yu,
A lobi yu sote, meki A ferlusu yu!”
10Ma na Yu puru mi ini mi m'ma bere,
na Yu ben meki taki mi ben kan didon na den bobi fu en.
11Leki fa mi gebore den poti a libi fu mi ini Yu anu,
Yu de a Gado fu mi sensi di mi kmopo ini mi m'ma bere.
12We dan, no tan fara fu mi,
bika bigi problema de fu miti mi,
èn sma no de fu yepi mi.
13Den feyanti fu mi lontu mi leki wan grupu bulu,
leki bofru fu Basan den tapu mi fu alasei.
14Den bradi den mofo opo gi mi,
den e bari leki lew di e suku wan sani fu priti.
15Ala mi krakti gwe libi mi,
leki watra di den kanti na gron.
Ala den bonyo fu mi kmopo na skrufu.
Mi kon lasi ati fu tru.
16Mi krakti drei gwe leki wan pisi broko prapi,
mi tongo deki na ini mi mofo,
Yu poti mi didon na ini mi grebi kba.
17Den feyanti fu mi lontu mi leki dagu,
wan grupu takru-ati sma lontu mi,
den boro mi anu nanga mi futu
18Mi kan teri ala den bonyo fu mi,
den e luku mi èn den e prisiri.
19Den e prati mi krosi,
den e fringi lot fu luku sortu wan fu den o kisi mi krosi.
20Ma Yu, MASRA, no tan fara fu mi!
Kon esi, bika Yu na a wan di e yepi mi.
21No gi den a okasi fu den kiri mi,
kibri mi libi fu den dagu no grabu mi.
22Ferlusu mi fu a mofo fu a lew,
nanga den tutu fu den bulu.
Yu piki mi.
23Mi sa ferteri den kondreman fu mi fu den bigi sani di Yu du,
mi o prijse Yu te a pipel kon makandra fu gi Yu grani.
24Un prijse MASRA, un alamala di e lespeki En!
Un gi En grani, bakapikin fu Yakob,
un sori dipi lespeki gi En, pipel fu Israel!
25Bika A no e du leki A no e si a nowtu fu den mofinawan,
A no e drai En fesi gi den,
ma A Yere di den ben e bari suku yepi.
26Na Yu mi e gi grani fu den sani di Yu du,
te a pipel fu Yu e kon makandra,
èn mi o tyari den ofrandi di mi ben pramisi
fesi den sma di e lespeki Yu.
27Den mofinawan sa nyan te a sari den.
Den sma di e suku MASRA, o gi En grani.
Fu têgo Gado sa meki sani waka bun gi den!
28Alasei, te na den kbapisi fu grontapu,
sma sa memre MASRA èn drai kon na En.
Ala lo nanga ala folku sa kon boigi gi Yu.
29Bika na MASRA e rigeri leki kownu,
En na a Tiriman fu ala folku.
30Den sma di abi en bun na grontapu,
sa nyan èn den sa anbegi En,
den alamala di o dede gwe o boigi gi En,
den di no ben man hori densrefi na libi.
31Den bakapikin o dini En,
èn den o ferteri fu MASRA na den di e kon na baka.
32Den sa ferteri den sma di no gebore ete
fa A e du sani nanga leti.
Bika na En ferlusu En pipel.
