Dag 2 van 365 - Genesis 4-6 en Matteüs 2

₁Dan a man sribi nanga en uma. A uma hori bere èn a kisi Kain. A taki: “Na MASRA yepi mi fu mi kisi wan manpikin.” ₂Baka dati a kisi ete wan manpikin di a kari Abel. Abel ben e kweki skapu. Kain ben e prani gron. ₃Baka wan pisten Kain tyari wan ofrandi gi MASRA fu den sani san a ben prani. ₄Abel ben tyari wan ofrandi tu. A srakti den fosi pikin di den skapu ben meki, dan a gi den moro bun pisi meti fu den leki ofrandi. MASRA ben abi prisiri nanga a ofrandi fu Abel, ₅ma A no ben abi prisiri nanga a ofrandi fu Kain. Ne Kain atibron taki en fesi kenki. ₆Ne MASRA aksi Kain taki: “Fu sanede yu ati e bron èn fu sanede yu langa yu fesi so? ₇Efu yu e du bun, yu kan opo yu ede. Ma efu yu no e du bun, a sondu e didon luru yu na mofodoro. A e angri fu de yu basi, ma na yu mus basi en.” ₈Dan Kain taigi en brada Abel: “Kon meki wi go na gron.” Di den ben de ini a gron, Kain kiri en brada Abel. ₉Ne MASRA aksi Kain taki: “Pe yu brada Abel de?” Kain piki taki: “Mi no sabi. Na mi mus hori ai na tapu mi brada?” ₁₀Ne MASRA aksi en taki: “San yu du? Arki, a brudu fu yu brada e bari kari Mi fu a gron. ₁₁Fu dat'ede Mi e fluku yu. Mi e yagi yu kmoto fu a gron di swari a brudu fu yu brada di yu kiri. ₁₂Te yu o wroko a gron a no sa gi yu noti moro. Yu o waka lontu na grontapu leki wan man di no abi tanpe. Yu o gersi wan loweman.” ₁₃Ne Kain piki MASRA taki: “A strafu hebi moro leki san mi man tyari. ₁₄Tye, Yu e yagi mi gwe tide fu a gron èn Yu no sa luku mi moro. Mi sa waka lontu na grontapu leki wan man di no abi tanpe. Mi o gersi wan loweman. Ala sma di miti mi o wan kiri mi.” ₁₅Ma MASRA taigi en taki: “Kwet'kweti. A sma di kiri Kain, sa butu seibi tron.” Dan MASRA poti wan marki gi Kain, taki no wan sma di miti en ben o kiri en. ₁₆So Kain prati nanga MASRA. A go libi ini a kondre Nod, di ben de na oostsei fu Eden.

₁₇Dan Kain sribi nanga en uma. A uma hori bere, dan a kisi Henok. A pisten dati Kain ben e bow wan foto, dan a gi a foto a nen fu en manpikin Henok. ₁₈Henok ben de a p'pa fu Irad, èn Irad ben de a p'pa fu Mekuyael. Mekuyael ben de a p'pa fu Metusael èn Metusael ben de a p'pa fu Lamek. ₁₉Lamek ben teki tu uma. A wan ben nen Ada, a trawan ben nen Sila. ₂₀Ada kisi Yabal. Yabal ben de a fosi sma di go libi na ini tenti èn di ben e kweki meti. ₂₁En brada ben nen Yubal. Yubal ben de a fosi sma di prei gitara èn di ben e bro froiti. ₂₂Sila kisi wan manpikin tu di a kari Tubal-Kain. A ben e du a wroko fu wan smeti. En ben de a fosi sma di ben e wroko kopro nanga isri. En sisa ben nen Naama. ₂₃Lamek ben taigi den uma fu en taki:

₂₅Adam ben didon baka nanga en uma. Dan a uma kisi wan manpikin di a kari Set. A taki: “Gado gi mi wan tra manpikin na a presi fu Abel, di Kain kiri.” ₂₆Set srefi kisi wan manpikin. A kari en Enos. A ten dati den sma bigin kari a nen fu MASRA te den ben e anbegi.

₁Disi na den bakapikin fu Adam.

A dei di Gado meki libisma, A meki den fu den gersi en. ₂A meki den leki man nanga uma. Dan Gado blesi den èn a kari den: libisma.

₃Di Adam ben de wan hondro nanga dritenti yari na grontapu, a tron p'pa fu wan manpikin di ben gersi en. A ben de neleki en. Dan Adam kari en Set. ₄Adam libi ete aiti hondro yari baka di a tron p'pa fu Set, èn a kisi moro manpikin nanga umapikin. ₅Ala nanga ala Adam libi neigi hondro nanga dritenti yari, dan a dede.

₆Di Set ben abi wan hondro nanga feifi yari, a tron p'pa fu wan manpikin di a kari Enos. ₇Set libi ete aiti hondro nanga seibi yari baka di a tron p'pa fu Enos èn a kisi moro manpikin nanga umapikin. ₈Ala nanga ala Set libi neigi hondro nanga twarfu yari, dan a dede.

₉Di Enos ben abi neigitenti yari, a tron p'pa fu Kenan. ₁₀Enos libi ete aiti hondro nanga tin-na-feifi yari baka di a tron p'pa fu Kenan èn a kisi moro manpikin nanga umapikin. ₁₁Ala nanga ala Enos libi neigi hondro nanga feifi yari, dan a dede.

₁₂Di Kenan ben abi seibitenti yari, a tron p'pa fu Mahalalel. ₁₃Kenan libi ete aiti hondro nanga fotenti yari baka di a tron p'pa fu Mahalalel èn a kisi moro manpikin nanga umapikin. ₁₄Ala nanga ala Kenan libi neigi hondro nanga tin yari, dan a dede.

₁₅Di Mahalalel ben abi siksitenti-na-feifi yari, a tron p'pa fu Yered. ₁₆Mahalalel libi ete aiti hondro nanga dritenti yari baka di a tron p'pa fu Yered èn a kisi moro manpikin nanga umapikin. ₁₇Ala nanga ala Mahalalel libi aiti hondro neigitenti-na-feifi yari, dan a dede.

₁₈Di Yered ben abi wan hondro siksitenti-na-tu yari, a tron p'pa fu Henok. ₁₉Yered libi ete aiti hondro yari baka di a tron p'pa fu Henok èn a kisi moro manpikin nanga umapikin. ₂₀Ala nanga ala Yered libi neigi hondro siksitenti-na-tu yari, dan a dede.

₂₁Di Henok ben abi siksitenti-na-feifi yari, a tron p'pa fu Metuselak. ₂₂Henok ben e libi bun nanga Gado. A libi ete dri hondro yari baka di a kisi Metusalek èn a kisi moro manpikin nanga umapikin. ₂₃Ala nanga ala Henok libi dri hondro siksitenti-na-feifi yari. ₂₄A ben e libi bun nanga Gado, ma wan dei a no ben de fu si moro bika Gado ben teki en tyari gwe.

₂₅Di Metuselak ben abi wan hondro aititenti-na-seibi yari, a tron p'pa fu Lamek. ₂₆Metuselak libi ete seibi hondro aititenti-na-tu yari, baka di a tron p'pa fu Lamek èn a kisi moro manpikin nanga umapikin. ₂₇Ala nanga ala, Metuselak libi neigi hondro siksitenti-na-neigi yari dan a dede.

₂₈Di Lamek ben abi wan hondro aititenti-na-tu yari, a tron p'pa fu wan manpikin, ₂₉di a gi a nen fu Noa. A taki: “A disi sa trowstu wi fu a hebi wroko di unu e du tapu a gron disi, di MASRA fluku.” ₃₀Lamek libi ete feifi hondro neigitenti-na-feifi yari, baka di a tron p'pa fu Noa èn a kisi moro manpikin nanga umapikin. ₃₁Ala nanga ala Lamek libi seibi hondro seibitenti-na-seibi yari, dan a dede.

₃₂Di Noa ben abi feifi hondro yari, a ben de p'pa fu Sem, Ham nanga Yafet.

₁Libisma ben e kon furu moro nanga moro na grontapu èn den ben e kisi umapikin. ₂Dan den manpikin fu Gado si taki den umapikin fu den libisma ben moi, so den teki den leki uma. Den teki sortu wan den ben wani. ₃Ne MASRA taki: “A libibro fu mi no sa tan fu têgo moro na ini libisma. Den sa dede wan leisi. Den no sa kon moro owru leki wan hondro nanga tutenti yari.” ₄A pisten dati langa tranga man ben de na grontapu èn srefi baka a ten dati den ben de ete. Dati ben de den pikin di den manpikin fu Gado ben kisi nanga den umapikin fu den libisma. Den ben de tranga man nanga bigi nen ini a ten di de na wi baka.

₅Dan MASRA si taki a ogri fu libisma na grontapu ben furu. Ala sani san den ben e prakseri ben de soso ogri. ₆Fu dat'ede MASRA ben sari taki a meki libisma poti na grontapu. A ben hati en fu tru. ₇Ne MASRA taki: “Mi sa figi libisma puru fu grontapu. No den libisma wawan, ma den meti di den e kweki tu, den meti di e kroipi na gron nanga den fowru di e frei na loktu. Bika Mi e sari taki Mi meki den.” ₈Ma MASRA ben abi prisiri nanga Noa.

₉Disi na a tori fu Noa nanga den bakapikin fu en. Noa ben de wan man di ben bun ini Gado ai na mindri den sma fu en ten. Fowtu no ben de fu feni na en, èn a ben e libi bun nanga Gado. ₁₀Noa ben abi dri manpikin: Sem, Ham nanga Yafet.

₁₁Gado ben si fa grontapu ben kon pori. A ben furu nanga kruktudu. ₁₂Dan Gado luku grontapu. Èn fu tru a ben pori srefsrefi. No wan libisma ben e libi leki fa a ben musu libi. ₁₃Ne Gado taigi Noa taki: “Mi teki a besroiti fu tyari wan kba kon na ala sani di e libi. Bika na fu den ede grontapu kon lai nanga kruktudu. Fu dat'ede mi o figi den nanga grontapu puru na pasi. ₁₄Meki wan boto gi yusrefi fu gofer-udu nanga difrenti pikinpikin kamra na ini. Dan yu mus tara en fu inisei nanga fu dorosei. ₁₅Disi na a fasi fa yu mus meki en. A mus langa sowan wan hondro nanga feifitenti meter, a mus bradi tutenti-na-feifi meter èn a mus hei sowan tin-na-feifi meter. ₁₆Yu mus meki wan daki fu wan afu meter go na loktu. Na a seibere fu a boto yu mus meki wan doro. Èn a boto mus abi tu pisi go na loktu. ₁₇Arki, Mi o meki wan frudu kon abra grontapu fu kiri ala sani di e libi, ala sani di abi wan libibro. Ala sani di de na grontapu o dede. ₁₈Ma Mi sa meki wan ferbontu nanga yu. Yu sa go ini a boto. Yu nanga yu wefi, den manpikin fu yu nanga den wefi fu den. ₁₉Fu ala meti di e libi yu mus tyari tu fu den go ini a boto, fu den kan tan na libi nanga yu. A mus de wan manwan nanga wan umawan. ₂₀Fu den difrenti sortu fowru, den difrenti meti di yu kan kweki nanga den difrenti meti di e kroipi na gron, tu fu den sa kon na yu fu tan na libi. ₂₁Yu mus teki ala sortu nyansani tu, fu yu nanga den kan abi nofo nyanyan.” ₂₂Dan Noa du ala sani leki fa Gado ben taigi en fu du.

₁Yesus gebore ini a foto Betlehem na ini Yudea. Ini a ten dati kownu Herodes ben de na makti ini Israel. Ini a srefi pisten dati koniman di ben libi na a sei pe son e opo, kon na Yerusalem. ₂Dan den aksi den sma taki: “Pe a Kownu fu den Dyusma de di gebore? Bika wi si wan spesrutu stari na a sei pe son e opo di e sori taki A gebore. Dat' meki wi kon fu anbegi En.” ₃Kownu Herodes skreki di a yere a sani dati. Ala den sma fu Yerusalem skreki tu. ₄Dan Herodes meki ala den prenspari priester nanga den sabiman fu Gado wèt kon makandra. Dan a aksi den pe a Mesias ben o gebore. ₅Den man taigi en taki: “Ini Betlehem na ini Yudea. Bika a profeiti ben skrifi taki: ₆Betlehem ini Yudea, yu na wan fu den moro prenspari foto mindri den foto fu Yuda, bika na ini yu a fesiman sa kmoto di sa tiri Mi pipel Israel.” ₇Dan Herodes seni kari den koniman tapu wan kibri fasi, fu aksi den fin'fini oten den si a stari fu a fosi leisi. ₈Baka dati a taigi den taki: “Un go suku a pikin alasei fu Betlehem. Te un feni en, un mus kon taigi mi wantron, bika mi wani go fu anbegi En tu.” _9-10Di den koniman arki san Herodes taki, den gwe. Ne den si a stari baka di den ben si na a sei pe son e opo. Den man ben prisiri srefsrefi di den si a stari. Ne a stari go na den fesi te kon miti a presi pe a pikin ben de. ₁₁Di den go ini a oso, den si a pikin nanga en m'ma Maria. Ne den fadon tapu den kindi èn den anbegi a pikin. Dan den puru den diri sani di den ben tyari gi a pikin kon na doro: gowtu, wierook, nanga mirre. ₁₂Ma Gado warskow den man ini wan dren fu no drai go moro na Herodes. So den teki wan tra pasi drai go baka na den kondre.

₁₃Di den koniman gwe, ne wan engel fu Masra sori ensrefi na Yosef ini wan dren. A engel taki: “Opo, teki a pikin nanga en m'ma, dan un lowe go na Egipte. Un mus tan drape te leki mi sa taigi unu taki un kan drai kon baka. Bika Herodes sa meki den suku a pikin fu kiri en.” ₁₄So Yosef opo, a teki a pikin nanga en m'ma, dan a srefi neti dati den teki pasi go na Egipte. ₁₅Den tan drape te leki Herodes dede. Dan na so a sani san Masra ben meki a profeiti taki kon tru. A ben taki: “Fu Egipte Mi kari Mi Manpikin.”

₁₆Ma di Herodes kon ferstan taki den koniman hori en na spotu, en ati teki faya. Dat' meki a seni srudati fu kiri ala pikin boi te nanga tu yari na ini Betlehem nanga a heri kontren drape. Bika di a aksi den, den koniman ben taigi en taki na sowan pisten kba di den ben si a stari. ₁₇Di Herodes kiri den pikin, a sani san a profeiti Yeremia ben taki kon tru. A ben taki: ₁₈“Furu krei nanga dyeme de fu yere ini Rama. Na Rachel e krei fu en pikin ede. A no wani fu sma trowstu en, bika den pikin no de moro.”

₁₉Baka di Herodes dede, ne wan engel fu Masra kon sori ensrefi na Yosef na ini wan dren di a ben de ini Egipte ete. ₂₀A engel taki: “Opo, teki a pikin nanga en m'ma, dan un drai go baka na Israel. Bika den sma dede di ben wani kiri a pikin.” ₂₁So Yosef opo, a teki a pikin nanga en m'ma, dan den go na Israel. ₂₂Ma di Yosef yere taki Arkelaus ben tron kownu fu Yudea na a presi fu en p'pa Herodes, a kon frede fu go drape. Dan fu di Gado warskow en na ini wan dren, a go na Galilea. ₂₃Di den doro drape, den go libi ini wan foto di den e kari Nasaret. Na so a sani san den profeiti ben taki kon tru. Den ben taki: “Den o kari En wan Nasaretsma.”