Dag 3 van 365- Genesis 7-9 en Matteüs 3

₁Dan MASRA taigi Noa taki: “Go ini a boto, yu nanga den ososma fu yu. Bika Mi si taki yu na a enkri bun sma na mindri fu ala tra sma. ₂Fu ala meti di libisma kan nyan èn di den kan tyari leki ofrandi gi Gado, yu mus teki seibi manwan nanga seibi umawan. Fu ala meti di libisma no man nyan èn di den no man gi Gado leki ofrandi, yu mus teki wan manwan nanga wan umawan nomo. ₃Fu den fowru di e frei na loktu yu mus teki seibi manwan nanga seibi umawan. Yu mus du dati fu den no dede kmoto na grontapu ma fu den kan furu grontapu baka. ₄Bika abra seibi dei Mi o meki alen fadon na grontapu fotenti dei nanga fotenti neti langa. Ala sani san Mi meki Mi sa figi puru fu grontapu.” ₅Dan Noa du ala sani san MASRA ben komanderi en fu du.

₆Noa ben abi siksi hondro yari di a bigi frudu kon na grontapu. ₇Dan Noa, a wefi fu en, den manpikin fu en nanga den wefi fu den go ini a boto, fu a frudu ede. ₈Den meti di libisma ben kan nyan èn di den ben kan tyari leki ofrandi gi Gado, den meti di libisma no ben kan nyan èn di den no ben kan gi Gado leki ofrandi, ben go nanga Noa ini a boto makandra nanga den fowru nanga den meti di e kroipi na gron. ₉Den ben e kon tu na tu na Noa ini a boto, wan manwan nanga wan umawan, leki fa Gado ben taigi Noa fu du. ₁₀Baka seibi dei a bigi frudu ben kon na grontapu. ₁₁Noa ben abi siksi hondro yari di ala a watra di ben de dipi na ondro grontapu broko kon na loktu èn den sroisi fu heimel lusu den watra. Disi psa tapu a di fu tin-na-seibi dei fu a di fu tu mun. ₁₂Fotenti dei nanga fotenti neti langa alen ben fadon bun hebi na grontapu. ₁₃Ma a srefi dei dati Noa go ini a boto nanga Sem, Ham nanga Yafet, den manpikin fu en. A frow fu Noa ben go tu, nanga den frow fu den manpikin fu Noa. ₁₄Den krasi meti, den meti di sma e kweki, den meti di e kroipi na gron, ala sortu fowru nanga ala sani san abi frei, ben go makandra nanga den tu. ₁₅Fu ala meti di ben e libi, tu na tu ben kon na Noa ini a boto. ₁₆Wan manwan nanga wan umawan ben kon, leki fa Gado ben komanderi en fu du. Dan MASRA tapu a doro na Noa baka.

₁₇Fotenti dei nanga fotenti neti a bigi frudu ben de na grontapu. A watra ben e kon furu, te leki a boto ben lusu kmoto na gron èn a ben de hei na loktu tapu a watra. ₁₈A watra ben e kon furu moro nanga moro, te leki a boto ben e dribi tapu a watra. ₁₉A watra ben kon so furu taki a ben tapu ala den hei bergi na grontapu. ₂₀Te fu kba a watra ben hei seibi meter psa den bergi. ₂₁Ala sani san ben libi èn beweigi na grontapu dede. Den fowru, den meti di yu kan kweki, den krasi meti, ala tra sortu meti nanga ala libisma. ₂₂Ala sani san ben e libi na drei gron di ben abi a libibro na ini den, dede. ₂₃Na so ala libi sani ben figi kmoto fu grontapu. Libisma, meti di yu kan kweki, meti di e kroipi nanga den fowru di e frei na loktu. Noa wawan ben tan na libi nanga den wan di ben de nanga en ini a boto. ₂₄Wan hondro nanga feifitenti dei langa a watra ben tapu ala sani na grontapu.

₁Ma Gado no ben fergiti Noa nanga ala den krasi meti, nanga den meti di yu man kweki di ben de nanga en ini a boto. Dat' meki Gado meki wan winti wai psa abra grontapu, dan a watra bigin saka. ₂Den peti di ben e hori a watra fu grontapu nanga den sroisi fu heimel tapu èn a alen ben tapu fu fadon. ₃Safrisafri a watra ben e bigin hari gwe. Baka wan hondro nanga feifitenti dei a ben de fu si taki a watra ben e bigin hari gwe. ₄Tapu a di fu tin-na-seibi dei fu a di fu seibi mun, a boto tan fasi tapu Araratbergi. ₅A watra ben e tan hari gwe safrisafri te leki a di fu tin mun. Tapu a fosi dei fu a di fu tin mun den moro hei pisi fu den bergi ben de fu si.

₆Baka fotenti dei Noa opo a fensre di a ben meki ini a boto, ₇dan a lusu wan blaka fowru. A fowru ben e frei go frei kon, te leki a gron ben kon drei. ₈Baka dati a lusu wan doifi fu si efu a watra ben saka gwe kba. ₉Ma a doifi no ben man feni wan presi fu saka sidon fu di ala presi ben de ondro watra ete. So a drai go baka na a boto. Ne Noa langa en anu teki en kon baka ini a boto. ₁₀Noa wakti seibi dei, dan a lusu a doifi baka. ₁₁Di neti bigin fadon a doifi drai kon na en nanga wan yongu oleifblad na ini en mofo. So Noa ben kon sabi taki a watra ben saka gwe kba. ₁₂Noa wakti ete seibi dei dan a lusu a doifi baka. Ma disi leisi a doifi no drai kon moro. ₁₃Tapu a fosi dei fu a fosi mun, ini a yari di Noa ben o tapu siksi hondro nanga wan yari, ala a watra ben saka gwe. Dan Noa skoifi a daki fu a boto puru èn a si taki a gron ben drei. ₁₄Ini a di fu tu mun, tapu a di fu tutenti-na-seibi dei, heri grontapu ben drei baka.

₁₅Dan Gado taigi Noa taki: ₁₆“Kmoto ini a boto. Yu nanga yu frow, den manpikin fu yu nanga den frow fu den. ₁₇Meki ala den meti di ben de nanga yu kon na dorosei. Den fowru, den meti di yu man kweki nanga den meti di e kroipi na gron. Den mus meki furu pikin èn den mus furu grontapu.” ₁₈Dan Noa go na dorosei. En nanga en frow, den manpikin fu en nanga den frow fu den. ₁₉Ala den meti kmoto ini a boto tu. Den krasi meti, den meti di e kroipi na gron nanga den fowru. Alamala ini den eigi grupu.

₂₀Noa bow wan altari gi MASRA dan a bron meti nanga den fowru di libisma ben kan nyan leki ofrandi tapu a altari. ₂₁Di MASRA smeri a switi smeri fu a ofrandi a taki: “Noiti moro Mi sa fluku grontapu fu libisma ede, bika a ati fu libisma takru. Leki wan pikin srefi, den prakseri fu en takru kba. Noiti moro Mi sa kiri ala sani di e libi, leki fa Mi du. ₂₂Solanga grontapu de, a ten fu sai nanga a ten fu koti, a kowruten nanga a waranten, a dreiten nanga alenten èn a dei nanga neti no sa kba.”

₁Dan Gado blesi Noa nanga de manpikin fu en. A taigi den taki: “Un meki furu pikin. Meki den furu grontapu. ₂Ala meti sa frede en skreki gi unu. Den meti na grontapu, den fowru di e frei na loktu, den meti di e kroipi na gron nanga den fisi ini a se. Den sa de ini un makti. ₃Now un kan nyan ala meti di e libi èn di e beweigi neleki fa Mi ben gi unu a grun wiwiri fu nyan. ₄Ma yu no mus nyan meti di abi brudu ete na ini. Bika a libi de ini a brudu. ₅Mi sa aksi frantwortu na a sma di meki wan trawan brudu lon. Efu wan meti srefi meki wan sma brudu lon a o abi fu frantwortu en, noso te wan sma meki wan trawan brudu lon. ₆Efu wan sma meki wan tra sma brudu lon, wan trawan o meki a brudu fu a sma dati lon baka. Bika Gado meki libisma, fu de leki en. ₇Ma un mus meki furu pikin. Meki den furu grontapu.”

₈Dan Gado taigi Noa nanga den manpikin fu en taki: ₉“Arki, Mi o meki wan ferbontu nanga yu, nanga ala den bakapikin fu yu, ₁₀èn nanga ala den meti di ben de nanga yu ini a boto. Den fowru, den meti di yu man kweki nanga den krasi meti. ₁₁Mi e meki wan ferbontu nanga yu taki noiti moro Mi sa meki wan bigi frudu kiri ala sani di e libi, èn taki noiti moro wan bigi frudu sa kon fu kiri ala sani na grontapu.” ₁₂Gado taigi en moro fara taki: “Nanga disi Mi o stampu a ferbontu san Mi meki nanga yu, nanga ala libisani èn nanga ala den bakapikin fu yu. ₁₃Mi o poti mi bo na ini den wolku. So Mi o stampu a ferbontu di Mi meki nanga grontapu. ₁₄Ala leisi te Mi meki den wolku kon na wan abra grontapu èn a bo de fu si na ini den wolku, ₁₅Mi sa memre a ferbontu di Mi ben meki nanga yu èn nanga ala libisani. Dan a watra no sa tron wan bigi frudu baka fu kiri ala sani di e libi. ₁₆Te a bo de na ini den wolku, Mi sa si en, dan Mi sa memre a têgo ferbontu fu Gado nanga ala libi sani na grontapu.” ₁₇Dan Gado taigi Noa taki: “Na so Mi e stampu a ferbontu di Mi meki nanga yu èn nanga ala libi sani na grontapu.”

₁₈Den manpikin fu Noa di ben kmoto nanga en ini a boto ben de Sem, Ham nanga Yafet. Ham ben de a p'pa fu Kanaan. ₁₉Disi ben de den dri manpikin fu Noa. Na den bakapikin fu den furu heri grontapu.

₂₀Noa ben de wan man di e prani gron èn a bigin prani droifi fu meki win. ₂₁Wan dei Noa dringi fu a win, a kon drungu, dan a puru en krosi ini en tenti. ₂₂Ham, a p'pa fu Kanaan, si en p'pa sondro krosi dan a go ferteri den tu brada fu en di ben de na dorosei. ₂₃Ne Sem nanga Yafet teki wan langa dyakti, den bradi en abra den skowru dan den waka nanga baka go tapu den p'pa skin. Den ben drai den fesi fu den no si den p'pa sondro krosi. ₂₄Di Noa kisi ensrefi, a kisi fu yere san a moro yongu manpikin fu en ben du nanga en. ₂₅Ne a taki:

₂₈Noa libi ete dri hondro nanga feifitenti yari baka a frudu. ₂₉Ala nanga ala Noa libi neigi hondro nanga feifitenti yari, dan a dede.

₁Someni yari na baka, Yohanes a Dopuman bigin preiki ini a dreisabana fu Yudea. ₂A taigi den sma taki: “Un drai un libi, bika her'esi Gado o bigin tiri libisma.” ₃A profeiti Yesaya ben taki fu Yohanes di a taki: “Wan sma e bari wroko ini a dreisabana taki: ‘Meki pasi klari gi Masra, puru ala boktuboktu gi En.’ ” ₄Yohanes ben e weri krosi di meki fu kameel-wiwiri, èn a ben e tai wan leribuba na en bere. A ben e nyan sprenka nanga bus'oni. ₅Dan den sma fu Yerusalem, nanga den sma fu heri Yudea, sosrefi den sma fu a heri kontren na a Yordanliba, hari go na Yohanes. ₆Dan a dopu den ini a Yordanliba te den ben taki sortu sondu den du.

₇Furu fu den Fariseiman nanga Saduseiman kon na Yohanes fu teki dopu tu. Ma di a si den, a taigi den taki: “Un sneki unu! Suma gi un wan pingi fu lon gi a strafu fu Gado di de fu kon? ₈Efu trutru un drai un libi, meki a de fu si dan. ₉Un no mus prakseri taki un kan taigi unsrefi taki: ‘Wi na bakapikin fu Abraham.’ Bika mi e taigi un taki: Gado kan meki den ston disi tron bakapikin fu Abraham. ₁₀A aksi de klar'klari kba na den rutu fu den bon. Ibri bon di no e gi bun froktu den o kapu puru èn fringi go ini a faya. ₁₁Mi e dopu unu nanga watra leki wan marki taki un drai un libi. Ma a Wan di e kon na mi baka abi makti moro mi. Mi no warti srefi fu tyari En susu gi En fu A weri. Na En o dopu unu nanga a Santa Yeye èn nanga faya. ₁₂A hori En wrokosani na ini En anu fu wai a buba puru ini a graan. A graan A o poti na ini maksin, ma den buba A o bron na ini faya di no man dede.”

₁₃Yesus kmoto fu Galilea go na Yohanes na a Yordanliba, fu Yohanes dopu En. ₁₄Ma Yohanes no ben wani dopu En. A taigi En taki: “Fa Yu kan kon na mi fu mi dopu Yu? Na Yu mus dopu mi!” ₁₅Ma Yesus piki en taki: “Yu kan dopu Mi, bika a fiti fu un du ala sani soleki fa Gado wani.” Dan Yohanes dopu Yesus. ₁₆Fa Yesus dopu, A kmoto wantron na ini a watra. Ne heimel opo, èn Yohanes si fa a Yeye fu Gado saka leki wan doifi kon tapu Yesus. ₁₇Dan wan sten kmoto fu heimel taki: “Disi na Mi Manpikin di Mi lobi. Mi abi prisiri nanga En.”