Dag 4 van 365- Genesis 10-12 en Matteüs 4

₁Sem, Ham nanga Yafet, den manpikin fu Noa, ben kisi pikin baka a bigi frudu. Disi na den bakapikin fu den.

₂Yafet ben de p'pa fu Gomer, Magog, Madai, Yawan, Tubal, Mesek nanga Tiras. ₃Gomer ben de p'pa fu Askenas, Rifat nanga Togarma. ₄Yawan ben de a p'pa fu Elisa nanga Tarsis. Den sma fu Kitim nanga den di fu Dodan ben de bakapikin fu Yawan tu. ₅Den na den afo fu den folku di e libi na sekanti. Den folku ben prati ini difrenti kondre nanga ini difrenti famiri nanga den eigi tongo.

₆Ham ben de a p'pa fu Kus, Misraim, Put nanga Kanaan. ₇Kus ben de a p'pa fu Seba, Hawila, Sabta, Rama nanga Sabteka. Rama ben de a p'pa fu Seba nanga Dedan. ₈Kus ben de a p'pa tu fu Nimrod. Nimrod ben de a fosi bigi fetiman na grontapu. ₉MASRA srefi ben e si en leki wan bigi ontiman. Fu dat'ede sma e taki: “Yu na wan bigi ontiman leki fa MASRA srefi ben e si Nimrod.” ₁₀Den fosi foto pe a ben de na makti leki kownu ben de Babel, Erek, Akad nanga Kalne ini a kondre Sinear. ₁₁Dan a hari kmoto fu drape go na Asur. Drape a bow Nineve, Rekobot-ir, Kalak ₁₂nanga a bigi foto Resen di ben didon mindri Nineve nanga Kalak. ₁₃Den bakapikin fu Misraim ben de sma fu Lud, nanga den di fu Anam, Lehab, Naftuk, ₁₄Patros, Kasluk nanga Kreta. Na fu drape den Filistijnsma kmoto. ₁₅Kanaan ben de a p'pa fu Sidon nanga Het. Sidon ben de en fosi manpikin. ₁₆Ma ala den Yebusitisma, den Amoritisma, den Girgasitisma, ₁₇den Hiwitisma, den Arkitisma, den Sinitisma, ₁₈den Arwaditisma, den Semaritisma nanga den Hamatitisma ben de bakapikin fu Kanaan tu. Bakaten den difrenti Kananitisma disi ben panya go moro fara. ₁₉A kondre fu den Kananitisma ben e waka fu Sidon te go miti Gerar nanga Gasa. Moro fara a ben e waka go na Sodom, Gomora, Adma nanga Seboim te kon miti Lasa. ₂₀Disi ben de den manpikin fu Ham. Den ben e libi leki folku na ini difrenti kondre nanga ini difrenti famiri nanga den eigi tongo.

₂₁Sem, a bigi brada fu Yafet, ben abi manpikin tu. Ala den pikin fu Eber ben de bakapikin fu en. ₂₂Den manpikin fu Sem ben de Elam, Asur, Arpaksad, Lud nanga Aram. ₂₃Den manpikin fu Aram ben de Us, Gul, Geter nanga Mas. ₂₄Arpaksad ben de p'pa fu Sela. Sela ben de p'pa fu Eber. ₂₅Eber ben abi tu manpikin. A wan ben nen Peleg. Bika na ini a ten dati den sma ben e prati densrefi abra grontapu. A trawan ben nen Yoktan. ₂₆Yoktan ben de p'pa fu Almodad, Selef, Hasarmawet, Yerak, ₂₇Hadoram, Usal, Dikla ₂₈Obal, Abimael, Seba, ₂₉Ofir, Hawila nanga Yobab. Den alamala ben de bakapikin fu Yoktan. ₃₀Den ben e tan ini a kontren di ben e waka fu Mesa go te na a bergi Sefar, di de na a oostsei. ₃₁Disi na den bakapikin fu Sem. Den ben e libi leki folku na ini difrenti kondre nanga ini difrenti famiri nanga den eigi tongo.

₃₂Disi ben de den folku di ben abi den rutu na ini den famiri fu den manpikin fu Noa. Na den ben prati densrefi abra heri grontapu baka a bigi frudu.

₁Heri grontapu ben e taki a srefi tongo. ₂Ma di den sma ben hari go na a oostsei, den doro na wan opo sabana ini a kondre Sinear, dan den tan libi drape. ₃Dan den taigi makandra taki: “Yu sabi san, wi kan meki ston fu kleidoti. Wi o baka den bun dan wi o fasi den kon na wan nanga tara.” ₄Den taki tu taki: “Yu sabi san, kon meki wi bow wan foto nanga wan toren di e suku fu miti heimel. Dati sa gi wi bigi nen èn a sa meki taki wi no libi panyapanya abra heri grontapu.” ₅Dan MASRA saka kon fu luku a foto nanga a toren di den sma ben e bow. ₆Ne MASRA taki: “Luku, na wán folku èn den e taki wán tongo. Disi na a bigin wawan fu den sani di den o man du. Ala sani san den o wani fu du now, den o man du. ₇Yu sabi san, meki Wi saka go bruya a tongo fu den fu den no ferstan makandra.” ₈Na so MASRA meki den panya fu drape go abra heri grontapu èn den ben abi fu tapu a bow fu a foto. ₉Dat' meki den e kari a foto Babel. Bika na drape MASRA bruya a tongo fu ala sma na grontapu, èn na fu drape MASRA panya den abra heri grontapu.

₁₀Disi na den bakapikin fu Sem. Di Sem ben abi wan hondro yari, a tron p'pa fu Arpaksad. Disi ben de tu yari baka a bigi frudu. ₁₁Sem libi ete feifi hondro yari baka di a tron p'pa fu Arpaksad èn a kisi moro manpikin nanga umapikin.

₁₂Di Arpaksad ben abi dritenti-na-feifi yari a tron p'pa fu Sela. ₁₃Arpaksad libi ete fo hondro nanga dri yari baka di a tron p'pa fu Sela èn a kisi moro manpikin nanga umapikin.

₁₄Di Sela ben abi dritenti yari a tron p'pa fu Eber. ₁₅Sela libi ete fo hondro nanga dri yari baka di a tron p'pa fu Eber èn a kisi moro manpikin nanga umapikin.

₁₆Di Eber ben abi dritenti-na-fo yari a tron p'pa fu Peleg. ₁₇Eber libi ete fo hondro nanga dritenti yari baka di a tron p'pa fu Peleg èn a kisi moro manpikin nanga umapikin.

₁₈Di Peleg ben abi dritenti yari a tron p'pa fu Rehu. ₁₉Peleg libi ete tu hondro nanga neigi yari baka di a tron p'pa fu Rehu èn a kisi moro manpikin nanga umapikin.

₂₀Di Rehu ben abi dritenti-na-tu yari a tron p'pa fu Serug. ₂₁Rehu libi ete tu hondro nanga seibi yari baka di a tron p'pa fu Serug èn a kisi moro manpikin nanga umapikin.

₂₂Di Serug ben abi dritenti yari a tron p'pa fu Nakor. ₂₃Serug libi ete tu hondro yari baka di a tron p'pa fu Nakor èn kisi moro manpikin nanga umapikin.

₂₄Di Nakor ben abi tutenti-na-neigi yari a tron p'pa fu Terak. ₂₅Nakor libi ete wan hondro nanga tin-na-neigi yari baka di a tron p'pa fu Terak èn a kisi moro manpikin nanga umapikin.

₂₆Di Terak ben abi seibitenti yari a tron p'pa fu Abram, Nakor nanga Haran.

₂₇Disi na den bakapikin fu Terak. Terak tron p'pa fu Abram, Nakor nanga Haran. Haran tron p'pa fu Lot. ₂₈Terak, a p'pa fu Haran, ben de na libi ete di Haran dede. A dede ini a foto Ur fu den Kaldeasma, pe a ben gebore. ₂₉Dan Abram nanga Nakor teki wefi fu libi. A frow fu Abram ben nen Sarai èn a di fu Nakor ben nen Milka. Milka ben de wan umapikin fu Haran. Haran ben de p'pa fu Milka nanga Yiska. ₃₀Sarai no ben abi pikin fu di a no ben man kisi pikin.

₃₁Dan Terak teki en manpikin Abram dan den libi a foto Ur fu den Kaldeasma fu go na a kondre Kanaan. Terak ben teki en granpikin Lot, a manpikin fu Haran, nanga Sarai, a frow fu en manpikin Abram tu fu go nanga den. Ma di den doro Haran den tan libi drape. ₃₂Terak ben tapu tu hondro nanga feifi yari, dan a dede ini a foto Haran.

₁Dan MASRA taigi Abram taki: “Libi yu kondre, libi yu famiri nanga den ososma fu yu. Go na a kondre di Mi o sori yu.

₄Dan Abram go leki fa MASRA ben taigi en. A ben abi seibitenti-na-feifi yari di a kmoto fu Haran èn a teki Lot fu go nanga en. ₅Abram ben teki en frow Sarai, en bradapikin Lot, nanga ala den srafu fu en nanga en. A teki ala gudu tu di a ben abi ini Haran. Na so den doro ini Kanaan. ₆Dan Abram waka ini a kondre te leki a doro na a bigi bon More ini a birti fu a foto Sikem. A ten dati den Kananitisma ben e libi ini a kondre. ₇Drape MASRA sori ensrefi na Abram. A taigi en taki: “Mi o gi den bakapikin fu yu a kondre disi.” Ne Abram bow wan altari drape gi MASRA, di ben sori ensrefi na en. ₈Dan Abram kmoto fu drape. A hari go na a bergi di ben de na oostsei fu Betel dan a meki en kampu drape. Betel ben de na westsei fu a kampu èn Ai ben de na oostsei. Abram bow wan altari drape tu gi MASRA, dan a anbegi MASRA. ₉Baka dati Abram hari go moro fara na a Negebsabana.

₁₀Dan wan angriten broko ini Kanaan. So Abram hari go na Egipte. A tan wan pisten drape leki wan doroseisma, fu di wan hebi angriten ben de ini a kondre. ₁₁Ma pikinso fosi den ben doro Egipte, Abram taigi en frow Sarai taki: “Arki, mi sabi taki yu na wan trutru moi frow. ₁₂Te den man fu Egipte si yu, den o taki: ‘Na en abi a frow.’ Dan den o kiri mi, ma yu den o meki tan na libi. ₁₃Dat' meki yu mus taigi den taki yu na mi sisa. Dan fu yu ede sani sa go bun nanga mi èn den sa meki mi tan na libi.” ₁₄Di Abram doro na ini Egipte, den man fu Egipte si taki en frow ben moi fu tru. ₁₅Den kapten fu Farao srefi taigi Farao o moi a frow ben de. Dan den seni teki en tyari go na a oso fu Farao. ₁₆Farao ben e sorgu bun gi Abram. Fu Sarai ede Abram ben kisi skapu, kaw, buriki, man nanga umasrafu, uma buriki nanga kameel.

₁₇Ma MASRA strafu Farao nanga ala sma di ben de ini en oso nanga hebi siki. A du disi fu Sarai ede, a frow fu Abram. ₁₈Ne Farao seni kari Abram dan a aksi en taki: “San yu du nanga mi? Fu sanede yu no taigi mi taki na yu frow? ₁₉Fu sanede yu taigi mi taki na yu sisa. Na fu di yu taki dati mi teki en leki mi frow. Luku yu frow dyaso, teki en dan yu kmoto na mi tapu.” ₂₀Dan Farao komanderi wantu man fu sorgu taki Abram, en frow nanga ala sani san ben abi, kmoto ini a kondre.

₁Baka dati a Santa Yeye tyari Yesus go na ini a dreisabana fu didibri tesi En. ₂Yesus tan drape fotenti dei nanga fotenti neti sondro fu nyan. Baka dati angri bigin kiri En. ₃Dan didibri go tesi Yesus. A taigi En taki: “Efu Yu na a Manpikin fu Gado, taigi den ston disi fu den tron brede.” ₄Ma Yesus piki en taki: “A skrifi taki: ‘Wan sma no sa libi fu brede wawan, ma fu ala wortu di Gado e taki.’ ” ₅Baka dati didibri tyari Yesus go na a santa foto Yerusalem, dan a poti En tnapu na a lantyi fu a daki fu a tempel. ₆A taigi En taki: “Efu Yu na a Manpikin fu Gado, trowe Yusrefi go na gron. Bika a skrifi taki: ‘Gado sa seni den engel fu En fu tyari Yu na tapu den anu, fu Yu no stotu Yu futu na wan ston.’ ” ₇Ma Yesus piki en taki: “A skrifi tu taki: ‘Yu no mus tesi Masra yu Gado.’ ” ₈Te fu kba didibri tyari Yesus go tapu wan bun hei bergi. A sori En ala den kondre fu grontapu, nanga a gudu fu den. ₉Dan a taigi En taki: “Mi sa gi Yu ala den sani dati, efu Yu fadon tapu Yu kindi fu anbegi mi.” ₁₀Ne Yesus piki en taki: “Kmoto na Mi tapu, Satan! Bika a skrifi taki: ‘Yu mus anbegi Masra yu Gado èn na En wawan yu mus dini.’ ” ₁₁So didibri gwe libi Yesus. Ne engel kon sorgu gi En.

₁₂Di Yesus yere taki den poti Yohanes a Dopuman na ini straf'oso, A go na Galilea. ₁₃A no tan ini Nasaret, ma A go libi ini Kafarnaum di ben de sei a Meer fu Galilea, ini a kontren fu den bakapikin fu Sebulon nanga Naftali. ₁₄Na so a sani san a profeiti Yesaya ben taki kon tru. ₁₅A ben taki: “Un arki, sma fu Sebulon nanga Naftali, di e libi na a pasi di e go na se, ini a kontren di de na a tra sei fu a Yordanliba, un sma fu Galilea, pe furu sma e tan di no de Dyu: ₁₆Unu di e libi na ini dungru si wan bigi faya. Unu di e libi ini a kondre pe un de fu dede, wan faya opo kon gi unu.” ₁₇Bigin fu a ten dati Yesus bigin taigi den sma taki: “Un drai un libi, bika her'esi Gado o bigin tiri libisma.”

₁₈Di Yesus ben e waka na a syoro fu a Meer fu Galilea, A si tu fis'man di ben e fisi nanga den tyasneti. Den tu man disi ben de brada. A wan ben nen Simon, di den sma ben e kari Petrus, èn a trawan ben nen Andreas. ₁₉Yesus taigi den taki: “Un kon waka nanga Mi, dan Mi o meki un tron fis'man fu libisma.” ₂₀Wantron den man poti den tyasneti na wan sei, dan den bigin waka na Yesus baka. ₂₁Di den waka pikinso moro fara, Yesus si tu tra brada, Yakobus nanga Yohanes. Den ben de ini wan boto nanga den p'pa Sebedeus e lapu den tyasneti. Dan Yesus kari den. ₂₂Wantron den libi a boto nanga den p'pa, dan den bigin waka na Yesus baka.

₂₃Yesus waka ini heri Galilea, èn A gi den sma leri ini den kerki. A ferteri den sma a bun nyunsu taki Gado o bigin tiri libisma, èn A dresi ala sortu siki di den sma ben abi. ₂₄Dan a nyunsu fu Yesus panya go te na ini heri Siria. So den tyari ala sma di ben siki tranga kon na Yesus: sma nanga ala sortu siki nanga hebi skin-ati, sma nanga takruyeye na den tapu, nanga sma di ben e kisi stoipi. Srefi sma di ben lan den ben tyari kon na Yesus. Dan Yesus meki ala den sma dati kon betre. ₂₅Bun furu sma ben e waka na Yesus baka: sma fu Galilea, sma fu Dekapolis, sma fu Yerusalem, sma fu Yudea, nanga sma fu a tra sei fu a Yordanliba.